قصص عراقية حقيقية بقلم ابو بغداد سائق التكسي

(مصيبه)

بدت تعلم اخوية يطبخ و تعلمه شلون يغسل الهدوم و يعزل الملابس البيضة عن الملابس الملونه بالغسالة ... جان وجهها كلش تعبان و اتذكر شوية تفاصيل لان اني هم مجنت جبير بذاك الوكت ... اخوية جان تقريبا عمره 11 سنة واني سبع سنوات .. مجنت افتهم ولا حتى اخوية يفتهم ليش امي كاعد تعلمه هالسوالف ...
ابوية جان يطلع للشغل و بس يرجع كبل يسألنا من باب المطبخ وين امكم ... عبالك اكو شي صاير بس منعرفه شنو بالضبط ؟؟؟
امي بدت يوم بعد يوم تضعف و دائما تعبانة عبالك شي ملفوف عليها .. شي منشوفه احنا .. شي يعصرها عصر ..
و بنفس الوقت ابوية هم مو طبيعي ... اول ميفوت متلهف يسأل على امي .. و يطب وياها كبل للغرفة و يبقون هناك .. و اكثر من مرة نسمع صوت ابوية يبجي ... زين عمتي مجانت تحجي وي امي ابد .. اشو كامت تجي و تضحك ويانا و تسولف طبيعي و كل شوية تحضنا و تحضن امي !!!!
..
وراحت امي بليلة ويوم .. طلع عدها سرطان بالقولون و واصل مرحلة ميتعالج اصلا ... ابوية اندمر بوفاة امي دمار مو طبيعي .. حبيبته و مرته و ام جهاله و اصلا جان يحبها قبل ميتزوجها اكثر من اربع سنوات ...
و فوكاها اني واخوية ... يعني مسؤولية مو بس صعبة فوك الصعبة وهو خطية عمله يومي وباليوم الي ميطلع بي على باب الله متدبر الخبزة ..
اول فترة ورى وفاة امي جانو يساعدوه اخوته ... بس اخوته هم امكانيتهم مو كلش قوية .. وخوالي هم ما قصرو جانو يساعدوه .. لحد مطلع من مرحلة الحزن و شوية رجع طبيعي .. رجع للشغل و اخوية الاكبر لزم البيت ..
جان يكعد من الفجر يسوي أكل لأبوية وينظف البيت و يحضر هدومي وهدومة ... مجان ينسى شي ابد ... حتى من بدينا نكبر كام يسجل الشغلات بورقة جبيرة و دائما يخليها عالكاونتر كبال عيونه .. جان هو يتسوك للبيت وهو يطبخ وهو يسد احتياجيات البيت كلها ... صبغ حايط .. باب تطلع صوت ... جامة مكسورة .. كلوب محروك ... كيزر خرب .. قميص انكطعت دكمته ... كلشي كلشي ..
يعني صار بمكان أمي بالبيت بالضبط ... مجان يشكي و لا يكول اخ راسي ..
ودائما يضحك و يتشاقى ... يدرس و يشتغل بالبيت .. لا عنده اصدقاء ولا عنده معارف مثل الي بعمره ... دائما بالبيت و كل كعدته بالمطبخ عالجودلية الي بصف الثلاجة .. والله اتذكر شلون جان يحط الكتاب مقابيلة و بصف الكتاب المصفي ببطنه بتيته و شلون يكشر و يقرا ..
والحلو بي جان كل هالاشياء يسويها اليا و لأبوية بس ولا بيوم طلع درجة نقص بدراسته .. ينجح ركض ركض وكله يجيب معدلات بس اني رغم ما هو يدرسني و رغم ما الكه كلشي محضر اليا .. مجنت اجيب ذيج الدرجات ..
ودخلنا كلية ... طبعا هو دخل قبلي و درس طب اسنان .. واني وراه دخلت بس بالكوه انقبلت فنون جميلة الي بالوزيرية .. بالدفرات يعني ..
ابوية بذيج الفترة امكانيته تحسنت .. لان عمي الجبير طلع لكندا و كام يساعد عمامي و ابوية .. و الحمدلله الامكانية صارت زينة بس كل هالسنين ابوية مفكر يتزوج لان ميكدر يتزوج ولا يريد يتزوج ... حتى مرة لو مرتين اني فتحت وياه الموضوع رزلني و كالي اذا تفتح هالموضوع بعد وياي لا اعرفك ولا تعرفني ..
اخوية بمرور الوكت كمت اكتشف بي شغلات .. انطوائي و خجول و مثل المعقد وطبعا هالشي مكشفته بالبيت ..
لان وياي و وي ابوية كلش طبيعي و يضحك للهوى .. بس المشكلة خارج البيت .. انسان ثاني و ابد ميكون علاقات ..
و كل كلامه عن الدراسة .. ليش !!
لان اصلا ميلتقي ولا التقى و ولا عاش مرحلة المراهقة ومجان عنده اصدقاء بعمره يسمع منهم .. يعني الكل سامع بالمثل الي يكول من الشغل للبيت و من البيت للشغل ..
اخوية جان من المدرسة للبيت للمطبخ و من البيت للمطبخ للمدرسة ..
هاي جانت عيشته ..
و بيوم من الايام ...رحت لدوامة و اخذت ولد صديقي وياي
.. صديقي عنده كرايبة يداوم هناك .. يم مدينة الطب جان دوامهم ..
رحت على اخوية و طبعا جان كاعد وحدة كالعادة و مقابيله كتب .. حتى بالكافتريا يكعد وحدة و هم يدرس ..
و شفنا كرايب صديقي ..
عرفني عليه و كلتله اني اخو فلان .. ابتسم وكال اهلا وسهلا ..
حجينا شوية اني وصديقي وي كرايبه و من شافني هيج اذب ميانة بسرعة كالي تصدك ولا عبالك هذا اخوك ..
كلتله ليش !!!
كال لك اخوك كلش عجس و ميلتقي وي احد و شكله عبالك مضروب فيوز براسه ..
الحاصل ..
تعاركت وي الولد بس موصلت للضرب و عفتهم و رحت كعدت يم اخوية ..
خطية كل شوية يكلي جوعان حبيبي ..
كلتله مو جوعان بس شبيك كاعد وحدك مو اني مثلك طالب و عندي كومة علاقات ..
كالي اريد انجح ..
كلتله اي واني هم مثلك اريد انجح بس عندي اصدقاء وعلاقات شبيك صادق شوف نفسك بلكي تلكه بنت الحلال ..
رجع كالي جوعان حبيبي اجيبلك شي ..
كلتله شبيك يمعود ياجوعان جاهل اني جاهل ..
كالي لا مو جاهل سد الموضوع ...
سديت الموضوع و رجعت للبيت حجيت كلشي لأبوية ..
كعدنا وياه و الكعدة بيومها صارت بالمطبخ ..
ابوية يحاجي من صفحة واني احاجي من صفحة .. لحد ما تعصب تعصب وجان ينفجر علينا ..
كال شتريدوني احجي وي الولد الي ما اعرفهم اصلا ..
تريدوني احجيلهم على الطبخ لو على غسل الهدوم لو على مسح الكياعين ؟؟
تريدوني احجيلهم على امي الي عافتكم بركبتي واني عمري صغير ؟؟
تريدون احجيلهم شلون جنت الهي نفسي بشغل البيت حتى ما اتذكر امي شلون لازمة ايدي وتعصرها من الوجع و تعلمني اطبخلكم فاصوليا لو انطيهم مقادير التايت بالغسالة ؟؟
لو تريدون اعلمهم شلون جنت اكعدكم بصوت ناصي من صباحيات الله واني اكون قبلكم كاعد بساعتين اجهز الريوك ؟؟
شحجيلهم كولو ؟؟
من كال هيج اني وابوية واحد كام يباع عالثاني و عبالك كعدنا من نومة طويلة .. نومة طويلة نسينا بيها هالمسكين و شلون تعب ويانا ... نومة طويلة اكلت سنينه خطية و منطيناه فرصة يعيش حاله حال الشباب ..
اللوم علينا ثنينا والله ..
اني جنت ملتهي بنفسي و اطب واطلع ... ابوية هم ملتهي بالشغل ..
يعني المسؤولية كلها براس هالمسكين لا اني انطيته مجال يعيش عمره و لا ابوية انطاه مجال ياخذ راحته ..
ومن يومها كلناله خلص كلشي علينا .. بس بعديش !!
الولد هاي شخصيته صارت .. يعني افقر من الفقير نفسه بكلشي .. و تعاملة وي الناس صفر بس بمجال اختصاصه دائما الاول ...
ابوية كام يدورلة مرة حتى تلزمة وشوية تغير من شخصيته و لكينا كرايب امي من بعيد بنية صغيرة بس على حجي النسوان سباعية يكولون ... زوجناه و ياريت ما زوجناه ...
تغير هو من تزوج بس تغير علينا بس احنا ... كام ابد ميسمع كلامنا و دائما يطبك وي زوجته علينا لحد ما لعبت بعقله و طلع من البيت وراح كعد وحدة و فوكاها الفطير يكول سبب من اسباب طلعتي منكم انتو تباعون على مرتي من جوى لجوى ..
اني وابوية متأكدين هذا كلام نسوان لان هو فطير وميعرف يحجي هيج سوالف .. ابوية كاله انت متستحي تكول هالكلام على ابوك واخوك !!
كاله انتو المتستحون .. بيومها ابوية ضربه وطرده من البيت وهاي صار لليوم سبع سنوات لا شايفي ولا هو شايفنه وحتى رقمه غيره ...
و شكد حاولت اتصل بي بعيادته لو يم بيته الجديد ميقبل .. وفوكاها من اروحله يسوي نفسه ميشوفني و امد ايدي يعبرني ويمشي والله ..
المهم ..
ابوية كبر كلش و مرتين راحله للبيت هم مستقبله ...
و اخر شي كلش كطعنا أملنا بي وابوية كال خلص اذا جتي ساعتي ومتت اني راضي عليه دنيا واخره لان ما قصر وياي ولا وياك بشي ...
واذا على سالفة هالحجي مالته اني اعرف زين زوجته ركبته لان شافته طينه جاهزه ... الله يجازيها على السوته والله يفرحهم خلي بعيدين وسعيدين شنريد منهم ..
والحمدلله على كل حال والله يحفظكم ..
(مصيبه)
انتهى
اخوكم ابو بغداد سايق التكسي
#ابو_بغداد