قصص عراقية حقيقية بقلم ابو بغداد سائق التكسي

حبيتها

بعمر صغير من بديت اركز عالداير مدايري من ناس ومعارف … توقعت موضوع الزواج والحب جان سهل وبسيط … الحلو يتزوج الحلوة … و الضعيف يتزوج الضعيفة … والسمين يتزوج السمينة .. و الطويلة تاخذ الطويل حتى يتراهمون بالمشي .. و المحلوة تاخذ المحلو … جنت صغير و اباوع عالمواضيع بشكل سطحي .. طفل جنت و مشايف الصح من الغلط .. بعده عقلي على كدي … بديت اكبر و عرفت هالشي الي جنت افكر بي بصغري غلط .. وعرفت الحب يكسر هالقاعدة الي جنت مخليها براسي …
و الحب اذا اجى يلغي كلشي يلغي حتى العقل …
و يتربع عالتفكير و يسيطرعلى الانسان نفسه .. يخلي يمشي مسير مو مخير …
عالعموم …
اني تخرجت من كلية تعيناتها قليلة بالعراق .. و الاختصاص الي اختاريته جان غلطة ندمت عليها بس بعد فوات الاوان … لذلك عفت شهادتي و اشتغلت وي والدي بالدلالية … والدي عنده مكتب عقارات بمنطقة راقية بنص بغداد … من صغري جنت اروح وياه للمكتب واشوف تعاملة وي الناس .. والدي رغم امكانيته زينة يعني فوك المتوسطة بس اسلوبه وي الناس كلش بسيط …
وهالشي اكتسبه من عمره الي تعب بي كلش لحد موصل للي هو بي .. حسب كلامه  … والده  (يعني جدي الله يرحمه) جان كلش فقير و شغله بالبناء وهو جان يشتغل وياه لحظة بلحظة لحد مكدرو يفتحون محل عقارات و يشترون نص قطعة كاع و كامو يتاجرون بيها ..
ولان همه خبره بسالفة البيع والشراء كدرو يسوون الكاع كاعين وتلاثة واربعه و بدو يبنون مشتملات و يأجروهم … الشي الحلو بأبويه ميختار علاقاته و اصدقاءه من نفس مستواه المادي … وهالشي جنت دائما اسأله بي ..
اصدقاء ابويه كلهم ناس على كد حالهم و دائما يصيح ابو الجاي الي قريب من مكتبنا يكعده يسولف وياه بالمكتب لو هو يروح يمه لو يروح يم ابو المخضر يكعد ساعات طويلة اذا اني بالمكتب …
كل اصدقاءه ناس على كد حالهم … يكول هذولة الي تكدر تعتمد عليهم …
و هذولة الي راح يدعولك باجر عكبة من تنزل جوى التراب بدون رشوه و بدون واسطة .. كلتله يابه الله ينطيك الصحه و يطول بعمرك … بس مو شرط … كال شوف الانسان عباره عن علاقات و ذكريات .. الحب علاقة .. الصداقة علاقة …
حتى العبادة بكل الاديان هم علاقة بين الانسان و بالرب الي يومن بي … الي يأسس حياتك صح هيه علاقاتك بكل هالاشياء … كلتله يابه هههههه انت مو دلال انت مفكر … كال مو هيج ابني بس اني الي اكتسبته بهل السنين صبيته كله بتعاملي وي الناس و هسه جيبلي شخص واحد يكرهني بهل الدنيا ..
ماكو و لا تتعب نفسك وتدور لان ببساطة اني احب كل الناس و تعلمت ما اتكبر على غيري ولاتعتبر الي داسوي وي الناس نوع من العطف لان احنا عدنا فلوس وهمه على كد حالهم … الي داسوي اكو غيري سواه وياي من جنت صغير و ببداية عمري ..
و هسه اني مديون لهذولة الناس الي داير مدايري و كاعد ارد الدين لحد ما الله ياخذ امانته .. و اتمنى انت هم تكمل وراي .. لاتتكبر على واحد ابد و حاول تساعد ولاتنتظر مقابل ابد …
المهم ..
مشت الايام واني لزمت المكتب و ابوية من شافني تعلمت كلشي بالضبط و شاف تعاملي وي الناس بأسلوب حلو اعتمد عليا بكلشي و كام يبقى بالبيت لأن مأمن بيا و بقدرتي بالشغل … بالمكتب مال العقارات اشوف انواع من الناس .. و كل نوع يدور شي معين .. الي يدور بيت شراء و الي يدور ايجار والي يدور كاع والي يدور عمارة و الي يدور محل … اني عندي ملفات بالكمبيوتر و طبعا هاي بالجديد سويتها …
لان ابوية يستخدم دفتر جبير يسجل بي.. بس اني استخدم كمبيوتر اكتب بي تفاصيل العقار اذا جان للبيع لو ايجار و اشوفه الصور بالبداية للي يجي وبعدين اذا عجبه يشوف الشي مباشر … اطلع وياه بالسيارة اشوفه الي يريده …
و احاول دائما اقنعه بالشي حتى اني احصل نسبتي …..
و بنفس الوقت موضوع تعقيب المعاملات اني هم جنت اسويه حتى نسبتي تزيد … وعايش الحمدلله بخير و انعرفت كلش بنص الناس لان اسلوبي بالضبط مثل اسلوب ابوية اضافة لهل الشي جنت استخدم مفردات بالاقناع اكتسبتها من دراستي …
يعني هم تعلمت من ابوية شلون اتعامل وي الزبائن بطريقته هو … و زيدت عليها ثقافتي العامة الي اخذتها من الدراسة …
صارت عندي شخصية حلوة كلش بالتعامل و محبوبه كلش … و طبعا عندي علاقات شخصية يعني اصدقاء معدودين عالاصابع … بس الشباب الي اعرفهم محترمين كلش .. و كلهم متزوجين بس اني لا …
بحياتي مدخلت قصة حب .. ولا مجرب شعوره … و الي صار وياي بهل المسألة صدفه و فوكاها صدفه بعيدة كلش …
المهم ..
جتي فترة وضع العراق انكلب كلش .. و صارت اغتيالات عالحلاقين فترة و عالدكاترة فترة و جتي فترة عالدلالين هم … ابوية استشهد بهل الشي ….
بيومها سبحان الله هو ماعرف شجابه للمكتب مع العلم جان ميريد يجي بس قدره المسكين …
جويي مسلحين و خرطو شكو واحد بالمكتب و ابوية و ثنين رياجيل بعد هم دلالين جماعته استشهدو كلهم بنفس اليوم ..
من يومها اني كرهت الدنيا كلها … كرهت روحي كرهت عيشتي و قررت اسافر لان ابوية جان بالنسبة اليا مو بس اب ..
جان صديق و اخ و كلشي حلو بحياتي … امي واخوتي تفهمو حالتي لان يعرفون اني اقرب واحد على ابوية جنت … و طلعت لدولة اجنبية و طلبت لجوء بس انرفض طلب لجوئي … مهتميت لهل الشي و كمت ادور شغل بالاسود حتى الهي نفسي بي … جنت بس اريد انسى سالفة ابوية .. و اشتغلت عدة شغلات … و اجرت شقة بالاسود عشت بيها … و مرت اكثر من سبع سنوات واني عايش هيج ..
اشتغل و عايش يومي … جان يومي بسيط وهم ما بي اي علاقة حب .. جان عندي اصدقاء عراقيين اربعة و ولد مصري … هذولة الي اعرفهم وبس ….
و جنت اساعدهم بكلشي … لان اني ممحتاج شي اهلي امكانيتهم زينة و ممحتاجين احوللهم شي .. بس اني ردت هيج اعيش و خلص … عالعموم اتصلو اخوتي بيا و رادو وكالة علمود مواضيع تخص العائلة .. رحت للسفارة .. اول مرة جنت اروح للسفارة بيومها .. و رحت اسوي وكالة .. بالسفارة التقيت بموظفة صغيرة بالعمر و شكلها كلش قريب عالكلب …
حجيت وياها علمود موضوع الوكالة و البنية فهمتني كومة شغلات و جان عندي نقص بموضوع معين هيه حلته … و طلبت رقمها بس شاهد الله علمود موضوع ثاني متعلق بالاوراق يعني مو علمود سالفة مراهقين و علاقات ..
و اني بيومها من حجيت وياها استخدمت اسلوب الدلال و الخريج الي جنت استخدمه فترة من اشتغلت بالمكتب وي ابوية …
البنية شافتني محترم و كلامي موزون مترددت تنطيني رقمها … اتصلت بيها ورى يومين و طبعا اختاريت وكت نهاية دوامها حتى ما ااثر عليها … حجينا عالموضوع و هيه سالتني سوال على وضعي بالاوراق كلتلها عندي رفض و هيه تعرف شنو معناها واحد عايش بدون اوراق ببلد اجنبي … كالت اني اكدر اساعدك …..و بدت تسألني اسأله عن سكني بالعراق واني خريج شنو … حجيتلها كلشي و حجيتلها قصتي و دليتها مكتبنا و تفاجأت هيه … من عرفت انو احنا امكانيتنا كلش زينة و اهلي ممحتاجين واني هنا اشتغل شغل مو زين بس مرتاح بي .. و بدينا يوميا نحجي …
وفد يوم سالتها سوال اي رجال يسأله لبنية يبدي يحجي وياها ..
كلتلها انتي متزوجة .. كالت جواب عبارة عن جملة بس جملة تقهر … كالت من جنت انته بالكلية هم عندك علاقات مقربة من بنات طالبات يحجولك كلشي عن يومهم ؟
كلتلها عندي زميلات بس اني جنت مو ابو علاقات و لحد اليوم مو ابو علاقات …. اقصد علاقات وي الجنس الثاني … كالت زين …
اكو هواي ناس تشوف الشي من فوك .. وتشوف الطالبات من يروحون للكلية و يرجعون يتوقعون هالطالبات متونسات و مكيفات لان كلية و ملابس و هوسة شباب .. بس ورى كل طالبة قصة .. اكو المرتاحات ماديا الي صدك ماخذين الكلية بسالفة عرض الازياء و الطلعة و الطبه ..
بس اكو الي يتجرعون المر لحد ميتخرجون و ورى ميتخرجون يبقون بطابور الانتظار الي ممعروف شوكت يوصللهم السرى حتى يتوظفون ..
كلتلها اسف ولو اكطع سالفتج بخير شنو الربط بين زواجج و بين هالحجي ؟؟؟؟؟؟؟؟؟
كالت اسمع و حسيت بنبرة صوتها حزن رهيبة و حسيتها لزمتها العبرة من دتحجي .. كالت شوف تعرف اني من جنت اداوم بالكلية … شنو جان دعائي بليل ..
مجنت ادعي اكول يارب نجحني باجر و لا اكول يارب باجر خليني افتهم الموضوع .. جنت ادعي ما اتعرض لمضايقه بطريقي من البيت للكلية …
اني عائلتي ناس على كد حالهم …
جانت امنيتي بس اتخرج حتى اساعدهم بالراتب … جان طريقي يلعب النفس من البيت للكلية .. لان لازم اركب مواصلات عامة مرتين لحد ما اوصل للكلية … لبسي جان عادي وحتى جنت اتقصد ما اخلي مكياج و اصلا اني ما اخلي حتى بس اخلص من المضايقات بس ميفيييييد يا ابن الناس ميفيد …
جنت ادعي يوميا ميكعد يمي شاب يدور سوالف سخيفة تلعب النفس و هسه من داحجيلك اتذكر و اريد اتقيء والله العظيم …
يكعدون و يتقصدون يطخون الجتف بالجتف و غيره و غيره ماريد اتذكر والله …
و اني الفطيرة عبالي بس الشباب جانو يسوون هيج طلعو حتى اكو نفسيات ضعيفة رياجيل كبار شياب هم نفس التفكير النكس (مكرم القارئ) واني جنت مترباية و اخاف احجي و اسكت و اسكت بس ابجي بيني و بين نفسي و اتمنى بس اخلص و اخذ الشهادة واخلص ..
و طبعا هاي اني داحجيلك شي سطحي .. هاي بس بالكعدة بالكوسترات هيج يصير .. ما اريد بعد احجي على مواضيع ثانية هواي و المصيبه كليتي مابيها طلاب هواي من منطقتنا حتى نسوي خط …..
و المضايقات الي داحجي عليها محد مراح يحس بيها غير بس البنات الي مجربات هالشي ..
سوالف تخجل والله .. عالعموم شربت السم لحد متخرجت … بيوم تخرجي جانت فرحتي متوصف و كلت خلصت من هالسوالف كلها وهسه ابدي بحياة جديدة و اساعد هالاب المسكين الي انكسر ظهره من ورانه .. و اساعد امي حبيبتي هم …
و بديت مرحلة جديدة هيه سالفة البحث عن وظيفة … مخليت مكان مرحتله خليت بي اوراقي و محصلت وظيفة …
سنتين اني افتر منا ومنا و محصلت شي …
بالاخير تواصلت وي بنية جانت صديقتي بالكلية … طبعا هيه حالتهم كلش زينة بس بسيطة كلش .. ومجانت تحب هالسوالف مال اللبس و الفيكات .. كلتلها تعبت وكمت ابجي ..
كالت شوفي .. اني راح اساعدج … ابو خطيبي مدير عام .. و عنده علاقات متنوصف …
و هو شي واصل كلش .. راح ارتبلج موعد وياه وتاخذين اوراقج و بلكي الله يدبرلج شي …
كلتلها يله علواه … و رتبتلي موعد ورحت .. بيوم الموعد من وصلت و شفت الهيبة الي بيها هالرجال كلت هاي اخر فرصة اليا … و من شفته مخصصلي وكت .. كلت خلي احجيله كلشي و ما اخجل منه ..
كعدت حجيت كلشي و بجيت حتى هو انقهر عليا كلش كلش … كلتله حتى على سالفة المضايقات و سبحان الله بيومها هم سمعت حجي سخيف بالطريق … حتى هو حاول يضحكني هلكد ما كمت ابجي لان تعبت والله ..
كالي اسكتي بابا راح تلمين العالم علينا و عبالهم اني داكتل بيج ههههه …
و سكتت و هو كالي شوفي حتى اكون صريح وياج هسه اني ماكو شي جوى ايدي بس انطيني رقم اكدر اوصلج بي و الله يقدر على فعل الخير …
الرجل كلش واصل اجتماعيا و سياسيا …
و ورى يومين اتصل بيا و كالي تعالي لفلان مكان لان عندي شغل هنا و اريد اشوفج افهمج شي …
مترددت اروح لان الرجال ثقة و بكد ابوية .. رحت و جان المكان تحديدا بالحارثية … كعدنا بمطعم و هو كالي بس شوية اريد صبر منج و يصير خير و انطاني مبلغ مقبلت اخذه وهو تعصب كلش بحيث استحيت من كلمته و قبلت .. كالي اعتبريني واحد من اهلج و هالمبلغ لا شيء ترى بس ماريد بحياتج بعد تركبين مواصلات …
…
قبلت … و ورى اسبوعين هم طلب يشوفني و بنفس المكان …
حاول ينطيني مبلغ مقبلت بس هو ما لح عليا .. اني عبالي لكالي وظيفة .. اشو الرجال كام يحجيلي على وضعه الاسري وهو تعبان بسبب ولده لان مدللين و زوجته مرية جبيرة و وجودها و عدمه واحد بالبيت …
اني جنت اجاري بالحجي و احاول اتفاعل وياه بالحجي لان الرجال جبير و محترم وحسيته راد يسولف وبس …
و كام يتصل عليا باوقات مختلفة و يسأل عن صحتي و عن نفسيتي … و فد يوم ورى شهرين تقريبا من تواصلنا سوى طلب يشوفني برى و كالي عندي حجي وياج مصيري …
رحت لنفس المكان … كعد و فتح موضوع بس بصيغة مباشرة … كالي شوفي .. اني عمري حاليا جبير و شكد بعد اعيش يعني ؟؟
عشرين سنة بالزايد وهالعشرين سنة اكيد مراح اوصللها بسهولة .. بالادوية و العلاج اوصللها هاي اذا وصلت …
كلتله الله ينطيك الصحة لاتحجي هيج .. كال لا هاي حقيقة كلنا نموت .. واني ماريد بس اعيش مرتاح بهل كم سنة الباقيتلي واني حياتي كلها جبتها وظيفة و ارتباطات و تعب بتعب ..
طول عمري اسمع مشاكل الناس و محد سمع مشكلتي … اني زوجتي اخذتها غصب عليا لان على وكتي عمي وابوية همه الي يتحكمون بينا .. اتزوجت بنت عمي و اني ما احبها .. بس تزوجت حتى احافظ عالعائلة عود وهالخرط …
و هسه اني جايج بعرض بس ماريد اسمع منج اي رد حاليا …
رجعي للبيت و فكري زين و جوابج اريده انتي مقتنعة بي … وكلشي بالحلال .. كلتله شنو ؟
كال انتي صغيرة … واني مخلي هالشي بعيني .. اني اريد اتزوجج ..
و مهرج وظيفة بسفارة باحلى دولة بالعالم .. و شقة و سيارة انتي تختاريها .. بس انتي تعرفين وضعي الاجتماعي هنا .. الزواج يكون هنا بالبداية و بعدين نروح هناك و اني بين فترة وفترة اجيج .. لان اني دائما اروح لهل الدولة … و هنا بالعراق حتى أأمن مستقبلج ورى ما الله ياخذ امانته … اخذلج بيت بس نتزوج بأسمج …
و لا تعتبرين هالشي بيع و شراء … بس اني حبيتج و اريد اريحج و كلشي بالحلال …
طبعا العرض مالته جان مفاجئ بالنسبة اليا .. رجعت للبيت حسبتها بيني و بين نفسي .. خليت كل الاجوبة بس كل الاجوبة جانت تكول كلشي حلال وهو ممسوي شي غلط …  و حتى اكون صادقة سحبتني سالفة اوربا و وظيفة و سفارة و فلوس ..
وحتى ما اكون منافقة … بعت نفسي … وقبلت ..
تزوجني و الرجل ما كذب بكلمة من الي كاله … طبعا اهلي مقبلو بالبداية بس اني اصريت على موقفي و كالو خلص انتي اختاريتي وهاي قسمتج الرجال ميتعيب بس جبير عليج كلش ..
كلتلهم اني الي راح اتزوج مو انتو … وافقت و بخلال ست اشهر اشترالي بيت بالعراق و اجرته وايجاره يروح مباشر لأهلي .. وطلعت هنا و سوالي موعد بالسفارة و طبعا بعلاقاته كبل توظفت …
الراتب جان حلو و اني اصلا عندي لغة انكليزية من الكلية … و دخلت دورات مكثفة تعلمت بيها لغة البلد الي اني بي .. الوظيفة جانت متحتاج لغة هواي لان المراجعين عراقيين .. بس للأضمن ضبطت اللغة … زوجي جان يجي كل ست اشهر يبقالة شهر .. بقيت متزوجته خمس سنوات .. بالسنة السادسة .. هو تعب …
و كام بس يتصل بيا .. اني جنت اشتاقله لان زوجي ..
جنت اخابره ميجاوب هواي كالعادة … و مرة اتصل بيا كالي حبيبتي اريد احجي حجي بس اريد تستوعبين كلامي زين … انتي هسه ممحتاجه شي بس اني ضميري تعبني تجاهج ..
انتي صغيرة .. و الف واحد يتمناج … و انتي هم تريدين تحسين احساس الامومة …
اني دشوفين صارلنه اكثر من خمس سنوات متزوجين وماكو شي اسمه حمل …
و دشوفين لقائتنا قليلة .. واني رجال اعرف الصح من الغلط .. وهالشي غلط و اني مقصر بسبب وظيفتي هنا و وضعي ..
اني مقصرت وياج واي شي تريدين اني حاضر بس لازم احنا ننفصل … لان بصراحة اني جسديا بعد ما بيا حيل عالسفر و داتعب هواي هنا بالوظيفة و المسوولية الي على راسي …
كلتله انته صدك تحجي ؟؟؟؟؟؟؟
كال والله داحس روحي مقصر  …….
و صدك انفصلنا واني بقيت هنا و هو بقى بالعراق و اني هنا ممحتاجة شي واهلي امكانيتهم تحسنت كلش بسببي ..
و هنا ما اكلك تعبت مو تعبت بالدوام لو بلشغل .. لان هنا كلشي سهل .. بس بديت احس بوحدة كلش ..
صح قبل هو مو يمي هواي وكت …. بس جنت احس روحي متزوجة .. و هسه يوميا افتح انترنت وي اهلي من ارجع من الدوام لحد ما انام ..
حتى بس ما احس بنقص ..
يكولولي تعالي بس اني تعلمت هنا و ماريد ارجع اسمع كلام ما احبه لان تعرف المجتمع هناك ….
هسه يكولون راحت متزوجة رجعت متطلكه …………….

طبعا انقهرت عليها وحسيتها هم عدها ظرف مثلي و كمنا يوميا نحجي اني وياها ..
و بديت اروح اشوفها نطلع برى نتمشى و مرات هيه تجيني لان هيه عدها سيارة .. بدينا نضحك ثنينا و اني جنت ناسي الضحك وهيه جنت احسها تضحك من كل كلبها وياي لحد ما عيونها تدمع من الضحك …
و مرة هيج بدون سابق انذار كلتلها احبج …
هيه باوعت بعيوني و كالت احبك و شفت اللمعه بعيونها من كالت الكلمة … حضنتها و بحضنها نسيت كلشي … نسيت تعب الكم سنة بدون اوراق و نسيت وجعي بسالفة ابوية …
و تزوجتها و موضوع الاوراق سبحان الله على كصتها حصلت الاوراق و رجعنا للعراق زيارة و اهلي شافوها و شفت اهلها ناس طيبين خطية فقرا كلش ومن اهل الله …
و فترة ورى زواجنا صار عدنا ايه … ورى ايوته استقالت هيه من الوظيفة … و اني هنا كدرت اسويلي مصدر رزق ثابت … والحمدلله هسه عايشين و ميجمعنا غير كل الحب والخير و التقدير .. وما اتمنى شي غير بس الصحة والسلامة لعائلتي الي هنا والي بالعراق و يبعد عنا كل شر ……… بس الي دوخني ههههه الي قبل جنت افكر بي … مال الضعيف للضعيفة و الطويلة للطويل …  لان اني طويل كلش وهيه كصيرة حبيبتي .. و دائما هيه تتشاقى وياي عالسالفة هاي .. تكلي احنا شلون تراهمنه ماعرف ههههه انت لقلق و اني حمامه .. اني اكلها الحب بابا الحب .. شكد احبها والله احبها ..

(حبيتها)
انتهى
اخوكم ابو بغداد سايق التكسي
#ابوـبغداد