قصص عراقية حقيقية بقلم ابو بغداد سائق التكسي

حب من طرفين

بالضبط مثل الصور الي نشوفها مرات بالانترنت لو بالتلفزيون لو بالجرايد لو بالمجلات ..
الصور يغوشوها بطريقة احترافية  … كل الي ورى صاحب الصورة يتغوش و تضيع ملامحه … و يبقى بس صاحب الصورة مبين وجهه واضح …
بس الوراه مغوش و ممفهوم اصلا …
بالضبط هذا الشي هو احساس من عدة احاسيس بالحب او الاعجاب .. تشوف شخص و متشوف شكو وراه .. يتغوش الوراه …
او الاصح …
عيونك متشوف غيره .. و الدنيا هاي شكبرها بناسها بحروبها بعالمها تنحصر بهل الشخص … وهذا الشي صار وياي من شفته ..
رغم بساطته اتذكر كل تفاصيل ذاك اليوم … جان شايل كتاب واحد بيده بس عبالك الكتاب يهمه اكثر من كلشي بهل الدنيا …
عيونه جانت بس عالطريق و مجان يباوع عالبنات الداير مدايره … يعني كليتنا كلية طلابها هواي ..
و بيها بنات اكثر حتى من الولد ..هو مركز بطريقة و مهامة الي ديصير داير مدايره من هوسة …
و اني هم من شفته الهوسة الوراه كلها مشفتها .. عبالك الصوت صار صامت فجاءة .. و صوت الخطوات مالتهم كلها راحت بقت بس صوت خطواته … دخت بي و نسيت حتى صديقتي الي بصفي شجانت تحجي .. وراها من صار بعيد رجع كلشي طبيعي و رجع الصوت الداير مدايري ينسمع .. سمعتها دتكلي صفا صفا شتكولين هسه ؟
كلتلها شنو شكو شبيج … كالت مو داكلج عكب باجر النيشان مال همسة تروحين وياي ؟؟
كلتلها اوكي بعدين نحجي كومي خلي نروح للمحاضرة .. و رحنا بس اني تفكيري بي …
اول مرة اشوفه بيومها … و من يومها كمت ادور عليه بنص الطلاب .. شفته وراها و حاولت اصير كدامة بس ردته يشوفني ..
طبعا اني مقاصرة بالشكل و طولي حلو و لبسي هم مرتب .. بس الولد ميباوع عليا …
بالكليات هواي اكو يجون بس علمود شي واحد … يجون بس علمود الدراسة و هذولة النوعيات نصيحلهم القطار اني وصديقاتي .. لان القطار دائما عنده وجهه وحدة يطلع عليها ..
و ميكدر يطلع من السكة مالته .. ميروح يمنه يسرى لو حتى يغير مساره .. عدل يطلع للنهاية ..
و طبعا اني مراح اكول اني و صديقاتي جايين مندرس .. احنا ندرس بس بنفس الوكت هم مو غلط اذا تصير شغلة حب و زواج …
عالعموم …
الولد ميدور هالمواضيع او الي حسيت بي هيج … و مرة صدفة شفته واكف وي بنية … البنية اعرفها اني و عندي شوية ميانة وياها ..
رحت بحجة اسلم عليها حتى بس اصير قريبة منه … سلمت عالبنية و سلمت عليه هو هم … و المشكلة صوته … صوته طلع يخبل … اخاف جنت دايخه بي علمود شخصيته صوته طلع راهم كلش وي ستايله …
البنية عرفتني عليه .. عرفت اسمه … و حاولت اختلق موضوع عالدراسة حتى بس اطول وكفتي وياهم ثنينهم … هو عافنه و راح … كال عندي شي لازم اراجع بي الادارة .. بس راح سالتها بطريقة غير مباشرة لصديقتي … كلتلها الولد هذا ويانه ؟؟؟
كالت يمعودة ويانا و كاتل نفسه عليا وهو ميتعيب بس اني ماريد اكسر كلبه .. كلتلها هاي شنو ؟
كالت والله هو ميتعيب بس اني احسه عبالك شايب مو شاب و بعده صغير .. كلتلها اها …
و عادي حجينا شوية و رحت اني … بس اهم شي عندي اسمه عرفته …
و ثاني يوم بالضبط شفته و سلمت عليه .. هو هم رد عليا السلام و اني وكفت يمه و سألته كلتله البارحة ان شاء الله مشت سالفتك وي الادارة .. كال اي اي الحمدلله جنت محتاج شغلة منهم و رحت و مشت .. كلتله زين و فلانه وينها مشفتها ؟
كال لا والله اني هم دورت عليها و ماكو هيه ..  ردت اطلع موضوع ثاني حتى احجي وياه كلتله متعرف ابو خط يلتزم بالوكت لان ابو الخط مالتنا مرات يتاخر علينا و من يتاخر و يجي ياخذنا …  يكوم يسوق سريع حتى بس يوصلنا عالوكت و بصراحة ممرتاحين وياه …
كال اي تامرين امر بس انتي وين بيا منطقة … كلتله بفلان منطقة كال ميخالف … بساعتها من ديحجي هو حسيت عيوني فاضحتني .. لان عيوني حاضنته حضن و متريد يروح بعيد و يبقى يحجي .. حتى لو ماكو حجي و يبقى ساكت بس اريده كبالي …
اريد احفظ شكله .. ضعت بي و من اكول ضعت ما اكذب بهل الوصف … صح عيب بنية بذاك الوكت وحتى هسه تكول اني احبك قبل ميكول الرجال هالشي ..
بس ردت و تمنيت اصيح احبك يارجال والله احبك ..  خليتها بيومها بداخلي وسكتت …
و ثاني يوم هم شفته بس هالمرة هو اجه عليا … كالي والله سألت و راح يردولي خبر هالاسبوع … و هالمرة هو بقى واكف يمي … حجى كومه مواضيع بس كلهم ربطهم بالبنية الي متريده اصلا … و اوف هالموقف شكد صعب و اني متأكدة هواي بنات لو حتى شباب حاسين بي .. من انت معجب بواحد لو تحبه و يجي يحجيلك عن انسان ثاني .. تمنيت هيج يحجي بيا اني و اتمنيت عدد المرات الي ذكر بيها اسمها يذكر بيها اسمي … تمنيت هيج يهتملي مثل مديهتم الها وهيه اصلا متريده .. و هيه ياريت لو موجوده .. اصلا هو يدور عليها و هيه تتهرب منه … و يوم ورى يوم الولد كام هو يجي عليا و يكعد يحجي و يسولف بس مثل مكلت بكل مرة يجي بيها يحجيلي عن فلانة … و اخر شي من صار بيني و بينه حجي و صرنا اصدقاء …
اجه يشتكيلي عليها .. كالي صديقتج يوميا اتعارك وياها علمود المكياج ..
و وصفلي مكياجها وصف يضحك .. كالي تخلي ملمع مال خشب مثل الثنر ههههههه ضحكت كلتله شنو ..
كال ثنر يلمع الصاج والله هيه شكلها حلو بدون مكياج ..
كلتله انت متحب المكياج ؟
كال لا احسه يضيع شكل البنية الحقيقي … كلتله زين وانته مشاكلك وياها بس علمود المكياج .. كال اني اغار عليها وهيه تختار المواضيع الي تخليني اغار و تركز بيهم عبالك تريدني بس اتعارك وياها .. كلتله انته متاكد هيه تحبك ؟ كال اي .. كلتله شلون تأكدت .. كال يعني غير هيه كالت احبك .. كلتله زين الله يسعدكم بس اني من جوى محتركة حرك .. و حتى بنفس اليوم رحتلها للبنية ..
كلتلها ترى الولد يحبج من صدك و كال انتي كايلتله احبك صدك هالشي ؟؟
كالت اي تسرعت اني بالبداية عجبتني هيبته بس اريده هسه يضوج مني حتى بس اعوفه …
لان يغار هواي و كاعد يخلي قوانين عليا و اني ابوية وامي نفسهم ميخلولي قوانين على لبسي و مكياجي وهو بعد حي الله صديق وحبيب كام يدورلي غيره هذا اذا يتزوجني باجر عكبه يمكن يحجبني و يضمني بغرفة النوم … كلتلها عوفي شكو مخليته هيج يتعلق بيج لعد ..
اذا تعرفين طريقج بطريقة مسدود شكو الولد هيج دسوين بي ترى هو فقير و ميستاهل ..
كالت وانتي عيني شكو حاركه روحج حرك هيج … اني من كالت هيج تعصبت بالزايد …
كلتلها الولد ديجي مقهور يمي و ديشكيلي عليج وانتي كاعدة تقهري ادري تورط لان حبج .. كالت والله مضربته على ايده و توسلت بي يحبني هو كتل نفسه عليا و اني بالبداية مثل مكلتلج حبيت رجولته و شخصيته بس يوم ورى يوم اكتشفت بي شغلات محلوة …
كلتلها عوفيه بابا … ميصير تخلي هيج متأمل بيج … كالت يمعوده دروحي … و عافتني و راحت …
اني هم كلت مدام هيج خلي اروح للولد اكله .. رحت و لكيته و حجيتله كلتله ترى البنية متريدك وانت دتاكل بنفسك اكل … كال انتي شدتحجين و ضاج مني ..
كلتله ياعيني متريدك البنية متريدك .. راح واجهها و صدك والله البنية كالتله طرقنا مختلفة اني وياك …
و عافته و هو بقى اسبوعين ميجي للدوام …
و راها رجع يداوم و هيه ابد مهتمت لهل الشي .. اني جنت ادور عليه بغيابه وهيه ولا عبالك …
و رجع للدوام … التقيت بي بس الولد صدك جان تعبان نفسيا من وراها …
و الاكثر تعبه من شافها تمشي وي ولد ثاني غيره …
اجاني بوكتها يدور عليا .. اني فد كيفت من شفته جاي .. و اكثر شي حبيته من كالي جنت ادور عليج .. كلبي طار من الفرحة .. بس طلع جاي علمود ياخذني لنفس الكافتريا حتى بس يخليها تشوفني وياه …
كيفت  رغم قهري كيفت رغم حصرتي الي اخذتها و طلعت من كل كلبي كيفت ..
كيفت بس لان اكون وياه …  هو بسرعة بسرعة حجى الي صار …
و جان بنيته بس يشوفها انو هو وياي و يخليها تتخيل و تغار … طلعت وياه ورحنا للكافتريا و اختار مكان ببداية الكافتريا بس همه يكدرون يشوفونا … طبعا الولد بالكعدة كلها يعتذر مني و يكلي الله يخليج لا تعتبرين هالشي محلو اعتبري مساعدة لان اني اعرف البنية شتفكر من تشوف واحد يستخدمها .. كلتله لا والله مصار شي .. و بداخلي اريد انفجر … بقينا كاعدين عشر دقايق تقريبا جان تكوم حبيبته السابقة هيه والي وياها …
هو رأسا كال خلي نروح نرجع .. كلتله لا اكعد هسه تبين اذا نكوم انته سويت هالشي بس حتى تخليها تغار … كال ها لعد شلون … كلتله عادي اكعد .. كعد هو و سكت ..
بس شكله كلش متاذي .. كلتله ممكن سوال .. كال اي تفضلي .. كلتله فلانه اول حب بحياتك ..
كال اي .. كلتله زين هسه اذا تعوف الولد الي وياها و ترجعلك تقبل ترجع وياها مثل قبل .. كال لا طبعا و الدليل اني ردتها تشوفني وياج … كلتله زين والله يعني كرامتك متقبل .. كال اشو احس مثل الكاعد تصنفين عليا … كلتله تحس انته دتحس …
كلتله كرامتك ما اذتك من تاخذ بنيه تجيبها هنا بس علمود تشوف نفسك انته رجال و تكدر تطلع من ازمتك … و تصادق و تحب …كرامتك مكالتلك هيه الي تحبك لو صدك تحبك مجان من اول اسبوع راحت وي غيرك .. كرامتك مكالتلك و مسولفتلك عن الي جنت تحبها محاولت حتى تسأل عنك من غبت كم يوم عن الدوام و اصدقائك بالقسم مكالولك فلانة كم مرة جتي تسال عنك ؟
يوميا اجي اسأل عنك و لو مو الخجل لان اني بنية و اصير علج بحلوك اصدقائك ردت حتى اسالهم عن رقم تلفونك .. لك انت مو بشر و كمت ابجي لان حسيت نفسي مثل لعبة بيد طفل مدلل ياخذني يلعب بيا و ورى عشر دقايق يمل و يذبني …
الولد انصدم من شافني هيج و حاول يسكتني و نظرته الي جان بالبداية يشوفني بيها حسيتها بعيونه تغيرت .. حسيته مهتملي بعيونه مو مثل ذيج الايام من يكعد عيونه تباوع عليا بس نظرته مابيها اي مشاعر ..
حسيته جمد كبالي و عبالك واحد ستوى ديشوفني للأول مرة و معجب بيا ..
نظرات عيونه كامت تفتر  على تفاصيل وجهي … بنص هالمشاعر الي انفجرت بوجه مد ايده و لزم ايدي و اني دابجي ..
كالي سكتي بداعة امج … سكتت و كمت طلعت رحت للبيت كبل حتى مكملت دوامي .. هو بقى بمكانه …  ثاني يوم جيت للدوام جان تجي صديقتي بقسمنا كالت اكلج فلان سال عليج مرتين البارحة تقصد عليه .. كلتلها زين …
عاد اجه هو بس شافني من بعيد ابتسم وعيونه تضحك ..
اجه و كام هو يدور مواضيع يفتحها .. اني كيفت بداخلي و كمت اسوي نفسي علساس ممركزة وياه بس اني روحي وياه مو بس عقلي .. و عرف هو كل الي ظامته عليه .. حجيتله كلشي و حتى وصفتله اول مرة شفته و شلون اني جنت ادور عليه بنص الطلبة … كيف كلش و كلتله ترى مو تشوف نفسك عليا …
كال والله غلطان اني بس هالشي الي صار شمدريني قابل اشتم ايدي ياعيني … كلتله زين يعني هسه عرفت مو …
كال ياعرفت يا دنيا انتي الي والله الي …و بقيت وياه بعلاقة ٤ سنوات حتى ورى متخرجنا و توظفنا بقينا نلتقي … و اخر شي ورى مصار عنده راتب زين و وظيفة تقدملي و تزوجنا … اني بقيت بوظيفتي و الحمدلله صار عدنا اطفال ثنين … ذاك اليوم قبل شهرين تقريبا من اليوم … اني عندي مرام الصغيرة بنتي … شوية متنام زين بذيج الفترة  … عدها تحسس بصدرها جان بس هسه الحمدلله صارت زينة …  المهم … مرام تنام يمي بالغرفة و هو ينام برى بالصالة لان عنده دوام …. بيومها اجه للغرفة كالي ها راح تنامين مو ؟
كلتله اي  .. كال اكيد ؟؟؟ كلتله اي اكيد شبيك …
كال زين اوكي وراح …
السوال جان غريب  .. اني متمدده بس عقلي كام يفتر .. سواله غريب كلش؟؟؟
يعني جان يريد يعرف مثلا راح انام … اني جتي افكار براسي كومة عاد علكيفي خليت مرام على صفحة جان اكوم افتح الباب بس علكيفي .. سمعته ديوشوش بالتلفون … تقربت هو محس بيا ..
سمعته يكلها مشتاقلج فلانة .. فلانة منووووو نفسها الي قبل جان عنده علاقة بيها قبلي …
اني بدون تفكير اكو بصف باب الغرفة بوفيه (معرض) عليها مواعين فوك ثنين كلش احبهم فيكه كلش و مطرزات بنقشه مال العهد السومري … بدون تفكير شلت واحد منهم جان اشمره عليه كل قوتي انضرب بي و وكع بالكاع اتطشر صار الف وصله …. تكسر …
و جان اصيح كلمة (…..) غلطت عليه …
هو كمز و اني ردت اضربه بالماعون الثاني جان يجي يلزم ايدي و باسني و ضحك كال جذذذذب هاج التلفون يمعودة و يضحك بس ضحك قوي ويريد بس يسكتني اني ارجف ارجف لزمت التلفون بالكوه و دست عالقائمة مال اتصال و بقيت اكلب بي صدك طلع جذاب المخبل …
كلتله ليش سويت هيج الماعون راح … ضحك قوي كال يعني مهتميتي لبنتج الي فزت من صياحج و مهتميتي ضربتيني همزين ما اجه براسي اهتميتي بس للماعون هههههه ..
كلتله ليش هيج سويت .. كال يمعودة مشتاقلج وست مرام متقبل تنام الا بحضنج زين اني وين انام هههههه ظهري انكسر من القنفة و بصراحة مداشبع منج من ورى مرض مرام ..
رأسا قشمرني لان ضجت كلش من جاب طاري اسم فلانة الي جان عنده علاقة بيها …
هو فرح بس اني انقهرت .. فرح لان شاف غيرتي عليه هيج ..
بس اني انقهرت عالماعون … الماعون كلش حلو ههههه .. المهم هو حلف بعد ميتشاقى هيج شقى ثكيل .. و هسه احنا عايشين مرتاحين بس بصراحة .. لو مصاير الصار و اني طاكة كباله بيوم الكافتريا .. جان هسه شكو قصة اقراها مال حب من طرف واحد لو فلم اشوفه يحجي على حب من طرف واحد كاعدة مكابلتهم وابجي … الحب من طرف واحد موت والله بس الحمدلله حبني بالاخير و اخذني … اني اعرف اكو بعض الناس من تسمع قصتي تكول هاي شلون صلافة عدها و هيج راحت واعترفت للولد … لان سمعت هالشي حتى من صديقة اليا .. بس شسوي حبيته .. والله لأخر لحظة متخيلت هو راح يصير رجلي وابو جهالي .. بس الحمدلله صار و يحبني حب بس الله يدري بي ….
(حب من طرفين)
انتهى
اخوكم ابو بغداد سايق التكسي
#ابوـبغداد