قصص عراقية حقيقية بقلم ابو بغداد سائق التكسي

من حال إلى حال

وعيت عالدنيا واني ماعرف بالضبط منو امي و منو ابوية .... البيت متروس ناس ... بس منو منهم ابوية منو منهم امي ؟؟
ما ادري !!
ليش ما ادري و ليش ماعرف ... لان ببساطة لا امي بالبيت و لا حتى ابوية بالبيت ... عمري سبع سنوات ابوية طلك امي و السبب مجهول ... و لليوم ماعرف شنو سبب الطلاق لان اكيد لا امي ولا ابوية ينطون بنفسهم و واحد يلوم الثاني بسبب الانفصال ... امي مباشرة بعد طلاقها من ابوية تزوجت من ابن خالها و ابوية سافر و عافني يم امه وابوه (بيت جدي يعني) ... بيت جدي بالوشاش .. عمامي تلاثة .. الجبير يبيع جكاير و ببسي و نساتل و جبس عالشارع العام مقابيل مستشفى الطفل ... و الوسط يشتغل بمطعم بشارع ١٤ رمضان .. و الاخير جندي جان و يشتغل بنفس الوقت بمحل مال مخضر ... و جدي عنده محل مال بنجرجي بنفس شارع البيت بس مشغل بي عامل (والسبب يكول على عمامي حرامية و يبوكون من الدخل) .. و بيبيتي جبيرة كلش ...
عمامي ثنين منهم متزوجين و طبعا عدهم جهال و من عمري ... الي جان يداريني و اصيحله يمه هيه بيبيتي ... و اني اصلا عبالي هيه امي ..  جانت تعتني بيا و تسبحني و توكلني وتخاف عليا و مدللتني ... جانت تضم الفلوس بصرة مال قماش جوى الفراش الي تنام عليه ... ريحة الصرة القماش جانت مميزة و هسه اذا اسد عيني اتذكرها بالضبط ... نفس ريحتها  لبيبيتي ... طيبه عبالك مسك ... جانت مدللتني مثل مكلت و اني اصلا جنت صغير و ماعرف من الدنيا غير جكليت لو مصاصة لو نستلة ام العبد لو ازبري .. هاي السوالف جانت هيه حياتي ...
جنت اداوم مدرسة ... بس اكرهها للمدرسة مو لان اني ما احب الدراسة ولا لان اني كسول .. بس اكرهها لان من يستدعون اولياء الامور لو يسألوني عن ولي امري  ماعرف شجاوب و اذا اجاوب اكول ولي امري بيبيتي لو جدي .. المعلم يسألني لعد امك وابوك وين ؟؟
جانت متقصر بيبي الله يرحمها و خطية رغم الوجع الي بركباتها بس جانت تجي وياي و لحد هسه اتذكر الطريق من البيت للمدرسة خمس لو ست دقايق بس وي بيبي جان يصير نص ساعة لان خطية تمشي و تتعب و اني لازم ايدها و ابقى واكف يمها لحد متستراح ونرجع نكمل الطريق ...
ما قصرت وياي ابد ..
بس بالضبط مثل ميكول ابو المثل (ماكو شي يدوم) ... توفت بيبي و بقيت وحدي ... بالفاتحة مالتها حسيت اني صرت وحدي ...
حسيت بعد ماكو سند احط ظهري عليه ..
حسيت الدنيا فرغت من الي يحبوني ..
حسيت  و عرفت الخيمة الي جانت مغطيتني عافتني و تعريت ...
جنت امشي بنص الجهال و عبالك بس اني حاس بنقص .. جهال عمامي الي من عمري كلهم يلعبون يم الجادر مال فاتحتها واني ابجي و لازم الصرة مالتها و اشمشم بيها ... شسوي و وين اروح و بعد وين انام ؟؟
جانت نومتي يم رجلها و من تفز بليل تغطيني اذا مكشف .. بعد منو يغطيني و منو يغسلي وجهي الصبح ... بعد منو يحجيلي قصص و ينومني وهو يلعب بشعري ؟؟
صرت وحيد ...
وحيد بنص عائلة صح جبيرة بس كل واحد ملتهي بروحه ...
راحت لدار حقها واني بقيت .. لا اني الي اكدر اروح وياها ولا  اني الي اعرف شلون راح اعيش بدونها ...
كمت انام على نفس فراشها ... جدي جان يحبها كلش و يعرف ماعندي احد ... حاول يدللني بس خطية ما طول هواي وراها بسنة ونص لحكها .. وهنا جانت الضربة القاضية اليا ...
بعد وفاة جدي انتهيت اني وصرت مثل الطوبة الي يلعبون بيها تك كول ... انضرب منا و انضرب مناك و بالتالي ماكو مكان استقر بي ...
عمامي يتصلون بأمي و امي تاخذني يمها اسبوع اسبوعين و رجلها يكلها رجعي لعمامة لان وكح ...
شلون جنت وكح و ليش؟؟
لان امي عدها جهال من رجلها و ميحبوني و دائما يغلطون عليا واني ما اتحمل واضربهم ... و ما اتوقع اكو طفل يتحمل هالشي بعمري بذاك الوكت ...
و ارجع لبيت جدي وفوكاها عمي الجبير يكتلني لان جنت اسوي وكاحة ببيت امي ...
اول غلط سويته بحياتي بصف اول متوسط بديت ادخن ... و بطلوني من المدرسة و خلوني اشتغل بالمحل مال جدي وي عمي الوسطاني  ... عمي الوسطاني جان هواي يضربني بحجة يعلمني مصلحة وهو اصلا ميعرفها للمصلحة ...
ثاني غلطة سويتها كمت اني اطبق كلام جدي من جان يكول عمامك حرامية و يبوكون من الدخل .. كمت اني ابوك من الدخل واشتري جكاير لو اشتري لفات ...
جلدي و جسمي تدبغ من الكتل و صرت حالي حال البنية الي يغتصبها الف واحد .. من توصل للمية لو للميتين لو للتسعمية .. تسلم نفسها بدون احساس ... و الاذية الي جانت تتاذاها بالبداية تصير لا شيء و ينعدم عدها الاحساس ..
اني هيج صرت ..
عديم الاحساس بجسمي و بجلدي من كثر الكتل الي جنت انكتله ... حتى من جنت اجي واريد ابوك من الدخل اكون مهيء نفسي للكتله و احسبها بيني و بين نفسي واكول اذا حس اني بايك شراح يسوي يعني ؟؟
يكتلني ؟؟
طززززززز ...
عادي ...
وبقيت بهاي الحالة لحد مصار عمري ١٧ سنة بس كبرت و صرت افتهم الدنيا شلون ماشية و ابد بعد محاولت احجي وي امي ولا حتى اعرف اصلا ابوية وينه .. ابوية اكبر نذل بهل الدنيا ... سافر و نسى ابنة ههههه او الاصح نسى اهله حتى هههههه ...
عالعموم ..
عمامي ملو من عندي لان صرت مسيء و اخطائي كثرو لدرجة متنحسب اصلا ... يعني سالفة المشاكل بالمنطقة   صارت مثل العنوان على اسمي .. اذا ينذكر اسمي الكل يتأفف مني لو يسبوني و يسب حتى الرباني (مع العلم اني محد رباني غير بس بيبيبتي ) بس جنت اكيف مرات من يسبون امي لو يسبون ابوية ..
اول واحد بالعالم و بالكره الارضية اذا واحد كاله انعل والديك (مكرم القارئ) يضحك .. اني جنت هيج من اسوي سالفة لو مشكلة و واحد يكلي انعل والديك جنت اضحك .. 
وفد يوم .. عمي ضربني علمود عركة و اني رجعت ضربته بس مضربته بيدي ... ضربته بطابوكه براسه ..
هو عود راد يشوف المنطقة شلون يكتلني ويعلمني الادب .. ضربني كبال الناس و وكعت بالكاع .. من وكعت ايدي صارت على طابوكة كمت بدون وعي ضربته براسه ... خبر عليا الشرطة ههههه و جانت اول دخلة للسجن بحياتي ... طبعا هو رجع طلعني بس بعد شنو ؟
بعد ما شرط عليا اعوف البيت نهائيا ...
زين وين اروح ؟
ماعندي مكان اروحله ؟
و ذاك اليوم قررت ارجع علاقتي بأمي بس علمود اخذ منها فلوس علمود امشي نفسي ... رحت لأمي و حجيتلها عالصار و طبعا لامتني ههههه تكلي انت طلعت من الطريق ... ضحكت كلتلها ماشي هسه انطيني فلوس .. كالت اوكف برى لاتفوت جوى لا اخوتك يكولون لرجلي من يرجع من الشغل انته جيت و الله اذا سمع يطلكني ... كلتلها دفوتي جيبي الفلوس ..
من فاتت جوى لزمتني الغصة و بجيت بس بسرعة مسحت عيوني ... لان هيه ماعرف من ياطينه مخلوقة .. تلومني على شي صار من وراها ومن ورى ابوية ..
عالعموم انطتني فلوس و طلعت لباب الشرجي .. كلت  هناك ادور شغل ... لان اعرف باب الشرجي بيها هواي شباب محافظات يجون يسترزقون و ينامون بالفنادق ...
افتريت عالمحلات مال كهربائيات جانو يخافون يشغلون غريب ميعرفوه .. لان الكهربائيات غالية .. و افتريت على اهل المطاعم هم مشغلوني ... اخر شي ..
اكو محلات يم السينما الورى مو يم الكراج ,,,, جانت هالمحلات مال اصباغ بس جملة ...
ابو المحل جان كاعد برى رجال جبير و ابد مو سهل .. يعني مبين حافظ الدنيا حفظ و يعرفها زين ..
رحتله داسأله على شغل اشو هذا كالي اكعد هنا عالكرسي الي بصفي .. كعدت و جان يدزلي جاي ...
كالي انت وين بيتكم منين جاي ؟
كلتله من بغداد ... كال ليش تريد تشتغل ؟
كلتله حتى اعيش .. كال ابوك شيشتغل ؟
ضحكت ...
من ضحكت هو كالي ترى اني محجيت نكته ؟
كلتله عمي اذا احجيلك تصدكني .. كال احجي خلي نشوف ...
حجيتله مقتطفات من حياتي ...   كالي باع ... اني راح اشغلك و انومك هنا فوك .. كلتله وين فوك ؟
كال فوك اكو شقة اني  مالتي مسويها مخزن ... بس خلي ببالك شي .. اذا تنباك ابره من المخزن اسويك ابره ... واذا تفكر تبوك شي وتنهزم .. لو تنهزم للكعبة اجيبك ..
كلتله عمي والله ماريد غير بس مكان يلمني و اعيش وهاي هيه  ..
كال ماشي بس تذكر اني حذرتك ... شغلني بالتحميل و التنظيف وفوك عشت ...  جان عندي دوشك و طباخ و قنينة مال غاز و ثلاجة من هاي الصغيرة و تلفزيون من هذا الاحمر ابو الجنل ... هذا المكان رغم مجان معبى غراض و قواطي مال صبغ بس جنت مرتاح بي .. لا بي مرة عمي تسمعني حجي .. ولا بي احد يهيني و يضربني .. و الاهم كرامتي محفوظة ...
اشتغلت و كمت اجمع فلوس و طبعا بشغلي هناك تعرفت على كومة شباب و كل واحد بهل الشباب وراه قصة ... هدوم جنت اشتري بربع السعر لان اهل البالات هناك صارو اصدقائي .. حتى الاكل مرات جانو ميقبلون ادفع الحساب اهل المطاعم ... لان صارت عندي علاقات هواي ... و فد يوم من الايام ... اكو ولد عنده عربانة مال شربت بطيخ قريب من المخزن .. جنت اروح اكعد يمه دائما ...   فد يوم كالي شنو رأيك نجيب نسوان ... كلتله  وين يمعود ؟
كال بالمخزن شبيك ... كلتله لا يابه اخاف احد يوصل الحجاية و تعال انطرد واني ماعندي مكان ... بقى يلعب بعقلي لحد ما اقتنعت ...  و قنعني شلون ..
كال انت معليك بس تحضر المكان و اني اجيب بنات ثنين وياي و اجيك .... كلتله ماشي ..
و اتفقنا على يوم الخميس لان الجمعه عطلة ...
و صدك والله رتبت المكان و سويته و جاب هو بنات ثنين .... لكل واحد وحدة .. طبعا بفلوس جايبهم ..
هاي جانت اول مرة بحياتي اسوي هالشي ... و اصلا بعمري ممسوي علاقة و اصلا ممصادق ..
البنية الي جابها من عمري صغيرة مو كلش جبيرة ... و الي وياها هم بعمرها بس جانت كلش كلش مو زينة يعني لسانها ينكط سم مو عسل .. تغلط هواي وتسب هواي و بس تضحك ...
بس البنية الي وياي جانت فقيرة ... صار الي صار و حسيت بالبنية  تريد تحجي ... طبعا اني بغرفة وياها وصديقي ابو عربانة الشربت بغرفة ثانية بنفس الشقة ..
كلتلها شبيج اشو مو على بعضج ... كالت  ماكو شي .. كلتلها صدك شبيج ؟
كالت مابيا ... بقيت احجي وياها واحاول اضحكها ... كالت شنو انت عايش هنا ؟
كلتلها اي ...
كالت محافظات مو ؟
كلتلها لا والله من بغداد بس عندي قصة .. اشو هاي كيفت للسالفة و ابتسمت كالت احجيلي بله ؟
كمت احجيلها وهيه حطت راسها على ايدي وتسمع و تسأل على كلشي اكوله ..
انقهرت عليا و كل شوية تبوس جتفي وبصراحة بذيج اللحظة اني بجيت .. هيه هم بجت و حضنتني كالت البيك بيا ..
اني رأسا مسحت دموعي و كلتلها شنو ؟
كالت اني مثلك كبرت و صدك ماعرف منو امي .. بيت كلشي بي غلط .. رياجيل تفوت رياجيل تطلع ... عركات .. ريحة شرب بكل شبر بالبيت ... بنات ياخذوهم و يرجعوهم ... والحل والربط كله بيد ام فلان ... جانت هيه تتحكم بالبنات .. اني اصلا مو بس امي ماعرفها منو ابوية هم ماعرفه منو ههههههه ... ضحكت اني كلتلها صدك تحجين ؟
كالت والله ... كالت شعبالك اني احب هالشي الي سويته وياك لو داسوي وي غيرك ؟
كلتلها  ماعرف ..
كالت لا اني افهمك و اعلمك ... اني فتحت عيوني عالدنيا بهيج بيت و بهيج قذارة شتريدني اطلع ؟؟ اطلع دكتورة لو مهندسة هههههه .. حالي حال القبلي ... لازم اقبل بهل العيشة الي يوميا من الصبح لليل العنها و اكفر بيها مليون مرة و اشوف الي يسوى و الي ميسوى ولازم اقبل اسوي وياه الي يريده علمود يدفع ...
حسيتها جانت صادقة وياي و حضنتها قوي و انقهرت عليها ... كامت تجيني بين يوم ويوم ... ورى ما نعزل تجي و وجه الصبح قبل منفتح تروح ...
حبيتها و حبتني وهيه تعرف تاريخي واني اعرف تاريخها ...
و فد يوم جانت نايمة يمي كلتلها ليش منتزوج ؟
كالت دسكت يمعود هههه لاتشاقى ..
كلتلها والله احجي صدك ... كالت تاخذني وانت تعرف شنو اني ؟
كلتلها اي ليش لا يعني علساس حالي احسن من حالج ؟
صفنت هيه و كالت الله يخليك لا تتشاقى اذا كاعد تتشاقى ترى هالشقة ثكيل ..
كلتلها والله احجي صدك نتزوج .. كالت يعني معقولة تتزوجني و تطلعني من هالحياة العايشتها ؟
كلتلها والله اسويها ...
كامت تبجي و حضنتني ...
ثاني يوم رحت حاجيت ابو الشغل كلشي واعترفتله بكلشي وكتله اريد اتزوجها ... هو ضاج لان سويت هالشي بس بنفس الوقت ..
كالي اساعدك بكلشي ..
و عوف المخزن اني راح اشوفلك شقة هنا .. وصدك والله لكالي شقة ايجار رخيصة و تزوجتها و كعدنا بالشقة ...  بقيت بشغلي اني وهيه كامت تكلي حب بكميات جبيرة و تسويها بلفات مال ورق و اني اوزع على اهل البسطيات لو على الجهال الصغار الي يبيعون بالكراج ... كمنا نجمع اني وياها و عشنا احلى عيشة .. جان حبي الها جبير وهيه حبها الي اكبر لان ابد ما فد يوم حسستها هيه شنو جانت .. وهيه خطية جانت مداريتني مثل المي بالصينية ... و عشنا هيج .. و بقينا هناك فترة بعدين تحولنا لمكان ثاني بس شغلي بقى نفسة .. بالمناسبة قطعت علاقتي بابو الشربت ورى مشكلة جبيرة ردت افوت بيها للسجن بس الله حلها ... من عرف اني راح اتزوج نفس البنية سمعني كلام كلش سخيف وكالي لك هاي انت صدك اول مرة تسوي هيج وانت فطير وانت مشايف نسوان ... وضربته بالمكينة مال شربت بس الله ستر و هو ما صار بي شي ...
عالعموم ... تحولنا لمنطقة ثانية و بقيت بنفس شغلي وهيه بطلت تسوي حب لان شغلي تحسن و ما كمنا نحتاج لهل السالفة ...
و طبعا اني جنت بكل ذيج الفترة انتظر يوزعون الورث مال بيت جدي ... لان الي حصة ... وجرت سنين يله صفت السالفة و توزع الورث .. بيت جدي و المحل انباع بسعر كلش زين ... و اني وكعتلي حصة زينة كدرت بيها افتح محل بنجرجي و ميزانية وبلنص بحي صناعي ... بس الحي الصناعي جان جديد مو قديم ...  بالبداية جان الشغل مو زين و جتني فترة ردت اعزلة للمحل وارجع لشغلة الاصباغ ... بس شوية شوية الحي الصناعي صار  عليه رجل و كمت اشتغل و الشغل ابد ميوكف ...
المحل مالتي انعرف و لان اني بس اريد اعيش و اعيش زوجتي جنت امشي بصف الحايط مثل ميكولون على الرغم من اني ماكو مكسورة ما اعرف اسويها ... بس ردت اصير عدل علمود هالمرية الي حبيتها والله ...
و سبحان الله ... ورى ما اجاني ولد الرزق كام يزيد و يزيد و يزيد ... اخذت سيارة و انطيتها لولد صديق يشتغل بيها ... و المحل اني لازمة ... و مشت الدنيا و الحمدلله الولد صار عنده اخ و اخت و عايش هسه ... واني مرتاح و موجود ومعروف بالحي الصناعي و الكل يحسبلي الف حساب و يحترمني ....  و بالمناسبة النذل (ابويه) ما بين و امي ما شفتها بعد ولا اريد اشوفها .. و عمامي ورى توزيع الورث هم ما شفتهم اصلا ...
اهم شي بحياتي هسه زوجتي و جهالي و شغلي ...
وبس ...
(من حال لحال)
انتهى
اخوكم ابو بغداد سايق التكسي
#ابوـبغداد