ننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة
اقرأوها فعلا تستحق القراءة
اغلب الي اعرفهم يقيسون اللواته و الذكاء و السباعية (بحجيهم همه) بعدد العلاقات وي البنات و شكد عدهم صديقات .. اني حسب حجيهم غشيم و ماعندي معرفة بالبنات و هالشي الي مأخرني عن الارتباط و الزواج لحد مصار عمري ٣٥ سنة … اني ساكن بدولة اجنبية و اطلع الصبح على كولة اهلنا من الفجر للشغل و ارجع ساعة اربعة لو خمسة العصر … اسبح و اكل هالقاسمة الله و هالموجود .. و شوية احجي وي اهلي عالانترنت و مرات اشوفلي فلم اجنبي لو عربي و احضر الاكل الي اخذه وياي للشغل و الف راسي و انام .. يومي مجدول على هالاساس .. علاقات ماعندي لان غشيم على كولة جماعتي و ماعرف احجي وي البنات وهالشي اني اعترف بي اني اخجل من البنات بصورة عامة .. من جنت بالعراق لليوم اني نفس القالب بالتعامل .. يعني كرايبنا اذا عدهم بنات و يجون يمنا زيارة للبيت اطلع ابقى افتر بالسوك لو يم جماعتي لحد ما ارجع للبيت يكونون طالعين .. حتى سلام ماعرف اسلم عليهم .. هاي خلقتي و هاي سالفتي و متعلم عليها و ماعرف اغيرها شسوي ماعرف .. عالعموم .. حاولت قبل كم سنة اتعرف على بنية مدبرتها و عافتني ورى اول اتصال هاتفي لان ماعرف افتح مواضيع وابقى ساكت .. المهم .. قبل فترة من اليوم سمعت من ولد شباب اصدقائي يلعبون لعبة على الانترنت و يحجون وي جماعتهم الي يلعبون وياهم وشفتهم مندمجين .. صار عندي فضول اعرف هاللعبة شنو مع العلم بحياتي ملاعب العاب الكترونية .. اتذكر بالتسعينات واحد بمنطقتنا فتح محل مال اتاري و مرة وحدة رحت لعبت لعبة مال ثنين يتعاركون و الله ماتذكر اسمها و حتى الجهال الي بعمري جانو ديلعبون حاولو يعلموني دوس دائرة و دوس مثلث عالعموم حتى ماطولها .. مفتهمت و خسرت اللعبة و مرحت اصلا لعبت بعد .. . المهم .. نزلت تطبيق اللعبة على تلفوني اسمها ببجي و اكيد الكل حاليا يعرفها … و سويت لاعب و بديت العب .. اصدقائي الي هنا ضافوني و ضفتهم و يوم ورى يوم كمت احب اللعبة و صدك تقويت بيها .. تقويت لدرجة كمت اكمل كلشي بيها و صار عندي اصدقاء كومة بيها .. عرب و اجانب .. و فد يوم من الايام .. نزلت العب وحدي بدون اصدقائي .. اكو من ضمن الاعبين بنية .. و طبعا الي لاعب ببجي يعرف قصدي .. بالطيارة سويت تحالف .. و قررنا ننزل بمكان معين وهي البنية سوت وياي التحالف .. البنية شافت لعبي قوي و طبعا هالحجي اني وياها نحجي صوت .. ضفتها و ضافتني … و بدينا نلعب سوى .. علاقتنا جانت بس باللعب البنية شافتني هادئ سالتني عالفيس بوك .. ضفتها عالفيس بوك .. حسابها عالفيس بوك بي صور وهميه للمثلات اجانب و صور ورد و سيارات و اغاني و مرات سوالف دينية تنزل .. عالعموم بدينا نحجي اني وياها بالاتصال الي بلفيس بوك … بديت شوية شوية اتعلم على وجودها بحياتي … و كمت انقللها بصور و فديوات الامور الي تصير وياي بيومي العادي .. يعني بالشغل ادزلها صور .. بالسوك ادزلها صور .. اسافر من دولة لدولة اذا بشغل و اذا وي صديق هم ادزلها صور .. حتى الاغاني الي اكون مشغلها بالسيارة هم ادزلها و تسمعها .. صارت جزء من يومي .. و طبعا سألتها عن وضعها و اسمها .. انطتني اسمها و كالت اني اداوم بفلان مكان و اني الوحيدة لأمي و ابوية .. و ابوية وامي ناس كبار و اني مداريتهم .. حبيت شخصيتها كلش لان شفتها مثقفة و مداريه اهلها .. يوم ورى يوم كمت اتعلق بيها .. و طبعا مرات تسد الاتصال تكلي خابروني بالوظيفة و مرات تكول عندي شغل و راح اتأخر بالدوام .. واني جنت انتظرها لحظه لحظه .. لدرجة جنت افتح حساب الماسنجر وانتظر النقطة تصير خضره حتى اعرف هي فاتحه واكتبلها .. حبيتها كلش .. حسيت بشعور الحب اخيرا وياها الي اصلا مجنت مجربه بحياتي وهي اول علاقة صارت بحياتي … كلتلها احبج وهي نفس الشي طلعت تحبني .. كمنا نفتح الصوت سوى دائما حتى بليل و ننام عالصوت و عالسوالف … بس اني جنت افتح كامرة و هي متقبل تفتح لان حالفة لاهلها متسوي هالشي .. و طبعا اني كيفت من سمعت هالشي كلت الحمدلله .. بس دزتلي صورها و صورها كمت انام واكعد اباوع عليها .. سويتهم خلفية للتلفون و جنت دائما اخفي التلفون اذا يجون اصدقائي يمي حتى لا يشوفون صورتها .. كمت اغار عليها من كلشي .. و جنت قبل اسمع جملة (اشتاقلج حتى وانتي وياي) جنت ممفتهم هالجملة واضحك من اسمعها اذا بفلم لو بالانترنت و اكول شلون واحد يشتاق لواحد وهو وياه عالنت لو عالتلفون.. بس جربتها .. جنت اشتاقلها حتى بوجودها وياي عالاتصال .. حبيتها حب صادق و نيتي صارت زواج .. فتحت الموضوع وياها و كيفت هي .. و طبعا اني محصل عالجنسية و كلتلها عندي شغل هسه بس بشهر التاسع الي هو بعد كم يوم افرغ و انزل اخطبج من اهلج … سالي امج .. و طبعا هي كالتلي امها مثقفة جدا و تدريسية جامعية و ابوها هم مثقف و موظف متقاعد .. و رحت قطعت تذاكر على شهر التاسع و بلغت اهلي حتى يتحضرون يروحون وياي و اهلي كلش فرحو من سمعو هالحجي … و ورى يومين تقريبا من سالفة الحجز اتصلت بيا تبجي .. كالت امي متقبل و كالت اذا يجي نرفضه لان منقبل تسافرين برى انتي و احنا منكدر بدونج قابل تعوفينه وتروحين .. وكالتلي شلون تقبل اعوف اهلي .. اني انقهرت بس مو عليها ولا عليا .. انقهرت على اهلها لان صدك كبار بالعمر و قررت اعوف كلشي و اصفي كلشي و ارجع اني هناك اعيش .. طبعا هالحجي يأذيني بس فدوة لان احبها .. كلشي يروح فدوة انعل ابو الجنسية لابو اوربا … اريد استقر كافي … كلتلها خلص اعوف كلشي واجي .. كيفت هي و كالت اوكي .. و هم ورى يومين من هالحجي كالتلي اكلك امي خايفة لا تتزوجني هسه هنا و بعدين ورى فترة تاخذني غصبا باعتبار زوجتك لاوربا و همه يبقون وحدهم و كاعدة تبجي بالغرفة … كلتلها لا والله اني خلص اريد استقر بالعراق و امج اي ضمانات تريد خلي تجيب ورقة بيضه تكتبها و اني اوقع عليها اي شي تريده .. اي شي .. كالت زين .. و مشى يوم يومين جتني كالت امي تخربطت و وكعت و وديناها للمستشفى خايفة لاتخسرني و طبعا هالحجي بجي تبجي واني هم بجيت .. و كالت عوفني اني مافيدك هذولة اهلي ماريد اخسرهم من ورى حبي الك .. اني كتلها والله متخسريهم والله .. و بقيت احاول و طبعا بهل الحجي الايام تمشي و موعد سفري للعراق يتقرب و اهلي منتظرين رجعتي .. و كل ميتقرب الموعد تصير سالفة .. الى قبل ٣ ايام .. الموعد تقرب و كلتلها خلص راح انزل واعيش بالعراق و بين فترة و فترة اجي احاول اخطبج و حتى لو يرفضوني عادي ابقى احاول .. كالت اوكي تعال بس اني متاكدة امي متقبل لان خايفة لا تاخذني هناك للخارج .. كلتلها ماشي .. و اول بارحة جتني تبجي هم .. تكلي خالتي جتي طلبتني لابنها و رفضت و امي كالتلي شنو عبالج من رفضتي ابن خالتج راح اخليج تتزوجين هذا ابو الخارج .. و صارت مشكلة و اخير شي كالت عوفني اهلي قافلين عليك .. طبعا اني بهل الحجي كله مجنت حاجي للولد اصدقائي لان اغار عليها كلش والله …. اخير شي قررت اسولف لواحد قريب عليا من اصدقائي .. حجيتله كلشي كالي بابا شلون تبقى وي وحدة فترة و تروح تتسرع هيج تكص تذاكر و انت مشايفها … كلتله شايفها بالصور .. كالي و شنو يعني صور من الانترنت كلشي الواحد يكدر يطلع … كالي زين باع .. انت اخوية بس راح احجيلك الصراحة .. البنية هاي مشكوك بأمرها لان مشايفها انته و انطيني معلومات عنها خلي اسأل .. انطيته كل المعلومات و اسم منطقتهم و اسم ابوها و نفس التوصيف الي وصفته اليا … اتصل هو بمعارف بنفس منطقتهم كالوله ماكو هيج ناس هنا و طبعا اهل المنطقة صارلهم ٢٥ سنة بالمنطقة و يعرفوها شبر شبر .. كالي شوف .. هاي اول جذبه طلعت مو من المنطقة و يجوز حتى اسمها جذب .. والله اعلم بعد شكو بس راح انطيك سالفة تسويها حتى تحصرها حصره زينة .. كلتله شنو .. كال كلها اني هيج هيج راح انزل للعراق حتى لو يطردوني من الباب اهلج لان مستحيل اتخيل حياتي تكمل بدونج .. و بنفس الوكت كلها اختي تريد تمر عليج تشوفج باجر بحجة صديقتج و لاتجيبين طاري لاهلج انو اكو صلة قرابه بين اختك و بينك .. و خلي تكلهم صديقتي من الوظيفة .. و رحت طبقت نفس الحجي كله و جان تنحصر و طكت من البجي و كالت شوف اني حبيتك والله .. واريدك .. بس اكو شي ضامته عليك او بصراحة جذبت بي عليك .. كلتلها شنو .. كالت اني شبه منفصلة .. كلتلها شنو شبه منفصله ؟؟؟؟؟ كالت يعني متعاركة وي زوجي لان ضربني و جيت لبيت اهلي و لا هو يقبل يطلك و لا اهلي يقبلون اتطلك منه واني ماريده اصلا لان هو مو محترم و اني جذبت عليك احنا ناس عادين و ابوية مو موظف وامي مو تدريسية واني لا عندي وظيفة و هاي حاصرة روحي بنص اربع حياطين و اريد اتطلك و اخلص .. كلتلها شنووو هالحجي .. كامت تبجي و تكول والله احبك .. كلتلها شتحبيني و شنو سالفة الوظيفة و تروحين ساعات و ترجعين .. كالت اي انظف بالبيت لو اطبخ لاهلي و اخوتي .. كلتلها اخوتج؟؟؟ مو كلتي بس انتي الوحيدة لاهلج .. كالت لا عندي اربع اخوة و بعد اخت .. كلتلها و سالفة امج تخربطت و مستشفى من ورايا كالت جذب لان انقهرت عليك و ردتك تعوفني بس انته بصراحة مستعجل و رحت كصيت تكت و تريد بس تجي .. كلتلها غير احبج .. و الصور هاي مال منو .. كالت صور من الانترنت .. اتخبلت اني و كمت ماعرف الصدك من الجذب و افتر راسي .. كالت و اسمي فلانه طلع غير اسمممم فوكاها .. كلتلها زين ليش محجيتي هالحجي كله .. كالت ماعرف جذبت عليك و مكدرت اكلك .. بس صديقتي كالتلي اذا متعترفيله بكلشي اني اروح اكله .. كلتلها صديقتج منو ؟؟ كالت عندي صديقة عالانترنت حاجيتلها كلشي و مشوفتها حسابك عالفيس .. كلتلها يعني لو مو صديقتج كايلتلج اروح اكله جان بقيتي ماشيه بالسالفة و بالجذب .. و كالت هاي هي اسفة اني و تبجي .. و تحلف احبك .. كلتلها مو نفس هالحلفان جنتي تحلفي من تكولين امي تخربطت و خالتي جابت ابنها يريد يتزوجني شلون تريديني اصدك بعد بكل كلمه تكوليها .. جان تفر الموضوع و كالت انت طلعت متحبني لان انت تدور شكل حلو مثل شكل البنية الي بالصورة و مع الاسف اني حبيتك .. انت طلعت تدور وجوه حلوة .. كلتلها شنو هالخرط يا وجوه ياصخام تريدين تبررين الي سويتي وياي بحجة ثانية افضع من الاولى و تريدين تلبسيني الغلط فوكاها .. و تريد بس تطلعني غلطان .. سكتت و كعدت صفنت بيني و بين نفسي و كلت ياربي اني شمسوي غلط بحياتي ماعرف .. يعني ادور زواج حقيقي و مادور علاقات غلط و تاليها هيج يصير بيا ليش .. هاي تاليها .. بنية احجي وياها اشهر و اريد اتزوجها واني مشايفها و محترم كلامها و مصدك كل حرف بكلامها .. تاليها تطلع متزوجه مادري ممتزوجة شمعرفني بعد اذا كل الي فات جذب شمعرفني هسه الي راح تحجي صدك لو جذب .. بس حبيتها احلف بكل حرف بكل كتاب سماوي حبيتها .. احلف بكل نبي نزل للناس حبيتها .. حبيتها و رسمت مستقبل الي والها براسي .. ليش الفقير بهل الزمن يتعب .. ليش الي ماعنده تجارب هيج يصير بي .. يعني لو اني مثل جماعتي الي مكضيها يوميا وي بنية جان هسه مصار وياي هيج ..بس لو لان غشيم هيج ينلعب بيا و بمشاعري .. يعني اول حب بحياتي و اول تجربة و ورى هالعمر هيج تطلع .. شسوي .. بس اريد اعرف شسوي .. من البارحة لليوم كاعد صافن و عقل ماكو براسي .. شكول لاهلي .. شكول لاصدقائي الي كلهم فرحولي .. و شلون راح اكمل حياتي وهي ماكو بيومي .. لان تعلمت عليها .. او بالاحرى تعلمت عالوهم و السراب الي رسمته اليا بكلمة احبك و تعال نتزوج و فوكاها جانت مرات تتعارك وياي على اسماء الجهال اذا صار عدنا جهال هههههه اضحك على حالي و اضحك على غبائي لان بين قوسين اني غشيم و محاب كبل .. ليش .. (ليش) انتهى اخوكم ابو بغداد سايق التكسي #ابو بغداد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
