قصص عراقية حقيقية بقلم ابو بغداد سائق التكسي

ابو سهاد

چنت بس اسمع الصياح و الغلط اصعد ركض للبيتونه .. اكعد يم صناديگ الحليب و الببسي الفراغات و بصف الغراض المكسره .. و من كثر ما اختل هناك چنت مرتب مكان بنص الهوسه مال غراض .. عدنا كوشات قديمة من هاي المطرز عليها فراشات و ملمسها ناعم بس قديمات و بيهم شگوگ  .. جنت مخليهم و حاصرهم بنص الغراض .. اكعد عالكوشات و اختل هناك و اسد أذني و كل شويه اوخر أيدي و اسمع الصوت مال الصياح اذا ماكو صوت اروح أتقدم عالدرج و انزل بايه بايه .. و من احس العركة خلصت انزل و گبل اطلع برة للطرمة .. اروح العب بأي شي حتى الهي نفسي ..
أبوية چان كلش قاسي على أمي .. و چان يضربها لأي سبب تافه .. بس الي افتهمته بمرور الوكت و من بديت اكبر ... انو أبويه عديم الشخصية برى البيت .. و جبان كلش و چان يطلع قهره و ضوجته بالمسكينة أمي .. اني الوحيد الهم .. ماعندي لا اخ و لا اخت .. أبويه حالته المادية كلش زينة .. علاقات نسائية ماعنده و لا يشرب بس محد يحبه غير بس أصدقائه النايمين براسه ... و فوك كل هالشي چانو ميحترموه و يحركوه على أمي وهالشي سمعته بأذني .. مرة چانو يريدون يروحون سفرة للحبانية أبويه و جماعته و طبعا الروحة بسيارة أبوية .. چانو گاعدين يتفقون بالصالة مال بيتنا .. أبويه بوقتها چان عنده مواعيد مال شغل و گالهم يمكن مراح ترهم .. گالوله لا شغل و لا شي انت جبان تخاف من مرتك لان متقبل تبات بره .. أبويه گالهم تخسى اني اخاف .. گالوله لعد اذا هيج زلمة انته خلي نروح و لا تخربط السفره مالتنا ... يعني (چانو يدفعوه حتى يوديهم للسفره) و هو رأسا قبل و گالهم مدام صار هيج الحجي لعد نروح و كلهم كامو يضحكون و گالوله هلا هلا هاي الزلم المعدلة ...
و بنفس اليوم ضرب أمي .. بس الي مدوخني چان مدللني إلى درجة مصروفي اليومي و البايسكلات الي عندي و الألعاب ابن وزير ماعنده بگدي هالسوالف .. جان متناقض بتصرفاته بالبيت .. وي أمي نار و شرار و وياي مثل المي بالصينية .. بس اني جنت أكرهه لان أمي المسكينة أشوفها يوم ورى يوم تذبل كبال عيوني و ماكو شي يفرحها .. مشى الوكت و أمي شالت كومة أمراض من وراه صار عدها سكر و ضغط من الهبطات .. اني كبرت و بديت أدافع عنها .. ما اقبل يغلط عليها لو يلمسها و اول مره بالحياة اشوف ابن يدافع عن أمه لان الي سمعناه و شفناه بحياتنا الابن يركض يختل ورى امه من يتعرض لخوف مو العكس .. الأم تختل ورى ابنها !!!
و بليلة و يوم والدتي توفت .. الدنيا انهجمت عليا بيوم وفاتها و جوي گرايبها الي بعمري مشايفهم اني لان أبويه ميقبل يسوي اختلاط وي أهلها و دائما چان يگول عليهم حرامية و يدورون مصلحتهم و يردون يأخذون مني وبس ..
الي شفته همه غير الي يكوله عليهم .. ناس طيبين و محترمين .. ثامر بالواجب و راحو ..
ورى وفاة أمي كرهت أبويه بالزايد لان اعرف السبب الرئيسي لوفاتها هو قهرها و تعبها من عنده ..تغيرت كلش وياه و گمت احاول ارجع للبيت متاخر دائما حتى ما احجي وياه .. إلى ان فد يوم تعارك وياي و اني طگيت بوجهه و گلتله شنو موتت أمي و هسه تريد تموتني لان ماكو احد تضربه لو تتعارك وياه .. هو سكت مجاوبني لان يعرف هو موتها لامي ..
اني من توفت والدتي بديت اشرب و چنت ادور كلشي غلط اسوي .. ومره من المرات تعاركت و ضربت ولد بكرك على چتفه و انشك چتفه و صارت گعده و اخذو فصل من أبويه .. بذاك اليوم حسيته انقهر و كيفت بصراحة .. گلت بيني و بين نفسي والله الا اندمه على كل شي سواه للمرحومة .. گمت ابوگ فلوس من وراه و اصرف على جماعتي .. و گمت اتداين من المحلات الي بالمنطقه و ما اسدد الحساب (حتى لو عندي) و كل ميسألوني عالفلوس أكلهم اخذو من أبويه .. چان يتعارك وياي و يتعصب و اني اكيييييييف و ارتاح بيني و بين نفسي ..
إلى ان بيوم من الأيام سويت مشكلة چبيره من ورى بنية .. و وراحو أهل البنية لأبويه لشغله و تعاركو وياه و هو تخربط و اخذوه للمستشفى .. اني بيومها انهزمت لبيت گرايب أمي و سالوني ليش هيج اني مخربط و ليش هالمصايب ...
بصراحة بذاك اليوم حچيت كلشي و گلتلهم هو موت أمي و اني كل الي داسوي و راح اسوي بسببه .. گالو لا انت هيچ كاعدً تأذي ناس مالها شغل بابوك و بافعال ابوك و كاعد تأذي نفسك و سمعتك لان الرجال هم سمعه .. و گالو حتى لو ابوك مو زين يبقى ابوك .. گلتلهم كتل أمي و مرضني لدرجة انام و احلم بذيج الأيام الي جان يضرب المرحومة و يصيح عليها و گمت ابجي بس بجي بحرگة گلب .. حضنوني و گالو كلشي يتصلح و لازم ترجع للبيت و ترجع لدراستك لان اني جنت مبطل .. و أخذوني للبيت و جان أبويه حال الموضوع وي أهل البنيه و ساد المشكلة .. رجعوني للبيت وهو ماعنده غيري احد و يحبني رغم كل الي داسوي ... گعدنا و حچو وياه أهل أمي و گالوله راح يتغير و هو عرف غلطه .. اني گمت وگفت وگلتلهم زين اني اتغير ماشي بس اريد أمي .. گالو حرام هالحچي أمك يم رب العالمين .. گلتلهم هو السبب بعركاته و ضربه الها خلاها تموت ناقصه عمر .. گالو حرام كل واحد بينا يروح بيومه .. هو گام عافنا كلنا گاعدين و راح لغرفته .. و ورى مفات لغرفته گرايب أمي راحو و اني رحت لغرفتي ... بيومها سمعته يبچي و اول مره بحياتي اسمع أبويه يبچي .. من ذاك اليوم تغيرت اني و رجعت للدوام .. بس علاقتي بي جانت علاقه عاديه يعني كلام و حجي على كد الموضوع و بس .. لان بصراحة ما أكدر أتقبله ابد .. و تخرجت اني و بالوظيفة تعرفت على موظفة بنت أوادم و صار بينا علاقه و حجيتلها كلشي من الألف للياء .. البنية چانت تهون عليا الي صار بيا و چانت دائما تكلي الضار صار و ميصير تبقى عايش بالماضي .. لان بصراحة اني كئيب .. و هالبنيه غيرت بيا أشياء هواي و صارت من قسمتي بالنهاية .. و تزوجتها و صار عندي سهاد و رواء .. سهاد الچبيره و سميتها على اسم أمي و جان أبويه كل ميلعبها عيونه تدمع لان يحس بغلطه .. و بعد سبع سنوات من زواجي والدي التحق بأمي و الله يرحمهم ثنينهم .. و حاليا اني بتركيا عايش بمحافظة أسكي شهير لان صار عندي شغل هنا و الحمدلله على كل حال .. بس الي اتحاشا دائما حتى لو يصير سوء تفاهم لو شد بالحجي بيني و بين زوجتي دائما اخلي الموضوع يصير سري مو كدام بناتي لان ماريد يشوفون الي شفته و الحمدلله علاقتي بزوجتي كلش زينه بس مستحيل ميصير اكشن بالزواج بس اهم شي ينحل بدون ميكبر و ينتهي بسريه ..
(ابو سهاد)
انتهى
اخوكم ابو بغداد سايق التكسي
#ابو_بغداد