قصص عراقية حقيقية بقلم ابو بغداد سائق التكسي

سووها وبس

أول مرة تعاركت بيها وي أمي جنت بصف رابع ابتدائي … كلتلها بعد لا تصيحيلي ليوثه و تعاركت لان كالت كبال صديقي على اسم البنية الي جانت مختارته اليا (في حال طلعت بنية) لان اهل قبل يختارون اسمين .. مجان اكو سونار .. اني اختارتلي اسمين اذا ولد ليث و اذا بنيه لينا .. تعاركت وياها لان اصدقائي من يسمعون يبقون يعيدون الاسم و يضحكون عليا .. و حسيت بعيون أمي اكو قهر .. بوست ايدها كلتلها جذب جذب يمه اي اسم يعجبج صيحيني .. مع العلم ما احب امي تدلعني (الف رحمه على روحها وروح والديكم)… بس امهاتنا ميكدرون يشوفونا كبار .. دائما بنظرهم احنا ذاك الطفل الي ملفلف بوصلة قماش (كماط) … امهاتنا يشوفونا صغار شكد ما كبرنا … و احنا نبقى صغار لحد وقت معين .. هي لحظة وفاة الاب و الام … هنا راح نكبر (يتامى) .. و الي جان قبل ميخوفنا راح يخوفنا .. والي جان قبل يفرحنا مراح يفرحنا بعد … و راح نحس الكبر بكل تفاصيل حياتنا حتى بأسمائنا … جنت بمرحلة اسمي ليث و ليوثي و ليوثه و لوله ولولتي (مرحلة الكماط) .. وراها كبرت لمرحلة الابتدائية صرت (ليث و ليوثي و ليوثه) .. ورى الابتدائية صرت ليث .. و ليث ابن بيت ام علي لو ليث ابن بيت ابو علي و ليث ابو الطيور  .. و ليث اخو علي الدلال .. و ليث البيتهم بالركن .. و ليث الي يشتغل وي رحيم الفيتر .. و ليث الي يشتغل بسوك الشعبية وي سيد قصي .. و ليث الي يداوم بفلان متوسطة و ليث الي يمشي وي فلان  .. و من دخلت اعدادية صرت .. ليث ابو التكسي ليث ابو بغداد و ليث الدلال .. ليث ابو الخطوط .. ورى فترة صرت استاذ ليث و ليث زراعة  .. وهم بقيت ابو بغداد ابو التكسي و الدلال .. و مره سمعت كلمة عمو ؟؟؟
اني صرت عمو !!!
اني الي جنت اكول للأكبر مني عمو هسه ينكالي عمو !!
صدك جذب .. كبرت .. هاي شنو البياض الي بصفاح راسي .. هاي طباشير لو شعر لونه ابيض .. ايباخ هذا شعر لونه ابيض .. كبرت اني .. صرت ابو بغداد سايق التكسي .. و هسه الناس يصيحولي اخونه الجبير .. و استاذ ليث .. و ابو بغداد الورد .. و راح ليوثه و ليوثي و ابو الليوث .. من راحت امي نسيت هاي الاسماء .. امي حتى من الطباشير جان براسي (قصدي الشيب) جانت تكلي ليوثه .. مجنت استحي مثل مستحيت بصف رابع .. لان هاي أمي و من تحجي الكلمة ميكون الها بيها قصد (مضر اليا) .. بس و داعة امي .. ما حسيت  روحي كبرت لا من صاحولي ابو بغداد و لا عمو و لا حتى من شيبت بكد ما حسيت كبرت من ماتت أمي .. لو شكد تحاول تنسى .. لو شكد تحاول تغشم روحك و تكول بمرور الوقت انسى .. راح تنام و تكعد يا ابن ادم تتذكر حواء الجابتك .. لو شكد قوي و تلاوي الحديد .. لو تضرب الكاع تشكها بالنص .. راح تنزل دمعتك بس تتذكر امك .. اني حتى على عركة صف رابع ابتدائي نادم ..
عالعموم ..
أني ما احب احد يصيحلي استاذ .. لو تصيحولي ليث لو ابو بغداد وبس .. و الاحترام موجود مو بالالقاب .. الاحترام موجود بالكلمة الطيبة ..  اني عرفتوني ابو بغداد و عرفتوني ليث مثل ما جنت لحمة صغيرونه تتحرك بيد امي وابوية .. و خلولها هل الاسم الي هو منهم و الهم .. واني كلي منهم .. علمود هالشي .. اني احب بالتعليقات تكولولي ليث لو ابو بغداد .. و بس .. و اتمنى طولة العمر و الصحة و السلامة و العافية و الخير و البركة لامهاتكم و ابهاتكم .. بوسوهم .. شمو ريحتهم .. صوروهم فديوات .. سجلو اصواتهم .. اخذو وياهم صور .. ضحكو بالفديوات انتو وياهم  .. ضحكو .. سووها و بس .. سووها .. و بس ..
انتهى
اخوكم ليث
#ابوـبغداد