قصص عراقية حقيقية بقلم ابو بغداد سائق التكسي

المساحة

يوم جان مثل كل يوم طبيعي .. رحت للدوام و كملت و رجعت انتظرت بالكراج شوية .. و جتي السيارة الي تروح لمنطقتي و صعدت .. كعدت انتظر السياره تقبط … اجه واحد صعد و سد الباب وجانت اصلا السيارة ممقبطة ..
صوت طبكة الباب جان قوي لدرجة السايق صاح يابه علكيفك وي الباب ترى اني سايق بالسيارة مو سيارتي  و كاله ارجع افتحها بعد نفر ..
الي طبك الباب اعتذر من السايق و فتح الباب و انتقل من الكرسي الي بصف الباب مال السيارة للكرسي الي بصفي .. و كال مرحبا .. اني مجاوبته و درت وجهي عالشباك بقيت اباوع على اهل العرباين .. جهال وجوهم تضحك و اعمارهم صغيرة بس همومهم مبينه جبيرة ..  هالشي واضح بعيونهم رغم ضحكهم بيناتهم ..
بلحظة الي سلم بيها عليا هالولد الي بصفي الي عطره هلكد مو قوي و هلكد مراش روحه بالمعطر صاير قوي لدرجة الخنكه .. بنفس اللحظة كلت بيني و بين نفسي .. هم راح يسمعني حجي المتعلمة عليه يوميا .. حفظت الموضوع و تقريبا تعودت عليه .. بالبداية من بديت اداوم بالكلية جان هالشي مال (تصجيم وهاج رقمي) كلش ينرفزني .. بس بعدين صار عادي و روتيني و كمت ما اهتم ولا ادير وجهي اصلا .. اني صح بالاعدادية صايرة وياي هالمواقف .. بس بالكلية لان اركب اكثر من وسيلتين نقل و غصب عليا اطب بكراج متروس بشر ..
الموضوع زاد عن حده .. و رجع كال يابه مو كلنه مرحبا ..
و هم مجاوبته .. سكت شوية و هم رجع حجى .. كال انتي هنا بفلان كلية تداومين ؟
و هم مجاوبته .. و رجع هو جاوب بمكاني هالمرة كال اها اي زين اتشرفت بيج .. و كام هو يسأل وهو يجاوب بس صوته نصاه شوية لأن صعدت مرية جبيرة بالعمر بصفه و قبط السايق و طلع .. و بقى يحجي و اني ولا عبالك داسمعه .. بس المصيبة كال جملة هي تضحك و اني بالكوه لزمت نفسي لان ردت اضحك من صدك .. كال هسه اني ادري تكولين هذا غير لزكة و شكد لغى .. بس والله انتي مو غلطانه لان اني صدك لزكه و الغي هواي .. هههه ردت اضحك بس لزمت نفسي ..
و ابد مدرت وجهي عليه ابد ولا حتى شفت وجهه .. و ورى شوية من اخر جملة كالها .. كال يله اني اترخص ممحتاجة شي .. طبعا هم مجاوبته .. كال بس مو وكته للركي هسه شبيج ترى احنا بالشتا راح اجيب بطيخ بمكانه (يعني هو تخيل انو اني طلبت منه شي الي هو ركي) ..
و هم مجاوبته .. جان يصيح نازل و نزل .. بصراحة حاولت اشوف وجهه .. بس ملحكت وضاعت ملامحه عليا ..واختفى ورى الركاب .. و قبل مينزل كال جملة للسايق .. كاله بالخوه خو ما بعدك ضايج مني .. السايق كاله لا حبيبي مصار شي .. و هم رجع اعتذر للسايق ونزل .. المشكلة اني مثل مكلت حاولت اشوفه بس جان بس ظهره عليا ..
و نزل و راح .. الوحيد من بين الي سمعوني و لحكوني ردت اشوف وجهه .. يجوز جان فضول عابر .. يعني مو شغلة اعجاب لأن اني ما احب الرجال الي يصجم و يلحك بنات .. و مرت ايام و ليالي و نسيت هالموقف و طبعا صادفوني غيره هواي و بقيت بدوامي عادي .. و فد يوم احنا الطلبة واكفين برى نحجي على الدراسة .. قريب من الكافتريا كلنا ملتمين و كاعدين نقارن شغلات بدراستنا .. اجه ولد من قسمنا و وياه صديقه .. سلمو ثنينهم و هم بدو يحجون بسالفة الدراسة .. بس الي شفته الولد الي وي زميلنا هواي لح بعيونه عليا .. بقى يباوع عليا .. اني بديت اتهرب من عيونه لأن عيونه كلش قوية ..و كمت اكلب بالدفتر الي بيدي بسرعه بحجة اشوف الطالبة الي بصفي الشغلة الي دنحجي عليها بس عقلي يمه الولد و داحجي بيني و بين نفسي عنه اكول ما ارفع عيوني بي بعد .. و سمعته يكول لصديقه يله ابو الحب اني اترخص و سلم و راح .. وراها رفعت راسي براحتي و السرعة الي جنت اكلب بيها اوراق الدفتر رجعت طبيعية .. و كمت عادي احجي ..
ثاني يوم اجتني طالبة صديقتي و وياي بنفس القسم كالت اكلج اكو شخص دازلج هدية بس حلفني ما اكول منو ولا اكول اي تفاصيل عنه .. كلتلها شنو هالحجي .. كالت اي والله ما اتشاقى و ترى هي الهدية بسيطة كلش .. كلتلها شنو بله .. جان تطلع مساحه على شكل نص ركيه ام العطر ..
اني ضحكت و جنت ناسيه موضوع الي صعد وياي و بقى يلغي هواي .. كلتلها ترى اني مفتهمت انتي صدك تحجين لو تتشاقين .. كالت اي والله و حلفني تاخذيها .. اني مديت ايدي داخذها و تذكرت السالفة بنفس الثانية الي لزمت بيها المساحه ههههه ضحكت كلتلها عرفته .. و وخرت ايدي من عالمساحه كلتلها كوليله شكرا ما اخذ هدايا غير بس من اهلي والناس الي عندي ثقة بيهم .. ضحكت البنيه كالت يعني هيج اكله .. كلتلها اي ..
و انتهت السالفة بس من طلعت من الكلية و دخلت للكراج حسيت هو نفسه الشخص راح يلحكني .. و بقيت انتظر اشوفه .. بس ما اجى و ما لحكني .. و من رجعت للبيت بقيت افكر بيني و بين نفسي كلت هذا مبين مركز وياي و اكيد هو بنفس الكلية .. و اكيد فاتن تعرفه (فاتن هي الي جابتلي المساحه) .. و رجعلي نفس الفضول الاول الي ردت اشوف شكله بي بس ملحكت .. بس هالولد ملعب و مبين ابو بنات ماريد لا ماريد .. و صار بداخلي مثل العركه .. صوت يكول اريد اشوفه و صوت ثاني يكول لا هذا ملعب و هذا ابو بنات و انتي بحياتج مصادقتي و دائما تكولين الي يصجم بنات مو ثقة لأن متعود على هالشي .. و داومت وراها و التقيت بفاتن .. هي مفتحت موضوع عن الولد و اني جنت بين الي اريد اسألها عليه و بين الي ما اريد .. اخر شي سألتها كلتلها ها رجعتيله المساحه .. كالت اي و انقهر كلش .. كلتلها بابا خلي يولي ترى هذا ابو بنات .. كالت انتي غلطانه والله اصلا ماكو افقر منه (وهنا بديت اسحب الحجي منها سحب) كلتلها بنتي هذا من جماعة الي يلحكون شكو بنية بالشارع و ياهو الي تنطيهم عين يجلبون بيها .. كالت والله داكلج غلطانه ..
كلتلها و شنو هالثقة الزايدة بله .. كالت سدي الموضوع .. كلتلها سدي سدي و اني اصلا صوجي سألتج .. بنفس الوكت الي جنت احجي وياها اجه نفس الولد الي خلى عيونه بعيوني قبل كم يوم .. جان يسلم و كعد بصف فاتن .. اني رأسا سويت نفسي داكلب بالكتب و باوعت عالساعة الي بيدي .. بقى يحجي وياها بس بصوت ما اسمعه لأن هو بصفها .. يعني احنا كاعدات على مكان مثل المسطبه .. فاتن صارت بالنص و الولد بصفها من ذيج الصفحة واني من هالصفحة .. هي ضحكت و هو كال يابه شنو سالفتج صار كم مرة اسلم ومتردين السلام .. بس صوته جان عالي و مبين موجه كلامه اليا مو لفاتن .. اني كلت العفو وياي هالحجي .. ورفعت عيني بعينه .. بس عينه قوية والله قوية .. كال اي يعني هسه هدية متاخذين و سلام هم متردين هههههه طلع هو نفسه .. يابه انصدمت .. هو نفسه ..
كلتله اها هاي انته .. جان تندار عليا فاتن كالت اقدملج فائز اخوية .. يابه غير ما اعرف شحجي .. طلع اخوها واني قبل شوية حاجيه عليه .. عاد اني لزمتني العبره ماعرف شكول بس كلت اهلا و سهلا .. طلع يداوم ويانه بس بغير قسم .. اخوها الاكبر منها .. و راها سلم وراح وهي بدت تحجي .. كالت اخوية مو مال هالسوالف ترى .. و ميلحك بنات .. و هو شافج واكفة وياي اكثر من مرة و سألني عليج و كلتله التفاصيل العادية الي اعرفها عنج .. و اصلا هو يجي بسيارته الشخصية للدوام و لحكج مره من شافج بالكراج و ركب وياج بنفس السيارة و بنص الطريق نزل .. كلتلها هاي هيج مركز وياي اخوج .. كالت اي وخلي ببالج هو اخر سنه وراح يتخرج و ترى غرضه شريف يعني مو من نوع الشباب الي يدور علاقات ..
كلتلها والله فاتن هالاشياء و هالامور لازم تكون صحيحة واكو اهل عندي و اني ما ادور شي خارج عن المألوف .. كالت زين .. و سدينا الموضوع و اني الي عرفته منها هو راد يشوف ردة فعلي من صعد وياي بالسيارة .. يعني اني اقبل بعلاقات لو مثل مكالتله اخته ماعدها شي البنية .. و صدك والله ما مر على هالموقف شهر و جوي خطابة عليا .. هو واهله .. و طبعا طلعو سائلين بالمنطقة علينا قبل ميجون .. و همه امكانيتهم زينة و هو لازم شغل والده و اصلا حتى لو يتخرج مراح يتوظف يعني يشتغل وي والده .. و هالتفاصيل كلها حجتليها امي .. و عادي كايلين كبال اهلي انو اخت الولد هي صديقتي و وياي بنفس القسم واخوها شايفني و رأسا جاي من الباب .. بس اكيد مذاكرين التفاصيل الدقيقة الي صارت مال هو صعد وياي بنفس السيارة و اجه وي اخته و دزلي المساحه .. بصراحة الولد ابد ميتعيب ..
و اي بنية تتمناه بس مو معناها اني اعوف دراستي و هدفي بهل الحياة الي تعذبت بي و بعدني داتعذب .. ترى اي بنيه امكانية اهلها بسيطة و تداوم كلية تشوف الويل بالروحة و بالرجعه .. و خصوصا اول ايام بدخولها للكلية خصوصا اذا جانت اصلا مو قوية ..
يعني ماعدها خبره بالطلعات و الطبات .. سالفة التنقل كلش صعبة .. و عذاب .. و كلت هالشي لأمي .. و ردت امي الجواب الهم مع العلم اني هالشي حجيته لفاتن ورى ما جوي .. الولد مجان عنده اي مانع ابقى اداوم واتخرج وحتى لو اريد اتوظف هم عادي .. وافقت طبعا و تزوجت .. توقعت راح اكعد وي اهله بس طلع والده مساعدة للولد بشكل كلش جبير و عنده بيت بنفس منطقتهم بس بيت مو كلش جبير .. الرجال شحجي عنه اكون مو منصفه بحقه .. كلش داراني و كلش دللني .. دللني لدرجة ما بقى شي عندي اطلبه منه .. سفرات و طلعات و طبات .. حياتي كلش حلوة وياه جانت .. و هو يوديني اني و فاتن للدوام و يرجعنا .. و تخرجت اني و صار عندي شيماء و علي .. و توظفت بس بسبب الجهال مكدرت اكمل .. عفت الوظيفة و كعدت بالبيت اربي اطفالي .. و راحت سنين و جتي سنين و سافرنا ورى احداث الفين و تلاثة لسوريا بقينا هناك سنتين و رجعنا و جهالي كبرو .. و اني كبرت و فائز كبر .. و قبل مدة من هاليوم حسيت فائز متغير علينا بالبيت .. قبل جان يكعد وي الجهال و يكعد وياي من يرجع من الدوام و نسولف ونضحك و يسأل شيماء و يسأل علي على حياتهم و وضعهم و يحاول يشاركهم بكلشي .. اشو فجاءة الرجال تغير ..
كام يكعد ميسولف و عبالك جسمه يمنه بس عقله بمكان ثاني .. اني حسيت اكو شي مو طبيعي بالموضوع و كام يستخدم التلفون هواي .. اني كلت هاي مبينه واضحه .. شافله وحدة .. كلت احسن شي اسوي اكشفه .. و حاولت اكثر من مرة افتح تلفونه بس مكدرت لان تلفونه بي رمز .. وردت اجرب ارقام و احاول افتحه بس خفت .. لان اني وياه عدنا ثقه كلش قوية واحد بالثاني و الخوفه مجانت من ردة فعله اذا عرف اني مكلبه تلفونه وفاتحته .. الخوفه لا يطلع كلشي ماكو و هو يحس ..
كلت احسن شي اخلي علي ابني هو يراقبه لان مرات علاوي يروح وياه للشغل .. راح و رجع علاوي يكلي يمه كلشي ماعنده .. بس فائز بعده نفس حطته .. تغير جذريا هالرجال .. وفوكاها مرات نحجي وياه يطلع يكول ها شنو .. يعني ممركز ويانه .. اني هنا كلت بعد كافي هالرجال عنده شي .. كعدت وياه كلتله مليتني ابو علي مو ؟
كال شنو مليتج ؟؟
كلتله يعني خلص مليتني تغيرت اني و شكلي مو مثل اول مرة لحكتني بيها تغير شوية … و شفتلك وحدة من بنات هاليومين .. كالي بابا انتي شدتحجين و طبعا اني بجيت لا اراديا من داحجي وياه .. كام باسني من راسي وكالي والله ما ابدل الدنيا بيج .. انتي حبيبتي الاولى والاخيرة .. كلتله هااا لعد شبيك هالفترة كاعد تكلب بالتلفون هواي و تصفن هواي .. كالي احجيلج الصدك اني عندي شي ضامه عليج .. كلتله والله عرفت احجي احجي و طبعا اني بدقيقتها اريد اكوم اخنكه .. و كمت اهز برجلي دانتظر يطلع الحجاية اريد اعرف شلون عرفها ومنين .. كال اني عندي ذاك المرض (الله يبعد الشر عن القارئين) كلتله شنوووو .. كال اي والله حللت و طلع عندي و ببدايته … كلتله يمه صخام و كمت الطم .. كال اشششش ماريد شيماء وعلي يعرفون واصلا مردت اكلج .. كلتله منين اجاك .. كال يابه هو منين يجي شمعرفني بس رحت حللت و كالي الدكتور ببدايته و تكدر تتلاحك عليه بالعلاج و خايف كلش من العلاج لأن يأذي .. كلتله لا عفيه لاتكولها و كمت ابجي و ردت اتخربط .. هو كام يصبر بيا حبيبي و سكتت .. و بدينا برحله جديدة .. رحلة عبارة عن علاج و ادوية و عقاقير .. و حبيبي يوم ورى يوم كام يضعف و يفقد حيله .. الا ان الحمدلله الله نجاه من هالمصيبه .. وتعافه و رجع طبيعي .. و راح منه كلشي بس عنده فحص كل فتره و كل منروح ايدنا على كلبنا … و الحمدلله كلشي بخير .. بس هسه هو انكلب (صار عنده هوس مو طبيعي) كل ميحس بسالفة يروح للدكتور .. بس حبيبي ميخالف اهم شي صحته فوك الكل .. وهسه احنا عايشين و مطالبين من هالدنيا غير بس العافية و الستر .. و الله يبعد الشر والامراض عن كل هالبشر .. لان الي شفته بهل الموضوع جبير كلش جبير ..
الله يحفظكم ..
(المساحه)
انتهى
اخوكم ابو بغداد سايق التكسي
#ابوـبغداد