قصص عراقية حقيقية بقلم ابو بغداد سائق التكسي

دائما خلو نفسكم بمكان المقابيلكم و حسو بظروفه

فد يوم بتت وي علاوينا بمستشفى الكندي .. جان عنده عملية و بقيت وياه بالمرافقة ... الحمدلله عمليته نجحت بوكتها .. و الله يستر عليكم و يبعد عنكم المرض و المستشفيات ..
الحاصل ..
بليل علاوي نام و اني طلعت ادخن بره و بعدين رجعت كعدت عالمسطبات الي بالممرات اذا شايفيها ... تعرفت على ممرضة جبيرة بالعمر بس جدا راقية و نفسها طيبة .. خطية مو شافتني كاعد و ماكو احد يمي .. و شافتني شوية اتشاقيت وياها و ضحكتها ..
كالتلي من رخصتك و راحت جابت جدرية بيها تمن و فاصوليا .. حلفتني الا اكل من طبخها .. بوقتها جنت شبعان بس مردت اخجلها و اكلت .. و بديت اسولف وياها و اتعرف عليها اكثر ...
اكو ممرضة ثانية بس مو كلش جبيرة .. يعني 40 او 42 سنة عمرها تقريبا .. يصيحولها ام غايب .. اكيد انتو تعرفون اسم ام غايب او ابو غايب بالعراق يطلقوه على الشخص الي ميصير عنده جهال ..
اني صار عندي فضول اسأل المرية الكاعدة يمي (بس اكيد بيني و بينها)
.. كلتلها خطية ميصير عدها جهال ؟
كالت لا يمة .. هاي اصلا ممتزوجة ..
كلتلها لعد ليش يصيحولها ام غايب ؟
كالت هاي البنية قصتها قصة ... هاي البنية متزوجت لان تشتغل ممرضة .. و انت تعرف و مع الاسف بالعراق عدنا هواي شغلات غلط لازم يرجع المجتمع كله يعيد النظر بيها .. هالمسكينة تصرف على خواتها و امها بعد ما ابوهم توفى .. وفوك الظيم ماعدهم رجال بالبيت .. وهي قامت بالمسؤولية .. و  خطية دائما تحجيلنا و تبجي ..
تكول كل كرايبنا البنات الي بكصتي و حتى الجوارين تزوجو .. بس اني لا ..
ليش لا ؟
لان اشتغل ممرضة .. بالعالم كله شغلة الممرضة طبيعية و يصيحولها ملاك الرحمة .. بس يمنا من يعرفون بنية ممرضة (وخصوصا لو صغيرة) اول شغلة يحجوها (هااااااااا تبات برة خفارات) اي شنو يعني الي تبات بره لازم تسوي شي مو زين !
شغلتي هيج شسوي ؟
والله العظيم من مات ابونا ما شفنا فلس احمر لا من قريب و لا من غريب ... و لو باقيين بعد مية سنة هم مجان احد عبرنا .. لا عدنا راتب ولا عدنا تقاعد لان ابونا جان رجال كاسب يشتغل بالبناء .. لا دارس ولا مشتم ريحة المدرسة .. و اني هسة صح ام غايب و صح مراح اتزوج و متأكدة من هالشي .. بس يكفي احس بخواتي بناتي ..
طبعا شكت كلبي من حجتلي حالة ام غايب .. و ياربي كم حالة مثل حالة ام غايب عدنا بالعراق ..
ليش ؟
السستر تبات برة و يخلون بيها انه ..
ام الصالون هم يحجون عليها ..
حتى الدكتورة الي تصير عدها خفارات بالمستشفى هم يحجون عليها ..
و و و و و و و و و ..
ليش ؟
ماكو جواب كالعادة ..
احنا محتاجين ندرس درس واحد يسوى كل الدروس بالمدرسة ..
درس اسمة انسانية ..
درس تنذكر بي ام غايب و ام محمد ام الخضرة و خالة ام رعد الفراشة مال مدرسة و حجية صبرة ام بسطية الجاي بالنهضة و و و و و ..
درس نذكر بي ناس محد ما وكفلهم ولا احد طبطب عليهم بيده ولا حتى سمعهم كلمة حلوة ..
درس نفهم بي الطلاب الصغار المساعدة و تفهم ظروف الاخرين ..
والله ماعرف شحجي  بس ياريت لو بيدنا نغير شغلات هواي بهل الدنيا بين فترة و فترة ..
حتى كل مدة ننزل مفاهيم جديدة و تعليمات انسانية جديدة ..
و اخيرا ..
الله يحفظكم و مثل كل مرة ارجع واكول ( دائما خلو نفسكم بمكان المقابيلكم و حسو بظروفه )
انتهى
اخوكم ابو بغداد سايق التكسي
#ابو_بغداد