قصص عراقية حقيقية بقلم ابو بغداد سائق التكسي

ابو التأسيسات

يوميا من نكمل الشغل و نرجع بالكوسترات .. ابوية جان يحجيلي قصص .. هي مو قصص هي مواقف … جنت احس هو ديسوي هالشي وياي لان يحس بتأنيب الضمير … لان عمري صغير و هو مطلعني وياه بالشغل .. جنت احس هو يحجي بينه و بين نفسه غير الحجي الي كاعد يحجيلياه بالسيارات .. جنت احس يكول هذا المسكين مطلعه وياي بنص التراب و الاسمنت و صياح العمال و الي بعمره هسه ديلعب طوبه لو راكب بايسكل … جان يحجيلي سوالف عن الناس الي تعبت بحياتها و بالاخير وصلت و صارت .. اني جنت اسوي نفسي مركز وياه بس هالشي جذب .. لان جنت احس بتعب و اريد بس اوصل للبيت و انتظره يكمل حمامه (يعني يسبح) و افوت ورى ميطلع هو من الحمام اسبح و اروح اذب روحي عالفراش و اشبع نوووووم … ابوية جان شغلة بالتأسيسات الكهربائية .. يعني يغذي البيت بالكهرباء و يرتب السويجات و الوايرات كامله .. تعلمت منه كل شي بس هالشغلة جنت اكرهها .. أشتغل وياه صح و اسمع كلامه صح بس بداخلي محاب هالشغلة .. حتى مرات جنت اعوفه يشتغل و اصعد بسطوح البيوت الي هو لازمها اباوع على الجهال الي بالشارع .. الجهال الي بعمري .. يلعبون و اكو بيهم راجعين من المدارس و الجنط مال كتب معلكه بظهورهم … و فجاءة يصيحني اروح يكلي وين جنت .. اكله جنت بالحمام لو جنت اسوي فلان شغلة (اطلعله عذر بس مو حقيقي) .. و هالشي بكل سنه جان يقل عندي .. يعني سنه ورى سنه كمت اترك هالعادة .. و التزم بالشغل … جنت احس روحي رجال رغم صغر عمري .. ماعرف ليش هالاحساس كام يجيني كل ما اتقدم بالعمر .. و من كبرت شوية قررت ان الزم شغل وحدي بنفس الوقت الي ابوية لازم بي شغل (يعني بمكان منطلع لبيت واحد اني وابويه) اني اجيب عمال وياي و اطلع لبيت ثاني اسويله كهرباء .. ابوية يعرف اني ادبرها بس جان مرات يجي يشوف شغلي ورى ما اكمل قبل تسليم البيت …  من شاف اكثر من بيت اني سويتله الكهرباء (بدون اخطاء) كام ميطلع ورايا يشوف شغلي .. جانت الاجور مالتنه زينه .. و قررنا نفتح محل بالمنطقة مال كهربائيات و بنفس الوقت تأسيسات كهربائية .. لان شغلنه جان قبل عالمعارف و عالاصدقاء .. و هالفكرة جانت فكرتي بصراحة .. وافق ابوية عالفكرة و اخذنا المحل و شغلنا كام يزيد يوم ورى يوم لدرجة احنا كمنا نطلع عمال و كهربائين للبيوت واني وابوية بالمحل كاعدين ..
بس هالشي مجان يمنع انو نطلع احنا مرات  نشتغل بيدنا .. و مجنا نتعامل وي الي يشتغلون ويانه على انو همه عمال .. لا ابد .. جنا نتعامل وياهم على انو همه يشتغلون ويانه مو يمنه .. وهالشي صح لان هالناس قبل جانو همه يجيبولنه شغل .. يعني مثلا واحد بيهم لازم شغل و صار عنده ظرف (تمرض .. صار وياه شي) جانو يجون لابوية يكولوله اطلع بمكانه لان صار عدنا هيج حالة .. و الحمدلله الشغل مشى اضافة للكهربائيات الي بالمحل جنا نبيعها .. يعني من الاخير وضعنا المادي صار زين شوية .. بمرور الوقت كمت اتعرف على ناس اكثر و صارت عندي علاقات اكثر بمجال الشغل .. العمارة الي بيها محلنه جان بيها محل عقارات و محل غذائية و حلاق .. ابو العقارات جان صديقي و عن طريقة هم لزمنا هواي شغل .. و بيوم من الايام جنت كاعد يمه و جتي مرية وياها بنية بعمري و رجال جبير .. جانو يدورون بيت للأيجار .. البنيه كامت تباوع عليا نظرة اعجاب .. و كل متصير عيوني على عيونها تبتسم .. اني بحياتي كلها مصاير وياي هيج موقف ابد .. والله العظيم خجلت .. بس بقيت كاعد و طبعا طلع الدلال وياهم بسيارتهم حتى يشوفهم البيت .. اني رجعت لمحلي وهو قفل الباب (موقتا) بين ميشوفهم البيت و يرجع لمكتبه … اني صح كعدت بالمحل بس عيني عالشارع انتظر رجعتهم .. و رجعو ورى تقريبا ساعة و عافو الدلال نزل من السيارة و راحو .. بس وصل قريب من المكتب مالته صحته .. كلتله ها بشر صارت لا .. كال اي اي خويه اخذو للبيت يعني (راح يأجروه) .. كلتله وين هو (و طبعا سألت وين حتى اندله) كالي جوى بالفروع يم بيت فلان .. و لأن اني ابن المنطقة اندليت رأسا .. بوقتها مردت ابين للدلال اني ليش هيج اسأل .. و ثاني يوم سألته همه شوكت يتحولون بس بطريقة غير مباشرة بس هو دلال ابو درب حس اكو شي لأن مرتين سألته .. كالي شبيك اشو مهتم كلش و هاي اول مره تصير … كلتله يابه البنية عجبتني و يجوز اتزوجها شنو وحد اني عن البشر .. كال وهيج من نظره وحده .. كلتله هسه انته شعليك .. كال صدك اني شدخلني و كالي اسبوعين يتحولون للبيت .. كلتله اشكرك .. و بقيت انتظر هالاسبوعين و صار تفكيري كله بالبنيه الي ضحكت بوجهي .. قفلت عليها .. و خلصت الاسبوعين و بديت اقوي علاقتي بولد بنفس شارعهم الي تحولو بي .. الولد صديق قديم بس بمرور الزمن و الشغل و الالتزامات مال الدنيا كل واحد بينا التهى بحياته .. بديت امر عليه و اوكف وياه بالركن لو نوكف يم بابهم بحجة شباب و واكفين و طبعا هالشي مو غلط ولا عيب …
و شفتهم جوي ينظفون البيت قبل ميحولون الغراض .. هي شافتني لان بيت صديقي بنفس شارعهم بالضبط … هم ابتسمت من شافتني .. كيفت و من الاخير لزكت بشارعهم .. حتى ابوية حس بالموضوع شافني هواي اعوفه وحده و قبل جنت ما اعوفه ابد .. سالني اشو متغير هالايام .. كلتله لا متغير ولاشي .. كالي متلفي هواي بالمحل وين تروح احجيلي اني ابوك و صديقك .. وصدك ابويه جان يعاملني على هالاساس … كلتله يابه هيج و هيج السالفة …. كالي خلي نسأل عليهم و اخطبها الك هسه احنا الحمدلله وضعنا تغير و تكدر تتزوج .. لاتطول السالفة و تكعد تحب ترى هالامور وراها مشاكل و اخاف اهلها يشوفوك اخوتها .. كلتله يابه ماعدها اخوه .. كالي لك مو بس اخوتها اهلها اخاف جوارينهم .. اكعد راحة و خلي نسأل و اذا طلعو ناس اوادم تزوجها و يله شوفني جهالك قبل لا الله ياخذ امانته .. كلتله يابه عمرك طويل وان شاء الله يومي قبل يومك .. بس مقبلت بسرعة تصير الامور .. جنت بس اريد احجي وياها .. و حاولت بس مكدرت لان هي بس بالبيت ومن تطلع متطلع وحدها وي امها تطلع .. لحكتها مره هي وامها من راحو للسوك بس مكدرت انفرد بيها وهي شافتني وجانت كل شوية تندار بدون ما امها تحس حتى تشوفني دامشي وراها لو لا .. و حاولت اكثر من مرة بس مدبرتها .. و بصراحة كرهت هالسالفة و كلت خلص خلي ادز امي بالبداية و بعدين اذا صارت موافقة مبدئيه .. نروح اني وابوية و كرايبنا .. و دزيت امي و رجعت وياها مرية جوارينه .. راحو و رجعو و امي جان شكلها ممرتاح .. كلتلها ها يمه بشري .. كالت البنية لا مخطوبة ولا شي .. و اهلها ناس طيبين مثل الورد .. و مثقفين .. بس اكو شغلة .. البنية خرسه و طرشة .. كلتلها لا يمه بروح ابوج صدك تحجين .. كالت والله .. كلتلها حتى لو اني قابل .. كالت يمه اني ما اتدخل الي تريده نسوي الك .. و ابويه من عرف كعدني بصفه و كالي انته هذا اختيارك و اذا تريد باجر نروح بس ليكدام اريد افهمك كم شغلة ..
البنية على حجي امك من الولادة هي هيج يعني اي عملية بالمستقبل مراح تفيدها و راح تكمل عمرك وياها على هالحاله .. و لازم تخلي ببالك شي .. هسه انته مندفع عليها لان عجبتك كشكل .. بس بمرور الوكت من راح تعيش وياها راح تخسر هواي شغلات .. يعني هسه اني بهل العمر من احس روحي مخنوك اول شخص يجي براسي افضفض وياه هي امك .. الليل كله نسولف قبل مننام .. وشكو شي بحياتي صار امك تعرفه .. و شكو شي ردت اسوي بحياتي مثلا ادخل بشغل جديد لو اعوف شغل قديم هم اخذ رأي امك .. صح مرات اسوي الي براسي بس هم رأي امك مفيد .. مو بس هيج .. اني هسه من ارجع للبيت اكدر اطلب منها شي محتاجه .. مثلا هسه ردت اكله معينه و ردت تخلي بيها شغله .. اكدر افهمها و صح هالشي مو مهم .. بس انته باجر عكبه ردت توصللها فكرة شلون توصللها الفكرة بالاشارات .. اني ما اكلك البنيه بيها عيب لا سامح الله .. هاي الله هيج خالقها و لا اعتراض على حكمه .. بس الحياة الزوجية مشاركة و لازم اكو تكافئ بالموضوع .. و هالكلام الي دأحجي مو معناه اني ما اقبل تتزوجها .. بس هالحجي ابينلك للمستقبل اذا صارت قسمتك وياها راح تصير هيج اشياء و بقت يمك .. كلتله ماشي حتى لو هالامور تصير اني قابل البنية هاي اريدها .. كالي ماشي و تقدمنا و تزوجنا ..
و امي هم نفس الحاله .. بقت تحجيلي على وحدة كرايبها من بعيد هم خرسة و متسمع و اندعمت عالشارع العام لان مسمعت صوت السيارة و منتبهت و ثنينهم امي و ابوية رادوني افركش السالفة بس اني قفلت خلص .. و اول شغلة سويتها قبل ما اروح اخطبها .. رحت لمركز بذاك الوقت جان ماكو هواي مراكز بالعراق مال صم و بكم .. و طبيت لمديرة المركز و طبعا هي جانت تداوم بمركز هم بس ما اندله وين .. طبيت لمديرة المركز كلتلها اريد اتعلم كم حركة معينه .. كالت ليش .. كلتلها اني راح اتزوج وحدة متسمع و لا تحجي و اريد اشوفها انو اني احبها .. طبعا مديرة المركز مرية جبيرة اكبر من امي .. و كلتلها ابوية خوفني وحتى امي .. كالت يمعود ترى اهلك مزيدين الموضوع كلش .. فاقدين السمع و النطق و حتى فاقدين النظر همه حالهم حالنا بالضبط بس همه عدهم وحدة من حواسهم متشتغل .. بس بالضبط نفس عقلنه و نفس تفكيرنا .. كلتلها اهلي ناس على كد حالهم و مداخلين مدارس .. كالت وانته ؟؟
كلتلها اني هم تعليمي على كد حالي بس مفتهم الدنيا شلون تمشي .. كامت باستني من راسي و علمتني كم حركة و انطتني كتاب بي صور مرسومه عن هالموضوع .. و تعلمت كم شغلة و من رحنا تقدمت الها سويتلها هالحركات .. عيونها دمعت والله العظيم .. و الله قسم هالبنية من نصيبي و تزوجت و عاشت وي اهلي بنفس البيت .. الحلو بالموضوع ابوية و امي كامو يحبوها اكثر مني هههههههههه .. بحيث مرة كلت لأمي اريد اتزوج عليها و اني تسرعت .. رادت تضربني و كالت والله اذا تفكر تسويها لا انته ابني و لا اعرفك ولا تعرفني .. هالبنية متلكي مثلها للموت .. كلتلها مو كلتي اكو كرايبج ماتت لان متسمع .. كالت كلت بس جنت بعدني مشايفة مرتك .. لك شايلتني شيل هالبنية .. و صح هي متحجي ولا تسمع بس والله العظيم من فاتت لبيتنا لهل اليوم ماسوت شي غلط .. و لا حسيت هي بيها نقص .. صح مرات تكعد بصفي و يعجبني اسولف وياها بس ابتسامتها و نظرتها اليا تسوى حجي الدنيا كله .. كلتلها يمه اني جنت اتشاقى وياج .. اني هم مثلك هالبنية للموت ما اتخلى عنها .. و علمودها تعلمت احجي لغة الاشارة صح مو قوي كلش بس افتهمتها و تفهمني .. و يوم ورى يوم الله سعدني بهل البنية و جابتلي جهال ثنين و الحلو بالموضوع .. ابني هسه كبر تقريبا .. من كثر متعلم لغة الاشارة وي امه و حتى بنتي نفس الشي .. من كثر ما تعلم هاللغة ناوي يدخل بموضوع تعليم لغة الاشارة .. و جهالي ثنينهم يا سبحان الله عبالك نزلو من بطنها يعرفون هاللغة .. صح بالبداية جانت اكو امور صعبة عليا .. مثلا من جابت اول بطن .. جانت من تنام و ابني بليل يكعد يبجي اني اكوم اشوفه لان هي متسمعه .. و حتى وي بنتي نفس الحالة صارت .. بس تعلمت و ما فد يوم ضجت و لا تعاركت وياها .. لان هالشي مو بيدها و الزواج مشاركة على كولة ابوية .. و الجهال مو جهالها وحدها .. جهالي .. بس شوية شوية عبرت الحالة .. واني قررت ورى بنتي (يعني ورى ثاني طفل) اوقف الانتاج ههههههههه لان بصراحة خفت هم راح توكع براسي سالفة الليل .. و كلتلها كافي ثنين ..
طبعا مرات اصدقائي الي وياي بالشغل .. (القريبين عليا و بيني و بينهم ميانه) يكولولي الله ربك زوجتك متحجي و عركات قليله عندك .. بالك صافي و ماعندك وحدة تزن و تطنطن فوك راسك .. اكلهم ليش انتو عبالك فاقد النطق ميتعارك هههههه غلطانين .. اصلا من تصير سالفة و تتعارك وياي .. نظراتها بس نظراتها تخليني اخاف ههههه ياريت لو تحجي و لا تباوعلي بنظرة ماعرف شضامه وراها .. لان الي تحجي مثلا تهدد مثلا تكول هيج راح اسوي .. بس زوجتي تباوع عليا بنظرة ممفهوم شراح تسويلي وراها ههههههههههه .. بس للامانة مشاكلي جدا قليلة وياها .. و البيت كلش هادئ .. يعني حتى العركة تكون هادئة لان بس اشارات .. مرة تعاركت وي ابني لان راد يشتري ماطور من هذني الصغار و هي متقبل تخاف لا يوكع منه .. و هو ضاج عود و من ضوجته بالغلط كسر مزهرية بس حلف هو مجان متقصد .. طبعا العركة كلها صارت بالمطبخ واني كاعد بالصالة .. الي شفته بس شغلة وحدة .. ابني طلع من المطبخ و ركض صعد لغرفته .. و هي جتني تأشرلي يعني انته بس كاعد و متعرف تلزم ابنك .. اشرتلها شكو .. تاشر على ايدها يعني صار ساعة ارزل بي بالمطبخ وانته كاعد هنا بالجذب مجيت رزلته هههههههههههه متت  من الضحك و كلتلها شلون اعرف انتو دتتعاركون و انتو ثنينكم واحد يأشر للثاني .. هي ضحكت و اشرتلي على راسها يعني نسيت ..
كمت بست راسها و صعدت كلتله لك ابن القند… (مكرم القارئ) كم مرة كايلك من تحجي وي امك بلغة الاشارة احجي وياها بصوت مسموع حتى اسمع اني .. كالي والله اني تقصدت ما احجي بصوت لان انته كاعد بالصالة .. كلتله خلص اني اقنعها و اشتريلك دراجة بس لا تسويلنه مشاكل .. و اكو بعد هواي امور تصير بس شي على شي مرتاح وهي هالطيبة ام كلب الابيض .. والله العظيم رغم ما بعض الناس و الاقرباء و حتى امي و ابوية كالو راح تكون حياتك صعبة وياها .. بس كل هالحجي طلع ماله قيمه و مجرد حجي فارغ .. يجوز لو ماخذ وحدة تحجي و تسمع مراح تفهمني بكد ام جهالي .. و الحمدلله على كل حال .. و هسه ما اريد شي من هالدنيا غير الستر و العافية اليا و لاهلي و لكل الناس .. (ابو التأسيسات)
انتهى
اخوكم ابو بغداد سايق التكسي
#ابوـبغداد