قصص عراقية حقيقية بقلم ابو بغداد سائق التكسي

العازف

صوت الناس الي تبيع … صوت السيارات و ريحة البهارات الي بصفها اتمشى … اشكال الناس الي متعبها الوكت داير مدايري … صوت الاطفال الي يحاولون يخشنوه حتى يسمعون الناس الي بالشارع همه ديبيعون (علاليك) صوتهم المساكين شكد يحاولون يخشنوه حتى يوصل للكل بس أي واحد يسمعه من بعيد يعرفه صوت طفل ما تعدى العاشره من عمره … صوت الميزان القريب مني من يحطون عليه السلعة و يدك بالبداية .. حتى الطين الي بالكاع  الممزوج بالمي بي صوت مميز من تدوس عليه برجلك … ريحة الفلافل الي ديكلبوها بالدهن و يطلعوها بالمصفي يصفوها من الدهن … حجي الناس داير مدايري … ناس تسأل على اسعار المخضر .. ناس تسأل على اسعار البقوليات .. ناس تسأل على اسعار الهدوم مال جهال …صوت العرباين و صوت التايرات من تمشي عالطين هم نغمة .. نغمة العيشه … صوت الناس الي تعتذر من تطخ جتف بجتف بالغلط … صوت بنية صغيرة تعبت من المشي تكول لأمها (شوكت نرجع للبيت ماما تعبت) … كل هالاصوات و هالصور جانت بالنسبة الي شي جديد .. لأن اول مرة بحياتي ادخل بهيج تفاصيل .. تفاصيل عيشة الناس الي جنت بعيد عنها .. ليش بعيد عنها .. لأن مجنت محتاج انزل اشتغل و هاي اول مرة بحياتي راح اشتغل بهل المكانات لان احتاجيت .. و الحاجه مو عيب … احتاجيت فلوس لان ابوية شكد ميحاول يوفرلنه المصرف المسكين مكاعد تسد وياه المصاريف .. منا فلوس العلاكة .. مناك فلوس الايجار مال البيت .. منا فلوس العلاج مالته و فلوس علاج امي .. لان المساكين بيهم امراض مزمنه .. و ابد ما جانو يخلونه او يحسسونه همه تعبانين .. جانت امي الله يرحمها و يرحم والديكم .. بكل سالفة تكول هو منو ما بي سكر وضغط .. و جانت تضعف سنه ورى سنه و احنا من نكلها ضعفانه يمه … اوف .. كلمة يمه للفاقد امه شكد صعبه من تنكتب لو تنكال .. من جنا نكلها يمه ضعفانه تكول مو احسن من السمن .. اصلا داحس روحي خفيفه .. مجانو يحسسونه بضعفهم و قلة حيلتهم رغم تعبهم بهل الدنيا .. تعبو لحد مكبرونه .. ما بيها شي من نكبر نخلي جتفنه بجتفهم و نشيل منهم شويه … بذاك الوقت طلعت اني و لكيت شغلة بمحل مال بقوليات بنفس المكان الي وصفته .. صاحب المحل صديق جوارينه و اني اصلا جنت مخلي خبر يم جوارينه (اني ادور شغل) .. و الرجل ما قصر بس عرف صديقه يدور واحد أمين يوكف وياه .. كاله عليا و دزني عليه … و هاي جانت الي اول محطة بحياتي (استرزق منها) .. الصراحة جنت استحي بالبداية من اتعامل وي الناس … خصوصا النساء .. بس بحكم الشغلة الي اني بيها .. تعاملي اكثر شي وي النسوان … يوم ورى يوم تعلمت … حتى الهدوم الي جنت البسها (بالبداية) جنت اهتم بقيافتها .. بس يوم ورى يوم كمت اجي بهدوم عادية و ما اهتم هواي … بوقتها ابوية كيف من كمت اشارك بمصرف البيت .. بس ما بينلي هالشي … و حتى امي كيفت .. بس همه لو بيدهم والله ميخلونا نشتغل لا اني و لا اخوتي (لحظه) … بس العيشة صعبة و ايد وحدة متمشيها .. الدوام مالتي ما بطلت منه ابد .. و داومت مسائي لان السوق الي اشتغل بي المغربية يكون معزل نهائيا و ميبقون بي غير بس النواطير (يعني الحراس المسوولين عن حماية المحلات) .. و بمرور الوكت تغيرت شغلتي .. اشتغلت بمطعم مره .. ومره بوكالة مال طحين .. ومره بمحل مال البسه رياضية .. لحد ما اخر شي اشتغلت بفرقة موسيقية … جنت ادك دمام … بذاك الوكت حرفيا المسوولية صارت عليا و على اخوتني ثنينهم .. لان ابويه جان عايش بس السكر دمره ..
المسكين (الله يرحمه و يرحم والديكم) جان يحجي جملة و كلنه بالبيت منقبلها و نكله لاتكول هيج .. يكول هسه السكر منين اجاني .. اني اكثر شي اكرهه الحلويات و الشكر .. و اسم مرض السكر مرتبط بالشكر و الحلاء .. واني الحلاء اتخبل منه .. زين هسه معقولة راح اموت من السكر و اني اصلا مماكله .. شلون يقبلها السكر نفسه و جان يضحك ابو ضحكة الحلوة الله يرحمه … جنا نكله يابه عمرك طويل شنو هالحجي .. و المسكين هو شكل وياه سكر من ورى القهر و الهبطات .. من جنت اشتغل بالفرقة مجان راضي هو بس مجبور يقبل .. لان ماكو باليد حيله … اني بذاك الوكت بطلت من الدراسة لان متفيد بعد حتى دراستي المسائية مترهم .. هو اكثر وقت نشتغل بي لو نطلع نعزف بي هو وقت الظهرية لو المغربية لو بليل .. و طبعا شعبنا شعب عجيب .. كل شي اشتغلت محد علق على شغلي و سماني بأسم الشغلة .. بس من اشتغلت بالفرقة الموسيقية (رأسا بقدرة قادر صرت فلان الدمبكجي) … مجنت اهتم لسالفة اللقب .. بس جنت مرات احس الناس الي اصلا محد يعرف ظرفي شنو وليش اشتغلت هيج يباوعولي بنظرة دونيه اي اي دونيه .. يحسسوني اني داسوي شي غلط .. و همه خيرهم ما اجاني كالي ابوك لو امك شمحتاجين .. اني ماريد احد يسألني انته شمحتاج لان اني رجال و اعيش روحي غصبا ما عليا .. بس الي بركبتي ابوية و امي و خواتي ثنين .. اخوتي ثنينهم هم يشتغلون .. و اهم شي ما بايكين احد ولا مادين ايدنا على رزق الناس .. معيشين نفسنا المهم .. ما فد يوم تأخر ايجار بيتنا .. ما فد يوم ثلاجتنه فرغت .. ما فد يوم دكينا باب الجوارين و كلنالهم نريد راس بصل لو شوية دهن لو فد كرصتين خبز .. عيشنا نفسنا بنفسنا .. و مرت سنتين واني اشتغل بالفرقة .. و بيوم من الايام قرر ابو الفرقة يسوي علاقات وي ناس يغنون .. حتى يوسع شغله .. و اكو مطرب بذاك الوكت جان ستوى طالع .. مطرب شعبي يغني بالاعراس الي بالشارع يسووها .. سوى وياه اتصال و اتفقو سوى .. الولد كلش حباب بس موهوب .. صار صديقي كلش و راد يساعدني .. عرفني على ناس عدها خبرة بالعزف .. علموني شلون اعزف بأكثر من اله موسيقية .. اني جان الي واهس بهل الامور كلش .. حتى هلكد ما الي واهس جنت مرات البس هدوم مال طلبه و هالشي والله محاجي لبشر بس اخوية الاصغر مني يعرفه .. جنت البس هدوم طلاب لان اني اصلا اعرف شيلبسون زي موحد .. و اروح للوزيرية يم اكادمية فنون الجميلة افوت افتر هناك .. ومرات اروح يم الزوراء للمعهد مال الفنون .. ماعرف ليش جنت اسوي هالاشياء والله … اني بوقتها جنت اتمنى عندي وقت حتى اكمل دراستي بس مترهم خصوصا ورى ما ابوية كعد بالبيت .. و يوم ورى يوم معارفي بهل المجال كامو يزيدون ..
و المطرب الشعبي الواحد صارو اكثر من تسع مطربين عندي علاقات وياهم .. و كمت اطلع وياهم حفلات بقاعات مال اعراس (معروفه) طلعت اول قاعة اتذكرها مال نقابة الاطباء مال اسنان الي قريب على معرض بغداد الدولي .. و وراها بنادي اسمه اليرموك الترفيهي .. اشتغلت وي فنانين هسه صارو معروفين كلش .. بس بذاك الوكت جانو ستوهم بادين شغلهم .. و بديت اطور عزفي و اطور من موهبتي (حسب ميكولون الي يعرفوني) لان كالو الي عندك موهبه خصوصا انته اكثر من اله موسيقية تعرف تستخدمها و عندك قدرة تتعلم بعد … لحد ما صرت عازف اورك و درامز .. و توفى والدي و هناك اني صرت المسوول الاول عن البيت .. جانت صدمة خصوصا اني اعرف هو جان مجبور يقبل وضعي .. ابوية مجان راضي على شغلي و خصوصا من بديت اسهر (بحكم شغلي) و ارجع للبيت وجه الصبح .. و انام للعصر و اطلع .. بس الرجل الله يرحمه مجان عنده خيار .. مجان عنده مبلغ جبير شويه افتح بي مصدر رزق واكعد بي.. و حتى لو فتحت اسواق مثلا .. او محل كهربائيات .. او فيتر .. مراح يدخلي مدخول يومي اعيش بي هالعائلة …
يعني خواتي يداومن وحدة اعدادية و وحدة كلية .. اخوتي واحد بيهم صار عسكري و بطل من الشغل و هم خطيه وراه مصرف روحه و رجعه .. و اخويه الثاني يشتغل بس مو ذاك الشغل القوي .. اني جنت اطلع الايجار من شغل اسبوعين والله .. و من عده مرات يكيتون علينا و فلوس الكيت تتقسم .. و ورى وفاة ابوية بسنتين امي لحكته .. و اني خلص رسميا صرت المسوول عن الكل … طبعا هالحجي السنين تركض داير مدايري .. و اخوتي هم كبرو و خواتي ثنينهم تزوجو و زوجت اخوية ورى مخلص جيش .. و كدرت ابني بيت و بنيت الطابق الفوك كله لاخوية المتزوج .. و هالحجي اني حتى بالتلفزيون طلعت اعزف اكثر من مره .. و طلعت باغاني لفنانين معروفين .. جنت اتنقل من فرقة لفرقة .. طبعا بالمناسبة .. اني مرة انعجبت ببنية جانت جاية وي اهلها بوحدة من القاعات .. اهل البنية ناس راقين .. حبيتها و التقيت بيها خارج اطار الشغل .. و حتى اكون صادق لحكتها و هي عرفتني .. و صار تواصل بيناتنا و صارت بيني و بينها علاقة (نظيفه) لمدة ٨ اشهر .. و بيوم الي قررت اخطبها انرفضت ههههههه وجان السبب واضح .. شغلي .. و طبعا المضحك المبكي بالموضوع .. الرفض حاله حال السكر و حجاية ابويه عن السكر .. ابو البنيه (يشرب) واني ما اشرب بس اشتغل عازف .. ابو البنية يكول لامها (هالحجي هي وصلته الي) يكلها هاذا تلكي يكوم سكران و نايم سكران و مو بعيد باجر عكبه نشوفه يعزف ورى وحدة تركص .. و هو حتى شهادة ماعنده و بنتج بعدلها اقل من سنتين تصير مهندسة .. هههههه من كالتلي هالحجي بيومها بجيت .. بجيت لان تذكرت ابويه .. حاجيت صورة ابويه المعلكه بالصالة .. كلتلها والله يابه حقك كلت اني راح اموت من ورى شي ممسوي .. من ورى السكر الي اصلا انته متحبه ومماكله .. اني هسه مثلك يابه .. واحد يشرب يكول عليا اشرب و رفضني هههههه واني الشرب محاطه بحلكي و اكره حتى ريحته .. و انتهت علاقتي بالبنية للامانة بطلب منها لان يجوز تقرا القصة و هالحجي مر عليه سنين .. و حبيت وحدة ثانية و هم مرهمت .. و اخير شي .. تزوجت وحدة اهلها جانو ممقتنعين بيا .. بس حاربت اهلها لحد ما وافقو عليا .. مع العلم هي صاحبة شهادة و خريجة .. واني ماعندي شهادة و دمبكجي على كولة الناس .. طبعا الي تزوجتها حجيتلها كل حياتي من ايام شغلي بالسوك لحد يوم الي ضفتها على الانترنت و اصلا اني اعرفها قبل ما ادور على حسابها بالانترنت .. شفتها بمكان ماله علاقة بشغلي .. و سألت و تطقست و مجان صعب عليا اعرف منو هي و وين ساكنه (بحكم العلاقات الي صارت عندي حاليا) .. اكو فرق جبير و اعترف بهل الشي .. فرق بوضعها و وضع اهلها و وضعي (العلمي فقط) بس المعيشي لا .. لان الحمدلله اني حالي تغير من حال الى حال افضل بهواااااااي .. و صح اعترف كله بسبب العزف و الحفلات و الاغاني .. يجوز برأي الناس اني غلط .. لان هالمجال الي طورت نفسي بي هو مو صحيح .. بس مجان عندي خيار .. اني لو باقية عليا .. جانت اعيش عيشه هادئة .. بعيدة عن ضجيج الحفلات .. حياة موظف براتب يكفي .. و عندي بيت صغيروني .. هاي جانت امنيتي .. بس مكدرت اسويها سويت الاحسن منها بهواي .. بس مراضي عن نفسي ..
و كل ما اتذكر ناس مرو بحياتي  جانو يشوفوني غلط .. انقهر .. و الي يقهرني اكثر ابوية و امي .. راحو ثنينهم و جانت امانيهم الي و لا اخوتي هواي تختلف عن الي صرنا بي .. جانو امانيهم نصير اصحاب شهادات و تخصص .. بس للأسف الدنيا مخلتنه نصير .. عالعموم .. هاي حياتي .. و اني متأكد اني بنظر الناس ( مو كل الناس يعني بس بنظر بعض الناس) اني الي عندي كله حرام و اني اصلا شغلتي حرام بحرام .. بس شسوي .. حتى هسه اذا يسألوني زين اذا رجع بيك الزمن ليوم الي سمعت بي نغمة العيشة راح تختار غير مصدر رزق ..
راح اكول لا … راح اعيش نفس الي عشته و اشتغل نفس الشغلة لان هي الوحيدة الي كدرت بيها اوازن بمصرف البيت و الايجار و الادوية و و و و .. هسه الراح راح .. بس بصراحة اعيش نفس العيشه ..
(العازف)
انتهى
اخوكم ابو بغداد سايق التكسي
#ابوـبغداد