قصص عراقية حقيقية بقلم ابو بغداد سائق التكسي

المحامي

اول سفرة اليا جانت خارج بغداد ذاك الوقت … اصدقائي اجرو بيت بالحبانية و قنعوني اروح وياهم … همه يدرون بيا اني ما احب الطلعات هواي بس بقو يقنعوني اسابيع لحد ما قبلت اروح … يجوز هواي ناس تحب الطلعات و الطبات و السفر .. بس اكو نوع من الناس واني واحد من هالنوع .. يعجبني ابقى بالبيت ..اطلع بس للضروريات يعني اشتري ملابس لو مثلا اهلي محتاجين شي .. و طبعا طلعتي اليومية المعتاد عليها هي الدراسة اروح للاعدادية و ارجع .. و السالفة مو معناها اني معقد .. بالعكس اصدقائي لان يعرفوني مرح ودائما اتشاقى بقو يلحون حتى اروح وياهم .. رحت وياهم و دخلنه للمنطقة السياحية بالحبانية … نزلنا الغراض من السيارة و سفطناهم بالبيت الي مأجري و طبعا النظام هناك جان نظام بيوت صغار و كلهم متشابهات .. و الناس جانو كلش هواي و البحر متروس ناس .. طلعنا للبحر و سبحنا و رجعنا للبيت المغربية .. اكو عائلة بواحد من البيوت القريبة من البيت الي احنا بي .. بالمناسبة اني  و حتى جماعتي تيهنا اكثر من مرة الشقة الي مأجريها لان كل البيوت تتشابه و بقينا نتبع ارقام الشقق لحد موصلنا .. و خلينا مثل النيشان براسنه حتى نوصل للشقة .. يعني كلنا هالمركز الصحي بظهره شقتنا .. اكو مركز صحي صغيروني بنص المدينة السياحية هذا خلينا النيشان لان اقرب شي على شقتنا .. و بليل جماعتي احجيها بأمانه يشربون بس اني ما اشرب .. شربو و نامو من وكت .. اني بقيت اكلب بقنوات التلفزيون و طبعا جانت قنواتهم تختلف عن قنوات التلفزيون العراقي .. يعني بذاك الوقت جان عدنا قناتين فقط (العراق و الشباب) بس مدينة الحبانية عدهم بث خاص بيهم للتلفزيون جانو مطلعين فلم اجنبي مال الفاني (ارنولد شوارزنجير و ليندا هاملتون) بقيت اتابعه شوية و كلت خلي اطلع اتمشى .. طلعت و شفت بنات ثنين بنص الليل ديلعبون ريشه على ضوء العواميد لان المنطقة جانت كلها اضوية .. و عادي اكو ناس هواي دتتمشى عبالك دنيا صبح مو ساعة وحده بليل .. وكعدت على مصطبه قريبة منهم … جان الريشة مالتهم وكعت يمي .. شلتها و رحت انطيتها لوحده منهم بالايد و هلكد ما البنية حلوة معرفت شحجي وياها  اقسم بالله العظيم نسخة من هاي الممثله التركية الي تطلع بفلم (ازرق ازرق) معرف شنو اكولولها و اني شايل الريشة و واكف كبالها .. اخذتها من ايدي و كالتلي شكرا اني من غبائي كلتلها شكرا .. ضحكت هي كالت زين شكرا .. كلتلها عفوا عفوا اسف .. و رحت اتمشى .. طلعت يم البحر اتمشى و اباوع على المي و تخيلت روحي بفلم عربي قديم .. و تخيلت شكلها و دخلت بقصة حب بيني و بين نفسي ههههههه .. بالمناسبة اي واحد يكابل البحر يمكن يتخيل هيج تخيلات من ورى الافلام المصرية و الاغاني .. دائما يوكفون عالبحر و يتخيلون و كمت هيج العب برجلي بالرمل هههههههههه .. دخلت بقصة حب و اني اصلا هالبنية كل الي بيني و بينها ريشة مال لعب .. شلت هالريشة من الكاع و انطيتهياها لا اكثر و لا اقل … و رجعت للشقة و طبعا احنا جنا مأجرين الشقة اسبوع و اصلا كلنا عدنا عطلة يعني ماعدنا دوام جنا مخلصين اعدادية و مكيفين راح ندخل كليات و علمود هالشي جماعتي رادو نروح سفرة .. رجعت للشقة و بقيت اراقب كل شوية اطلع برى بس مشفتها للبنية ..
ثاني يوم لبست احلى لبس عندي جايبه وياي من عده لبس السبح .. و كلت لجماعتي اني ماروح وياكم للبحر .. كلت بيني و بين نفسي خلي ابقى افتر بالمكان داير مداير شقتنا لحد ما اشوفها والحكها احاجيها .. و راحو جماعتي و اني بقيت مثل البزون افتر بالشارع .. و حظي اسود اعرفه شفتها بس شفتها واكفه هي و اختها واخوهم الصغير وابوهم وامهم يم السيارة ديصعدون الغراض مالتهم بالصندوك .. خلصو سفرتهم و ديرجعون لبغداد .. هي اصلا مشافتني و لا انتبهت .. ركبت السيارة وراحت وي اهلها واني من كل عقلي مشيت سريع و حتى اكو غصن مال شجرة نازل صار كدامي جريته قوي وكطعت اوراق اشجار بيدي كومة و ذبيتهم بالكاع علساس ضايج هههههههههههه .. من كل عقلي عايش الدور .. ورحت للبحر ادور على جماعتي .. شفتهم و طبيت بنصهم كالو شبيك اشو شكلك ضايج و ليش لابس هيج دلبسلك شورت .. كلتلهم هسه اروح ابدل واجي .. كالو شبيك .. كلتلهم رجعت لبغداد .. كلهم التمو عليا منو منو رجعت .. كلتلهم وحده .. كالو منو هالوحده .. كلتلهم ماعرف اسمها .. كالو لعد شنو شبيك .. كلتلهم وحدة البارحة بليل من انطمرتو انتو اني طلعت اتمشى و جانت تلعب ريشة هي واختها و وكعت ريشتها يمي و شلتها انطيتها بأيدها ..كالو اي وبعدين شصار ؟؟؟؟
كلتلهم مصار شي .. اليوم بدلت ردت اروح احاجيها و شفتها هي واهلها لمو غراضهم و رجعو لبغداد .. كالو بس !! كلتلهم بس .. جان يشيلوني اني وهدومي المرتبه و شمروني بنص المي كالو هي جوى بالمي روح دورها .. جوى جوى بالغميج .. هههههه و هدومي المرتبه كلها صارت مي تنكعت و بقينا نسبح و كملنا سفرتنا و رجعنا ورى اسبوع بس شكل البنية براسي بس ابد متوقعت بعمري راح التقي بيها … و اجى وقت الدوام و داومت بكلية التراث الجامعة .. الي تصير بشارع النقابات قريبة على الهلال الاحمر … الكلية جانت بيها هواي اقسام .. اول واحد تعرفت عليه بالكلية من عده كم صديق اعرفه ابو الباب الرئيسي اسماعيل .. الي هو مسوول عن التفتيش و الهويات و الزي الموحد .. تعرفت عليه لان كل شوية اروحله اسأله فلان شي وين و فلان مكان وين ههههه جنت ما اندل شي بالكلية و بيها اقسام هواي (اني قانون جنت) بس اكو انكليزي و محاسبة و ادارة الاعمال … اكو طلاب بذاك اليوم قديمين يعني مو مرحلة اولى … و شفت بنات واكفات يصيحون على واحد اسمه علي .. علي جان المصور .. بس الصور مالته توب لقطات تخبل ياخذ .. البنات جانو يريدون ياخذون صورة بمناسبة بداية السنة الدراسية الجديدة  .. اني هالحجي كله كاعد استطلع الي ديصير بداخل الكلية لان جديد و حتى الاصدقاء الي اعرفهم من الاعدادية قليلين يعني ينعدون على الاصابع  وكل واحد بيهم ملتهي بروحه .. اني كلت لعد مدام هيج خلي احتفل بنفسي و اخذ اول اليا حتى تبقى ذكرى .. صورة اول يوم الي بالكلية و اخذلي علي صورة جانت بعدها مطالعة سالفة صورني و اني ما ادري ههههه بس علي سواها الي و كالي سوي نفسك دتباوع على ذيج الصفحة واني اخذلك صورة .. و سويتها ..
المهم .. بديت اداوم و اتعرف عالطلبة يوم ورى يوم و بديت اتعرف عالاساتذة و خصوصا الاساتذه الي من ضمن اختصاصي الي اتذكرهم استاذ رعد الجده جان هو العميد .. و دكتور نوار ابو الجنائي  و دكتور حيدر فليح ابو المرافعات و ابو الحقوق العينية دكتور عامر و ست الاء .. جانو يحبوني لان بصراحة احجيها جنت ملتزم .. يعني اجي بوقت المحاضرة و التزم بالزي الموحد لان اكو اساتذة اذا يشوفون لبس مو نفسه بالزي يطلعوه برى المحاضره .. عالعموم يوم ورى يوم كامت تصير عندي علاقات حلوة وي الكل .. و بيوم من الايام اكو اني جنت بالكافتريا و اكو طالبة مسوية عيدملادها طبعا احنا دوامنه يختلف وياهم بالاوقات بس مرات نبقى بالكلية علمود نلتقي بناس نعرفهم بغير اقسام ..
هي عازمة صديقاتها بس بداخل الكلية ..  قسمها انكليزي .. و طبعا جايات وياها صديقاتها من غير كليات .. من بين الجايات شفت نفس البنية الي شفتها بالحبانية و هالصدفه جانت صدفه بالاحلام متصير .. من شفتها كمت من الطاولة الي جنت كاعد عليها و بقيت افتر يمين و يسار اكول بيني وبين نفسي هيه لو مو هيه .. و احجي وي روحي والله العظيم احجي اكول هيه لو مو هيه لك هيه هيه هاي ام الريشة هيه .. و حاولت ابينلها نفسي بس وين تذكرني اني اتذكرها لان شكلها حلو و شكلها مينسي بس هيه وين راح تذكرني مستحيل و من سابع المستحيلات تتذكرني واصلا اني شكلي مجمعر يعني ما بيا شي يلفت الانتباه .. و قررت احاجيها وكلت هالمرة متضيع مني مثل الحبانية .. و بقيت ااشرلها هي تباوع عليا بس تسوي نفسها ملتهيه وي البنات و على اساس دتسولف .. بس هي جانت تشوفني و اخير شي ضاجت جان تكول لصديقتها الي هي من نفس الكلية عليا .. البنية صديقتها كامت تباوع عليا و شكلها ضاجت .. اني هنا خجلت بصراحة ..و قررت انتظرها برى و عفت حتى الدوام .. انتظرتها و طبعا اني بذاك الوقت الحمدلله عندي سيارة برازيلي .. و مراح اكول اشتريتها بفلوسي لان جنت اشتغل و هالحجي .. لا والله جنت معتمد على اهلي لان الحمدلله والدي وضعه زين …  السيارة  سيارة اخوية الجبير انطانياها لان راد يبدل سيارته و ياخذ احدث .. صعدت بالسيارة و بقيت انتظرها تطلع .. و طلعت و جان اكو ولد شاب بعمري دينتظرها برى .. الولد شاب يخبل .. صعدت وياه و هنا اني حسيت بنفس الشعور الي حسيته بالحبانية من شفتها دترجع لبغداد .. و كلت خلص الموقفين الي جمعوني بيها مواقف عابره و جانت مجرد صدفه بس البنية مو الي و اصلا اني شحاجي وياها و لا اعرفها و هاي طلعت مرتبطة .. نزلت كملت دوامي و ثاني يوم داومت و شفت البنية الي بقسم الانكليزي ام العيدميلاد بالكافتريا بس جانت تباوع عليا .. و جانت مركزة وياي .. اشو ركزت بيها حلوة هاي .. ابتسمت بوجهها هي ابتسمت .. و وراها بيومين سلمت عليها ردت السلام .. كيفت اني .. و حاجيتها .. و بديت اتعرف عليها و حجي جان طبيعي و كالت اني ادري بيك انته عينك عليا من يوم العيدميلاد .. هنا اني معرفت شكول خو ما اكلها لا جنت اباع على صديقتج الحلوة .. كلتلها هاااا يعني حسيتي .. كالت اي و بديت من صدك احبها .. و حبيتها و هي حبتني .. و كمنا دائما نلتقي بالكلية و نسولف و نحجي و اخذت رقم تلفونها و بديت اعيش الحب و احلى لحظات عمر الانسان من يحس هالاحساس ..
و اربع سنوات علاقتي بيها نظيفة الحمدلله و ما طلعت مني اي كلمة مو حلوة .. و تخرجنا و بقت علاقتنا و بمساعدة اهلي و رب العالمين تقدمتلها و خطبتها (طبعا ورى مشتغلت يله تقدمت) .. بس الي صدمني ههههه بيوم الخطوبة جتي البنية الحلوة و اجه وياها نفس الولد الي شفته ينتظرها برى .. و خطيبتي سلمت عليهم .. اني سويت نفسي اطرش بالزفة و على اساس ماعرفهم .. سألتها كلتلها هذولة منو .. كالت هاي سماء و اخوها احمد .. سماء صديقتي من ايام الابتدائية و جانو جوارينه و شالو و بقينا نلتقي بس بالمناسبات ومرات نحجي تلفونات .. كلتلها اخوها ؟؟
كالت اي اخوها التوأم .. كلتلها اي والله صدك يشبهها هذا .. وطبعا احتفظت بالسر بداخلي وخفت اكولة كدام خطيبتي .. لان اذا كلته راح تكول يعني جنت تباوع عليها مو عليا .. و بنفس الوقت اني غبي لان مفكرت هذا اخوها من شفته بباب الكلية ينتظرها …  عبالي عائلتها كلها عبارة عن اخ صغيروني واخت و ام واب مفكرت عدها اخ و يطلع مجاي وياهم للسفرة بالحبانية … تصير قابل متصير هههههه  يعني واحد معاجبه يروح و همه جوي وحدهم ..
بس سبحان الله قسمتي هيج صارت و قدري هيج .. و وراها تزوجنا وطبعا هالحجي كله قديم … ورى سنتين من الزواج حجيت لزوجتي بس جنت خايف من ردة فعلها …
طبعا ماتت من الضحك و المصيبة خابرت سماء حجتلها و اصلا سماء تذكرت الموقف و اني من جنت ااشر بالكلية سماء عبالها دأشر لزوجتي مو الها .. لان اني اصلا ماعرف اسوي هالسوالف ....  و شاهد الله سماء حاليا (ام علي) اكثر من اختي و عدها وكفات ينشد بيها الظهر .. و اخوها اكثر من اخوية .. و علاقتنا بيهم علاقة اهل .. بس هاي الحياة .. طبعا اصدقائي كلهم تزوجو بس كل ميريدون ينصبون عليا ورى هالعمر يخابروني مكالمة جماعية و يكولون مشتاقين نروح للحبانية نلعب ريشة ههههههههههه .. اني اكلهم غير قديمين ..  همه يعرفون القصة كلها بس هاي حياة الانسان .. كلنا نتوقع قسمتنا بمكان بس تطلع بمكان ثاني .. وابسط شي قصتي وي زوجتي و حبيبتي و وي ام علي (سماء) .. و الله يحفظكم و يحفظ الجميع ..
(المحامي)
انتهى
اخوكم ابو بغداد سايق التكسي
#ابوـبغداد
روابط صفحات القصص ..

https://vm.tiktok.com/ZMeLYRHDw
صفحة التيك توك  للقصص القصيرة …

https://www.instagram.com/iraq.txei/
صفحة الانستغرام للقصص المصورة …

https://www.youtube.com/channel/UCER9QkmohGeDKgFFQ8WNAxA
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …

و صفحة السناب بالصورة الشخصية للصفحة و شكرا لكم ..