قصص عراقية حقيقية بقلم ابو بغداد سائق التكسي

(ضياء و مهند)

من بيتنا للمدرسة مالتي اكو اكثر من طريق ... يعني اكدر افوت من شارع المضمد .. و مرات اكدر افوت من شارع الجمباز مال طيور مال صفاء الاكرع .. و بظهر بيتنا هم اكو طريق يطلعني عالمدرسة بس يفوتني على شارع السوك الصغير ..
السوك الصغير بي يمكن ثمن محلات .. محل مقابيل محل ..
جنت اتقصد اخذ فره كاملة حتى افوت على شارع السوك الصغير ..
لان بشارع السوك الصغير اكو دكان .. بوقتها الدكان جان بسيط و غراضه بعد ابسط ...
جنت احب اشتري تمر و سمسم .. اذا تذكرون جانو يسونه على شكل طوبات طوبات صغار ... جنت افوت اشتري ثنين و ابقى اكل بيهم لحد ما اوصل لباب المدرسة ..
بالمحلات اكو محل مال كصابة ... بي عامل صغير بكدي ... جنت كل ما افوت من يمه اباع عليه و هو يباع عليا ...
و مرات جنت افوت الكاه ينظف و ما اكدر اشوفه .. لان خطية ملتهي برزقة ..
فد يوم اكو محل بنص البيوت جايب قواطي مال دعابل بس رخيصة ... رحنا اني و ابن جوارينا حتى اشتري .. من فتت بالشارع شفت الولد الي يشتغل يم الكصاب كاعد وي جهال بالركن ...
الجهال جانو كلش خبيثين .. مو عبرناهم بالمشي .. ضربونة بنومية مال حامض ما ادري رارنجة بس خربانة ..
الظاهر واكعة من الاشجار مال حدايق البيوت الي بنفس الشارع ..
اني وصديقي اندارينا عليهم و شفت الولد الي يشتغل يم الكصاب لازم الي ضربنا و يضرب بي ..
وكال ماكو شي روحو روحو ..
كملنا مشينا بس اني الولد ابد مراح من عقلي وراسي .. طلع بيتهم بنفس المنطقة .. اني عبالي بغير منطقة و يجي يشتغل هنا .. تفكير جهال بعد ..
الحاصل ..
صديقي الي جان يمشي وياي كالي تعرفه ؟
كلتله اي هذا يشتغل بالمحل مال كصابة الي بالسوك الصغير ... كال مبين سبع ..
كلتله اي والله ..
جنت فقير اني و على كد البيت و المدرسة بوقتها .. يجوز هاي جانت اول مرة اروح بعيد من يم بيتنا حتى اشتري الدعابل ..
اشترينا الدعابل و رجعنا من نفس الطريق و سلمت عليه .. كام هو من يم جماعته الجهال و اجه يتمشى ويانا ..
كال اكيد جيتو اشتريتو دعابل من دكان ام حسن .. يبيعون رخيص مو؟؟
كلناله اي و بوقتها عرفت اسمه وهو هم عرف اسمي ..
صار صديقي ..
كمنا اني ابن جوارينا نروح لدربونتهم نلعب وي جهال شارعهم .. و جان مهند صدك سبع و خوش ولد وحباب ..
هو مبطل من المدرسة لان ابوه مفقود .. و الكصابة مال بيت خاله .. هو يشتغل وي خاله عامل ..
مهند صار قطعة من عندي .. وكفلي وكفات ما انساها للموت ..
من جنت اتعارك بالابتدائية ما اروح اخذ اصدقائي و لا اروح اخذ اخوتي لو ابوية ..
جنت اروح اجيب مهند ..
مهند كل الطلاب يخافون من عنده لان سبع و ابد ميخاف ..
كبرت اني و رحت للمتوسطة و مهند هم كبر بس بقى على حطته بالكصابة مال خاله ..
كمنا شوية شوية نطلع ابعد من المنطقة .. ونروح للنفط و للشهداء و حتى مرة لحكنا طير مضروب جنحة للمعلمين .. كل شوية يوكع و يطير واحنا نركض وراه بالدرابين لحد موصلنا للمعلمين و رجعنا و مع الاسف ما لزمنا ..
ابوية و امي يعرفون بمهند حالتهم مو زينة ..
جان عمي يروح لعمان لان يشتغل سايق مال تريلة .. يجيب ملابس حلوة و اني و مهند نتلابس بالهدوم ..
جنت اوديله هدوم و خطية يكيف بيهم ..
جنا من نكعد نحجي يكول باع ضياء ..
ما اعرف ليش بس من عندك عادي اخذ هدوم و اقبل .. بس مرات كرايبنا محافظات ساكنين يجون زيارة و جايبين مثلا شغلات .. ما اخلي امي تاخذهم ..
لان اعرف نفسيتهم شنو ..
وبنفس الوقت اعرف نفسيتك شنو ..
انت اخوية ضياء ..
مهند حبيته و هو يحبني اكثر من الاخوة .. و علاقتنا لو شكد ميحاولون الناس يخربوها ميكدرون ..
لان الي يضيعني يلكاني يم مهند ..
والي يضيع مهند يلكاه يم ضياء ..
كل المنطقة و كل الي نتعرف عليهم غربة عبالهم اني و مهند اخوان ..
وصدك احنا اخوان ..
راحت سنين جتي سنين اني داومت كلية .. و مهند هم على حاله بقى بس هو لزم المحل وحدة ..
جنت مرات اجلب بي يبدل ويجي وياي للكلية ..
و جنت افوته وياي و خطية احس بي ينقهر من يشوف الطلاب و الطالبات ... مرة طلعنا و هو لزمته العبره .. كالي والله يعجبني اجي وياك دائما ..
بس بالخوة الي بيني و بينك بعد لاتحلفني اجي وياك ..
افتهمت حالته و عرفت ليش ميريد يجي .. كلتله خلص والله ..
مهند علمني شغلات هواي جنت اخاف اسويها ..
علمني عالسبح و علمني شلون اتعارك و علمني شلون اصوفر ..
جنت ما اعرف اصوفر بأصبعين و جنت اتمنى اعرف اصوفر ..
مهند جان بسيط ابسط من ما يتصور الناس .. يجوز معظم الي بعمرنا بالمنطقة يخافون من عنده لان عراك و كصاب و ميخاف ..
بس داخله طفل مكسور ..
طفل ما عنده امكانية يوصل للي يريده ..
طفل خجول .. والله العظيم بالكلية من راح وياي ..
اكو بنات سألو عليه و كلتله بوقتها ..
يكولون شبي كرايبك ميباع على عيونا من يحجي و يدنج ..
كلتلهم هو يخجل وصدك هو شكد مرات نسوان و بنات يجون يشترون من عنده و حتى من يجي يمي للبيت ابد ميباع عالعيون اذا الي يحجون وياه بنات ..
حتى امي ميباع بعيونها .. يخجل كلش ..
و بيوم من الايام مهند اجاني ساعة تسعة الصبح ..
مكيف طاير من الفرح ..
كالي لك ضياء فرجت وراح اطكككك ..
كلتله شلون كول !!
كال كرايبي يداوم بشركة اهلية مال ماطورات مال مي كبار و مولدات و هيج سوالف .. راح يشغلني بالشركة بالحراسات و اني المسؤول عالباقيين ... وما احجيلك الراتب خويي ..
حضرلي بنية عالسريع شوفلي طالبة وياك حلوة و بنت اوادم حتى اتزوج ههههههههههههههههه ..
عيونه تضحك حبيبي و مكيف و طاير من الفرح ..
كيفتله كلش و فرحتله ..
و كام يداوم .. خطية من كام يستلم راتب زين يوميا ياخذني يعزمني ..
اكله بابا عوف الفلوس تفيدك ..
يكول انجب لك خلي اردلك عزوماتك ياحقير و يضحك ..
حتى هدوم اذا يشتري شي حلو يجيبلي قطعة هدية .. جنت اكله لك بابا اني ممحتاج و عندي كومة هدوم ..
يكلي البس بزود اخوك ..
و راح مهند بليلة ويوم ..
فاتو عصابة على ابو الشركة و هو و حراس ثنين وياه وكفو بوجوهم و رموهم بمكانهم ..
حبيبي واخوية و صديق طفولتي راح و بعد ما اشوفه ..
راح وما ظلت منه بس الذكريات و الهدوم الي جان يجيبلياهم ..
راح و مكانة و خطواته محفوظة بكل دربونة مشيناها اني وياه سوى ...
امه ما فرحت عمت عيني عليها ..
خطية جانت مكيفة على اساس يتزوج ..
ما لحكت تشوف جهالة ..
راح اخوية الي وكفلي بعركاتي بالمدرسة ..
راح نصي الي جنت ما اطلع منا لراس الشارع اذا مو هو بصفي ..
راح الي جنت اتحامى بي و افتخر بي بكل مكان ..
راح الي جنت اسولف لأصدقائي بالكلية على وكفاته وياي و شلون زلمة ينشد بي الظهر ..
و رجعت وحدي و ماعندي صاحب ..
يوميا ادعيله الله يغفرله بس اني متأكد هو يروح للجنة ..
لان حياته بسيطة و ماعنده ذنوب المسكين ..
جان حلم حياته يريح أمة و يتزوج و يصير عنده جهال ..
جان اكبر شي شاغله بالصغر علاكة متروسة و هدوم بيها حظ ..
و من بده شوية يتنفس و يشوف حاله ..
راح بطلقة طالعة من شاجور شايلة حرامي وقاتل ممعروف اصله منين ما منين ..
الله ينتقم من الي سواها ..
الله ينتقم من الي شلع كلبي مني و نومة جوى التراب ..
حبيبي مهند مشتاق لضحتك و لصوتك و لسوالفك ..
الف رحمة على روحك يا اخوية وصديقي و عمري و ذكرياتي وطفولتي ..
(ضياء و مهند)
انتهى
اخوكم ابو بغداد سايق التكسي
#ابوـبغداد
روابط صفحات قصص ابو بغداد سايق التكسي

صفحة التيك توك  للقصص القصيرة …
https://vm.tiktok.com/ZMeLYRHDw
صفحة الانستغرام للقصص المصورة و القصص القديمة  …
https://www.instagram.com/iraq.txei/
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …
https://www.youtube.com/channel/UCER9QkmohGeDKgFFQ8WNAxA

و صفحة السناب بالصورة الشخصية للصفحة و شكرا لكم ..