قصص عراقية حقيقية بقلم ابو بغداد سائق التكسي

لو دامت لغيرك ما وصلت لك

قبل فترة عندي ولد صديق باوربا ... الولد راد يشتغل بالسفارة العراقية الي بالدولة الي كاعد بيها ومقيم بيها هو ..
حتى يسجلوله راتب زين و يكدر يسوي لم شمل لزوجته الي بالعراق .. لان الدول الاوربية تطلب منك راتب نشط اذا عندك معاملة لم شمل ..
هالولد جان كل ميجي يمنا لو نشوفه يسأل منو عنده معارف بفلان سفارة ... و كل مرة يسأل و يدور على عنوان بالانترنت لو عنوان القنصل ..
الحاصل ورى مصار الفيس بوك اسلوب حياة للعراقيين و للعرب و صار هوية و عنوان للجميع (تقريبا) ..
لكه عنوان السفير ..
كتبله كومة رسايل ودزلة طلب صداقة ..

ولليوم اتذكر نص الرسالة الي كتبها للسفير ..
بصراحة رسالة تفطر الكلب لان هو يحب زوجته كلش و بالكوة تزوجها وكتبله تفاصيل تقهر كلش ..
المهم ..
الولد بين فترة و فترة يراسلة للسفير و حاول يقابلة و راح مرتين و مرهمت ....
و لان صاحبنه امكانيته ضعيفة و سكنة بعيد كلش عن السفارة  ( يعني بغير محافظة اصلا ) جان يحاول يسوي اتصال وي السفير لو القنصل عن طريق الفيس بوك ..
وطبعا انهملت الرسايل .. و الولد فقد الامل بالسالفة و كلناله يابه شوفلك حل ثاني حتى تجيب زوجتك ..
الولد اشتغل كلشي و كدر يجمع فلوس من الشغل (واتداين هم المسكين) و كدر يتفاهم وي مهرب بتركيا و نزل لتركيا حتى يعبر زوجته لليونان ومن اليونان يدبرلها جواز مضروب و يطيرها للدولة الي هو بيها ..
هناك بتركيا لان الطريق بحر  و يخوف .. و تعرفون المهربين ميخجلون والولد صاحبنا زوجته صغيرة ..
خاف عليها وكالها اصعد وياج بالقارب و خلي شيصير يصير ..
صعد وياها بالقارب (وهو مقيم وعنده اوراق اوربية) المهم..
صعد وياها و بالاقليم اليوناني انلزمو ..
بصموه هو و زوجته و شافو عنده اقامة بأوربا عن طريق بصمته هههههه ... المضحك المبكي اعتبروه مهرب .. مع العلم هو شرحلهم السالفة و كالهم زوجتي صعب اجيبها لم شمل لان يريدون مني عقد عمل براتب قوي و اني محد انطاني عقد عمل بهيج راتب ..
كالوله قصتك مو مقنعة و انت مهرب و لان انت مقيم تستغل جوازك الاوربي حتى تتنقل و تهرب بكيفك الناس ..
الحاصل ..
الولد انسحبت اقامته و انحبس مده قصيرة و طلعوه و رحلوه  قصري للعراق و بقى ببغداد ...
رباط السالفة ..
ذاك اليوم فتحنا وياه كامرة و دنسولف .. طبعا الولد هسه مفتح اسواق غذائية و عايش يومه مرتاح .. يعني على حجايته مطلع العلاكة و مستور ..
يكول قبل فترة اجتني رسالة عالفيس بوك و انقبل طلب اضافتي ..
طبعا هو من يحجي المكتوب بالرسالة يغلط و يسب هههه بس مفاد الرسالة جان .
السفير مادري القنصل مجاوبة ورى ٣ سنوات ههههه كاتبله اني طلعت من الوظيفة و حاليا اني مواطن حالي حالك و كاتبله الرسالة بالفصحى على كولة صاحبنا  يكول (ذكرني بفلم الرسالة وحسيت روحي مقاتل بمعركة احد) يكول كاتبلي انا الان لا يسعني تقديم لك اي مساعدة لاني عدت الى صفوف المواطنين ... وانا الان مواطن حالي حال سائر العراقيين البسطاء الشرفاء الطيبين هههههه ..
يكول صاحبنا كلتله يعني انته من جنت بالدولة ما رديت عليا ومن صرت مواطن كمت تكلب بالرسايل لان صرت  لاتهش ولا تنش وماعندك لا شغل ولا عمل ..
عساها بحظك و ببختك ههههههه ضيعتني و ضيعت زوجتي لو مشغلني منظف بالباب مال سفارة الكط ورق اشجار جان شصار ؟؟
على الاقل اسمي موظف بالسفارة و جان جابولي زوجتي وخلصت مشكلتي بذاك الوكت ... بس من وراكم انسحبت اوراقي و انسجنت وفوكاها عبالهم اني مهرب هههههه ..

يكول صاحبنا هو مجاوبني بس طلعتلي علامة يعني اني انضربت بلوك هههههههه ...
الحاصل و رباط السالفة .. 
كل شي بحياتنا اكسباير ..
و احنا اصلا اكسباير ..
اذا جنا اقوياء النا يوم نضعف و نتعكز بخشبة مال شجرة جنا بوكت قوتنا اذا نلزلمها فاسه نكسرها تكسير ...
اذا جنا اصحاب وظيفة ماكو وظيفة تدوم هم اول وتالي يجي غيرنا يكعد عالكرسي اذا طلعنا تقاعد ..
و اذا جنا (مشهورين) هم الشهره الها وكت و تخلص .. ليش ؟
لان اكيد راح يطلع الاحسن منا و يستلم مكانه .. واذا جانو الف يأشرون عليك من جنت مشهور شوية شوية العدد يقل لحد متبقى وحدك تحجي اسطورتك للتكعد وياهم (والله اني جنت بفلان وكت الناس تسولف بيا) بس هسه كبرنا و نسونا ..

يا ابن ادم من الاخير (لاتنغر) ولا تتكبر على ال منك و ال بيك ..
لان اول وتالي ..
اني وانت الي دتقرأ وانتي هم الي دتقرين و الكل (اكس باير) ..
و الداير مدايرك اليوم .. باجر يلتهون بغيرك ويلتمون عليه ..
و اخيرا نستعين بالمثل الي يكول
(لو دامت لغيرك ما وصلت الك)
انتهى
اخوكم ابو بغداد سايق التكسي
#ابوـبغداد