قصص عراقية حقيقية بقلم ابو بغداد سائق التكسي

الله يرحم شهدائنا الابرار

فد يوم صعد وياي ولد كروة مرجع .. الولد جان شكلة خايف على مهموم .. يعني بي شي خطية ..
كعد بصفي و يدخن جكارة ورى جكارة .. و ساكت خطية .. بس يجر حسرات ..
يمكن لو اي واحد بيكم يصير بي الموقف راح يكله خير شبيك !
لان وضعة ابد مو طبيعي المسكين ..
كلتله خير خوية شبيك ؟
كال خويه شايل حمل مشايله بشر و ما اعرف شسوي ..
كلتله شلون سولف ؟؟
كال تدري انت وين موديني هسة ؟
كلتله غير لفلان منطقة ..
كال لا اقصد تعرف ليش رايح هناك و شراح اسوي ؟
كلتله لا طبعا الله اعلم ..
كال خوية اني رايح لبيت ناس لا اعرفهم ولا يعرفوني و لا حتى اندل البيت بالمضبوط .. رايح انقللهم خبر موت ولدهم ثنين بحادث على طريق وحدة من محافظات ابونا العراق ..
كلتله لا كول غيرها يمعود ..
كال اي والله خوية اني اشتغل بالنقليات و هم سايق .. و صاحب المكتب الي اشتغل الي هو نفسة صاحب التريلة الي اندعمت هو حملني هالسالفة لان ميكدر يسويها ...
كلتله وشلون صار الحادث !
كال اخوة ثنين بعمر الورد .. الجبير سايق و الاصغر منه يطلع ويااه يكعد بصفة يعني يساعدة هيج شي .. عالسريع مال فلان محافظة انكلبت السيارة هي والحمل و ثنينهم توفو المساكين و اصلا انهرسو هرس الف رحمه على روحهم لان الراس مال تريلة صار مثل القوطية و انطبك فوكاهم طبك ..
كلتله ياستار خوية ..
كال اي والله و السواق بباقي التريلات همه اتصلو بأبو السيارة (يعني صاحب المكتب مال نقليات و صاحب السيارات) .. و الرجال حملني السالفة و كالي راح يبقى راتب الولد ماشي منا ليوم الدين ..
و صدك مراح يقصر وياهم لان الرجل الله ممكنة و صاحب وكفة ...
بس ما يكدر ينقل الخبر و دزني اني و دز وياي فلوس يعني مال فاتحة و هالسوالف و ما قصر الرجال بس يكول ما اكدر انقل هيج خبر و بعمري مصايرة بيا ..
كلتله خوية الله يساعدك والله صعبة .. يعني الناس منتظرين ولدهم يرجعون من الشغل و انت رايح تكلهم ولدكم ماتو و بعد متشوفوهم ..
و ياريتني محجيت هالكلمتين .. بس كلت هيج طك من البجي الولد و بصراحة اني هم انعصرت عصر و كمت ابجي .. لان صعبة ياجماعة الخير والله صعبة ..
وصلنا للمنطقة و سألنا و دلونا اهل الخير على بيت الشباب ..
خطية جهال يلعبون بباب البيت و رجال شايب كاعد عالرصيف يباوع عالجهال ..
نزل الولد الي وياي و اني بصراحة مكدرت انزل لان السالفة متتعالج لا بحجي ولا بأسلوب ..
و الله لا يخليكم بهيج موقف لان مصيبة والله مصيبة ..
نزل و كام يحجي وي الرجال و طبعا اني ما سمعت الحجي لان صوت الجهال و هوستهم و صوت الناس الي بالشارع رايحة جاية ..
كعد بصفه عالرصيف و بده يسولفله .. و خطية شكل الرجال انكلب بعد مجان مبتسم وي الولد .. شايفين مرات يطلعون بالبرامج مال نباتات شلون يثبتون الكامرة على وردة لو فد نبات .. و تطلع مراحل النبات من يعيش لحد ميذبل و يموت ..
تماما هيج الرجال الله يحفظة صار وياه ..
شكله بالبداية جان مبتسم و يسولف وي الولد و تدريجيا كام يتحول خطية لحد ما طكها ببجية .. و نزع نظارته و طلع جفية من جيبه و كام يمسح بيها دموعة ..
اني اباع عليه و ابجي و حتى الولد حضنه و يبجي ..

يابوية غير موقف والله العظيم كل مرة اكعد كبال الكمبيوتر و اريد اكتب هالسالفة و اكتبها للنص و امسحها بس اليوم انسألت على اصعب موقف بالتكسي صار وياي و كلت اكتبه الكم ..
الحاصل ..
كام يبجي و صوته كام يوصلني رغم هوسة الجهال و الناس الي بالشارع .. و اكو جوارينهم يعني هم واكفين يم الابواب لان دنيا عصرية ..
من شافو كام يبجي جوي و بدو يلتمون ..
و ما احجيلكم من دخل الخبر جوى للبيت ..
صياح و بجي .. حتى الجهال الي جانو يلعبون كامو يبجون على بجي جدهم و النسوان بالبيت ..
المهم اجه الولد صعد وياي و رجعته بس الطريق كله يبجي ..
هاي اصعب كروة بحياتي شلتها والله ..
والله يحفظكم و ينطيكم الصحة و العافية .. و يحفظ ابونا العراق و كل العراقيين ..
و الله يرحم شهدائنا و امواتنا يارب ..
انتهى
اخوكم ابو بغداد سايق التكسي
#ابو_بغداد