قصص عراقية حقيقية بقلم ابو بغداد سائق التكسي

اليتيمة

ابد محسسني بيوم امي ميته .. و بنفس الوقت ابد محسسني بيوم اكو نقص بحياتي .. جان ابوية و امي و اخوتي بنفس الوقت ... اني الوحيدة بس ..
ملاعيب جان خطية يجيبلي انواع الملاعيب .. ملابس احسن لبس يشتريلي .. اكل بس اشتهي شي كبل يسويلياه
.. و اذا يشوفني ضايجة لو مقهورة يبقى الليل كله يسألني شبيج و يحاول يضحكني و يحاول ينسيني ضوجتي ...
شوية شوية بديت اكبر و هو وياي خطوة بخطوة .. جان موظف بالاتصالات .. دائما من ورايا حبيبي يروح متأخر للدوام .. طبعا جان بالبداية يروح بالخط مال موظفين بس لان كل مرة يتأخر بسببي طلعو من الخط .. اخذ سيارة صغيرة و كام هو يروح ..
لحد هسة اتذكر من ينزلني يم باب المدرسة .. ميطلع بالسيارة اذا ميشوفني صرت ورى الباب الحديد مال المدرسة ... امي الله يرحمها ما اتذكر منها شي .. يعني شي ضبابي و احاول وي الصور ادمج شكلها ..
يعني شكلها اعرفه من الصور اكثر من ما اعرفه بالشوف .. لان صغيرة جنت من توفت ..
و مثل مكلت هو صار كل حياتي ... بكلشي جان يحاول يرضيني و ابد ما بيوم فرض رأيه عليا .. يكلي شتريدين كولي ..
هو ماعنده غير بس اخ واحد و ساكن بالخارج .. و أمي عدها خوات ثنين بس تقريبا كل سنة يتصلون مرة و مرات اصلا ميتصلون ..
كبرت اني و صرت بالكلية .. بالكلية فتت بعالم جبير .. عالم ما بي ابوية .. عالم كله بنات و شباب و لبس و علاقات ...
اني جنت دائما منطوية على روحي لان اخاف اسوي شي ميعجب ابوية .. الشباب اذا يحجون وياي حتى لو من نفس القسم ما اجاوبهم و لا احجي وياهم ...
ومرات اذا واحد يسألني و بصفي واكفة صديقتي .. اجاوبة بس بلسان صديقتي ..
يعني مثلا واحد سألني على فلان درس او فلان كتاب .
اباع على صديقتي الواكفة بصفي و اكلها كوليلة هيج وهيج .. يعني ابد مخيبت ظن و ثقة ابوية بيا حتى بعدم وجودة .. لان دائما جان يكلي البنية ماعدها شي بهل الحياة غير سمعتها و الحمدلله و الشكر سمعتي الكل يحلف بيها ...

و بيوم من الايام حياتي كلها انكلبت ..
مو بس انكلبت تغيرت جذريا ...
فد يوم جانت دنيا مغربية و كاعدين اني و ابوية بالطرمة .. عدنا سنادين مال زرع متعود ابوية كل يوم يسكيهم و ميقبل اني اسكيهم لان يكول انتي تغركيهم تغرك بالمي .. كاعد يسكي بالزرع واني لازمة بيدي كتاب اكلب بي ..
جوارينا ابنهم يشتغل بمحل مال ملابس .. متحارش بوحدة جاية تشتري منه .. و اهل البنية جوي عليهم للبيت ..
صار رمي طلقات و الرمي عبالك ببيتنا لان همه ماكو بينا و بين بيتهم عشر امتار ..
و ابوية فز من الصوت و كبل عرك وجهه و نام بمكانة و هي النومة نومة ..
مات الي جان مدللني و شايل همي .. مات الي رباني و الي خلاني ما احزن بيوم .. مات شيال همي و حزام ظهري بهل الدنيا .. راح الي جان عزوتي و سندي و الحايط الي اتسند عليه ... راح الي ما فكرت بيوم بخوف وهو موجود ..
مات ابوية و طلعت بنص الشارع اصيح و اضرب على وجهي .. التمت العالم و كلهم كامو يبجون والله العظيم ..
الجبير و الصغير يبجي على ابوية لان خطية ماعنده اذيه على احد و يروح بدربة و يجي بدربة ...
اصعب يوم بحياتي هو من فرغ البيت من الناس و كلمن رجع لحياته و اني بقيت وحدي وي الصور و الذكريات و ريحة ابوية ..
كلشي اباع علية بالبيت يذكرني بي ..
حتى البسامير الي مدكوكة بالحياطين .. حتى الكرك الصغير .. البلايس الي يخلي جوى الشباك ... المشمع الي يفرشه بالحديقة من يكص الحشيش ..
كلشي ..
ريحته بالبيت بكل مكان و صوته بكل شبر بالبيت ..
اصعب لحظات حياتي هي ذيج اللحظات من الكل بعد الفاتحة راح لحياتة و اني بديت بحياتي الجديدة الي ما بيها ابوية ..
بديت بحياة كلها مسؤولية و خوف و هسة هيج يصير بيا و هسة هيج يصير بيا ..
و الظيم و القهر وين !
صرت مطمع لكل الي يعرفني ..
خالاتي يتسابقون على زواجي لولدهم ليش ؟؟؟
مو حب بيا لا والله العظيم ..
بس لان البيت والسيارة مال ابوية و الذهب مال امي اليا ..
يعني كل هالسنين ما جوي عليا للبيت بقو يمي يومين و مكالو هاي البنية شلون عايشة و ابوها خطية شلون مربيها .. مكالو هاي البنية من تكبر تحتاج شغلات مال بنات (وخطية ابوية جان يجيب جوارينا مرية اسمها ام ميثم هي تعلمني على شغلات البنات لان حبيبي الله يرحمة جان يستحي ) و خالاتي من مات ابوية كامو يحبوني و كل وحدة تريديني لابنها ..
جوارينا و الشارع كله وكفلي وكفة .. اوف ياجوارينا اوف يانخوتهم و خوفهم عليا ..
كامو نسوان المنطقة يتناوبون على المبيت يمي ... هاي ما انساها و لا انسى فضلهم عليا ..
كامو يسوون جدول و طبعا هالشي عرفته بعدين .. جدول اسبوعي يوميا تجي وحدة تبات يمي .. و رياجيل المنطقة الكبار كلهم يخافون عليا و دائما يسألون نسوانهم (خو ما احد مضوجها لو مسمعها شي) ..
بس رغم كل هذا اني ما اكدر ابقى وحدي .. ما اعرف و اخاف اعيش وحيدة .. جم دوب نسوان المنطقة يبقون يباتون يمي ..
اتصلت بعمي الي بالخارج و طبعا هو جان مرتب على جيه للعراق ..
اجه للعراق علمودي .. و رتبلي اوراق سفر و سافرت وياه .. بالبداية جان زين وياي و شايليني على جفوف الراحة .. و وصلنا للدولة الي هو عايش بيها و مرته رحبت بيا ..
اسبوعين عدل ..
14 يوم تماما ..
جان ينفتح موضوع بيعي البيت فلانة و خلي نسوي مشروع هنا تعيشين من وراه ..
شكد الذهب مال امج الله يرحمها ..
السيارة ليش باقية بالبيت حرامات ..
و طلعو نفس الطينة مال خالاتي .. طلعت من عدهم واني كل نيتي ارجع للعراق و ارجع لجوارينا الي يخافون عليا اكثر من جهالهم احسن من ما ابقى مطمع بعين اهلي عود ..
طلعت و عفت جنطة الهدوم و بس اخذت جنطة صغيرة بيها فلوس و بيها جوازي .. كبل طلعت للسفارة العراقية ..
بالسفارة العراقية التقيت بولد شوية اكبر مني .. الولد قديم بالدولة ذيج و صايرلته مشكلة .. المشكلة هو جان مزوج وحدة اجنبية .. و الاجنبية مخلفة من عنده و بعدين صايرة مشاكل بيناتهم و مطلكين .. و صايرة مشاكل علمود الطفل وجاي للسفارة حتى يساعدوه ..
اني من سمعت قصته انقهرت عليه كلش .. سالني هو شعندج هنا ؟
كلتله اني جيت هنا عقد عمل و بالكوه حصلته و اهلي امكانيتهم مو زينة و صارت مشاكل بالشغل و بطلوني و هسة راجعة للعراق ..
طبعا بذيج اللحظة ماعرف شنو الي خلاني اكول هيج ...
الولد كال صدك جذب و ليش ترجعين !
كلتله شغل ماكو واني اصلا جاية هنا حتى اشتغل ..
كالي و الله ولا ترجعين .. اني اختي وامي هنا عايشات و مجنسات امشي وياي هسة كعدي يمهم و شغلج موجود و حتى الشغل ميحتاج لغة ..
كلتله يله ..
بس اني بذيج اللحظات كل شوية اريد اكول ترى اني جذبت عليك وماعرف ليش كلت هيج .. و بنفس الوقت اكول خلي اشوف شيصير .. صار عندي فضول اكمل الكذبة الي كذبتها ..
و رحت وياه و صدك الرجال عرفني على امة واخته ثنينهم كبار بالعمر و شالوني بالصلوات خطية ..
من شفتهم هيج يتعاملون وياي كمت ابجي و حجيتلهم كلشي .. كامو يبجون خطية و انقهرو عليا من عرفو خالاتي شلون تعاملو وياي بعد وفاة ابوية و عمي و مرته شلون طلعو ماديين ..
و بقوني يمهم و صرت وحدة منهم و بيهم .. و اشتغلت بمدرسة صغيرة اختصاصها تعليم الاطفال العرب لغة عربية .. يعني مثل المدرسة الاهلية .. مكان مستأجري من البلدية و هم يسوون بي جلسات نسائية للجالية العربية و تعليم حياكة و خياطة و طبخ .. و بنفس الوقت بي غرفتين مسويها مثل الصف و بيهم صبورة .. هاي يدرسون بيها لغة للجهال حتى لا ينسون لغتهم العربية بسبب الغربة ..
و عشت الحمدلله و الشكر احسن عيشة بس ما قبلو اطلع بسكن وحدي و بقيت وياهم .. و الله سهلها وجتي قسمتي عن طريق اقربائهم و تزوجت .. الي تزوجته سبحان الله طلعت ذبته مثل ذبة ابوية .. حنين و على اقل شي يبجي ..
يعني اكثر من خمسين مرة حاجيتله شصار بيا من ابوية مات و كل ما اعيدله التفاصيل عيونه تدمع ..
الله عوضني خير بهل الرجال بعد ما فقدت ابوية .. والله عوضني بالجوارين الي وكفولي والله عوضني بهل الرجال الي شفته بالسفارة صدفة هو واهله ..
الحمدلله على كل حال ..
( اليتيمة )
انتهى
اخوكم ابو بغداد سايق التكسي
#ابو_بغداد