قصص عراقية حقيقية بقلم ابو بغداد سائق التكسي

قدوة الصف

بصف ثالث ابتدائي جان عدنا معلمة اسمها ست ابتهال … و عدنا بنفس الوقت طالبة اسمها هم ابتهال .. علمود تشابه الاسم جانت هالطالبة مميزة بنظر الطلاب الي بالصف .. بس اني جنت اكرهها و يمكن جنت اغار منها (مع العلم اني ولد وهي بنيه) .. جانت رحلتها أول رحلة بالسرى اليمين الي بصف باب الصف .. فوك راسها جان السويج مال البنكة و السويج مال الانارة (يعني الدكم مال شمعات الصف) و المكروهه مسويه رسمه و شعر معلكتها فوك راسها فوك السويج مال البنكه .. حتى مره شكيتها و سوت غيرها …
جانت كل متنترس الصبورة كتابة و ست ابتهال تكول منو ينظف الصبورة هي تكوم ركض حتى جنت اكول لكريم الي كاعد بصفي و مقاسمني الرحلة (باع باع اللوكية عبالك الصبورة مسجله بأسمها) .. جان كريم يضحك .. و حتى مرات من جانت تصير سالفة (انتخابات)  من الطفولة عدنا انتخابات .. ننتخب قدوة الصف .. جانت هي توزع الاوراق الصغار الي نكتب عليها اسم الطالب الي راح ننتخبه و اكيد ابتهال صارت قدوة الصف ليش .. لان عدها شعبية بسبب أسمها و تفاعلها بالصف .. مرات جنت احاول ااثر على شعبيتها و احجي كبال الطلاب البقية بالفرصة عليها … جنت اشوفهم يضحكون بوجهي و بعدين اشوفهم نفس الطلبه يحجون وياها و يتلوكولها خصوصا من صارت قدوة .. هي جانت تتحاشى التعامل وياي .. ليش ..
لان اول شي اتعارك هواي بالمدرسة و ثاني شي تشوف تعابيير وجهي من عيني تصير بعينها (مبين عليا اكرهها) بس هالشي ميمنعها ان تبتسم بوجهي و ابد ما فد يوم رجعتلها الابتسامة .. دائمها اسوي روحي متجاهلها .. مرت الايام و العمر مشى و هي بقت وياي لصف خامس ابتدائي بعدين تحولنه لمنطقة ثانية و انتقلت لمدرسة ثانية .. نسيتها تقريبا .. بقينا بالمنطقة الجديدة كم سنة و بمرحلة الاعدادية اكو بيت بمنطقتنا القديمة سعره جان مناسب كلش .. ابوية كال خلي نبيع هالبيت و ناخذه لان بي غرف اكثر من غرف البيت الحالي .. و رجعنه لنفس المنطقة القديمة .. جنت بوقتها بالاعدادية … بديت ارجع علاقاتي بالجهال القديمين (الي صارو شباب طبعا) و رجعت أكون علاقات جديدة هم .. طبعا لان اني من المنطقة سابقا مجان صعب عليا ارجع اسوي علاقات .. و بسرعه كونت علاقات و الشي الثاني الي خلاني (أنتشر) هي هوايتي .. اني هوايتي كرة القدم .. لاعب زين و اكيد ما اكدر اقيم نفسي بنفسي .. بس الحمدلله لعبي زين و لعبت بفرق شعبية هواي بذاك الوكت .. رجعت لمنطقتنه القديمة و رأسا لعبت بفريق .. انعرفت بالمنطقة بسرعه و كامو الشباب يلتقون يمي بكثرة خصوصا (احنا بيتنا بي اربع شباب غيري) يعني احنا خمس اخوه من عده اختي الوحيدة .. و اكيد لان شباب راح تصير عدنا علاقات هواي ..
الحاصل .. الساحة الي العب بيها طوبة مقابيلها اكيد اكو بيوت .. و احنا الي نلعب طوبه و اكيد الي راح يقرأ المكتوب يفتهمني (بعد كل لعبة طوبة بذاك الوقت لان جانت الساحات ترابية .. لازم نغسل وجهنا و شعرنا و رجليناتنه و ايديناتنه موقتا لحد منوصل للبيت حتى نسبح سبح كامل لان التراب يصير علينا من الساس للراس) .. مرة لعبنه بهل الساحة و طبعا بيتنا جوى بالفروع بعيد عن الساحة .. رحنا لبيت من البيوت و ابنهم صغير طلعنه الصوندة مال المي … غسلنا وجوهنه و كلنا ملتمين كبال البيت .. صدفه باوعت عالسطح مال البيت شفت بنية دتلم الهدوم المعلكة عالحبل لان حايطهم مال السطح مو عالي (ناصي شوية بعكس حياطين البيت الارضية) هي ما انتبهت بالبداية .. بعدين من سمعت الصوت تقربت عالسياج شافتنه رأسا وخرت و رجعت ليورى .. اني من شفتها بقت براسي صورتها .. كمت كل ما اروح العب طوبه هناك (بنفس الساحة يعني) اباوع على بيتهم لعل و عسى اشوفها ..  بس مشفتها .. و بصراحة ولو عيب احجيها ورى هالعمر .. مرات كمت البس هدوم حلوة و اروح اسوي نفسي اتمشى بنفس الشارع مالتهم بلكي اشوفها صدفه .. وهم ما شفتها .. بس متخليت على الفكرة نهائيا (يعني لزكت بالموضوع) .. و مرة من المرات شفتها صدفه بس مو يم بيتهم .. شفتها هي و امها بالسوك الي بمنطقتنا و طبعا لحكتها بيومها و هي حست اني لاحكها بس منطتني أي تلميح انو هي مهتمه .. و بقيت اكرر نفس السالفة (مال افتر بشارعهم بلكي اشوفها) و حتى مرة من المرات اكو شباب ثنين بفرعهم شافوني دائما اتمشى بالشارع .. سمعوني حجي أول مرة .. و ثاني مرة وكفوني .. كالو صارلك فترة تضرب قدم بشارعنه خو ما مضيع شي .. كلتلهم لا والله اني ترى بيتنا بفلان فرع حتى سألوني على شباب اعرفهم شافوني صدك ابن المنطقة ما حجو وياي بعد .. بس من ورى هالموقف قررت اقلل روحتي للشارع مالتهم .. بس كمت انتظر اشوفها بالسوك لان بمنطقتنا بس سوك واحد موجود وكل اهل المنطقة يتسوكون منه و يفترون بي .. و مره شفتها بس هي و اختها مو وحدها .. كلت خلص جتي عدله هالمرة احاجيها ميه بالميه .. لان بيومها ما عبالي اختها عبالي صديقتها .. و حتى لو عرفت بيومها اختها هم مو مشكلة .. المهم احاجييها وانطيها رقم التلفون .. بس لو امها وياها ما اكدر اسوي هالشي .. لحكتها و سمعتها حجي بس ما وكفت و اصلا ثنينهم كامو يمشون سريع .. كلت خلص لهنا و كافي … هاي البنية متريد تحجي وياي .. و عفت الموضوع بس البنية براسي .. و بيوم من الايام  جانت عندي لعبة بنفس الساحة ..
الجمهور الي يوكفون اغلبهم من اهل المنطقة بس هالمرة لان اللعبة وي فريق ثاني جان اكو جمهور جاي من المنطقة الثانية .. المنطقة الثانية هي بصف منطقتنا لزك .. ورى مخلصت اللعبة اجاني واحد مدعبل شعره مكعكل .. كالي انته مو فلان .. كلتله اي ؟
جان رأسا يحضني منو طلع (كريم صديقي بصف الثالث  و الرابع ابتدائي) حضنته و بوسته و كلتله وين رحت يمعود هواي سألت عليك محد عرف اخبارك .. كال مو شلنه منا ..   كلتله احنا هم شلنه فترة و رجعنه .. كال اي والله احنا كعدنا بفلان منطقة (يقصد المنطقة القريبة من عدنا و الفريق الي ضدنا منها) .. كلتله ايباخ شلون عرفتني .. كالي انته ممتغير .. كلتله بس انته هواي متغير حتى لزمت شعره كلتله شمسوي بروحك هههههه .. ضحك و بقى يمي و اخذته دليته بيتنا الجديد .. طبعا بقى يمي لليل و بعدين راح .. بالكعدة مالتنه بدينا نسولف و نحجي على الطلاب … و تذكرنا ابتهال .. جان يضحك كالي بعدك تكرهها .. كلتله اي والله .. كلتله مادري وين صفى بيها الدهر .. كالي اخوها جان صديقي فترة و بعدين تعاركنه و تزاعلنه .. كلتله طالع على اخته اكيد .. كالي شبيك بيتهم كبال الساحة الي هسه جنا يمها .. كلتله يا ساحه ؟؟؟؟؟
كالي الي هسه شفتك بيها .. من كالي هيج  كلشي توقعت كلشششششششي بس ابتهال تكون نفس البنية مستحيل .. حتى كمت اقارن بشكلها لان ٣ مرات شفتها لحد ذيج اللحظة .. ابد متشبهها .. حتى كمت احجي بيني و بين نفسي اكول معقولة هي .. لا لا ذيج تلعب النفس هاي كمر ..
بس للأسف طلعت هي ابتهال .. و طبعا بعدين عرفت هي نفسها ابتهال ..
المهم .. ورى ما حجيت وي كريم بقت علاقتي بي و كمت مرات التقي بي ..
زين .. اني بذيج الفترة جنت صف سادس .. كملت الاعدادية و دخلت كلية .. بالكلية كمت اركب وسائل نقل حتى اوصل للكلية حالي حال كل الناس .. الشارع العام مالتنا جان بي محلات يمين و يسار (عالسايدين يعني) … مرة راجع من الكلية .. بيومها ما كملت محاضرات لان جان عندي شغلة اريد اسويها .. رجعت و بالطريق مال الرجعه راكب بكوستر .. بصف الشباك كاعد .. اباوع عالناس و صدفه شفتها وحدها دتمشى .. رأسا عرفتها .. بس عرفتها صحت بصوت عالي ناااااازل حتى اكو بصفي رجال جبير فز من صوتي جان يكلي ليش ما تشتغل مؤذن .. ضحكو الي بالسيارة و اني اعتذرت منه بسرعة و نزلت .. ركضت وصرت وراها .. كلتلها يابه على كيفج هسه اني شرايد قابل هي حجاية .. مندارت عليا .. بقيت اسرع خطواتي و كلتلها زين كلمة على الاقل .. جان توكف و ذبت حسره اوووف ( بس الا اوووف جانت مصطنعه) على اساس ضايجة .. كلتلها يابه على كيفج .. جان تكول انته متستحي وين ما اروح تلحكني مرة بالسوك مرة هنا ..كلتلها يعني تذكريني .. كالت شتريد مني .. كلتلها ماريد شي بس عندي امتحان رياضيات و محافظ جدول الضرب … ضحكت كالت واني شعليه .. كلتلها اوف صدقه لهل الضحكة تدرين أول مره اشوف ملاك يضحك .. كالت يعني على اساس شايف ملاك قبل .. كلتلها اي انتي .. جان تكول دروح و دارت ظهرها و راحت بس مرجعت أني .. بقيت وراها .. هي تمشي و تحجي واني وراها اسمع حجيها .. كل شويه تكول كافي روح واني مستمر وراها و احجي .. كالت بس فهمني شتريد ترى هسه اذا اخويه لو ابوية يفوتون صدفه منا يموتوك والله .. كلتلها شكو بيها اصير شهيد الحب ..طبعا هالحجي هي تمشي واني وراها .. اخر شي بسرعه كتبت الرقم و كلتلها بس حاولي تخابرين ورى العشره .. طبعا مقبلت تاخذه و من كمنا نتقرب على الفروع المتصله بفرعهم اني خلص رجعت .. و ما اخذت الرقم مني .. بس كيفت ليش .. لأن عرفت هي وين تداوم .. و كيفت هم لان عبالي مو ابتهال (حسبت عمر ابتهال و حسبت عمر هاي فرق اكو) لأن ابتهال بعمري المفروض هسه كليه .. و طبعا بذاك اليوم اني مادري بيها ابتهال مثل مكلت ..
و هالشي أكدلي الموضوع لان كريم بيوم الي شفته ما حددلي البيت بالضبط بس كالي كبال الساحة و بس ..
المهم .. بنفس اليوم رجعت للبيت كملت شغلتي و ثاني يوم قررت ما اروح للكلية حتى انتظرها بوقت الطلعه مال مدرستهم .. لأن اذا اروح واكمل دوامي مراح الحك اشوفها .. لان المرة الي شفتها بيها جانت صدفه جان عندي شغل بالبيت و مكملت محاضرات ورجعت من وكت .. و ثاني يوم انتظرتها .. و شفتها و هم لحكتها بس هالمرة جانت تمشي على كيفها لأن شافتني .. كلتلها بس اخذي الرقم كل شي ماريد منج (الورقة مكتوب عليه اسمي و رقمنا الارضي) .. و اخذته و كلتلها ورى العشره اتصلي .. كالت احاول و راحت ..  هالشي كله ما طول نص دقيقه .. و رجعت للبيت فرحان بيومها عندي طاقة ايجابية مستحيلة .. لدرجة اغني بالبيت و كل شوية اتشاقى وي اخوتي .. صح اني مرح بس مو كلش .. و انتظرت ساعة ساعة لحد ما عبر الميل على رقم ١٠ .. وبقيت كاعد بصف التلفون ادعي يدك .. حتى كل شوية ارفع السماعة حتى اسمع طووووووووو علمود اعرف التلفون بي حرارة لو لا .. ( حرارة مصطلح بذاك الوقت على وجود خط بالتلفون الارضي ) .. و ساعة بالدعش وربع تحديدا دكت .. كالت قبل كلشي اريد اسألك سوال .. كلتلها تفضلي .. كالت انته اسمك فلان و ابوك اسمه فلان ؟؟؟؟
كلتلها اي بالضبط بس اني مجنت كاتب اسم ابوية عالورقة الصغيرة .. جان تضحك .. كالت تذكرني مو .. كلتلها بداعة امج لاتكولين انتي ابتهال ..
جان تضحك كالت اي .. كلتلها بس انتي بعمري شلون بعدج بالاعدادية .. كالت دقيقة فد شوية ارجع اخابرك .. سدت التلفون لان سمعت طكطكه و طبعا خافت لا ابوها لو اخوها يسمعوها دتحجي .. و رجعت اتصلت بيا ورى ساعة تقريبا .. كلتلها اي فهميني شلون .. كالت اني تركت سنة كاملة لان  تمرضت و الحمدلله تعالجت .. كلتلها خير شبيج .. كالت سويت عملية برجلي ومكدرت امشي مدة طويلة .. و بالعلاج الحمدلله رجعت أمشي .. كلتلها يا ستار .. و بدينا نسولف و جنت اصنف عليها و كلتلها جنت اموت منج ماعرف شلون عجبتيني و هيج كمت الحكج و بس اريد احجي وياج .. كالت اعرف جنت اشوف هالشي بوجهك جنت تغار مني لان شاطره و محبوبه وانته كل الجهال يكرهوك علمود عركاتك ..ضحكت بيومها و من يومها كمنا يوميا تقريبا نسولف .. البنية حبيتها كلش و هي حبتني و مرت اول سنة على حبنا بسرعة … والله الوقت وياها جان يطير .. و كملت اعدادية هي و داومت كلية هنا علاقتنا زادت اضعاف بعد .. لان كمنا نلتقي مرات برى الكلية .. بس بمكان عام اكيد .. اني جنت جاد وياها لأبعد الحدود و الحب الي صار بينا ردت اختمه بزواج ..
و بديت ارتب على هالموضوع و طبعا الحمدلله والدي امكانيته لا بأس بيها و مره لمحت بالبيت عالموضوع مال الزواج … ابوية كال اني اساعدك اذا ناوي تتزوج .. بس على الاقل كمل كليتك حتى من نروح نتقدم شايل شهادتك بيدك و اسمك خريج .. و حجيتلها الي صار وهي لمحت لأمها و امها حجت لأبوها و طبعا همه عائلة جدا مثقفة و ناس محترمين كلش .. امها كالتلها شكو بيها و هالحجي اني خليتها تسوي حتى اخاف واحد يجي بهل الفترة امها رأسا تسد الموضوع كلت يعني احجزها .. بس امها كالتلها بنتي احنا منغصبج على احد بس في حالة احد تقدملج انتي رفضي كدام ابوج و اخوج الجبير (طبعا همه عائلتهم مكونة من ولد ثنين واحد صغير و واحد جبير وهي و اختها وامها وابوها) .. كالتلها ماشي .. ومشى الوكت و قبل تخرجي بفترة صارت احداث الحرب مال ٢٠٠٣ .. بوقتها احنا ما بقينه بالبيت لان يمنا نصبو بالشوارع مدافع اذا تذكرون .. ابوية كال خلي نروح لمحافظة نبقى لحد متخلص هالحرب لان من ورى  هالمدافع  الي بنص الاحياء السكنية راح ننهجم .. و طبعا همه هم راحو لغير محافظة  .. يعني كل واحد منين اصله راح (يعني عائلة راحت للجنوب و عائلة راحت للغرب) .. و خلصت الحرب .. رجعنا لبيوتنا و رجعت اتصل بيها و طبعا ورى فترة من نهاية الحرب .. الاتصال شوية صار اسهل بوجود الموبايل .. و تخرجت اني .. طبعا تزوجتها أني … زواجي صار بسنة الفين و سته بنص الطائفية اني تزوجت .. و هي من طائفه واني من طائفه .. و السالفة الي تضحك .. منطقتنا صارت نصين حالها حال نص مناطق بغداد بذيج الفترة الدموية .. همه المساكين بالنص الي من طائفتنه و احنا بالنص الي من طائفتها  .. ابوية بوقتها خاف علينا كال خلي نتحول هناك (يقصد عالمربع الي ساكنين بيه بيت عمي ابو ابتهال) .. و ابو ابتهال خاف على ابنه الجبير كال خلي اتحول للمربع مالتنه ههههههههههههه .. ابويه كاله يابه خلي احنا نجي ببيتكم و انتو تعالو ببيتنا (يعني احنا نروح لبيت ابو ابتهال و بيت ابو ابتهال يجون ببيتنا) .. و صدك تحولنه بس بيومها رغم ما الشغلة هسه نقراها و يمكن نشوفها مضحكة  بس جانت مبكية والله..  امي و ام ابتهال و حتى ابتهال و اختها و اختي شبعو بجي .. شبعو بجي عالوضع و على عقلية الناس الي وصلت للقتل و الطائفية .. بيومها اني بجيت بصراحة .. و مو عيب الرجال يبجي على وضع بلده .. ردت اكحلها بساعتها لان الوجوه كلها تبجي كلتلها لابتهال شوفي اذا الله رزقنه و صار عدنا  جهال  هالفترة اذا ولد نسمي طائفي و اذا بنيه طائفية .. هي ضحكت بس الدمعه بعينها حبيبتي .. و تحولنا و طبعا هي جانت تشوفني وين جانت تكعد تحاجيني و شلون تراقب الخيال (من جوى الباب) اذا احد يفوت رأسا تسد التلفون .. و اني جنت مرات من تلم الهدوم اطلع برى يمها بالسطح اكلها هالمكان اول مره شفتج بي (بعد التغيير الكارثي من ابتهال المكروهه الى ابتهال المحبوبه) هناك و اشرلها جوى عالشارع من جان اخوها الصغير مطلعنه الصونده .. و الحمدلله أنتهت ذيج الايام السوده و رجعنا لبيتنا و بيت عمي هم رجعو لبيتهم .. و صارت ذكريات تنذكر متنعاد ان شاء الله .. و هسه اني عندي ولد ثنين و بنيه الحمدلله من قدوة الصف المكروهه  .. و مرتاح بحياتي بنص اهلي و زوجتي و اطفالي .. و ما اريد غير الستر و العافية .. بس للأمانه اني اليوم اعترفتلها اني الي شكيت اللوحه السخيفه الي فوك السويج مال بنكة الصف و الحمدلله اليوم اول يوم بحياتي حسيت بي بمعناة اهل الريجيم (لان اتعاقبت الساعة عبرت ١٢ و ماكو عشاء) يله شسوي حكم القوي عالضعيف ..
(قدوة الصف)
انتهى
اخوكم ابو بغداد سايق التكسي
#ابوـبغداد