قصص عراقية حقيقية بقلم ابو بغداد سائق التكسي

ابو العلاقات

الاتصال بيناتنا جان كلش بسيط …. يعني اكدر اختصر الاتصال بس بالعيون اكثر من هيج ماكو … هيه تباوع عليا واني اباوع عليها وبس … حالنا حال طيرين عايشين بمكانات مختلفة بس طريقهم بالطيران يجبرهم يلتقون بنفس السما ..
و وكت لقائهم بس وقت الغروب .. من يرجعون ثنينهم لعشوشهم .. واحد يجي من هالصفحة و الثاني يجي من ذيج الصفحة .. بس الاثنين طايرين بسما جبيرة .. و الي يربطهم واحد بالثاني هو مسار الطيران بس .. هيج جنت اني وياها ..
اني اطلع اروح للاعدادية الي اداوم بيها و هيه تروح هم للاعدادية الي تداوم بيها .. امشي وهيه تمشي .. و من نوصل ونصير واحد مقابيل الثاني العين تصير بالعين بس نكمل الدرب .. جنت بوكتها خجول .. و ماعرف احجي وي بنية .. حتى صديقات اختي من يجون للبيت و يكعدون بالمطبخ لو بالصالة جنت اختل بالغرفة و كل شوية افتح باب غرفتي شوية و اتسنط .. اسمعهم راحو لو بعدهم بالبيت ؟
اذا بالبيت ابقى خاتل بالغرفة و اذا راحو اطلع .. متوقعت بيوم من الايام راح اصادق بنية و حتى من جنت اشوف شي بالتلفزيون لو اسمع عن العلاقات اكول بيني و بين نفسي (معقولة اكو هيج ولد ميخاف و هيج يروح يصادق و يكول احبج) .. ممعقولة يمعودين ترى صعبه كلش و الاصعب منها خوفي من الرفض لو من طريقة ردة فعل البنية اليا .. يعني الف فكرة تاخذني و توديني .. يجوز تصيح وتعيط بالشارع .. يجوز تضربني .. يجوز تشتكي يم الشرطة و ثاني يوم يسحلوني … و مو بس هاي الافكار .. جنت افكر اخاف تكول لأهلها و تجيب اخوتها يشبعوني كتل .. هاي حقيقة ما اخجل منها و هاذا خوف جان متملكني يمنعني ان احاول اسوي علاقة وي بنية .. بس جنت اتمنى اسوي و احب وانحب … بس هالخوف و المستحى هو المبقيني بمكاني ..
بذاك الوكت جان موديل اللحية مطالع .. بس اني اصلا مسوي لحية مو علمود ارتباطات دينية .. بس لان اكو بوجهي جرح قديم و هالجرح سبحان الله جاي على شكل ضربة سجين .. مع العلم هو مو سجين .. فد يوم جان عندي بايسكل بس البايسكل جبير عليا .. او بالاحرى هو مال اخوية الاكبر مني و سوالي تنازل عنه كبال امي علمود اني اخذه وهو اشترى غيره ..
جنت من اصعده ما اكدر اكعد عالكشن لان ماكدر ادوس عالبايدر اذا اكعد عالكشن .. جنت دائما اسوقة واني واكف .. و اكيد هالشي هواي من الشباب مجربي بطفولتهم .. فد يوم جنت اسوق بي بسرعة و طلعو كبالي جهال .. و جان اكو بيت بعده مكامل بناءه و عماله يشتغلون … بالكاع كبال البيت منزلين جياسة مال سمنت و رمل و حصو و شياشة مال حديد … اني بسرعتي عود ردت اوخر من الجهال و انكلبت من البايسكل لان مسيطرت جنت سريع اسوق … وكعت اني والبايسكل و وجهي انضرب بالشيش و صار الشك .. بيومها متأذيت هواي بسبب الجرح بس الخياط طلع روحي .. خيطولي وجهي و ورى فترة شالو الخيط .. جنت جاهل و ما احس بهل الشي راح يأثر عليا بس من كبرت عرفت شكله شوية نشاز ..
بس بالمناسبة هو يضيع من اسوي لحية يعني مراح اكول مأثر عليا نفسيا وهو سبب ميخليني اصادق .. لا ممأثر عليا لان اصلا ممبين بوجود اللحية ..
المهم .. اني جنت مربي لحية و مبين اكبر من عمري بهواي … نجحت من الاعدادية و دخلت كلية … بالكلية صارت عندي علاقات بس مو هواي .. يعني اصدقاء ينعدون على الاصابع .. بنات ابدا مصادقت لان بالكلية السالفة صارت اصعب .. اخاف قبل جنت اخاف من بنية تصيح و الشارع الفارغ يطلعون بي ناس و يلتمون لو تروح تكول لاخوتها لو الشرطة تشيلني ههههه .. هسه الخوف صار اكثر لان كلية و طلاب مثل النحل داير مدايري .. يعني الخوف صار رعب و اتخيل الطلاب كلهم يلتمون و تصير قضية رأي عام ههههههههههه …
الحاصل .. فد يوم بالجادرية صار تجمع للكليات و جان بوكتها حفل بصراحة ما اتذكر بالضبط علمود شنو بس عالاغلب شي وطني .. رحت اني و هناك التقيت بنفس البنية .. على الرغم من اني ممحاجيها و ماعرف حتى اسمها ولا اعرف اصلا وين ساكنة بس الي ادري بي هيه بفلان اعدادية بمنطقتنا و بيتهم هم بمنطقتنا بس اي تفاصيل ماعرف عن البنية … شفتها من بعيد و راحلها كلبي .. روحي طلعت من جسمي و طارتلها والله العظيم .. بس قبل متوصل روحي الها وكفت هالروح .. لان عيوني شافت ولد وياها و مبين من حركاتهم انو همه بيناتهم علاقة .. انقهرت و اليوم من اصفن و اتذكر شلون انقهرت اخرب من الضحك … لان بنية ماعرفها ولا تعرفني و ميجمعني بيها غير نظرات هههههه انقهرت بذاك اليوم وحسيت بغيره لا وفوكاها رجعت للبيت ومكملت الحفلة و عفت اصدقائي … الطريق كله اجر حصرات عبالك طالع من حرب طاحنه و مهزوم بيها اني … حتى بيومها واحد ورايا بالكوستر جمع الكروة و طخني على جتفي كالي خوية انطيها للكبالك اني مدرت وجهي ولا اخذت الكروة منه من الضوجه والقهر ههههه ..
الولد انطى الفلوس للبصفي و غلس عالموضوع .. و راحت البنية من ايدي (علساس يعني بيني و بينها قصة حب عنيفة ههههه راحت من ايدي هو اني سلام ممسلم عليها ) المهم .. بيوم من الايام بالكلية جان عدنا ولد بالكلية جماعتنا يضوجون منه .. بس الولد بصريح العبارة ميستحي ابد بسالفة البنات .. دائما يحشك روحة بنص البنات و يحاول يضحكهم لو يسمعهم حجي .. و ابد مشفته فد يوم واكف وي شباب .. كل وكفاته وي البنات .. و طبعا مرة سألت صديقي عليه كالي هذا مهتلف ممخلي وحدة بالكلية ممفاتحها بسالفة حب و علاقة و يوميا ينطرد خمسين مرة هههههه .. رغم ما اني معجبتني شخصيته بس الي خلاني احاول اتقرب منه هو الفضول .. ردت بس اعرف منه شلون عنده جرأة يسوي هيج .. و صدك والله اني كمت اسلم عليه وين ما اشوفه بس علمود اتقرب منه .. و فد يوم عدنا كافتريا خارج الحرم الجامعي لكيته كاعد وحدة .. رحت على نفس الميز الي هو كاعد عليه و كلتله ممكن اكعد .. هو كالي والله منتظر بنية بس عادي تفضل حبيبي ..
وطبعا هو جذاب لا جان ينتظر بنية ولا شي بس راد يفيك .. كعدت يمه و حاولت اني احجي وياه .. جاوبني الولد بس طلع فطير كلش …كلتله انت وين ساكن و بدينا نسولف و بصراحة الولد ارتاحلي … واني هم هههه رغم فطارته ارتاحيتله ..
صار صديقي بس الفرق بيني و بينه بكلشي مثل الفرق بين مسلسل صراع العروش و مسلسل الفندق ههههه هو بوادي واني بوادي ثاني … هو مواضيعه مو رزنة و كلها عالبنات و العلاقات و فلانه هيج تلبس و فلانة هيج تسوي .. و اني سوالفي عالدراسة و عالاحترامات .. حتى اصدقائي من جانو يشوفوني وياه يكولون بيناتهم شجاب الدولمة عالجلاق .. بس حبيته و علاقتي بي كبرت لدرجة كام يحجيلي سوالف صح اني اسمعها من لسانه بس محاولت اطبقها على ارض الواقع بس يمكن اكدر اكول فادتني .. يكول اني من اول مرة اكعد وي بنية اعرفها عدها علاقات قبل لو لا … كلتله شلون بله ؟
كال الي عدها علاقات قبل ضارب الدنيا بالقندرة (مكرم القارئ) يعني ميهمها الداير مدايرها و ماخذه راحتها بالكعدة ولا عبالك كاعدة وي ولد غريب و بنص مكان عام و متخاف من شي و تضحك براحتها و تحاول هيه تضرب امثال بنص الحجي و مواضيعها اكثر من مواضيعي اني …
لان سامعه هواي حجي .. وكلمة احبج متأثر بيها مثل البنية الي مسامعتها قبل ..
يعني من اكلها احبج ترد بسرعة و متاخذلها صفنة … كبل تكول صدك لو تكول اني هم احبك .. تحس الكلمة هاي رغم كبرها و قوتها كلمة عادية عليها حالها حال كلمة هاااااي شلونج .. و حتى بطريقة كعدتها .. تحسها هيه المسيطرة عالمكان مو انته .. و نوعية اسألتها قوية و بيها تفرعات هواي .. و اذا تفوتلها يمنه تطلعلك يسرى و مو بس هيج .. الخجل منك كرجل كاعد كبالها يكون معدوم ..
لان قبلك كاعدة هواي وي غيرك و سامعة هواي من نوعية كلامك ..
بس هسه نجي عالبنية الي ماعدها علاقات .. اول شي جيب ليل واخذ عتابة لحد متقنعها وهاي اذا اقتنعت تكعد وياك بالكافتريا الي بداخل الحرم الجامعي لان اصلا ماعدها جرأة تطلع برى تكعد وياك .. و الكعدة كلها تتلفت يمنه يسرى من الخوف عبالك تاجر اسلحة و مدجج بالسلاح و خايف من كبسة .. بحيث الكعدة كلها انته مرعوب و تنسى اصلا من ورى حركاتها و خوفها انت شرايد تكلها .. و تعرك .. تشوف العرك واضح ..
و مو بس هاي .. حجيها يصير سريع و بي تردد بحيث تريد تسأل هيه و متريد و تريد تحجي و متريد وتريد تسمع و متريد .. شي ههههه ماعرف افهمكياه .. طبعا اني كلتله هذا مو شرط ينطبق عالكل مو .. كال لا بس اني احجيلك الي اني مجربة .. كلتله زين …
وبقت علاقتي بي و بصراحة هو ميخجل و عنده كلش عادي اذا شاف وحدة كاعدة كبل يروحلها لا و يحجيلها قصص  هههههههههههه اذكرت موقف .. فد يوم اجاني يضحك .. كلتله ها شبيك مطرود .. كال لك رحت لوحدة شفتها كاعدة وحدها .. كلتلها ممكن اكعد .. كالت تفضل .. كعدت كبالها كمت اجذب و طبعا البنية واضح عدها جوكر .. ها بالمناسبة الجوكر هو مصطلح على البنية الي عدها حبيب لو صديق .. جان يكول عدها جوكر و متباوعلي هههه .. كلتله اي .. كال كعدت اكلها اني متابعج من دخلتي للكلية و كل ما اشوفج استحي احجي وياج بس خلص البارحة قررت اليوم من اشوفج اجي احجي وياج .. لان والله ماكدر اسكت بعد .. البنية ضحكت هههه كالتله دروح بابا اني اول مرة اجي للكلية واصلا اني اداوم بالتراث وجاية انتظر بنت خالتي هسه راح تجي ونروح هههههههههههههه هذا الموقف ابد ما انساه ..
عالعموم .. اني مسويت علاقات بالكلية ابد .. والولد لليوم علاقتي بي و هو تزوج واني تزوجت .. بس هو استعدل و راحت الخفه مالته و اكثر من اخوية حاليا … بس الي افتهمته من حياتي الي عشتها … مو كل حب يخلص بزواج لان هو حب هواي وتزوج وحدة بدون علاقة .. وهسه يحبها اكثر من روحة .. واني الي مجنت متوقع راح احب .. تزوجت وحدة (موظفة وياي) بعد قصة حب دامت اكثر من اربع سنوات .. قصة حب صارت بيها مشاكل هواي و زعل هواي بس ابد مفترقنا وقررنا بالاخير واحد يخلي ايده بأيد الثاني و نكمل دربنا لنهايته عالحلوة والمرة .. و نختم كلشي بزواج .. يعني من الاخير كلشي مو قياس بهل الدنيا .. حتى الي مفكر نفسه هو ابو علاقات نهايته مو دائما تكون مثل بداياته .. بس ارجع واكول كلشي بهل الدنيا مو قياس .. و حتى سالفة البنية و خبرتها بالعلاقات مو قياس .. لان مرات يجوز تكعد وي بنية هيه شخصيتها قوية و تكون هيه المسيطرة بالحجي و انت اول واحد بحياتها ..
وعالعموم .. اكو شي دائما اكتبه بالقصص .. الشي يكول .. لاتحاسب وحدة على ماضيها لان ببساطة انت مجنت بي .. و راح تظلمها وتظلم روحك اذا حاسبتها على شي هيه حجتلكياه من باب (لازم تعرف كلشي عني) وانت تلزك بي و تحضره و تخلي على طرف لسانك حتى تطلقة بكل عركة و سوء تفاهم بينك وبينها .. و هالشي صار وياي .. اني الموظفة الي حبيتها و تزوجتها .. جانت قبلي عدها علاقة بشخص و مرتبطت بي لان صارت مشاكل .. بس ابدا ما اجه يوم حاسبتها عليه .. لان من الاخير اني مجنت بحياتها .. و بالاخير اكول .. الله يجمع كل ثنين بحبهم سوى و يسهل عليهم ارتباطهم .. (ابو العلاقات)
انتهى
اخوكم ابو بغداد سايق التكسي
#ابوـبغداد