قصص عراقية حقيقية بقلم ابو بغداد سائق التكسي

ابو الاقساط

باب الغرفة انفتح و تقربت بخطواتها الي اصلا متنسمع ... حبيبي ابني عمري كوم صار وكت المدرسة ... اني جنت اماطل بالكعدة مالتي و اتوسل بيها اكلها بس خلي الميل يصير عالتسعة و اكوم .. (اقصد يصير الوقت ثمانية الا ربع لان دوام المدرسة بثمانية) ... تكلي زين و تروح و تسد الباب و اني ابقى جوى البطانية بس بنفس الوقت اسمع صوت (تششش) صوت البيض يتكلة بالطاوه و صوت البوري مال السنك بالمطبخ هم مفتوح ... و طبعا صوت عصافير و سيارات بالمنطقة تروح وتجي ...
بس اغفى ثواني هم ترجع تنفتح باب الغرفة و تجي .. تكول كوم وليدي صار الميل عالتسعة ... اني بكل مرة عبالي امي تخوفني حتى اكوم بسرعة و اوخر البطانية بالكوه و اباع عالساعة الي عالحايط اشوفها صدك  الميل مالتها عالتسعة و اكوم ... عيوني بالكوه افتحها و اروح للمغسلة مال حمام ... اغسل وجهي و بكل مرة بقايا الصابون يبقى بس عالصفاح مال وجهي يعني مو بالوسط بس على نهاية الخدود و تحديدا بصف الاذن .. امي خطية تجيب الخاولي تكول تعال و هيه تنشف وجهي ...
اروح اكعد بالكاع بالمطبخ و ميه بالمية الريوك كله جاهز و الخبز حار محميته عالطباخ ... اكل شوية لان اصلا ما اشتهي ... وهيه جانت بكل يوم تتوسل و ابد متمل من هالشي و تكلي اشرب هاذا و اكل هاللفة ... حتى مرات جانت هيه تسويلي لكم لكم و تخليهم بحلكي ... الوقت بسرعة يمشي بس الحلو مدرستي قريبة من البيت ... اكل بسرعة و اكوم و هيه تكوم وياي و تشيل جنطتي الي بيها لفتين و مطارة و برتقالتين من عده الكتب و المحفظة مال اقلام و تشيل الجنطة و تلبسنياها بظهري ... تطلع وياي للطرمة و تفتح باب الحوش و تبقى تباع عليا شلون امشي و اروح للمدرسة ... مجانت امي تسد الباب الا كلش اصير بعيد ... هذا البرنامج او هاي الامور جانت تنعاد يوميا بدون تعب من امي و لا جنت اسمع منها كلمات مو حلوة و تذمر لو حتى تقصير ...
و ماريد احجي على باقي الامور لان لا قصة و لا كتاب الف ليلة و ليلة يستحمل تعب امهاتنا علينا ... امي جانت هيه الاب و العائلة كلها مالتي ... تواصلي وياها جان اكثر من ابوية ... لان ابوية جان يطلع من صباحيات الله يروح للدوام و يرجع الظهر ياكل وياخذله غفه و بعدين يشغل السيارة يطلع على باب الله (تكسي) يشتغل ...
الصبح موظف و بليل تكسي ... ابوية جان يحب امي الى درجة الجنون و امي نفس الشي تحبه هيج ...  جانو مخلصين كلش واحد للثاني ...  ابد ما شفتهم فد يوم تعاركو .. وابد ما شفتهم بيوم واحد صيح عالثاني ...  حياتنا جانت احلى ما يكون ... و بديت اكبر و خلصت ابتدائية و دخلت متوسطة .. بالمتوسطة من جنت اسمع قصص من الاصدقاء وياي و اسمع على مشاكل الناس .. اول شغلة جنت اسويها (اكول بكلبي) الحمدلله على النعمة الي اني بيها ... و مرات جنت ما اصدك من اسمع شلون واحد يضرب زوجته لو زوج يطلك زوجته .. جنت ما اصدك ...
لان اني عايش بجنة ..
جنة ابطالها ابوية و امي ..
ما فد يوم ردولي طلب و اني هم من كبرت كمت اطلب اشياء على كد امكانيتهم ... يعني كمت افتهم الدنيا شلون ماشية ... و كبرت اني ... صرت رجال و طبعا ابوية وامي كبرو هم ... داومت كلية و جنت ذكي جدا و درجاتي دائما تتقدم ... الي بالكلية كلهم يحبوني ولد و بنات .. جنت محترم و ناقل وياي تربيتي لكل مكان ... احترم الاصغر مني قبل الجبير .. وابد ما رديت واحد طلبني ...  و شوية بذيج الفترة وضعنا المادي تدهور ...لان ابوية كبر و طلع تقاعد  و التكسي كام ميجيب همه و هو هم ما بي حيل يشتغل مثل قبل ... اني بوكتها كمت اشتغل تكسي و اساعد اهلي ... و بنفس الوقت مصرف الكلية هم طالع ... حجيت للطلبة وياي اذا يريدون خط حتى اوديهم واجيبهم ..... واخذت خط طلاب و بنفس الوقت اشتغل برى بالشارع يعني تكسي ... و كمت بفلوس الخط شهريا .. ارتب السيارة و اعدلها لان هيه مصدر رزقي و رزق اهلي .. و فد اجروني شباب صغار  ... رادوني اخذهم بزفة ... شباب جانو بالعشرينات و جوى العشرينات .... اربعة ..
اخذتهم بالزفة و طلعنا ... اني جنت كلش مركز عالطريق لان سيارات هواي بالعرس و موسيقى و طبل و الي وياي يصفكون ... جانت عيوني بس عالشارع و خصوصا اكو شباب الله يسلمهم بالعرس جانت سياقتهم كلش رعنة ... يعني يدخلون يمنه و يسرى بنص السيارات وهورنات يدكون ... لذلك تركيزي جان بس عالشارع ... ما حسيت الا صار صياح قوي و واحد ضربني على جتفي ... درت راسي لكيت واحد نقص من الكاعدين ورى .. ضربت بريك ونزلت وطبعا السيارات كلها جانت واكفة ... شطلع ؟؟
واحد من الكاعدين ورى فاتح الشباك ومطلع جسمة و كاعد عالشباك و الله العظيم ما انتبهت عليه لان جان تركيزي بس عالشارع والهوسة الي دتصير .. هالواحد ماد ايده على واحد ثاني من اصدقاءة كاعد بكوستر من الكوسترات الي طالعه كروة للعرس و جانت بيها عوائل وشباب و الفرقة هم مال طبل وموسيقى ... و ذاك مجلب بيده مادري ... هذا الورى مجلب بيد ذاك و واكع من سيارتي و متكلب بالكاع و متكسر ... بس الحمدلله ما توفى بس ايده و رجليه انكسرت ... و كدمات و جروح بي من كل مكان ...
صارت هوسة واخذته بسرعة للمستشفى ... بالمستشفى جوي اخوته و اهله و ضربوني .. انوب الصوج كله صار براسي لان اني السايق ...
و صارت سالفة فصل ...
اتدخلو عشاير و صارت كعدة جبيرة و رادو فصل كلش جبير من عدنا و ابوية خاف عليا و قرر يبيع السيارة و نص البيت مالتنا ... و بعنا السيارة و نص البيت و دفعنا الفصل ... اني تعبت نفسيتي كلش بذيج الفترة و طبعا جنت احس روحي مذنب و كلشي صار بسببي .. مع العلم اهلي مصدكين كلشي و خطية ما لاموني .. بس البيت مالتنا مع الاسف انقسم نصين والسيارة راحت ... زين شسوي ؟
بطلت من الكلية و كمت اشتغل منا ومنا ...
اجوني للبيت طلاب جماعتي بنات و ولد و حتى اكو عدنا اساتذة اتصلو بيا و رادوني ارجع بس المصيبة وين ارجع ؟؟
وامي وابوية شلون ؟
و فد يوم عدنا طالبة طبعا هالطالبة اني جنت بس اشوفها بالكلية وبيني وبينها بس سلام ... اكو بنية زميلة اليا بنفس قسمي ... حاجيتلها على الي صار وياي وكايلتلها ... اني بطلت و كاعد اشتغل يوميا شغلة ... البنية مقهورة عليا و رايحة مسولفة لوالدها عليا و حاجيتله على الي صار وياي ... الرجال منقهر عليا و كايللها خلي يجي اني اساعدة بس بشرط يكمل شهادته و يرجع لدوامه لان مسكين يضيع مستقبله ... طبعا المساعدة مجانت مالية لو من هالقبيل لان هيج هيج مراح اقبل .. بس المساعدة جانت شغل ... و شغل كلش زين و راتبة يغطي احتياجيتي و احتياجات اهلي .. الشغل جان بمحل مال ادوات كهربائية كلش جبير بالعرصات الهندية ... والد البنية جان واحد من وكلاء شركة الجي بذيج الفترة ... و الله مكنهم كلش و عنده ببغداد هواي فروع بس الفرع الوحيد الي يكعد بي جان هو الي بالعرصات الهندية ...
طبعا هالحجي اجاني بيد واحد من اصدقائي الطلاب .. دزوه عليا للبيت و اني وافقت و رحت و التقيت بالرجال ... جان كلش محترم و ابد مو متكبر و ابن عائلة طيبه و حتى كلامه وياي جان كلش طبيعي ... يعني ولا عبالك هو صاحب هيج محلات و هيج عنده امكانية ... تعامل وياي على اساس كلش طيب و جان كل شوية يذكرني انت لازم تكمل شهادتك ... و قبلت و بديت اشتغل ... جان شغلي تقريبا مرتبط بالحسابات ... و يوم ورى يوم تعلمت الشغل و بديت اني اكمل شغلات للرجال و الرجل كلش جان واثق مني ... و كملت شهادتي و تخرجت ... و ردت اشتغل بالشهادة بس حسبتها حساب بذاك الوكت ... جان راتب  الدولة ابد ميقارن براتبي وي الرجال و شغلي وياه ... و اضافة لهل الشي اني تعلمت على هالشغل و تعلمت عالرجال وتعلمت على ليفل معين اعيش بي ...  و الرجال كالي ماشي ابقى بشغلك وياي .. حتى بيومها سالته سوال ...
كتله زين ليش انت من سمعت قصتي من بنتك دزيت عليا و شغلتني و بيوم الي شفتك اول مرة .... كتلي اهم شي شهادتك ؟؟؟
كال لان هالشهادة راح يجي يوم و تستفاد منها حتى لو بقيت تشتغل وياي هسه .. ولاتنسى انت لو مو دراستك جان معرفت تشتغل يمي اصلا ...
كتله ماشي و انت السبب الي خليتني اخذها .. كال  احنا واحد يكمل الثاني و مثل ما اني ساعدتك انت راح يجي يوم تساعد احد ... و بقيت اشتغل وي الرجل ... و راحت ايام و جتي ايام و الرجل قرر يصفي كلشي و يطلع يستقر بكندا يم اخته .. وقبل ميروح كالي لاعبالك راح اروح واعوفك هيج ... انت صرت مثل ابني ... و اقترح عليا اخذ محل بأي مكان ببغداد و هو يترسلياه كهربائيات عالتصريف .. يعني اني مهمتي بس اجيب محل فارغ و المحل ينترس كهربائيات ... و دبرت المحل و صدك والله الرجل عن طريق اتصالاته و معارفة الي يسدون عين الشمس و طبعا كلهم يثقون بي و بحجايته كامو ينطوني اجهزة كهربائية بكل اشكالها ... و اني هم كمت ابيع اقساط و ابيع حاضر و اموري تعدلت  الى درجة كلش كلش زينة .. بس بنفس الوقت اساعد الناس الي ياخذون مني اقساط وماعدهم يسددون .. يعني واحد يتاخر شهر و حدة تتاخر شهرين كلش عادي ... مجنت اسوي مشكلة و عادي انتظر الناس على حسب امكانيتهم ...
و تعينت بشهادتي ... و بالدوام هم توفقت و الرواتب صارت زينة كلش اخر فترة ... وكدرت اخذ قرض من الدولة و اضافة لهل الشي اني عندي فلوس مجمع و الحمدلله رجعت نص بيتنا الي بعناه بسبب الفصل القديم ...
و كلشي بالعدل و بالحلال ... يعني ما بكت فد يوم مع العلم هواي انفتحت فرص كدامي استفاد منها .. حتى بشغلي وي الرجال جنت اكدر اتلاعب بهواي امور و بضربه وحدة اخذ فلوس بيت كامل مكمل ... و حتى  بالوظيفة الي حاليا اني اشتغل بيها هم اكدر اسوي شغلات استفاد منها بس مسويت ...
وهسه ..
عايش و مرتاح و كل المنطقة تعرفني و يحبوني لان مماذي احد و لا راح ااذي ..
بس اهم شي ..
هو رضا امي و ابوية عليا لان لو مو رضاهم جان لا وصلت و لا صرت ...
واني اعرف هالرجال الله دز اليا لان ابوية و امي راضين عني رغم ما انباع نص البيت و السيارة الي معيشتنا بسببي .. مع العلم الله شاهد اني مجنت السبب بس الحمدلله يجوز جانت هالخطه كلها موجودة ومكتوبة حتى اني اوصل لهل الشي ...
و عالعموم ...
كلشي قسمة ونصيب و اذا وكعت مرة مو معناها انتهت الدنيا ..
كوم و اوكف و اكيد الله راح يدزلك ابن الحلال مثل ما الله دزلي هالرجال الي اصلا لا اعرفة و لا يعرفني و ساعدني ..
ولو مو هو ..
جان لا شهادتي اجتي ..
ولا بيتنا رجع ..
و لا حتى اني صرت هيج ..
(ابو الاقساط)
انتهى
اخوكم ابو بغداد سايق التكسي
#ابوـبغداد