قصص عراقية حقيقية بقلم ابو بغداد سائق التكسي

قصة

فد يوم صيف و دنيا ظهرية ... حارة الدنيا و اني ستوني ذاب الخط وراجع انام ... تمددت كدام المبردة و غطست بالنوم ... خابرني هيثم الرفش ..
جاوبته بصوت نعسان الو ها هيثم ؟؟
كال ليث عالسريع تعوف كل شي بيدك و تجيني ...
اني من كال هيج فزيت بصراحة و رئسا فتحت عيوني و صحصحت كلتله خير ؟
كال تجيني وحدك للبيت و متجيب وياك بشر ...
كلتله شبيك هيثم شصاير امك اخوتك جهالك اهلك شصاير ؟
كال تعال عالسريع ..
كمت عالسريع و طلعت رحتله .. دكيت الباب جان يطلعلي ابنه .. كلتله وين ابوك ؟
كال فوك دينتظرك .. كلتله فوك وين .. جان يكول بالسطح ..
كلتله سويلي طريق خلي اصعدلة .. سوالي طريق و صعدت ..
يم باب السطح اشو هذا ابن هيثم يدك الباب مال سطح من جوى .. كلتله شبيك دفتحها ..
كال مو ابوية ميقبل .. هيثم من ورى الباب كاله ها شتريد ؟
كال عمو ليث اجه .. جان يفتحها بس هو ورى الباب خاتل .. طبعا اني بهل الحجي مرتبك لأن شفت شي مو طبيعي ديصير ..
جان اطلع للسطح شلكيت تتوقعون ..
يعني هسة لو منا لسنة اعوفكم تتوقعون والله العظيم متصدكون ولا يخطر على بالكم شلكيت ..
لكيت هيثم بالشورت و الفانيلة و زولية مغسولة كدامة و عليها تايت و وغف .. كلتله شنو ..
جان يكول تذكر من جنا جهال و نتزحلك على الزولية من يغسلوها اهلنا ..
كلتله اي !!!!!
كال هسة ماعندي شي و طلعت الزولية داغسلها و اتذكرت ..
كلتله يعني مكعدني من نومتي و تعرف اني هم راح اطلع على باب الله العصريات و مفززني علمود تحجيلي هالكلمتين ؟
كال لا ..
كلتله شنو لعد ..
جان يكول شوف ..
اشو هذا كعد يم الحايط و حط رجليناته على الحايط ودفع روحه ..
غير متت من الضحك و راحت الضوجة من راسي و حتى الفزة نسيتها ..
كلتله لك صدك انت مخبل ههههههههه كال دباع بداعة امك و تزحلك بعد مرة بس كام على كيفه كال ظهري لزمني ههههههههههههههههههههههههههه كلتله لك صدك تحجي واني عيوني دمعت من الضحك ..
كلتله زين ليش مسوي هيج اجواء سرية و خاتل ورى الباب ..
كال بشرفك اذا جهالي يشوفوني داسوي هيج غير تروح هيبتي كبالهم .. كلتله دكوم كافي لا يطلع واحد من الجوارين بالسطح و يشوفك شيكول بله ..
كال لا ظهرية منو يطلع بالسطح ..
و كعدت يمه بس بصراحة انقهرت .. انقهرت من شفت الموقف و شريط الذكريات كله كام يرجع براسي لقطة لقطة ..
هو هم انقهر كالي لك ليث كبرنا .. كلتله اي والله هيثم كبرنا و ملحكنا نشبع من طفولتنا ..
كال ديله احنا بيها اخذلك زحليكة هههههههههههه كلتله انت هيج تشوف !
كال بابا منو ابو باجر اني لو ما ادري بيك كلبك مثل كلبي مجان خابرتك و فززتك و جبتك تلعب وياي ..
من كال تلعب وياي و روح ابوية بوقتها ردت ابجي بس ضحكت  .. و تخيلته من جان زغير و اني زغير ولابسين بجايم و جيوبنا بيها نبك .. اوف ..
و بصراحة تزحلكت اني و تراكسودي مرتين و الثالثة لزمني دمار .. كلتله لك لزمني دمار كال هسة يروح هسة يروح ..
كلتله هيثم بشرفك اذا هسة احد يشوفنا شيكول ؟
كال مدام ممأذين احد و مدام ممسوين شي غلط شيكولون خلي يكولون بس الافضل تكون السالفة سرية هههههههههههه لان الناس بيتين بله و هسة اقل ما بيها يطلعون دعاية علينا و يكولون تخبلو ليث وهيثم ..
ضحكت بذاك اليوم هواي و صدك شكرت هيثم على هاي السالفة لان شمهما يكون رجعني ولو دقايق لأيام طفولتي الي مشت بيا بسرعة مثل ما مشت بيكم بسرعة ..
والله العظيم من كتبت هالقصة ردت اوصل بيها فكرة ولو تكون مجنونة او البعض منكم راح يكول مترهم بعد كبرنا ..
لا تخجلون اذا لعبتو لعبة طفولية و لا تستحون اذا سويتو شي قديم كلش و رجعتو عدتو ..
ما بيها شي اذا فريتو مصرع .. ولا بيها شي اذا لزمتو دعبله و لعبتو طنب .. والله العظيم ما بيها شي ..
صح كبرنا بالعمر بس كلوبنا بعدها كلوب ذيج الاطفال الي كاعدين بالركن و منتظرين صديقهم يدبر طباشير حتى يرسم دائرة مال طنب و ينصبون دعابلهم و يلعبون ..
ليش اخجل من مشاعر نظيفة و ما بيها اي حقد او كره ..
مشاعر ترجعني صغير ولو لدقائق معدودات ..
انتهى
ملاحظة : ما انصحكم تجربون هاي اللعبة مال زولية هههههههههه لان كبل الظهر و الرجل تتشنج ..
اخوكم ابو بغداد سايق التكسي
#ابو_بغداد
تعديل بتاريخ ٢٩/٤/٢٠٢١ هيثم توفى قبل فترة بسبب ضعف بعضلة القلب و هو مو اسمه هيثم بس اني اتفقت وياه من بديت انزل القصص اسمي هيثم بالسرد .. ترحموله