قصص عراقية حقيقية بقلم ابو بغداد سائق التكسي

حال وحال

اني ما اتذكر شي عن امي … بس اعرفها من الصور .. هذا الشي الوحيد الي يذكرني بيها بس اي تفاصيل ثانية ما اتذكر … اني اصغر واحد بنص اخوتي .. اكو اكبر مني اربعة ولد و بنية وحدة بس … ابوية ميفرق بيناتنا جان .. و حتى سالفة الدلال مال عود اني اصغر واحد ماكو … مدللنا كلنا … خصوصا ورى وفاة أمي .. ممحتاجين شي ابد .. الي رباني اختي ولو هيه صغيرة جانت بس هيه تحملت مسووليتي و كبرتني … جنت ما اكعد الا يمها بالبيت .. اخوتي اذا ابوية بالبيت كلش عقال .. بس ابوية يطلع يروح لشغلة يتخبلون … وبصراحة جنت اخاف منهم لان يضربوني … يعني جنت احاول اسمع كلامهم و اختي اصلا لكيتها تسمع كلام … من بديت اكبر عرفت انو اخوتي الاربعة و حتى البنية كلهم من ام غير أمي … يعني اني من الصغيرة و همه من الجبيرة (المطلقة) .. ابوية ورى مطلك زوجته الاولى بقى كم سنة بدون زواج بعدين اخذ أمي الله يرحمها … عشت جبان بصراحه .. من كل شي اخاف و من اقل صياح لو رزالة اركض ورى اختي اختل و هيه جانت تدافعلي دائما .. اختي ابوية بطلها من الدراسة من صف سادس ابتدائي … لان شوية ابوية من النوع المتزمت برأيه و من النوع القديم كلش .. يعني ماكو سالفة بنية تكمل دراسة .. بس مثل مكلت مدللنا … كلشي عدنا بالبيت … ابوية امكانيته زينة و عنده عمارة و بالعمارة نفسها مسوي مكتب دلالية جوى .. الشقق مأجرهم والمحلات هم مأجرهم بس محل واحد هو مفتح بي المكتب مال عقارات (الدلالية يعني) … اخوتي  من بدو يكبرون و اني هم اكبر كامو يشتغلون وي ابوية و ابوية قرر يفتحلهم بنفس العمارة جوى يعني بالمحلات اسواق جبيرة طبك ٣ محلات … بس الاسواق جانت جملة مو مفرد .. و كام يبيع بسعر الشورجة حتى محلات المنطقة يعتمدون علينا بالجملة .. انعرفنا بالمنطقة واني جنت بذاك الوكت طالب اعدادية و طبعا الوحيد من اخوتي اني كملت دراسة لأن كلهم ميحبون يدرسون .. اخوتي من كبرت شوية كامو يخافون مني لأن كبرت و مبقيت ذاك الجاهل .. بس بصراحة جان عندي خوف منهم لأن تعلمت على هالشي من الصغر .. دائما يكفخون بيا و يهددوني اذا اكول لأبوية يكتلوني وراها اذا يروح للشغل .. اختي هم الي (هي اختهم من نفس امهم) هم خطية تخاف منهم كلش .. من الاخير جنت اكرههم و اتحاشى حتى الحجي وياهم … جنت اجي من الدوام ابقى بغرفتي ..
ادرس لو اشغل كاسيتات اغاني  …
درجاتي جانت كلش زينة …. و صدك اني جنت احب القراية … سنة ورى سنة اني انجح و دخلت كلية  … ابوية بوكت ما جنت طالب كلية توفى … اخوتي ورى وفاة ابوية سنتين صارت بيناتهم مشاكل .. اني بذاك الوكت جنت اشتغل محاسب بمعمل مال كاشي مال صديق ابوية الله يرحمة …. شغلي جان زين و مجنت محتاج اخوتي بشي ابد .... المشاكل بدت تكبر بينهم علمود سالفة الورث و رادو يقسمون و خصوصا بعد متزوجو ثنين منهم .. اني و اختي جنا الوحيدين الرافضين السالفة … بس بلأخير وافقنا .. اختي خافت من المشاكل و قبلت واني مشيت ورى كلمتها … بعنا كلشي واخذنا حصتنا اني واختي و قررنا نكعد سوى اني وياها و اشترينا مشتمل على كد الفلوس …
بذاك الوكت همه جابو ولد صاحبهم بس الولد ابد ما احبه اني .. جابو و زوجو لأختي رغم رفضها .. بس باعتبار اخونه الجبير كلشي بيده هو رتب كلشي … اني بقيت بالمشتمل وحدي الي هو ملكي و ملك اختي سوى .. ورى الزواج مال اختي بده يتصل بيا رجل اختي .. يكلي اختك تريد حصتها من البيت لأن هيه وياك بالعقد .. و هيه جانت تخابرني من وراه تكلي ابقى كله اي بس ترى اني ماريد ابيع و هو ديتعارك وياي و يكلي بيعي … اني هم بقيت اكله اي هسة و بعدين و هسه و بعدين اخر شي ضجت لأن جاب مشترين للبيت … اتصلت بأخوتي كلتلهم يابه السالفة هيج وهيج .. و هيه متريد تبيع ولا اني .. كالو هو رجلها واحنا منتدخل ..
اخر شي صارت مشاكل هواي .. و فد يوم اجى للبيت يصيح و الجوارين التمو .. ماعرف شلون جريت الكرك الورى الباب و ضربته .. لأن كام يغلط و يسب … هو وكع بالكاع و انترس دم .. اشتكى عليا و اخذوني الشرطة و رغم مجان الضابط كلش متعاطف وياي بعد مسولفلته القصة وشافني محترم نفسي واول مرة ادخل سجن .. بس هذا قانون مترهم يطلعني هيج بدون عقاب .. اخر شي خيروني اوافق على سالفة بيعت البيت  حتى يتنازل هو عن الدعوى .. وافقت لأن بس ردت اطلع ..
متحملت السجن و متحملت الاهانة .. اني مو مال هالسوالف … بعنا البيت و اخذت اختي حصتها بس المسكينة مو الها .. رجلها اخذ الحصة … و قررت اكعد ايجار وانطي الفلوس مالتي لأبو المعمل مال كاشي .. الي هو صديق ابوية كلش .. حتى يشغلها و بلكي ورى فترة اكدر اخذ قطعة كاع و علكيفي ابنيها .. لان جنت متخرج بس ممتوظف .. ابو المعمل راد يكتبلي ورقة بالفلوس الي حطيتهم عنده .. جان مبلغ جبير بصراحة … مقبلت اني بس هو لح عليا .. طبعا هو مقبل ياخذ الفلوس يشغلها لأن هو ممحتاج .. بس من كعدت احجيله عالصار… قبل و كال راح اسوي هالشي لخاطر والدك المرحوم لأن عنده وكفات حلوة وياي … و مثل مكلت لح عليا يكتبلي ورقة بالمبلغ .. كتبلي ورقة و بوكتها اجرت مشتمل طابق ثاني قريب عالمعمل الي اشتغل بي .. و مشت الوضعية ..و بديت اجمع من فلوس تشغيل المبلغ الي خليته يم ابو المعمل .. ابو المعمل جان يساعدني كلش .. يعني جنت احس هو يزيدلي مرات بالحساب .. جنت ما اقبل يكلي اش من اسوي شي اني ماريد نقاش .. و جمعت فلس على فلس .. بذاك الوكت اختي صار عدها طفل … و صار بينها و بين رجلها مشاكل و جتي كعدت يمي فترة … بالفترة الي كعدت يمي بيها صار عدها علاقة صداقة بأهل البيت الي اني مأجر منهم المشتمل … و صارت صديقة بنتهم .. بنتهم اني مشايفها بس اسمع اسم زينة .. بس زينة شكبرها شكد عمرها شلون شكلها ماعرف .. بس مرات اسمع يصيحون زينة من اكون بالبيت وحدي و اعرف الاسم .. بالمناسبة ابو المشتمل مقبل يأجرلي بالبداية .. لأن اني اعزب ..
بس ابو المعمل يعرفه و هو تكفلني يمه كاله ترى الولد محترم روحه كلش و ماعنده مكسرات .. اختي كامت تكوم وتكعد تحجيلي بزينه .. زينه هيج و زينه هيج .. زينه حبابة و زينه بنت اوادم .. زينه حلوه و زينه مثقفة .. اخر شي كلتلها من الاخير شتريدين ههههه .. كالت ليش متاخذها .. كلتلها اني ما اتزوج اذا ما اتوظف و اخذلي كاع .. كالت عالاقل اخطبها اخاف تروح من ايدك .. كلتلها عمي شخطب اني ستوني بديت اجمع .. و راحت اختي رجعت لرجلها ورى محلف هو راح يتعدل و طبعا اخوتي جوي اخذوها .. وهي وافقت .. اني متدخلت لان هيه موافقة .. و بيوم من الايام رحت للمعمل انصدمت بخبر من الحراس يكولون ابو المعمل توفى .. وكف كلبي وانقهرت لأن الرجال حسيته مثل ابوية وهو ساعدني هواي .. رحت للفاتحة و قمت بالواجب وراها ولده لزمو المعمل .. فاتحتهم بموضوع الفلوس و شوفتهم الاوراق .. كالو ننطيك ماشي و مجان عدهم اعتراض بس كامو يكطرولي الفلوس تكطر واني لان احب ابوهم مرحت قدمت شكوى لو شي .. كلت فدوة المهم اسمهم ديرجعون الفلوس .. و طبعا متحملت الوضع ورى وفاة الحجي بطلت .. بقيت كاعد فترة بالمشتمل و اكرط بالفلوس الي مجمعها .. اخر شي عثرة بدفرة تعينت .. التعيين مالتي متوقعت راح يفيدني .. بس والله استفاديت .. و فد يوم قررو يدزونا ايفاد للصين .. رحت و صارت علاقتي كلش قوية بالمسوول مالتي لان جان ويانه .. بالصين هناك حجيت للمسوول قصتي .. لان سألني على امور شخصية .. انقهر عليا وكال عمي اخوتك ذولة والله مو زينين … كلتله هاي هيه المهم هسه مرتاح .. و قرر يساعدني و رشحني لمنصب و الحمدلله اخذته لان انطبقت عليا الضوابط و الشروط .. و مشت السالفة الحمدلله … و اخذت كاع بس مساحتها صغيرة ورى ما استلمت اخر دفعة من الفلوس الي جانت يم ولد ابو المعمل ….
كملت بناء الكاع بس متحولت بالبيت .. خطبت زينه لأن اني ردت اتزوج وبس … يعني ما ادور حب و هالسوالف جنت عملي كلش .. البنية حبابة و تسمع كلام و فقيرة .. ومناقصها شي .. قنعت زينه نتزوج بنفس المشتمل مالتهم و عادي ابقي مأجره بفلوسي يعني مو (كعيدي) و بوكتها جان جايني سعر زين للبيت الي مكمل بناءه و هيه اقتنعت .. بعت البيت و اشتريت بمكانه بيت ثاني و بعته الله رزقني بخوش سعر و اخذت بيت صغير بس مرتب و فوك البيت الصغير قطعة كاع بس بمنطقة كلش راقية و الحمدلله مشت الامور وتحولنا للبيت الصغير و مرتاحين كاعدين و زينة بذاك الوكت جانت حامل ..
المهم .. اختي بيوم خابرتني كالت اخوك الجبير صايرة عنده مصيبة .. طلع داخل بشغلة (غلط) و صايرة مشكلة جبيرة وياه علمود فلوس .. رحت و وكفت وياه شفت اخوتي الباقين هناك سلمت عليهم عادي .. و كعدت بنصهم اباوع عليهم ماعرف شحجي .. بس واحد بيهم سمعني حجاية (علساس اني ما اتواصل هههه)  .. طبعا بهل الحجي اني جاي و مقرر احل السالفة كلها لان عندي فلوس اساعد بيها و كلت ابيع الكاع و احل المشكلة و جان جاهز المشتري جوى ايدي .. كمت وكفت بنصهم وجنا بس اني واخوتي بالصالة .. كمت رحت سديت باب الصالة و سديت باب المدخل حتى الصوت ميطلع من احجي .. كلتلهم تدرون شي .. مرات الاخوة من يتجمعون يتذكرون لعبهم من جانو صغار .. يتذكرون شلون جانو ياكلون سوى .. يتذكرون شلون جانو يكطعون نبك سوى .. يتذكرون سوالف حلوة .. يتذكرون لمتهم داير مداير امهم وابوهم .. كل التفاصيل الحلوة يتذكروها بس الاهم من كلشي .. يتذكرون وكفاتهم واحد للثاني .. زين هسه اني اذا اريد اتذكر شي حلو شتذكر منكم ؟؟؟
اتذكر شلون جنتو تكتلوني و تخوفوني اروح اكول لابوية .. لو اتذكر شلون جنت اختل بالغرفة من ارجع من دوامي حتى بس ما اشوفكم .. لو اتذكر شلون بس مات ابونا انتو انكلبتو عليا وعالمسكينة اختنا و بيعتونا البيت .. بس تصفيق و اشكركم على الشغلة الوحيدة الحلوة الي سويتوها .. بيعتونا البيت لان البيت مجان بي ذكريات حلوة حتى اتمسك بي .. بي بس قهر و قهركم انتو … تدرون اني ماعندي اصدقاء طفولة من وراكم .. لان جنت اخاف العب بالشارع لا يجيني واحد يضربني واني ماعندي احد يدافع عليا لان انتو بالبيت مشبعيني كتل .. يله ذكروني .. عندي ذكرى وياكم انتو مدافعين عني.. اني اذكركم بشي حلو تذكرون من مرة صعدنا بالسطح و قفلتو باب السطح عليا و اني حافي كمت اكمز و رجليناتي احتركت من الكاع و جتي زينب فتحتلي الباب وانتو تضحكون … تذكرون المجمدة الفوك الخربانة مرة دخلت بيها و سديتو عليا الباب و اني اختنكت و كمت ابجي .. تذكرون  ؟؟؟
بس مدام انتو بالجنسية اخوتي و مدام ابونا واحد و اسمنا انجمعنا على ماعون و صينية وحدة راح احل السالفة بس احلها مو لان انتو ينشد بيكم الظهر .. راح احلها لان اسمكم و مع الاسف انتو اخوتي .. طبعا همه رغم لسانهم الي مينلزم و رغم ما همه كل واحد شكبره ما فتحو حلكهم و سكتو بس الجبير كام حضني و كام يبجي من شفته يبجي اني هم بجيت .. و كامو الباقين هم حضنوني و بجينا كلنا و كالو والله احنا غلطانين بحقك انته و زينب (اختي يعني) .. و حليت السالفة بذاك اليوم و رجعت علاقتنا سوى و رجل اختي شافنا هيج رجعنا سوى عدل معاملته وي اختنا كلش و كام يخاف هههههه .. و هسه الحمدلله عايشين و مرتاحين و اني صار عندي بنية و الوضعية تمام .. و كل فترة نتجمع ببيت واحد من عدنا احنا والجهال ناكل ونسولف و نسهر و نرجع لبيوتنا .. والحمدلله على كل حال الي حول حالنا من حال الى احسن حال ..
(حال و حال)
انتهى
اخوكم ابو بغداد سايق التكسي
#ابوـبغداد