قصص عراقية حقيقية بقلم ابو بغداد سائق التكسي

ابتسم الابتسامة مجانا

عمري جان سبع سنوات تقريبا و اختي الصغيرة عمرها تقريبا سنتين … يكولون مرات الطفل ميتذكر الماضي و اذا يربى يم احد ينسى امه .. جذب هالحجي .. والله جذب … اني منسيت أمي ابد … جنت يوميا بليل اباوع عالسكف و اتخيلها و اسمع صوتها بكل مكان بالبيت … بس هي مموجوده ..  هي اصلا مميته هي حيه ترزق بس مو يمنا .. ببيت جدي .. ابوية انفصل عن امي و اني و اختي اعمارنه صغيره … سبب الانفصال خالي … خالي سوى مشكله جبيره وي ابويه و صارت مشاكل بيناتهم وصلت للمحاكم و انسجن خالي فتره و طلع ..  من طلع تهجم على ابويه و ضربه بسجينه و انهزم و هم لزموه و حبسوه .. جدي ابو ابويه كال لابويه طلكها لزوجتك و ابويه عبالك ما صدك مع العلم امي مسكينه و مالها دخل بلي صار … طلكها و تزوج وراها … الي تزوجها ابويه قبلت مرغمه ان تربينه … لان هي بنت عم ابويه … و طبعا جانت متاخره بالزواج و نفسيتها كلش محلوه بكل شي … جنت بأذني اسمعها من تحجي وي خواتها بالتلفون تحجي عليا وعلى اختي و عبالها اني ما افتهم … جنت اشوف بعيونها نظره اشمئزاز من تنظف اختي وتلبسها حفاظات …. لدرجة اني بذاك العمر تعلمت احفظ اختي و اسبحها و حتى من تفوت للتواليت (مكرم القارئ) اني الي انتظرها يم باب التواليت حتى افوت اغسللها ورى متكمل … و مجنت اكول لبابا هالشي … لان ابويه اول حجايه راح تطلع من حلكه اذا فتحت وياه هيج موضوع هي سب و شتم على أمنا …
و المضحك المبكي بالموضوع على الرغم من اعمارنه صغيره ولازم نبقى يم امنه بس اهل أمي من كرههم لابويه ورى الي صار غصبو امي تقبل انو احنا الجهال نبقى يم ابونه … بحجة خلي هو يحير بيهم … و طبعا ابويه قبل على هالشي و ما قصر رأسا تزوج جابلنه زوجة اب على اساس تدارينه .. اختي الصغيرة كمت احسها بنتي و اني عمري اصلا صغير … جنت اني اسويلها كل شي … حسيت روحي شايله مسووليتها … و طبعا ابويه ملتهي بزوجته الي خلته مثل المخبل من كثر ما تحجي و تطلب منه شغلات .. ابويه امكانيته كلش زينه .. وكل الخير الي عند ابويه هو من جدي .. يعني البيت الي كاعدين بي مساحته ٣٠٠ متر و ملك بس لابويه وهو جان عمره صغير مو جبير … و اصلا سبب المشاكل الي وي خالي و حتى سبب الانفصال هي الفلوس … و بيت جدي اهل امي هم مقاصرين و امكانيتهم كلش زينه … يعني الي اتذكره بالعراق جانت سالفة الخدامات بعدها مطالعه .. و زوجة ابوية هلكد مو عجوزية و تتعاجز من عدنا على الرغم اني شايله مسوولية اختي .. كامت تتعارك وي ابويه يجيب وحده تخدمنا .. و جاب وحده .. جانت زوجة الحارس مال المعمل مال بيت جدي … الي جتي جانت تخدم زوجة ابوية متخدمنا .. بس جانت تحبنا كلش اني واختي … و كبرنا ثنينا … كبرنا و احنا بعالم وحدنا … الحمدلله متفوقات بالدراسة و معدلاتنه كلها قوية بكل السنه … و مثل مكلت اختي جانت تحس روحها مسوولة مني مو من ابويه … حتى من جانت تريد شي تجي عليا و اني اروح اكول لابويه الي تريده و هو ينطيني … زوجة ابوية خلفت ولد واحد بس من ابويه .. الولد كبر ويانه طبعا بس كبر مخروع من الدلال … يعني عمره جبير واذا راد شي وما اجاه يكسر غراض البيت و يصيح و حتى يكفر و يسب امه … و غصبا ما على ابويه و على زوجة ابويه يجيبوله الي يريده … طبعا ورى مكبرنا و سنين راحت و تقريبا انست سالفة خالي و المشاكل .. جان ابويه ياخذنه بفترات متباعده يذبنا يم بيت جدي .. نبقى يم امي … والله والله والله .. ماكو روحه رحناها اذا مو الكعدة كلها امي تسب و تغلط على ابويه و تدعي على زوجته و على اخونه … بكل روحه تصير هالاشياء .. حتى اختي جانت تقلد واحنا بالطريق لبيت جدنا ابو امي .. جانت تشاورني تكولي ابوكم الله راح يحركه هو وعايش و يطلع حوبتي بي قبل ميموت ههههههه .. جنت اضحك و اسكتها … طبعا هالجمله مال ابوكم الله راح يحركه هي جمله تنعاد بكل زيارة نروح بيها لامنا … لازم تكولها … جنت اعرف و احترم وضعها النفسي و ما اعلق هواي … بس جنت احس سنه ورى سنه امي مثل نوعية ابوية تماما …
يعني صح احبها بس ما حسيت هي جانت مستقتله ترجعنا يمها … جنت احس هي جانت وي رغبة ابوها … يعني سالفة نذب الجهال وهو يحير بيهم هي جانت موافقه عليها مع العلم احنا بناتهااااا .. احنا لحمها ودمها .. بس هالحجي محجيته ابد و لا راح احجي الها … يجوز غلطانه اني و يجوز صح .. عالعموم هالحجي كله مو مهم …
المهم كبرنا و دخلت كليه اني وكلت هسه حياتي ورى التخرج اني اعدلها بيدي … بالكلية طبعا جان ابويه مأجرلنه سيارة مال رجال جبير يوديني و يجيبني للكليه و يودي اختي هم لدوامها و يرجعها … الرجال كلش جبير ومحترم و جنت مرات اسولف وياه .. مره حجالي حجايه خوفتني بس كلت اكيد مراح تصير وياي .. كالي الي حظه عاثر يبقى طول عمره حظه عاثر .. اني كلت هاذا يحجي على حاله مو على كل الناس (لان الي صار بيا و بأختي حسيته حظ عاثر) .. و نسيت هالجمله .. بالكليه اني جان عندي صديقات بس سالفة علاقات و حب ماعندي مع العلم هواي اكو بنات بذاك الوكت حبو و ارتبطو وهمه طالبات .. يعني همه و بالكلية تزوجو و انخطبو بشباب من نفس الكلية او من برى الكليه … اني جنت اشوف (البعض) من الطلبه الشباب مو كد المسوولية و يركضون على أي شي اسمه بنيه … لذلك شلت فكرة العلاقات والحب و هالسوالف من راسي .. الحاصل …
بيوم من الايام صدفه اكو طالب ويانه بالقسم الكل يكول عليه معقد .. هو الولد مايلتقي وياهم و دائما يكعد يقرا حتى من ماعدنا محاضره ينزوي بعيد و يكعد وحده يقرا .. طبعا هو يلبس مناظر طبيه .. و مربي لحيه بعكس كل الطلاب يسوون موديلات لشعرهم  .. و لبسه كلش بسيط ..
مره شفته واكف يم حايط من حيطان الحرم الجامعي و يكتب عالحايط … راقبته و صار عندي فضول اشوف شنو كاتب عالحايط .. ورى مراح رحت لكيت جمله صغيره و ممخلي توقيعه عليها ولا حتى حرف .. بس كاتب الجملة ومخلي جواها تاريخ .. بس التاريخ قديم يعني صارله سنتين تقريبا من لحظة كتابته .. الجملة جانت (ابتسم الابتسامه مجانا) .. الجملة عاديه و ما بيها شي .. بس التاريخ الجوى الجملة فضولي كتلني اعرفه شنو … وراها ثاني يوم .. شفته لنفس الطالب اني اعرف اسمه لان ويانه .. سلمت عليه بأسمه .. كلتله صباح الخير فلان .. هو باوع عليا و ابتسم كالي صباح النور .. و ابتسمت بوجه هو هم ابتسم و راح بس حسيته بقى يتلفت حتى يشوفني داباوع عليه لو لا .. من شفته يتلفت رفعت ايدي و سلمت عليه وهم ابتسمت طبعا هو راد يعثر المسكين يمكن اول مره تصير وياه .. و كمل طريقه .. وراها ثاني يوم هم شفته وهم سلمت عليه و هو هم سلم عليا .. و ثاني مره ورى مسلمت عليه اني رحت عليه .. جان كاعد وحده يقرا .. سلمت عليه رأسا وكف و سد الكتاب .. كالي اهلا وسهلا .. كلتله تسمحلي اكعد هنا .. طبعا المكان جان برى بنص الساحه … كالي تفضلي تفضلي ..
كعدت كلتله ممكن اسألك سوال .. كال تفضلي .. كلتله شفتك تكتب عالحايط هناك و اشرت بيدي عالحايط .. كالي اي صح .. كلتله وقريت الجمله .. كال هاي الجمله قريتها بكتاب و عجبتني و بكل مكان اكتبها و لو التصرف مو حضاري بس يعجبني غيري يشوفها ويبتسم .. كلتله يعني وين تكتبها .. كال بمكانات مختلفه .. كلتله زين و التاريخ شنو .. جان يكول هاي تاريخ وفاة امي .. من كال هيج كلش انقهرت عليه .. كلتله الله يرحمها اني اسفه .. كال مصار شي .. كلتله زين ليش تسوي هالشي .. كال امي جانت تضحك للهوى و الكل يحبوها .. كرايبنا و جوارينه و كل الي نعرفهم  يحبون امي .. جانت دائما تكلي اضحك بوجه الناس الله يفتحها بوجهك .. حتى من جنت اروح للشغل و ضايج لان مشبعان نوم .. تكلي لاتعقج وجهك ابني بعدك صغير اضحك اضحك ..و من قريت هالجمله بقت براسي و ربطتها بأمي و كمت اكتبها بكل مكان … كلتله وين يعني .. كال بالكراج الي اركب منه و بكل كتاب دراسي الزمه .. و حتى مرات بالباصات بخط خفيف و مرتب حتى ميعتبر تخريب .. و حتى بكل مكان اشتغلت بي .. و مكانات هواي و الحلو بالسالفة من افوت قريب من الجملة الي كاتبها اروح اشوفها بعدها لو مسحوها … اني ابتسمت طبعا من ديحجي و صارت عندي سوله وراها اباوع عالحياطين من اطلع بمكان اكول يجوز هو كاتبها بمكان و اشوفها صدفه… ومن يوم الي حجيت وياه كمت يوميا اروح اكعد وياه نسولف ونحجي و هو جان مثل الكتاب المفتوح بيدي .. كل شي يحجي المسكين .. الولد عنده احلام هواي .. و جان كلش مجتهد بالدراسة .. بديت احبه يوم ورى يوم .. واني هم صار عندي هالشي .. كمت اكتب بالكتب الي الزمها ابتسم الابتسامة مجانا و اخلي تاريخ وفاة والدته … و وصلت بيا حتى على حايط بيتنا برى بالطرمة هم كتبت هالجمله بخط صغير بس محد ما انتبه عليها ههههههههههه … طبعا حجيت لاختي هالشي و كالتلي انته حبيتي .. كلتلها اي والله حبيته .. كالت و شنو نهاية هالحب انتي من كل عقلج ابوج يقبل تتزوجي .. كلتلها ليش .. كالت مو تكولين ناس على كد حالهم .. كلتلها وشكو بيها .. كالت بابا اصحي ابوج طلك امج من ورى الفلوس …
ابونا اهم شي عنده الفلوس .. مسمعت كلامها و تعلقت بالولد و الولد هم يوم ورى يوم كام يعدل نفسه و اللحيه شالها و حسيت هو يبادلني نفس الشعور و بيوم الي كالي احبج جنت اسعد انسانه على الكاع والله … تعلق بيا كلش و اني تعلقت بي .. جان ماعدهم تلفون ارضي يخابرني من محل من منطقتهم .. يبقى يسولف وياي و اني اسولف وياه … جان يدك اذا زوجة ابوية ترد ميحجي .. و اذا اخويه بالبيت هم ميحجي .. جان اذا يسمع صوتي يحجي .. واذا زوجة ابوية تتقرب من يم المكان الي بي التلفون اسوي نفسي داحجي وي بنيه صديقتي .. حبيته كلش و مره صارت عدنا بالكليه سفره للحبانيه .. هو بحياته مرايح سفرات و جانت اول تجربه علمودي يروح هالسفره و اني هم مجنت رايحه للحبانيه بس رايحه للصدور و رايحه للرزازه و رايحه للموصل وي ابوية و زوجته سفرات … بس للحبانيه مرايحه .. سالته كلتله شتحب اكل اسوي .. كالي اخاف اكلج وتضحكين .. كلتله ليش صعب قابل ؟؟
كال لا سهله بس اخاف تضحكين .. كلتله اعرف اسوي شغلات بسيطة كباب طاوه .. كبه .. بس مو تكولي دولمة لو تمن ومركه .. ضحك كالي لا عوفي هالسالفة ناكل بمطاعم هناك وهاي هي .. كلتله لا اريدك تضوك اكلي .. كالي اني احب شغلة كلش بسيطة والله .. كلتله شنو .. كال طماطة مكلايه و بيتنجان مكله و كراد و كرفس .. بس اهم شي الطماطه تلجع بالطاوه يصير بيها سواد قليل .. كلتله صدك تحجي .. كال والله احب هالشي كلش .. بس انسي الموضوع هناك ناكل بمطعم ..
طبعا اني منسيت الموضوع و كليت طماطه و بيتنجان و حطيتهم بشي بلاستك و اخذتهم .. هناك وصلنه و اكيد بالبداية عفنا جنطنا بمكان واحد وطلعنه نفتر .. من صار وقت الغداء راد يعزمني بمطعم كلتله اوكف بس اروح اجيب شغله من جنطتي .. رحنا للمكان الي بي الجنط و طلعت العلبه البلاستك من شافها عيونه دمعت جان يبوس ايدي وهاي جانت اول مره يبوس ايدي بيها .. ماعرف حسيت احساس غريب كلش على الرغم الموقف صار بجزء من الثانية بس بقيت اتخيل الموقف ينعاد اكثر من الف مره براسي .. و اكلنه و رجعنا تمشينا .. و كتب الجملة بخمس اماكن مختلفه مال ابتسم الابتسامه مجانا و وياها تاريخ وفاة والدته .. حتى بمدينة الالعاب مال الحبانيه كتبها على مسطبه كعدنا اني وياه عليها .. و كملت السفره و رجعنا … وبقيت وياه بعلاقة عرفت كل شي عنه وهو هم عرف كل شي عني .. و طبعا مره من المرات اخذني وياه للكراج الي يركب منه لبيتهم شوفني وين كاتب الجملة مال ابتسم الابتسامة مجانا .. و السنين الي جنت اعرفه بيهم هي سنين دوامي بالكليه .. سبحان الله لان هالسنين جانت احلى عمر عشته مشت بسرعه و صار وتقرب وقت تخرجنا ..
طبعا هو قبل منتخرج  قرر يتقدملي .. و اكيد مثل ما كل الي سمعو القصة او قروها عرفو قرار ابوية قبل ما اكوله .. رفضه .. رفضه و زوجة ابويه اصلا جانت تريدني لابن اختها … ابن اختها الي اني اكرهه اصلا ..كلش مكروه .. مجنت اطيقه اصلا .. و سويت كلشي .. بجيت و حتى وصلت بيا بلعت حبوب ردت انتحر و ابوية شبعني كتل كالي تحبين مو … مدخلج كليه حتى تسوين علاقات و يغلط غلط بالقلم العريض ..
و تفل عليا (مكرم القارئ) و شبعني كتل … و جان عادي عنده حتى لو اموت طززز بس المهم ما اخذ الي حبيته .. و موقفه جان ثابت كله بسبب زوجته … المشكله مو هنا .. المشكله الي ثبتلي بالدليل القاطع امي متحبني هو حجيها من رحتلها عود اشكيلها من ابويه و حجيتلها الي صار .. كالتلي شكد اكره ابوج وعساه بالموت بس حجايته صح هاذا الي يريد ياخذج كلشي ماعنده شلون راح يعيشج .. راح يعتمد على راتبج و بذاك الوكت اصلا الرواتب جانت لاشيء .. كالت قابل احنا بفلم عربي و تعيشين انتي وياه على الكاع .. بنتي انسيه .. كلتلها احبه … جان تكول والله تنسي بمرور الوكت .. و الاسخف بعد تكلي ديربالج تقبلين بأبن اخت هاي الحيوانه (مكرم القارئ) تقصد على زوجة ابوية … تكلي شوفيلج واحد عنده بس غير هاذا الي تحبي و غير هاذا ابن اخت مرة ابوج .. بيومها خابرني الي احبه و بجيت اني وهو هم بجى .. و كالي شسوي هسه ماريد اخسرج … كلتله ماعرف ..
كال اتقدم بعد مره .. و ورى فترة هم تقدملي و ابويه ما قبل و كاله لأبوه للولد بس بأحترام يعني مو بقلة ادب .. كالهم انتو جيتكم على راسي بس البنيه تقريبا انخطبت .. و طبعا اني لا جنت مخطوبه ولا شي .. خابرني وراها حبيبي كالي صدك هالحجي .. كلتله والله جذب وجنت ابجي .. انقهر هو بس شبيده قابل .. و اكيد زوجة ابوية راحت كالت لابويه هاي يمكن دتحجي وي هالولد بالتلفون .. اجه ابويه كطع التلفون … و انكطعت اخباره لحبيبي عني .. طبعا هو يندل بيتنا .. و بيوم من الايام اجاني اخوية من ابويه .. يغلط عليا و يسب و يشتم بكلمات حقيرة و شايل وياه ورقة .. مقريت شمكتوب بيها اصلا لان شككها كبالي .. طلعت رسالة من الي جنت احبه شامرها بالحديقة .. موكعت بيدي ولا ايد اختي وكعت بيد اخونه .. و ورى هالموقف مال الرسالة ابوية بنفس الشهر غصبني انخطب لابن اخت زوجته لان جانت عينه عليا اصلا .. و انخطبت و بنفس الشهر عقد عليا و تزوجني و اخذني لبيت اهله  .. و بطلني ابويه و متخرجت اصلا .. و مكدرت اتواصل وي الولد لان كلشي صار بسرعه .. و اختي خافت تتدخل بالموضوع و حقها هالشي .. لان تعرف ردة فعل ابونا .. و خلص كلشي .. الولد الي اخذته مرتاحيت وياه لان من الاخير ماخذني كجسد وبس .. و قبلت بهل الوضع و عرفت حجاية عمو ابو علي السايق جانت صحيحه .. الحظه عاثر للموت يبقى حظه عاثر … و صرت بلا مشاعر اصلا .. و صار عندي اطفال منه و سنه جرت سنه و كبرو جهالي بس منسيته لحب عمري و حياتي .. بقى عايش بس بعقلي .. و بقت سولتي ادور بكل مكان على جملة ابتسم الابتسامة مجانا ..  حتى اتذكر مره زوجي ورى اول طفله جتني بفترة .. اخته و رجلها اجرو بيت بالحبانيه و عزمونه .. شكد حاولت اطلع اعذار حتى ما اروح مرهمت … طبعا اخته لزوجي احبها و فقيرة البنيه للامانه …و رحت للسفره و هناك رحت للمكانات الي مكتوبه بيها الجمله و لزمتني العبره ردت ابجي .. و كلتلهم اريد اروح للحمام (مكرم القارئ) حتى اطلع دموعي لان ردت اموت اختنكت .. و فتت لحمام مال مطعم بجيت بجي .. و غسلت وجهي وطلعت .. المصيبه المكانات الي نتمشى بيها كلها مشيت بيها وي الي جنت احبه و كل خطوى تذكرني بي ..
المهم .. مشت السنين مثل مكلت و جهالي كبرو … قبل فترة دورت على حساب الي جنت احبه بالفيس بوك … طبعا لكيت حسابه بعد مدورت على اسمه بالعربي و الانكليزي .. هو متزوج اكيد .. بس الي خلاني اتأكد هو حسابه رغم ما هو ممخلي صورته … الجملة ..  الجملة موجودة بصفحته ..  كاتبها بالعربي و الانكليزي و هم مخلي التاريخ مال وفاة والدته … ماكو أي صوره شخصيه .. فتت عالرسائل كتبت (بعد تحب الطماطه الملجوعه لو بطلت) و دزيتها من حساب وهمي سويته بلحظتها .. طبعا هو مشافها بأول يوم ثاني يوم فتحت الحساب الوهمي لكيته كاتب بس اسمي  و بصف اسمي علامات استفاهم هواي .. عرفت هو مناسيني .. ماعرف ليش سويت هالشي اصلا .. و خلص مسحت الحساب و بقيت محتفظة بالذكريات الحلوة الي عشتها وياه .. لان اعرف الي انتهى انتهى و ميرجع اصلا ..
طبعا اختي هم تزوجت و خابرتها حجيتلها  الي صار .. كالت لا تأذي لان راح تأذي من تسوين هيج وتأذين نفسج .. انتي جهالج كبار و هالشي الي سويتي غلط .. كلتلها اعرف غلط والله بس مادري ليش سويت هيج اصلا .. كالت المهم بعد لا تعيديها .. كلتلها ابد والله .. و صدك طويت هالصفحة .. و تناسيت مو نسيت .. تناسيت كل الي صار .. بس ارجع و اكول شسوي .. كل الي صار مو بيدي ..
(ابتسم الابتسامة مجانا)
انتهى اخوكم ابو بغداد سايق التكسي
#ابوـبغداد