قصص عراقية حقيقية بقلم ابو بغداد سائق التكسي

حب حياتي

اصدقائي جانو كل مينزلون لباب الشرجي يشترون احذية (مكرم القارئ) ياخذوني وياهم و على حسابهم حتى كروتي و لفاتي علمود بس اشوفلهم جودة المنتوج .. جنت اذا الزم القطعة بس اعصرها بيدي مرة مرتين اعرف هاي اصلية وشكد تطول باللبس ... اني طول عمري جان شغلي بالاحذية .. من وعيت عالدنيا و اني اشتغل وي اخوتي بالاحذية و تصنيعها ... جنا عمال بمعمل بالعمارية و بعدين تحولنا لمنطقة ثانية بس هالمنطقة جانت سكنية و شارع عام .. لان ابو العمارة صعد الايجار على صاحب المعمل و قرر ابو المعمل ياجر شقتين لزك بالدورة و يفتحهم معمل احذية بس حذرنا من الصوت العالي و كال هالله هالله بالجوارين ترى اكو عوائل ساكنة بنفس العمارة ... العمارة جانت على شارع عام ... و مقابيل العمارة الي بيها المعمل هم اكو عمارة ثانية .. و جواها اكو محلات ستة .. ثنين معزلات و الاربعة الباقيات واحد مكوي و صيدلية و اسواق غذائية و مكتب دلالية ... اني جنت دائما اخذ جكايري من ابو الاسواق .. جان رجال جبير كلش و  بنفس الوكت كلش حباب ... و بصفه الصيدلية اخخخ من الصيدلية .. بيها رجال جبير و بنته .. البنية جانت تجي دائما للصيدلية ورى الوحدة و الظاهر تداوم كلية .. جان يعجبني اباع عليها بس والله ما بنيتي شي بس هيه حلوة كلش .. و اني يعجبني اباع عليها حتى الوكت الي جنت ادخن بي واطلع للممشى مال الشقق وي وقت جية البنية للصيدلية حتى اباع عليها ... لان جوى بالمعمل ميصير ندخن بسبب السيكوتين و اكو سوالف سريعة الاشتعال ... جنت مرات اتمنى تتوصخ الجامخانة مال صيدلية لان من تتوصخ هيه تلزم هذا البخاخ و تمسح الجام واني جنت احاول اصير بمكان متشوفني بي وابقى اباع عليها ...
عالعموم ..
بيوم من الايام الاسواق الغذائية الي بصف الصيدلية لزك عزلت و خلو عليها قطعة سودة و قريت القطعة و الله انقهرت لان جان مكتوب عليها انتقل الى رحمة الله تعالى فلان ابن فلان والد كل من فلان و فلان .. خطية ابو الاسواق توفى .. والله العظيم دمعت عيوني لان والله الرجل طيب كلش كلش..
و راحت ايام وجتي ايام واني نفس الشي اسوي ...  اراقب هالبنية بس كمت اشتري جكاير من غير مكان .. عالعموم رجعو فتحو الاسواق و ابن ابو الاسواق (الله يرحمه) هو كام يكعد بالاسواق ... بس هالولد جان مخربط و يجيب اصدقاءه وياه ... و مبين مو بحاجة المحل بس هيج يكعد ... حتى مرة لو مرتين رحت اشتري منه جانو كاعدين خمسه يمه بالمحل و من ورى خشمه يبيع لذلك كمت ابد ما اشتري منه و حتى اخوتي الاثنين الي وياهم اشتغل كامو يشترون من واحد ثاني (يعني غير اسواق) ... عالعموم ..
البنية بنت ابو الصيدلية اسمها نور ... اني فد يوم جنت دادخن و اشرب جاي بالممشى الفوك واباع عليها شفت ابوها طلع برة يصيح على ابن ابو الاسواق .. ابن ابو الاسواق لسانه جان كلش زفر ... كام يغلط ويصيح عليه و فوكاها طلعو جماعته من الاسواق هم كامو يتهددون على الرجال ابو الصيدلية وهو رجال جبير و محترم و ميعرف لهجة الشارع ... اشو لهناك ذولة كامو يتهددون عليه و نور خطية تجر بابوها تريد تفوته للصيدلية .. اني بدون سابق انذار متحملت جان اركض على اخوتي كلتلهم كومو ابو نور ديتعارك ... حتى اخوية الجبير كالي شنو منو و جان ينزل وياي ركض ...
نزلنا كلنا ركض و رحنا بدون هلا و مرحبا كبل تضاربنا وياهم .. همه سته جانو بس خليناهم يلكطون حصو (مصطلح يلكط حصو يعني واحد ينهزم) ..
ركضو انهزمو بس صار مضارب بيناتنا و كتلناهم لان جانو يريدون يضربون ابو نور ..
خلصت العركة و الناس التمت واني سديت المحل الاسواق مالتهم نزلت الكبنك .. لان خفت لا ينباك شي من الاسواق و يذبوه براسنا .. و سويت هالشي كبال الناس و صيحت بصوت قوي (هاي كدامكم اني سديت المحل حتى لا يرجع يكول انباك شي ) و ابو الصيدلية فوتنا جوى يمه و كال انتو منين طلعتو !!!
عاد اني حجيت كلتله عمو اني و اخوتي نشتغل فوك و شفناهم شلون يتهددون عليك و همه سته وانت وحدك .. كال اتشرفت بيكم و انتو والله زلم  .. بارك الله بيكم ... و سالته شنو سبب المشكلة ؟
كال واحد منهم سمع كلام لبنتي وجتي كالتلي ... عاد خلصت السالفة و رجعنا للمعمل و بنفس الساعة اجه ابو المعمل وطبعا هو ممتعود يجي بهيج وكت لان دائما يجي وي التعزيلة ..
طلع الدلال مخابره وكايله صارت عركة العمال مالتك مسوين مشكلة ..
حجيناله كلشي و هو تفهم الموضوع وكال طبهم مرض وين ميخلون رجلهم خلي يخلون راسهم لان مدام السالفة بيها عرض يعني الصوج بيهم لهل الزعاطيط ..
بس للاسف ابو العمارة من عرف الموضوع كاله شوفلك مكان ثاني ... ابو المعمل ما بين النا  هو ضايج بس احنا عرفنا هو خطية انزعج وانقهر ...
و بنفس الوكت ابو الاسواق راح حجه وي ابو العمارة يعني انسدت من كل الجهات ..
بس كلنا خلي نحاول محاولة اخيرة وي ابو الصيدلية .. رحنا لابو الصيدلية و حجيناله كلشي .. انقهر كلش و حاول يحجي وي ابو العمارة بس مقبل و قفل علينا ..
بس ابو الصيدلية كال مدام هالشغلة صارت من ورايا اني احلها .. سوى اتصالات وي جماعته و لكه النا مكان و ارخص هم بس وين شوية بعيد بالتاجي ابو المعمل كيف و انتقلنا بنفس الشهر ...
وبنفس الوقت صارت بين ابو الصيدلية وبين اخوية الجبير علاقة طيبة .. و عرفت انو  نور امها متوفية و هيه الوحيدة لابوها ...
الرجل ابو الصيدلية مرات كام يجينا للبيت هو وبنته و بنته كلش حبت خواتي و حبت امي هم .. و حتى من جان يحتاج شغل للبيت لو عند شغل يحتاج جهد عضلي اني اروح اساعده لو واحد من اخوتي هم يساعدة  ...
نور جانت تضحك للهوى .. و اني حجيت لاخوتي انو اني احب هالبنية و اريدها بس الجواب جان مو بصالحي .. اول شي احنا اربع ولد و تلث بنات وام ببيت مساحته ١٥٠ متر .. وين اتزوجها و وين اسكنها و هيه مدلله و تدرس ..
يعني بين قوسين بعيدة السالفة كلش ..
اخوية كالي عوف السالفة و منريد نخسر الرجال لان صار واحد من عدنا و اذا تقدمناله و اكيد راح يرفض ورى الرفض علاقتنا راح تصير وياه شبه معدومه ..
اني بيومها عرفت انو مو كلشي بهل الدنيا نحبه يصير النا ... وعرفت المثل الي يكول (مد رجلك على كد لحافك) صح مية بالمية ..
انقهرت و حزنت بس اول وتالي اني مابيدي شي ..
و قررت انسى الموضوع ..
و بقت علاقتنا وي الرجال مدة طويلة و سنة تجر سنة  بس اني كل مرة اشوفها كلبي ينخطف و احس اني احبها .. حتى مرات من يجون لبيتنا جنت اصفن عليها واتخيل هيه الي .. بس ورى ميطلعون اعرف انو اني خيالي واسع و بالنهاية يبقى مجرد خيال ..
و فد يوم اتصل بينا الرجال وكال معزومين بعرس نور ...
رحت اني و شفتها كاعدة وي زوجها بالقاعة .. بس والله العظيم طلعت ادخن برة و بجيت .. رحت يم كراج السيارات و اختاريت مكان اظلم و وكفت بجيت بيني و بين نفسي و حتى الجكارة الي بيدي حاجيتها .. كلت للجكارة انتي الي عرفتيني عليها جنت كل ما ادخنج اباع عليها .. و لزمت الجكارة و عصرتها بجف ايدي هيه ومشتعله ...
محسيت بالنار مال الجمر والله .. لان جنت من الداخل مشتعل ..
راحت و خلصت صارت لغيري واصلا هيه من البداية مو الي ... ومن الكراج مال قاعة العرس عفت امي واخوتي وخواتي جوى و رجعت للبيت بس مخنووووك ...
و نسيتها للبنية و طلعتها من راسي لان صارت متزوجه ... و مرت سنين و بوقت الطائفية الرجل اتصل بينا و كال احنا راح نسافر وبنتي وزوجها هم راح يسافرون وياي لان بصراحة اخاف عليهم ... وسافرو ورحنا ودعناهم بس الوداع جان غريب .. البنية جان شكلها تعبان وعبالك ممرتاحة ... حتى من رجعنا حجيت هالشي لاخوتي  .. اخوتي كالو دسكت يمعود انت تتخيل لان جنت تحبها ..
و بقى اتصال ابو نور ويانا و سمعنا بعدين همه راحو للسويد استقرو هناك ... انكطع اتصالنا بيهم ورى مسافرو للسويد و راحت سنين وجتي سنين و اني واخوتي تغيرت احوالنا المادية وخواتي تزوجو و اخوتي هم ثنينهم تزوجو بس اني متزوجت (مو لان بعدني احب نور بس ملكيت بنت الحلال) .. و تطوعت عالمرور و صرت منتسب بالمرور .. راتبي زين الحمدلله و بنفس الوقت عندي سيارة ملك و اكدر اتزوج بس متزوجت مصارت قسمة ...
وبيوم من الايام هيج كاعد عالفيس بوك اكلب و كلت بله خلي اكتب اسم نور و ابوها بلكي يطلعولي وهالحجي هالفترة ..
دورت جان الكاها ..
انصدمت و الله و ترددت اضيفها لو لا بس كلت خلي اضيفها و اسال عن ابوها لان بصراحة اخوتي كلش مشتاقيله ..
ضفتها مقبلت الاضافة و قررت اكتب رسالة .. كتبتلها رسالة و مشافتها .. جنت يوميا اشوف الرسالة شايفتها لو لا بس تقريبا اسبوعين مشافتها ...
وفد يوم اني نايم ساعة ١ بليل جان يجيني اتصال عالفيس بوك فتحت عيوني بالكوه جان اشوف اسم نور .. رئسا كمزت عبالك اصلا منايم ولا نعسان جان اجاوب..
صوتها نفسه اوف من صوتها ..
كلتلها نور ؟
كالت اي شلونك و الله هسه شفت الرسالة وقبلت الاضافة شخبارك اخوتك شلونهم امك خواتك ..
كلتلها وين اختفيتو انتو ابوج وينه ؟
جان تبجي خطية كالت ابوية توفى و صار بيا الي مصار هنا .. اني رأسا كلتلها شكو خير احجي ؟
جان تبدي تحجي ... عدها بنية و ولد هيه و انفصلت من زوجها  و تزوجت واحد ثاني وهم انفصلت منه ...
و جانت دائما تدور على اتصال ويانا
...
انطيتها رقم خواتي و كامت تتواصل وياهم دائما ... و اني كمت يوميا ادزلها صور من مكان دوامي و ادزلها صور لبغداد .. و فد يوم قررت احجيلها كلشي و شلون جنت احبها ... بس قبل هالشي رحت اخذت صور لمكان الصيدلية و للعمارة الي جان بيها المعمل فوك وحتى للكراج مال قاعة العرس و نفس المكان بالضبط الي بجيت بي هم اخذت صورة ... اتصلت بيها ... كلتلها نور اكو حجي اريد احجي بس ارفق وياه صور ..
كالت شنو يعني ؟
كلتلها انتي سمعي صوت و بنفس الوقت شوفي الصور ... و بديت احجي شلون تحولنا للعمارة الي بالدورة و دزيتلها صورة المحل مال الصيدلية و طبعا هو متغير هسه صاير محل كهربائيات و حتى العمارة هم متغير شكلها ... وكمت احجي و اسولف و اكول شلون اول مرة شفتها وشلون جنت اتمنى تتوصخ الجامة حتى تطلع تبخها وتمسحها و هيه وي الصور الي ادزهم كامت تبجي ... و وصلت ليوم العرس مالتها ودزيت صورة الكراج والمكان الي بجيت بي وطفيت الجكارة بيدي ... وهيه بهل المقطع غصت من البجي ... ومن ذاك اليوم عرفت اني جنت متيم بيها واعشقها و حبتني حد الجنون و اني هم ... اتفقنا نرتبط و جتي من السويد لهنا تزوجنا و سوتلي لم شمل و رحت للسويد وياها و عفت حتى الوظيفة ..... و جهالها شاهد الله صارو جهالي و خصوصا ورى مجابتلهم اخ مني ... ابد ماقصرت وي الاطفال و همه اصلا هادئين المساكين و حبابين كلش بس عربيتهم مكسرة واني داقويها ...
و بصراحة تعلمت منهم لغة تقويت و هسه عندي شغل ثابت هنا وعايش وي حب عمري و حياتي و روحي بهل الدنيا .. احبهاااااااااااا موت .. و سبحان الله كل ما اتذكر سالفة تأخري بالزواج عبالك محسومة السالفة وهذا مستقبلي وقدري الها بالاخير ...
(حب حياتي)
انتهى
اخوكم ابو بغداد سايق التكسي
#ابوـبغداد