قصص عراقية حقيقية بقلم ابو بغداد سائق التكسي

ابو غايب

ابوية عنده صديقة صاحب اسواق غذائية بمنطقتنا … يروح يمه يوميا يكعد هناك من الصبح لليل .. يسولفون و يلعبون طاولي بيناتهم … ثنينهم اعمارهم جبيرة و مالهم اي علاقة بزمننا هذا .. صح عدهم تلفونات حديثة و صح يعرفون يستخدموها كلش زين بس ما يحبون التعامل وي هالاشياء … قبل فترة أني دخلت بعلاقة وي بنية و حبيت البنية كلش بس كشفت هالبنية تحجي وي ولد ثنين غيري عفتها بس بصراحة انقهرت لأن هي اول بنية بحياتي و اني مداخل بعلاقات حب هي اول وحدة بحياتي و ابوية حس بهل السالفة لأن حتى شكلي تغير … ابوية يعاملني مثل الصديق ابد مضربني بيوم ولا حتى رزلني دائما عايفني براحتي و كل مرة يكلي اي شي يصير وياك تعال احجيلي … ترددت هواي بس بالاخير وصلت لقناعة اروح و اسولفله … حجيتله كلشي .. طبعا هو ابتسم و كالي تصير ابني هالسوالف و الدنيا متوكف علمود علاقة حب خربت … و حجالي سالفة على ابو الاسواق صديقه … و كالي اذا تريد تعال اكعدلك نص ساعة يمنا هناك وهو يسولفلك احسن … اني بصراحة حالي حال شباب هالايام .. أحس بملل من اكعد يمهم .. لأن سوالفهم قديمة بس ماعرف حبيت اروح و اسمع .. ابوية حجاله لصديقة على سالفتي بس كبالي علساس هو محاجيله لان يدري بيا استحي … بس اني اعرف ابوية ميضم شي على صديق عمره .. رحت بحجة مريت هناك و داسلم عليهم .. هو قريب على بيتنا … طبعا هو ابو الاسواق ميصير عنده اطفال … و المنطقة كلها تصيحله ابو غايب … بس ابوية يصيحله بأسمه يونس … وهو هم يصيح لأبوية بأسمه حسن …
الحاصل رحت و كعدوني يمهم .. ابوية فتح موضوع وياه و علساس مفهم ابو غايب انو اني اريد افتح قناة مال يوتيوب عالانترنت احجي بيها قصص و سوالف حب مال ايام كبل و هو راح يحجيلي قصته بس انزلها بالقناة بدون اسماء … رحت و كعدت كالي لك مو تنزل اسمي وتكول هاي قصة عمو يونس ههههه .. كلتله لا عمو بس احجيلي … كال شوف .. هذا المحل الي هسه كاعدين بي اني وياك و ابوك جان محل صغير قبل … جان ابوية لازمة … و هالبيت هو بيت ابوية .. بيتنا جان مكون من اربع نفرات فقط .. اني وابوية وامي واخوية … هسه كلهم الله يرحمهم طبعا بس اني بقيت … و تزوجت و كعدت بي بس بمرور الوكت الاسواق كبرتها مثل متشوف و صارت اسواق معروفة بالمنطقة … اني من لزمت الاسواق جنت طالب متوسطة ابوية جان يكلي انته اكعد بمكاني مرات و اني جنت اتهرب من السالفة لان جنت احب الطوبة بذاك الوكت .. بس شوية شوية  و ورى كومة بسط و عركات وي ابوية اقتنعت ان استسلم للأمر الواقع و اني الزم الدكان … جنت اكعد هنا دائما اول ايام جان يصير عندي ملل قاتل .. بس بعدين من كمت اكتب شعر و نثر … كمت امشي يومي … جنت احس راح ادخل بعلاقة حب قوية و جنت احس بأحساس الحب وي كل كاسيت اغاني اشغلة هنا بالمحل .. بس اني لا مصادق و لا حاب بنية … جان عدنا خط تلفون هنا مطلعي برى يجون اهل المنطقة يخابرون منه بفلوس يعني … من جنت اشوف شباب المنطقة الي بعمري شلون يجون يخابرون من التلفون و يبقون ساعة يحجون بالتلفون وي صديقاتهم و اشوف شكلهم شلون يعيشون اجواء الحب رغم ما اني ما اسمع ولا كلة جنت اغار واتمنى اني هم اجرب هالشي … فد يوم جوي بيت بالمنطقة كعدو جدد .. تعال تعال اشوفك يابيت … و كمت وياه طلعنا برى أشرلي على بيت بعد عن الاسواق خمس بيوت … كالي ذاك البيت شفته .. كلتله اي بس ذولة مو بيت ابو صالح ؟
كالي قبلهم قبلهم … كلتله اي .. كال من نزلو ما اختلطو بالمنطقة ابد … و فد يوم صدفة اني جنت راجع للبيت من الدوام شفت بتهم يم باب البيت .. حبيتها و بقيت واكف لحد ما فاتت البنية للبيت و هي شافتني شلون بقيت واكف و عرفت كلش زين اني انصدمت بشكلها وجمالها .. من يومها كعدتي بالاسواق صارت برى الاسواق مو جوى عالميز .. كمت اطلع الكرسي برى و اكعد انتظر اشوفها اذا فاتت واذا طلعت .. حاولت احجي وياها بس الخوف والمستحى مال بنت المنطقة جان مخبلني .. لا يعرف احد وتصير مشكلة و احنا سمعتنا بالمنطقة حلوة و ابوية بوقتها موجود جان … يعني لو صاير مثل هيج شي ابوية يذبحني … و حتى وقت دوامها جنت حافظة … جنت ابقى انتظر تروح وترجع اشوفها وهالشي جان بالنسبة الي قمة السعادة و الحب .. خصوصا اذا باوعت عليا … اني متاكد جانت هي تعرف هالشي ..