ابوية جان خطاط .. المحل مالتنا بمنطقة شعبية و جان شغله كلش زين .. اني لزمت الصنعة من ابوية و بديت اشتغل بمكانة ... جان عندي خط حلو و اضافة للخط جنت ارسم .. بالبداية جانت رسماتي بسيطة كلش .. يعني كابتن ماجد .. لو ساسوكي .. لو دوق فليد ... يعني جنت ارسم شخصيات كارتونية ...
و جنت من اكمل شغلي المطلوب مني بالمحل دائما اطلع دفتر رسوماتي و ارسم ... المحل جان صغير وبي مقابيل الميز الي نشتغل عليه كراسي ثنين ... اني مرات جان صديقي يجي يلتقي يمي .. و نحجي ونسولف وبنفس الوكت اني ارسم ... مرة صديقي طلب مني ارسمه و جانت اول محاولة اليا برسم اشخاص حقيقين ... رسمته و جانت رسمتي حلوة و قريبة منه لدرجة جبيرة ...
من يومها كمت اطلع صورنا القديمة بالبيت و ارسمها ... ابوية انعجب بشغلي كلش و كالي ليش متحاول تدخل مسابقة للرسم ؟
كلتله ماشي و كيفت بوكتها كلش ... هالحجي قديم تقريبا بسنة ٢٠٠١ .. بوكتها شاركت بمسابقة مال رسم ... اتذكر لحد هسه المشتركين جانو انواع ... بس الاغلبية مبينين ولد ناس و امكانيتهم كلش زينة ... المشرفين عالرسومات يعني (اللجنه) هههههههه جانو منحازين لرسومات وحدة تصير (بنت فنان عراقي مشهور) ماريد اذكر اسمه ولحد هسه اتذكر خالد جبر جان من ضمن الموجودين ...
وطبعا هيه رسمها بين قوسين شخبطة .. الخشم ترسمه منبل و الاذانات دائما تسويهم كبار ... عالعموم اكو ولد مبين مثل حالي ماعنده معارف و جاي وحدة ... كالي محسومة السالفة ... كلتله والله واضح هيج ههههه .. كال بشرفك شوف شغلي ... شوفني شغلة جان هم شغل مضبوط كلش و مبين موهوب الولد .. وحتى هو من شاف شغلي انعجب بي و كالي خوية احنا نرجع منين ما اجينا اشرفلنه ههههه وخلي بنت فلان تفوز ... كلتله ليش يجوز احنا ..
والله العظيم لحد هسه اتذكر كلمته (كالي ليش انت ابوك مشهور لو عنده معارف) كلتله لا ابويه خطاط ..
ضحك كالي تدري اني ليش اجيت للمسابقة !
كلتله غير حتى تشترك و تنشهر وتنعرف ..
كال لا ..
كلتله لعد شنو جابك بله ..
جان يدك بجف ايده على بطنه ... كلتله شنو يعني ؟
كال بطني جابتني متشوف الكيك و الترتيبات عالميوزة .. واني اصلا بيتنا قريب منا كلت اسجل واجي هم اباع عالرسومات و هم اضربلي وجبه توب و ارجع للبيت ..
كلتله انت من كل عقلك تحجي ... تقرب مني و شاورني بأذني كالي احنا بالعراق و هنا ممحتاجين دافنشي هنا محتاجين انت ابن منو و ابوك شنو ..
كلتله دروح انت بطران و رجعت للبيت بيومها بس ممقتنع بكلامه و كلت يجوز المشرفين باللجنه شافو شي غلط برسوماتنا و اختارو بنت الفنان على اساس صحيح ..
يعني جنت اقنع روحي ...
عالعموم .. ورى محجيت هالحجي لابوية شفت ابوية كلامه قريب كلش لكلام ابو بطن ... و من يومها قررت احتفظ برسوماتي لنفسي و كافي اني اشوفها لو اهلي يشوفوها و اصدقائي المقربين ...
و بقيت اطور نفسي بالخط و اشتغل بمكان ابوية لحد ما اجه يوم ابوية تعب كلش واني وحدي لزمت المحل بس بصراحة صار عندي بالمنطقة اسم و انعرفت كلش ... جنت اكيف من اشوف احد صدفة بالشارع لو بالكوستر لو بالسوك و احجي وياه ويكلي مو انت الخطاط ؟
هالشي جان كافي اليا و مو مهم بعد عندي اذا افوز بمسابقات لو اشترك اصلا بمسابقات (محسومة منو ياخذها) ...
وفد يوم جنت اني بالمحل جوني بنات ثنين جانو معلمات ... وحدة منهم حلوة الى درجة اني ما باوعت بوجها لان عرفت اذا اباع بوجها راح ابقى مركز بعيونها هلكد مو جبيرة ... جنت احاول دائما اركز واسولف وي المعلمة الثانية صديقتها ..
حتى البنية كامت متحجي وياي وخلت صديقتها تسولف وياي .. همه طلبو مني اخط شعر مدرسي عالحياطين مال مدرسة و اقوال للنبي و سوالف عن النظافة وهيج امور .. اني كلتلهم اذا تريدون رسومات هم ارسم اني ... كيفو و كالو زين نريد هم سنافر ترسملنه و شخصيات مال بربا شاطر و ماجد لعبة خشبية ...
قبلت رئسا و كلتلهم هالشي اسوي مجانا .. كالو لا ميصير كلتلهم لا مجانا وحلفت ما اخذ فلوس ...
تواعدنا و رحت للمدرسة ... شعوري جان بالمدرسة شعور يخبل و مينوصف ... لان الجهال بالفرصة يلتمون داير مدايري و يبقون يسألون اسأله بريئة وفوك كلشي المعلمة الحلوة وكفت يمي ...
يعني ماعرف بذاك الوكت شصار وياي و بصراحة الرسم و الكتابة و حتى الشعر و التمثيل كل هالامور الي بيها ابداع تعتمد على الحالة النفسية .. ولان اني جنت مرتاح صراحة ابدعت بشغلي و سويت رسومات تخبل و خطيت اشعار بخط كلش حلو ....
كملت شغلي ورى كم يوم و رجعت للمحل بس حسيت نفسي مسوي انجاز راح تشوفه اجيال ...
و جتني المعلمة الحلوة وحدها .. جايبتلي كيك و كليجة و كالت على الاقل احنا مدفعنا فلوس هاي اليوم سويناها بالبيت و حبيت اجيبلك شوية ..
كلتلها ياشوية يمعوده هاي توكلني و توكل اهلي و توكل المدرسة هيه وطلابها ههههه .. ضحكت هيه و اني جنت صافن بوجها بس ردت احفظ تفاصيلها ..
هيه حست و خجلت و بسرعة راحت اني بذيج الدقيقة طبيت للمحل وغلطت على نفسي كلت شكد غبي شكد غبي اني ... هسه شنو هالنظرة السخيفة ...
و كعدت ضايج حتى عندي شغل مكملته و رجعت للبيت ...
حجيت كلشي لابوية ... ابوية كالي شنو حبيتها لك هيه مرتين لو اربع مرات شفتها ..
كالي زين بله ارسمها خلي اشوفها ..
كلتله يابه صدك تحجي ؟
كال والله ما اتشاقى وياك بله ارسمها و خلي اشوفها .. كلتله شنو تتحداني تريد تشوف اني وين وصلت بالرسم ؟
كال اهووو مدام كمت تحجي هيج يعني مراح تدبرها .. كلتله دوكف لعد ..
و صدك والله رسمتها و انطيت الرسمه لابوية .. ابوية باوع عالرسمة جان يكول عندي حجايتين ..
كلتله شنو؟
كال اول شغلة .. طاح حظهم للي رحت اشتركت بمسابقتهم وما نجحوك ..
و ثاني شغلة .. حقك يصير بيك هيج لان البنية حلوة الله يحفظها ..
كلتله يعني شسوي ؟
كال انت هسه تشتغل بالمحل و راح تتوظف بعد فترة اتواصل وياها و حاول تفهمها انو انت رايدها لان مثل هيج شكل ميطول ترى و بسرعه تتزوج ههههه ..
كلتله زين ...
ثاني يوم مباشرة رحت للمدرسة بحجة اسأل اخاف محتاجين شي ... و شفتها ... حجيت وياها و سلمت عليها و كلتلها عندي حجي وياج بس هنا صعب .. البنية حست اني شريد بالضبط ... كالت زين عوفها للصدف ..
كلتلها يعني شوكت .. ضحكت و راحت لان عدها تدريس بس بمشيتها واني واكف بالممر اندارت عليا و اوووووووووووووووووووووف من اندارت نظرتها جانت تخبل و ابتسامتها تخلي الواحد يتجمد بمكانه و كالت عوفها للصدف لاتستعجل ..
اني رفعت ايدي ودعيت كبالها كلت يا الله قرب هالصدف ههههه ..
و ورى يومين جتي للمحل و اخذت رقمها وبقيت اتواصل وياها عالتلفون الارضي ...
و توظفت اني لان اصلا اني متخرج جنت .. بس وظيفتي بعيده كلش عن موهبتي ..
جنت اداوم الصبح بالوظيفة وارجع العصريات ابقى بالمحل و جنت يوميا احجيلها شصار بيومي و هيه تحجيلي شصار بيومها ..
حبيتها و حبتني و متحملت ورى فترة تقدمت عليها وصارت قسمتي .. و شوفتها الرسمة كالت انت مبالغ كلش لان تحبني ترى اني مو حلوة لدرجة هالرسمة ... ضحكت كلتلها كلبي رسمج مو ايدي ...
و راحت ايام وجتي ايام و والدي توفى الله يرحمه و يرحم موتاكم و صار عندي اطفال ثنين و عندي وظيفتي و المحل غيرت نشاطة بس الرسم بقى عندي هواية ..
يعني شاركت بسوالف مجانية بدون مقابل .. مثلا الصبات الكونكريتية جنت اني واحد من الرسامين الي رسمو عليها ... و هم اكو مدارس هواي شاركت بالرسم والخط على حياطينها ... و اجينا لهذا وكتنا .. و بده وكت الانترنت و جنت هم انزل رسوماتي عالنت ..
الى حد قبل فترة ..
زوجتي كالت ليش متشترك بمسابقة و هيه جانت قارية على الانترنت اكو مسابقة (وهم مراح اذكر اسم المكان الي سنويا يسوي كعدة جبيرة و يدز دعوات) عالعموم ..
رسمت رسمات تخبل .. و اصلا عندي شغل قديم هم جمعته و اشتركت .. بس مع العلم اني تعاركت وي زوجتي و كلتلها على الي صار كبل و شلون بنت الفنان اخذت الجائزة وهيه رسوماتها شخابيط ..
كالت بابا الوكت تغير وهسه تفوز شبيك منو يكدر يوصل لربع الي ترسمه انته ..
تقويت والله و رحت و قدمت كلشي جنت شايله على جتوفي من لوحات سريالية و رسم زخرفي و رسوم كاركتيرية و رسم تجريدي و حتى بورتريه ... و تقدمت ..
هههههههههههه و صار نفس الي صار بالالفين و واحد .. كنسلو كل شغل الناس و اختارو واحد رسمه كلش تعبان و حتى صارت ضجة بالقاعة بوكتها و اكو رسامين شباب كامو يصيحون هااا واسطات ..
يعني من النهاية الي تغير ..
بالالفين و واحد ابو بطن (الرسام) خاف يحجي بصوت عالي ويكلي واسطات و اجه شاورني و بينلي السالفة .. بس الي صار بالقاعة هسه وبهل الفترة .. الشباب طلعو صوتهم و صيحو و كالو واسطات ..
يعني الي اختلف بس الصوت .. قبل جان مكتوم .. هسه صار مكشوف ...
رجعت للبيت و كلتلها لزوجتي شايفه هالرسومات كلهن شيليهم و حطيهم بالبيتونة فوك و ديربالج بيوم تكوليلي اشترك بمسابقة .. كالت زين على الاقل بمكان منضمهم فوك وتاكلهم الارضه خلي نعلكهم بالبيت .. كلتلها كومة يمعودة ... كالت ميخالف المهم من اشوفهم احس روحك بيهم و ايدك مشت عليهم بيوم من الايام ..
كلتلها يله هاي هيه .. وعلكناهم بالبيت و حتى عالدرج علكت بس هم بقو زيادة هههه ماعرف وين اوديهم ..
(الرسام والمعلمة)
انتهى
اخوكم ابو بغداد سايق التكسي
#ابوـبغداد
أنت تقرأ
قصص عراقية حقيقية بقلم ابو بغداد سائق التكسي
Storie breviننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة اقرأوها فعلا تستحق القراءة
