قصص عراقية حقيقية بقلم ابو بغداد سائق التكسي

الاصدقاء

ديربالك من البسامير الي بالرحله قبل متكعد شوف اخاف خشبه لو بسمار طالع … جانت امي تحذرني هالتحذير قبل ما اروح للمدرسة .. لان اكثر من مرة البنطرون انشك بهل البسمار … و مرات اذا اكو خشبة بالرحله شوية بيها كسر .. تطلع منها شغله احنا نصيحلها سلايه بس تكون شوية اكبر من السلايه الصغيرونه الي تفوت بأصابيعنه .. هالخشباية الصغيرونه اذا تلزك بالبنطرون (تسلته) .. اذا جان قماش .. بس اذا كابوي اي بسمار هم يشكه .. علمود هالشي جنت اسمع هيج تحذير قبل ما امشي اني وجنطتي و كتبي اروح للمدرسة .. يعني يم باب الحوش اسمع هالتحذير .. و طبعا جنت اول شي اسوي من اوصل للصف اتلمس بيدي الرحله .. خصوصا اذا قبلها بيوم الصف منظفي .. لان بكل تنظيفه للصف الرحلات تتغير مكاناتها (شلون الپواله مال دومنه ورى كل لعبه نخبطهن هيج بالضبط) … يعني رحلتي الي متعلم اكعد عليها يتغير مكانها .. مع العلم اني اعرف رحلتي لان هواي كاتب عليها بالقلم الرصاص و راسم عليها هم .. و اعرفها هم من الخشبه التحتيه .. الرحله جانت مقسمة ٣ اقسام .. القسم الاول هي الخشبة (المقعد) الي نكعد عليه .. و القسم الثاني هي الخشبة نخلي عليها الكتب من نقرا .. تصير سطحيه فوك .. بس اكو خشبه جواها الي هي القسم الثالث و الاخير .. هو المكان مثل المجر بس هو مجر .. هو مكان مثل المخبأ نضم بي الكتب بس قليل جنا نستخدمه .. لان اغلبنه بالابتدائية ميرتاح اذا مياخذ جنطته وياه وين ميروح .. خصوصا الجنطه هي كلشي و كلاشي بالنسبة النا بذاك العمر ..
يعني هسه اكو جندي بدون سلاح ؟؟
اكو دكتور بدون سماعة فحص ؟؟؟
اكو لاعب كرة قدم بدون طوبه ؟؟؟
اكو فلاح بدون كاع ؟؟
نفس الشي ماكو شي اسمه طالب بدون جنطه و كتب ..
و طبعا من عده الكتب اكو الوجبه الرئيسية الي بالعلاكه (الجيس) المخطط ابيض و ازرك .. لفة الكبه لو لفة الكباب (عروك) لو لفة البيض السلك .. و الشيفين مال طماطة .. و كم قرص صغيروني بكد قرص المرايا مال المقطاطة المدورة الي جنا نلعب بيها و نستخدمها استخدامات عديده (دعابل نلعب بيها و المرايا نعكس بيها اشعة الشمس) ..  بحجم المرايا مالتها كم قرص من الخيار  بنص اللفه … يعني بنص الخبزايه.. و برتقالة لو لالنكيه.. جان ماكو تفاح و موز بذاك الوكت .. للأمانه تفاح اخضر صغيروني اكو .. من هذا الحامض .. بس تفاح احمر (يلمع لمع) ماكو  و الموز نعرفه من صور كتاب (الحياتيه) .. و طبعا الكتب هم و المحفظة مال الاقلام و المساحة من هاي الي بيها مغناطيس ..
المهم … جنا منستخدم الخشبة رقم ٣ من الرحله استخدامات هواي …  بس اني اعرف رحلتي .. من الخشبه رقم ٣ لان تنسحب بالايد .. مو مثل باقي الرحلات مثبته ببسامير .. الظاهر مكسورة .. جنت مرات اسحبها بيدي و حتى على هالخشبة ارسم لو اكتب شغلات .. جنت من تتغير رحلتي اروح ادور عليها بنص الرحلات .. و اكول لأي واحد لو وحدة كاعدة عليها .. هاي رحلتي ممكن اخذها و انطيكم الرحله ذيج .. ماعرف ليش مجانو يكلولولي لا ابد .. دائما يقبلون .. يحبوني جانو و اني جنت احبهم للجهال الي من عمري .. و ماعرف ليش ولا مره تعاركت وياهم .. ولا همه تعاركو وياي .. صح جانت تصير مشاكل وي غير صفوف و جانو صف الثالث باء هواي يعتدون علينا بحجة همه اكبر من عدنا .. بس احنا صف الثاني أ .. جنا واحد يحب الثاني عبالك عائلة .. هسه هالحجي كله الي كتبته .. لان مشغل كارتون اسمه جونكر .. و تخيلت يوم من ايام الابتدائية .. زين الطلاب الي جانو وياي اكيد كلهم ارتبطو و تزوجو و يجوز اكو بيهم (استشهدو) بسبب ظروف البلد .. بس السوال الي سألته لنفسي .. ليش احنا بصورة عامة العراقيين هواي مرتبطين بطفولتنه .. ليش نتذكر تفاصيل عن الابتدائية و نتذكر حتى اسامي المعلمات .. بصراحة اكو شخص من عمري (هولندي) صديقي هو .. من اسأله عن ايام الابتدائية يتذكر موقف او موقفين وبس .. اني اتذكر حتى المساحة مال الصبورة جانت اسفنجة صح .. بس جانت الاسفنجة على خشبه ملزوكه .. و حتى ريحة المعجون الي بالشبابيك جان من الحر و البرد يتكسر اذا تذكرون .. و يتطشر بالكاع و مرات جوى الشباك .. جانت ريحته كلش مميزه .. التراب الي بين الصفوف و الممرات هم بي ريحه اتذكرها .. السلة مال الزبل (مكرم القارئ) الي بزاوية الصف قريبة من الصبورة (الزركة لو الحمره المشيفة النايلون) من جنا نكول للمعلمة (ست ست اريد اقط القلم) و نروح نوكف يمها حتى هاي اتذكرها .. حتى اكو مرات من جانت تصير مناسبات مدرسية .. و نسوي نشرات (جانت مو حاظره) بالايد نسويها .. نشتري ورق ملون من المكتبه و نكصه على شك مستطيلات (بعرض المسطرة وشوية كصيره) و نلزكهم وحدة بوحدة بالاصق الشفاف يصيرون دائرة و نفوت دائرة بدائرة حتى يصيرون نشره هم اتذكرهم و اتذكر مكانهم وين جان بالصف .. الفراشة خاله ام رعد هم اتذكر شكلها (كصيرونه و مدكدكه على جف ايدها) و دائما لابسه شيله بيضه و دشداشه سودة لابسه .. جانت تبيعلنه لفات مال حب و جياسه مال نبك بس هو مو نبك ما اعرف اسمه بالضبط شنو .. جان بحجم النبك بالضبط بس طعمه مو نبك و هش كلش .. و الداخل مالته مثل الاسفنج من يتفتفت .. يلزك بالحلك .. بس طعمه طيب .. حتى هالشي اتذكره .. زين اني هسه حجيت جزء من يومي بالمدرسة انتو شتذكرون من الابتدائية ؟؟؟
هم مرات تشوفون شي ينشطلكم كل تفاصيل الصف و صوت الجهال بالفرصة وصوت الجرص ..
عالعموم … تعرفون شنو امنيتي .. اتمنى يوم واحد بس يوم .. ارجع امشي للمدرسة و على ظهري الجنطة و لابس هذا البوت مادري جزمه ام الفرو الابيض .. تذكروها .. لونها ازرك و مال بنات وردي .. يوم واحد و جيس اللفه وياي .. يوم واحد اكعد بنص الطلاب اباوع عليهم و اسلم عليهم .. يوم واحد امسح بي الصبوره و اوكف بالزاوية اقط القلم .. يوم واحد اكول ست ست ست و اجاوب على السوأل و ابتسم وي الطلاب .. بالمناسبة .. اني مرات من اكتب وياكم بالتعليقات هنا و من اقرا تعليقاتكم بالقصص وروح امي وروح ابويه اتخيلكم كلكم (الي من عمري يعني مع احترامي للي اصغر مني و الي اكبر مني) وروح اهلي اتخيلكم كلكم جنتو طلاب وياي بالابتدائية و رجعنا التقينا هنا بهل الصفحة .. بالمناسبة ارجع و اعيد الشي الي دائما اسوي .. اني دائما افوت على صوركم بالصفحات الشخصية و اقرا شكاتبين بصفحاتكم .. و اكول من ارجع للعراق يجوز اشوفكم صدفه بالشارع اني راح اعرفكم (لان هم اصدقاء هنا) و هم اصدقاء بالابتدائية بالصف … عالعموم صباحكم خير و بركه و نشاط .. يله راح تصير الفرصه .. حضرو لفاتكم و مطارات المي …
انتهى
اخوكم ابو بغداد صف الثاني أ
#ابوـبغداد