قصص عراقية حقيقية بقلم ابو بغداد سائق التكسي

تقلصات طائفية ج١

نسيت قبلها بيوم اشتري قوطية (علبة) سكرين جديدة .. و ثاني يوم ساعة خمسة الصبح كعدتني زوجتي كالعادة بذاك الوكت …. كعدتني حتى أتريك و اروح بالبداية للبانزين خانة الزم سرى و ساعة بثمانية افول السيارة و اطلع على باب الله .. كعدتني و كالتلي حبيبي ترى السكرين خلص كلتلها عادي اشربه بدون حلاء تعودت ترى .. ابو السكر يوم ورى يوم يتعلم على كلشي مر .. و اني تعودت .. عمري ٥٩ سنة .. صاحب عائلة مكونة من اربع افراد .. زوجتي .. بنات ٣ .. بناتي ثنين منهم كليات .. و الصغيرة اعدادية .. زوجتي موظفة سابقة بوزارة الري .. اني هم جنت موظف بس تقاعدت .. ميول دينية ماعندي و لا حتى سياسية .. يعني بالاسم (مسلم) زوجتي من طائفة و اني هم من طائفة اخرى .. سكني بمنطقة تعتبر منطقة حيادية في بغداد و سكانها من المكونين (س) و (ش) .. جنت اشتغل تكسي بذاك الوقت لأن التقاعد ميكفي و عندي ايجار و بنات ٣ طالبات .. و اضافة لهل الشي اني صاحب مرض بيا سكر و ضغط و شغلات ثانية .. شربت الجاي و تريكت و طلعت لزمت سرى بالبانزين خانة .. اخذت غفة هناك بالسرى لان اني واكف ساعة خمسة ونص تقريبا و هي تفتح ساعة ثمانية .. كعدت على صوت ضربات عالشباك مال سيارة .. واحد من الواكفين شافني نايم كعدني (حجي حجي اكعد فتحت البانزين خانه) كعدت و كلتله اشكرك وليدي و تقدمت بالسيارة فولت و طلعت استرزق على باب الله .. اخذت كراوي هواي و جنت اسمع من الي يصعدون وياي قصص و سوالف تخوف على سالفة الطائفية الي بذاك الوكت جانت موجودة بالشارع .. ما اكول مجنت خايف بس بنفس الوقت اكول بيني و بين نفسي اني على باب الله يعني ممعقولة يوكفوني يكتلوني علمود طائفتي .. و شي ثاني اني متوكل على الله .. والي يتوكل على الله ميخاف ..

المهم .. صارت الدنيا ظهرية و كفتني مرية جبيرة بالعمر .. كالتلي لفلان منطقة (طبعا هالمنطقة صايرة نصين س و ش و بيها نزاع طائفي قوي كلش) كلتلها حجية اسف ماروح .. كالت فدوة اروحلك ترى رجليناتي راحو من الوكفة و هاي خامس واحد ميروح ترى والله ماكو شي .. كلتلها صعدي بقت يم الله بعد .. صعدت الحجية و وصلت للمنطقة البيها نزاع طائفي .. وصلت والحمدلله مجان اكو شي بس صوت طلقات بعيد .. و دوريات مال امريكان تروح وتجي .. نزلتها للحجية و طلبت منها تجيبلي مي بارد .. جابتلي مي بارد و شربت و رجعت طلعت .. مشيت تقريبا دقيقتين و بعدني مطالع من المنطقة شفت شباب واكفين و شايلين سلاح … ياستار استر هذولة يخوفون .. وكفوني اشرولي بيدهم اوكف .. وكفت و اني اعرف هذولة سيطرة وهمية بس شسوي مابيدي حل الشارع بي مخرج واحد و اذا ارجع عالبك يضربون عليا و اني اصلا ماعندي شي سايق تكسي على باب الله اخاف ارجع ليورى عبالهم عندي شي .. و اصلا اني رجال جبير قابل شعندي .. وكفت .. اجاني واحد بيهم كالي انزل حجي .. نزلت و صرت وياه وجه لوجه .. كالي انته منين .. كلتله من فلان منطقة و سايق تكسي وليدي .. كالي اصلك منين كلتله عراقي .. كال شو انطيني هويتك انطيته الهوية و الظاهر جان اكو واحد ورايا واكف بس منتبهت عليه .. قرى الهوية مالتي و اشر اشارة للواكف ورايا و بعدني ستوني دادير وجهي ملحكت ادير وجهي اجتني ضربة على راسي بحديدة وكعدت بالكاع على وجهي و اجاني صوت قوية كلش و فجأة …………….