قصص عراقية حقيقية بقلم ابو بغداد سائق التكسي

فلان الفلاني

اكثر الاوقات اكعد وحدي وبعيد عن الطلاب .. هالسالفة مجنت اسويها بس بالكلية .. جبتها من الطفولة من ايام الابتدائية اسويها .. يعني من اني وصغير احب اكعد لوحدي ..
او الاصح اتهرب من كل الناس الجدد الي ميعرفوني ..
ليش ؟
ليش اتهرب من كل الي ميعرفوني وليش احب اكعد وحدي ليش ..
لان لساني مو طبيعي .. اي لساني مو طبيعي و الاحرف الي احجيها مخربطة و طريقة نطقي (على كولة الناس تضحك) ..
انخلقت هيج .. انخلقت عندي عيب بالنطق .. مو مشكلتي لان مو اني اختاريت اكون هيج ..
بس شلون افهم الناس انو اني ما طلبت اطلع هيج بهل القالب .. شلون افهم الجهال بالمدرسة الي يجون خمسة لو ستة داير مدايري يوكفون و يكولون كول هيج كلمة لو هيج كلمة و يختارون الكلمات الي الاحرف عندي بيها مخربطة .. ومن اكول يكومون يضحكون ..
اتذكر وجوهم واحد واحد .. شلون يضحكون و شلون يصيحون الطلاب الي ديلعبون بعيد عنهم و يكولولهم تعالو شوفو هذا شلون يحجي ..
و شلون افهم جهال منطقتني و اكلهم والله مو بيدي هالشي .. شلون افهمهم يعوفون اللقب الحقير والسخيف عليا ( فلان ابو نص لسان ) .. يصيحولي ابو نص لسان ؟
ليش ؟؟
ليش ابو نص لسان لان اني اخربط بالاحرف ؟
احسن شي اكعد بعيد عن الكل و اهلي بالبيت متعودين عليا و ميضحكون عليا من احجي و الاهم من هذا ..
بالمدرسة جانت المعلمة او المعلم يتفهم سالفتي و ميحاول يكومني هواي اشرح ..  خطية المعلمين او المدرسين يعتمدون على الكتابة وياي اكثر من الحجي والشرح بالصوت ..
لان يشوفون الطلاب شلون يتمضحكون عليا و ينقهرون عليا ..
علمود هالشي اني بالكلية اكعد وحدي اغلب الاوقات و يجوز شوية الطلاب هنا عمرهم اكبر ويتغاضون النظر عن موضوع لساني بس صارت بيا خوفة ..
صارت بيا خوفة احجي والله .. واغلب الاوقات اتأخر بالحجي اذا بالكوستر واذا بالكيا واذا بالتكسي ..
ليش اتأخر ..
لان احاول قبل الرد اجمع الجملة براسي واحذف الكلمات الي بيها احرف اني اخربط بيها و انطقها عدل .. حتى لا يضحك عليا المقابيلي مثل مصارت وياي هالسوالف بأكثر من مكان و بأكثر من موقف ..
والله والله اكثر من مرة اسوي نفسي اخرس ..
و هاذا السبب الرئيسي من كعدتي وحيد بالكلية و اتحاشى اسوي علاقات ..
الى ان يوم من الايام انتبهت على بنية هم تكعد وحدها وابد متلتقي وي الطلبة الباقين .. اني توقعت البنية هم عدها خلل و تستحي من شي لذلك تكعد وحدها ..
جانت تباع عليا واني اباع عليها بس من بعيد لبعيد .. الى ان يوم من الايام هي جتي و سألتني انت ليش تكعد وحدك ..
كلتلها وانتي هم و الحمدلله والشكر وانتي هم ما بيها الاحرف الي اخربط بيها ..
كالت يعني مراقبني ؟
ضحكت اني و كلتلها السالفة كلها .. هي بوقتها من سمعت السالفة شكلها صار احمر وحسيت بيها اختنكت من داحجيلها الموضوع و عيونها دمعت .. و كالت دقيقة هسة اجي بس والله العظيم ولا حسيت هالبنية راح تروح تبجي وترجع .. عبالي راحت تسوي شي وتجي وطبعا هالشي عرفته بعدين ..
رجعت وكالت انت من كل عقلك تحجي لو تشاقى ..
كلتلها مو حجيتلج كلشي و دشوفين الاحرف عندي شلون حرف صاعد على حرف ..
كالت بابا عادي شبيك ماعندك ثقة بنفسك ..
كلتلها لو انتي بمكاني و عندج الي عندي و شايفة الناس شلون تتعامل وياج وتضحك على كلامج يمكن جان سويتي مثلي واصلا اني عبالي انتي عندج شي معين من جنت اشوفج تكعدين وحدج ..
كالت اني اكعد وحدي لان اضوج من الطلاب هنا واحس الاغلبية من الشباب جايين يدورون علاقات مو جايين يدرسون و البنات هنا جايين بس علمود وحدة تفيك عالثانية اشتريت هيج شي بفلان سعر و سويت تسريحة بفلان سعر و ابوية واعدني يشتريلي السيارة الفلانية بس اتخرج و هالسوالف التعبانة ..
كلتلها ليش انتي شنو فرقج عن البنات ؟
كالت اني فرقي عن البنات .. ابوية حارس بشركة اهلية وامي خطية متعرف الالف من الباء و اخوتي كلهم يشتغلون على باب الله و جيت هنا حتى انجح و اتعين واشيل من حمل ابوية واخلي على ظهري ..
من كالت هالحجي عرفت هالبنية صادقة وياي ومتعرف تمثل مثل باقي الطلبة ..
ومن يومها مكمت احجي وي غيرها وهي متحجي وي غيري .. يوم ورى يوم كامت تزيد ثقتي بنفسي بس المشكلة ثقتي بدونها متكمل ..
يعني من جنا نروح للكافتريا تكلي انت اطلب مو اني .. وتباع عليا من اطلب واذا هههههههههههه احاول اتأخر بالحجي حتى ارتب جملة مابيها احرف مخربطة .. ترفع تك حاجب وتأشرلي بأصبعها عيد عيد ..
واني ههههههه اعيد الحجي واكول الاحرف و هي تبتسم وتسويلي اوكي .. المشكلة مثل مكلت بدونها متصير عندي جراءة احجي .. بس وياها عادي احجي ..
مخلص الحجي ومن الاخير ..
البنية حبيتها مو لان تعاطفت وياي .. بس البنية حبيتها لان نظيفة و بنت ناس على كد حالهم و مؤدبة جدا ومثقفة .. والاكثر من كل هالشي ..
عرفتني على وضعي وحجيتلها قصتي و الوحيدة الي ما اخجل منها ..
و اعترفتلها بهل الشي وهي هم طلعت نفس الشي عدها مشاعر اليا .. و الحمدلله والشكر تخرجنا ثنينا و طبعا اني احمدالله واشكره اهلي امكانيتهم كلش زينة و رئسا بعد التخرج تقدمت للبنية وقبلوني اهلها وتزوجنا .. وفتحت شغل خاص بيا و هي هم توظفت واقسم بالله العظيم ابد ممحتاجين وظيفتها بس هي تحب هالشي واني ابد معارضتها و كالت باع اني كلشي ما اريد منك بس شي واحد (وهالشي قبل الزواج طلبته) ..
كالت اذا نتزوج اتوظف اني .. وراتبي كله لبيت اهلي ..
كلتلها ماشي لان اني واحمدالله الف مرة ابد ممحتاج لهل الشي بس هي حبيبتي تريد هالشي و لان هي تريد هالشي اني قبلت و لو تطلب روحي والله انطيها  .. لان تستاهل ..
وهسة الحمدلله والشكر عايشين ومرتاحين بس بيناتنا الحجي هههههههه هم بعدني مرات اجمع الكلمات براسي يله اكولها .. وطبعا لو تعرف مرتي يمكن تضربني طلقة هههههههههههههه .. بس شسوي مجتمعنا يريد كلشي كامل والكمال بس لله .. ولو الناس تباع على صاحب العيب الخلقي على انو انسان طبيعي وممختار يكون هيج .. مجان وصلت لهل الشي ومستحيت من لساني ..
انتهى
( فلان الفلاني )
اخوكم ابو بغداد سايق التكسي
#ابو_بغداد