قصص عراقية حقيقية بقلم ابو بغداد سائق التكسي

الهيكل

جان عدنا بيت مهجور بالمنطقة .. هو مو بيت هو هيكل بس محد مساكن بي .. فد يوم اكو حرامي طفر ببيت من البيوت و حسو عليه و صارت هوسة .. الحرامي طفر و طب بالهيكل ختل .. صار صياح بالمنطقة و كل الشباب طلعو .. يمكن سبع لو ثمن شباب فاتولة فوته وحدة .. الهيكل اظلم و دنيا ليل .. فاتو كلهم جان يطلعون كالو انهزم ..
بس المشكلة منين ينهزم ..
مكان الهيكل ما بي فلته صاير بنص البيوت ..
راحت ايام جتي ايام انست السالفة و الهيكل انبنى و صار بيت .. و مرت سنين و سنين و كلش راحت السالفة ..
قبل سنة تقريبا طلعت سالفة الهيكل من واحد من الشباب الي طبو عالهيكل و كالو انهزم الحرامي ..
الحرامي مو حرامي .. الحرامي هو ولد نعرفه احنا ... او ألاصح نعرف امه .. امه متزوجة واحد بمنطقتنا عكرة و نحس و كل امراض العالم النفسيه بي .. فد شخص مكروه و يلعب ستين نفس .. يحجي وي العالم من ورى خشمه و ابد ممحبوب ..
خطية فوك ما هالولد كاعد ببيت خالة الجبير و مشبعه اهانات .. فوكاها رجل امه ميقبل يجي يشوفها .. لان مرة مرتين لكفها تنطي فلوس .. لذلك يجي بالختله و كل ميجي المسكينة امه تكون مجمعتله كم فلس و شوية لامتله هدوم تنطيهم اله .. هذا مو طافر على امه و ماخذ الغراض و الفلوس .. بالرجعة مالته شايفته بنية من الجوارين عالحايط .. و فوكاها شايل جيس .. اكيد عبالها حرامي و مصيحة ..
الشباب من فاتو جوى للهيكل و لازمي عارفين شكله .. و رئسا متفقين ميحجون .. و طلعو كلهم على نفس الرأي مقابيل الواكفين بره الهيكل .. و الحلو بعد ..
من راحت الناس و الهوسة قلت (يعني الناس راحت) .. واحد من الشباب اخذه يمه بالبيت و ثاني يوم خلاه يروح لبيت خاله بس ميروح يسكن يمه .. يروح يجيب هدومة و يجي حتى يشتغل وي والد هالولد بمخزن مال دجاج مجمد وهيج سوالف بجميلة .. و صدك الولد ما جذب خبر و راح جاب هدومة و كعد بالمخزن خطية ..
بس سبحان الله ..
جان قبل من ساكن ببيت خاله  بالدراسة دائما يوكع و يسقط .. من كعد يم هالرجال و كام ياخذ يومية زينه و نفسيته تحسنت .. رجع للدوام بس نقل دوامه لجميلة .. كام يجيب درجات حلوة و ينجح يوم ورى يوم ..
و هسة الولد هذا الله يستر عليه و يرزقة و يرزقكم .. موظف و متزوج و كعد امه يمه بعد ما توفى رجل امه (الله يسامحه على كل حال) ..
زين .. لو مصايره هالسالفة و ملازمينه بالهيكل .. جان بقى بنفس وضعيته و نفس درجاته و بقى خاله سايك عليه ..
كم واحد هسة مثل حالة صاحبنا خطية امه متزوجه و عايش بعيد عنها و لعبانه نفس نفسه من الحياة .. و كم واحد تحطم بسبب موت والده و زواج امه لو طلاق ابوه و امه ..
عالعموم .. لا تعاتبون شخص مو زين بالدراسة لو اصلا ماله واهس بيها ..
عاتبو الزمن الي خلاه يصير هيج .. شوفو شنو ظرفه و بعدين حكمو عليه ..
و الله يحفظكم و يحفظ صاحبنا الي استعدلت وضعيته بعد مجان منتهي ..
والله مصيبه ياناس .. واحد يروح يشوف امه بالختله ترى حتى الله ميقبلها ..
(الهيكل)
انتهى
اخوكم ابو بغداد سايق التكسي
#ابوـبغداد
روابط صفحات القصص على باقي البرامج ..

https://vm.tiktok.com/ZMeLYRHDw
صفحة التيك توك  للقصص القصيرة …

https://www.instagram.com/iraq.txei/
صفحة الانستغرام للقصص المصورة …

https://www.youtube.com/channel/UCER9QkmohGeDKgFFQ8WNAxA
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …

و صفحة السناب بالصورة الشخصية للصفحة و شكرا لكم ..