قصص عراقية حقيقية بقلم ابو بغداد سائق التكسي

ابو الغاز

بالاصطفاف طلعوني اني و ٣ طلاب … المعاون صاح اسامينه طلعونه من التجمع مال صفنه و وكفونه بالنص .. ورى مطلعونه لنص الساحة بصف العلم .. المدير كام يحجي علينه .. رزالة بس محترمه .. بوقتها اني جنت غلطان و اعترف بهل الشي … الغلط الي مسوي بعدين اكوله بنهاية قصتي  ..  و التلاثه الباقين هم جانو مسوين مشاكل … اني جنت بوقتها صف رابع ابتدائي .. ضربونه كبال المدرسة كلها حتى نصير عبره لغيرنه .. اني بوقتها الوحيد بالاربعه ما بجيت .. و لا حتى كمت افرك ايدي من انضرب .. اكو طلاب من ينضربون بالخشبه يكومون يبجون و يخلون ايدهم جوى ابطهم يفركوها بسرعه لو بين رجليهم لو يفركون جف بجف .. اني صخ تأذيت .. بس اذيتي مجانت قوية مثل باقي الي انضربو .. حتى المعلم الي ضربني من شافني ما ابجي رفع الخشبه بالهوى عالي و نزلها قوي و ضربني بقوه كلش جبيرة .. تأذيت بس مبجيت .. من رجعت يم باقي الطلاب و بعدين مشينا للصفوف .. سألوني اصدقائي بالصف ليش مبجيت انته .. مجاوبتهم لان اني اصلا ماعرف ليش مبجيت و لان مستحي كلش من الموقف ..
بس بمرور الوكت عرفت .. اني الجلد مال ايدي ميت .. لان جنت اشتغل بالغاز بذاك الوقت … تعاملي كله وي دبات الغاز .. و طبعا مجبور الزم الدبه بالحر و بالبرد .. الجلد الفوك مال ايدي مات .. صار يشبه الجلد الي بجعب رجلي ..
و اكيد بوقتها فكرت انتقم من المعلم الي طلعني و خجلني كدام الطلاب .. عالرغم اني جان عمري صغير بس جنت مفتح بالدنيا ..  و ردت اضربه بمصيادة ام المصارين من بعيد … بس مسويتها .. مسويتها مو لأن اخاف والله .. مسويتها لأن الانسان الي متأذي من الدنيا ميعرف يأذي احد اصلا … بس من ذاك اليوم كمت هواي اخجل من المدرسة و الطلاب و خصوصا اكو بنات ويانه .. و عبالك لكيتها حجة حتى اكول لاخويه الجبير اريد ابطل .. طبعا احنا عائلتنه مكونه من اخوه ثنين و بنات ٣ .. ابويه متوفي و امي عايشه .. اخويه الجبير جان عسكري و كمل الجيش و هو الي معيشنه و اني اطلع اشتغل وياه ورى الدوام .. هو يشتغل هم بالغاز .. يشتغل بعربانه و بنفس الوقت عدنا مقابيل المحطة مال الغاز مكان اني وحدي اشتغل بي .. ابيع غاز .. يعني هو يطلع بالتركتر يفتر يبيع .. واني بدون ما اروح لأي مكان اكعد ابيع و الدبات مال الغاز يمي .. جان مسويلي مثل الخيمة بس هي مو خيمة .. هي خشبات و عليها جادر .. هاي بالصيف اكعد جواها من الحر .. و بالشتا هم اكعد جواها حتى المطر مينكعني … الشغل جان كلش زين .. يعني صح هو تعب بس بي خير من الله فلوس .. اني جنت السنه كلها مبهدل و هدومي مو نظيفة بسبب التحميل و التنزيل .. بس بالعيد جنت اطلع ارتب واحد بكل اصدقائي … واني الي اصرف عليهم من نطلع نفتر .. اني ما بطلت بوقتها من المدرسة بس وصلت للثاني متوسط و بطلت نهائيا .. بوقتها اني كمت اشتغل هم بتركتر اسوق و ابيع .. و جتي فترة اخويه راد يغير الشغل .. و كالي شنو رأيك نشتغل غير شغله .. كلتله حبيبي انته تريد تغير روح غير .. اني تعلمت على هالشغلة .. كالي بكيفك و ما غصبني .. هو فتح سكله (يعني يبيع مواد انشائية و هم بنفس الوقت يطلع عمال و خلفات يبنون) اني بقيت بشغلتي .. بس جنت مجمع فلوس زينه مع العلم عمري صغير .. قررت بوقتها اشتري سيارة و اشتغل بيها تكسي .. بس مجان عندي اجازة .. و عمري مو جبير كلش .. اخويه كالي ليش تاخذ تكسي و تطلع مكانات بعيده و تنلزم .. اخذلك لاندكروز و اشتغل على خط قريب من بيتنا .. و شغلك راح يصير من كراج لكراج و قريب .. وحتى لو المرور لزموك ولو من سابع المستحيلات يلزموك لان منطقة بصف منطقة و المنطقتين مو مناطق حيويه .. يعني اصلا ما بيها مرور .. و أن صارت و لزموك اني اجيك اخلصك من السالفة .. قبلت و اخذت لاندكروز بس تعبانه شوية .. و طبعا يم معارفنه فيترية و ولد المنطقة هم رتبناها .. و السيارة جنت كلش مرتاح بيها و بشغلها .. لان مو مثل شغلي بالغاز تعب .. اوكف بالكراج مال منطقتنه و يجون الناس يصعدون اوديهم للكراج الثاني وهم انتظر يجون ناس يصعدون ارجعهم لمنطقتنه وهيج .. شغله نظيفه و ما بيها تعب و مريحه .. و بديت اتعرف عالسواق و لو همه اغلبهم يعرفوني .. بس يصيحولي ابو الغاز لان كلهم من منطقتنا تقريبا … اللقب هذا بقى وياي وين ما اروح .. جنت احبه كلش لان يذكرني بأول شغله بحياتي … و الحمدلله بدلت السيارة القديمة و اخذ غيرها بس نظيفه كلش ..
و كل هالشي من جيبي يعني من فلوسي الخاصة مع العلم اخويه هواي راد يساعدني بس اني ما اقبل .. لهنا كل شي حلو و حياتنه تعدلت ولو هي عدله من البداية من ايام شغلي اني واخوية بالغاز .. بس تعدلت من ناحية الالتزام .. قبل من جنا  نشتغل بالغاز جنا مجبورين نكعد وي الفجر حتى نلحك عالمحطة .. و حتى نوزع براحتنه بالشوارع .. بس بهل الشغل نكعد براحتنه ..
عالعموم .. بيوم من الايام عندي صديقي جوارينه تحولو من منطقتنه لغير منطقة .. هو صديقي كلش و حبيبي واخويه هم .. بالتحويله مالتهم اني تركت الشغل كم يوم و كمت اساعده بالتحويله وي اهله يعني .. طبعا حتى سيارتي كمت اخلي بيها شغلات مال بيتهم وانقلها .. شغلات صغار مو كبار .. هناك احنا و دنزل الغراض شفت بنيه جوارينهم الباب عالباب .. البنيه ضحكت بوجهي .. من ضحكت بوجهي بداخلي عبالك كالت احبك مو ضحكت .. غير اول بنيه بحياتي تضحك بوجهي .. لزكت هناك .. كمت اعوف الشغل واروح يم صديقي تقريبا يوميا .. حتى مرات جنت اطلع للشغل و قبل متليل الدنيا اروح يم صديقي .. و حسيت البنيه معجبه بيا .. اشرتلها و طبعا اني بحياتي ممأشر لبنيه … هي هم أشرتلي .. و هالحجي كله صديقي يدري بي … و عن طريقه عرفت هي وين تداوم … و كمت انتظرها مرات يم مدرستها … و التقيت بيها اكثر من مرة و حبيتها للبنيه و هي هم حبتني … و بيوم من الايام كالعادة رايح لصديقي تفاجئت بطريقة استقباله الي مو مثل كل مره .. شفته مثل الشايل روحه عليا .. وطبعا جان واضح هالشي .. كلتله شبيك .. كالي انته دتجي علمودي لو علمود فلانه .. كلتله علمودك و علمودها شكو بيها .. جان يكلي اكلك ابويه حس بالسالفة و ميقبل على جيتك هنا .. كلتله شلون عرف يمعود كول غيرها ؟؟؟
كالي ابوها للبنيه شايفك اكثر من مره و حاجي لابويه .. كلتله لا بربك و من يومها استحيت كلش .. كمت اروح بس يم المدرسة مالتها و من سألتها على هالحجي كالت ماعرف اول مره اسمع منك هسه .. كلتلها لعد بعد منا وهيج بس هنا نلتقي ماشي .. كالت زين .. و جنت ناوي اخطبها .. حتى حاجيت اخويه و قبل كال هسه وضعنا تغير احنا ..  و انته تكدر تفتح بيت .. و رحت وراها للبنيه مكيف و اريد احجيلها هالحجي .. و جانت الصدمة .. صديقي الي هو اخويه عود .. لاحكها و كايللها عوفي هذا ميفيدج و اذا متعوفي اكول لأهلج .. و طبعا هي جانت خايفه وكالتلي لو تجيب اهلك وتجي تخطبني لو بعد لاتجي هنا ..
و اني لا رحت لصديقي ولا سالته .. لان عرفت اذا راح اروحله راح تصير مشكله جبيره و كلت يجوز ابوه مسوي مشكله وياه وهو خايف و رايح للبنيه كايللها هيج ..
حاجيت اخويه و رحنا تقدمنه للبنيه .. كالونه اهل البنيه (كالعاده انطونه مهله) .. و اكيد حتى يسألون عن و عن اهلي .. همه مجان عدهم مشكله عن وضعنا المادي او شغلي .. بس هاي بنتهم لازم يعرفون منو احنا و اني (تحديدا شنو) حقهم الناس ..
و انرفضت .. ليش .. لان  العينتين رايح كايللهم هذا جان يبيع غاز و يكبسل بفترة من الفترات و حتى اهله ميعرفون بي يكبسل .. بس وروح ابويه اني بحياتي محاط هيج سوالف بحلكي .. مراح اكول ما اعرف شنو حبوب و شنو كبسله .. كل شي اعرف و كل شي شايف و كاعد وي اسوء ناس الله خلقهم بهل الدنيا .. بس بحياتي ممسوي هيج امور .. و قررت اتواجه وياه … طبعا هو حاجي هالحجي لأخو البنيه .. و اخو البنيه حاجي لأبوه .. و رحت و التقيت بي و كالي و حلف هو مكايل هيج .. زين اني ماكدر اروح اسأل اخو البنيه .. سكتت … (اني هالحجي عرفته من البنيه)
و رحت مره ثانيه و التقيت وي البنيه و البنيه كالت والله هو حاجي هو هالحجي لاخويه ولو ميفيد بعد هالحجي كله.. كلتلها ليش ؟؟
كالت خلص اعتبر كل شي منتهي لان اهلي كامو يراقبوني .. و بعد لو ينزل وحي من السماء ميقبلون بيك اهلي واعرفهم كلش زين .. حتى لو السالفة جذب هم بعد ميقبلون تاخذني .. و انتهت سالفتي وي البنيه .. بس الي خبلني و بقى براسي ليش صديقي هيج سوى ..
ماعرف ..
بوقتها تعبت نفسيتي بس شسوي لازم اطلع من هالوضع و الدنيا تمشي و متوكف على احد … و مشت السنين و اشتغلت غير شغله و بعت السيارة و جتي فترة اشتغلت وي اخويه بالسكله .. لحد مستقريت على محل ادوات احتياطية .. اخذت محل ادوات احتياطية بالمنطقة و كعدت بي استقريت .. و قررت اتزوج بس بدون حب .. لان سالفة الحب جربتها مره و مرهمت .. و طبعا علاقتي انتهت نهائيا بصديقي القديم و بالبنيه … و اتزوجت بنت جوارينه .. و الحمدلله البنيه بنت اوادم و حبابه و صار عندي منها ولد ثنين … و بيوم من الايام طالعين اني وياها نشوف غرفة نوم .. لان غرفتي القديمة تعبت كلش … هناك بالطريق القريب من المحلات شفت صديقي القديم الي راح حجه عليا كبال اخو البنيه و شفت نفس البنية الي جنت احبها وياه و وياهم طفله … طبعا ضحكت … زوجتي سألتني شبيك تضحك .. كلتلها والله ماعرف شكلج … و تقصدت افوت من مقابيله حتى يشوفني  .. مبين متزوجها و عرفت السبب الرئيسي الي خلاه يروح يخرب عليا كل شي .. طلع جان يحبها و يريدها  .. و فتت كباله و شافني و صرت عين بعين وياه .. بس ابد مخليت عيني بعين زوجته .. لان صارت شرفه و مو اني الي يباوع على مريه غير زوجتي … بس السوال الي سالته لروحي … معقوله اكو هيج بشر … زين شلون قبلها على نفسه (صديقتي و حبيبتي ) و هو يعرف هالشي .. شلون يحبها و شلون عنده نفس يتزوجها … شلون ؟؟؟؟؟؟
هو الي دلاني مدرستها … هو بنفسه … والله والله والله لو مشايفه وياها و جاي واحد حالفلي كايله فلان تزوج فلانه ما اصدك … معقوله اكو هيج بشر .. الي اريد افتهمه هو خرب عليا كل شي .. زين اهلها شلون قبلو بي .. صديقي جان … صديق الي يكبسل … والله ماعرف شكول و شحجي بس مع الاسف … هو لو جاي كايلي عوفها والله وروح ابويه اعوفها .. بس المصيبة حلف هو مرايح حاجي هالحجي عليا … و صدكته بالبداية .. و اصلا اني كطعت علاقتي بي علموده هو .. لان كل شوية و كالي ابوية و ابوية .. و تاليها يروح يتزوجها !!
بس يله .. هاي هي .. الله يهني سعيد بسعيده ..
هسه نجي عالغلط الي غلطته و انضربت و انهانيت بي كبال الطلاب بصف الرابع .. الغلط جان ( طوبه ) مو طوبتي ولا حتى اني العب طوبه اصلا .. الطوبه جانت مال صديقي الي تزوج حبيبتي … هالطوبه هو جايبها وياه للمدرسة حتى يلعبون ورى الدوام بيها هو و باقي اصدقائنه .. يلعبون بساحة ورى المدرسة .. بالصف ورى مخلص الدوام طلع الطوبه و كام عود (يتك تك) بيها .. و ضربها بالغلط جتي بالشمعه الي بالصف و كسرتها .. اني ما اجذب و اكول ملعبت بالطوبه بالصف هم لعبت وياه بيها .. جان نهاية دوام مثل مكلت و احنا اخر كم طالب بالصف … وهو عود راد يشوفها للطلاب و يفيك بيها و صارت الحاله بسرعه .. الطلاب من شافو السالفة كالو للمعلم .. بس كالوله فلان و فلان (عليا و على صديقي) لان جنا دائما سوى .. من سألنه المعلم منو كسر الشمعه و الطوبه مال منو .. اني اعترفت قبل ما هو يفتح حلكه .. كلتله الطوبه مالتي و اني كسرت الشمعه .. لان انقهرت عليه  …
هو جان ناعم واني خشن … و اني شايفه بالعركات جان ميعرف يتعارك و اني دائما ادافع عليه .. هو هذا الغلط الي انضربت عليه وانهانيت كدام البنات و الولد بس ما بجيت  .. عالعموم ابو المثل كالها (لو تصاحب خوش صاحب لو تظل من غير صاحب) مع الاسف لو باقي بدون صاحب هواي اشرفلي ..
(ابو الغاز)
انتهى
اخوكم ابو بغداد سايق التكسي
#ابوـبغداد