قصص عراقية حقيقية بقلم ابو بغداد سائق التكسي

صحوه متأخره

وكفت كبال كبرها احاجي التراب .. احاجي الطوابيك الي فوك جسمها .. كلتلها حبيبتي الطابوك ثكيل عليج عمري  .. انتي جيس المي الحار من جانت بطنج توجعج متكدرين تتحملين ثكله .. شكالت روحج من غطوج بالتراب و خلو عليج طوابيك .. ثكيله الطوابيك مو أهلي … شلون راح اعوفج هنا بنص البرد .. اجيب اللحاف اغطيج .. اللحاف الي اشترينا سوى من السوق العربي تذكريه … بيومها تعبتي من المشي و كلتيلي شيلني على ظهرك .. كلتلج صح انتي ناعمة بس اذا اشيلج هسه يشبعون ضحك الناس لان يتخيلونه مثل جامبو الجبار شايل ساسوكي على ظهره .. كلتي ليش اني اشبه ساسوكي !!
كلتلج اي بس الصبح من تكعدين من النوم نسخه منه .. ضحكتي و بالكوه سكتج لان مكدرتي تلزمين روحج من الضحك .. من هسه اني مشتاق لهل الضحكة .. شلون راح اتركج هنا بنص الحر و انتي روحج تفرفرح من الشمس …. شلون ؟؟؟
اني غلطت بحقج هواي .. و كل الشكوك الي جانت براسج جانت صح … بس جنت اغطي عن الغلط مالتي بالعياط و بالزعل … لحد ما اخير شي رضيتي بالامر الواقع و كمتي تاكلين بنفسج و هالشي جان يبين على شكلج يوم ورى يوم … اعترفلج اني غلطت .. اعترفلج اني كذبت عليج هواي … بس ما حبيت ولا راح احب وحدة غيرج .. جنت احس بالامان من افوت للبيت وانتي والجهال تتلكوني .. منو بعد يتلكاني من باب المطبخ .. منو راح تكلي الله يساعدك حبيبي … بكل مكان عندي  ذكرى  وياج راح تطاردني  ..  انطيني مكان ماعندي ذكرى بي وياج .. احجي وين … ماعندي مكان بحياتي اذا مو انتي جنتي بي وياي و صارلتنه اكثر من حاله بي … وفوكاها من توفيتي اني ما جنت موجود يمج .. شلون شالوج شلون غسلوج شلون جابوج لهنا … شلون اتحمل جسمج الناعم الطسات وانتي بالتابوب … جتوفج الترفه شلون تحملت الخشب النامت عليه … شحجي و على منو اذب اللوم … هالمرض اخذج مني و ياريت هسه انصاب و الحكج بس هالمساكين منو يبقى الهم … شراح اكول لصوفي بليل .. ميعرف ينام اذا مو انتي تنوميه … نونه شلون راح اسويلها الاكل الي تحب تاكله من ايدج … ليش رحتي و ليش عفتيني واني ممعتذرلج … على الاقل انتظريني اعتذرلج … اني هسه شلون راح اكمل عمري و اعرف بنفسي انتي توفيتي و اني غلطان بحقج و انتي زعلانه مني …  جنتي كل متتصلين من طريقة كلامج اعرف انتي زعلانه .. بس لان اني بالغربة و عندي شغل مجنتي تبينيلي هالشي ..  جنت اعرف انتي زعلانة من انفاسج و من طريقة كلامج .. لج انتي جزء مني و حافظج .. بس شيفيد الحفظ بعد اذا الحفظته نام جوى التراب … المن بعد اشكي همي .. المن بعد اسولف عن المضوجني … منو بعد يدعيلي و ينطيني أمل … راح اكابل الحياطين و كل حايط يذكرني بيج … البيت كله انتي … الطريق انتي … شغلي انتي .. جهالنه انتي … التلفزيون الكمبيوتر التلفون انتي انتي انتي … بس تعالي اريد اكلج اني غلطان بحقج .. متوقعت المرض هاذا ياخذج بلحظة … من جنتي تكوليلي تعبانه و بالكوى اتنفس والله عبالي دتثيرين اهتمامي مثل كل مره .. بس ياريتني عابر تهريب و جايج .. والله لو ادري انتي راح تروحين جان مسافرت اصلا … بس والله هالسفرة مسويت شي غلط … و اعترف كبالج و كبال الله اني جنت بكل سفرة اسوي شغلات مو زينه … بس هالمرة رحت نظيف و رجعت نظيف … حبيبتي كومي رجعي وياي … عمري كومي … شكد اذيتج اني .. كومي مو جنتي من اتمرض تكوليلي انته قوي و راح تعبر هالازمة .. انتي ليش معبرتي هالازمة ليش … ليش … اني خاين اني جذاب اني كلشي غلط سويت .. ارجعيلي والله راح امشي عدل … بس ارجعي .. ليش ما الله اخذ روحي و عافج لهل الجهال .. اني الي استاهل الموت مو انتي … اني الي استاهل انام بمكانج مو انتي .. اني كل شي استاهل لان اني الغلط وانتي الصح ….

هالكلمات كلها مراح تبرر ولا تصحح الغلط … ليش ….
لأن الصحوة المفروض تجي من قبل … مو من متت .. مو من نمت جوى التراب … جنت اجدي منك اهتمام .. اهتمامك جان قبل الزواج بس … و ورى الزواج صارت حوراء تحصيل حاصل …  الاهتمام راح .. الحب مينطلب .. شنو فائدة انت تحب حوراء و تعرفها هي تصونك و تحبك و متشوف بهل الكون غيرك و من تسافر تسوي علاقات وقتيه (على كولتك) … علاقات مو للموت .. ساعات و تنتهي .. بس اني لأن زوجة خلص فزت بيك صرت زوجي للموت .. المفروض ما اطالبك بشي بعد (لان حجتك وياك) مو تزوجتج؟؟؟؟
و هسه من نامت حوراء جوى التراب … كل شكوكها طلعت صح … من جانت تشك بيك تسوي عركات و تخوفها بصوتك بعالي و تضطر تسكت خوفا عالجهال … و اليوم ماكو حوراء بعد .. اخذها المرض الي دياخذ الناس بهل اليومين … اعترافك ماله قيمه … راح تبقى روحها الطاهره تلاحقك بكل مكان … مو بعيد تتزوج .. و يجوز هالكلمات مجرد كلمات (انيه) يعني كلمات تطلقها و تحجيها بس هسه لان مصدوم .. و يجوز هالصدمه و هالصحوه راح تخليك تنركن بهل الدنيا .. و متفكر بغيرها بعد و متسوي علاقات … لان الجانت صاينتك بحياتها .. الجانت مسخره روحها الك راحت … سولف و ابجي للتراب .. حس .. حس على روحك .. بس كل شي اجه متأخر … هالحجي مو بس الك .. لكل واحد ظالم .. اذا ظالم اهله و اذا ظالم زوجته … الدنيا ساعات و بدقايق هالساعات تلكط بالبشر .. راجع نفسك .. صحح الغلط .. لأن الي يمك اليوم .. يجوز باجر مو يمك ..

أصعب لحظات المواجهة .. مواجهة قبر أنسان خطأت بحقه … شراح تحجي و شراح تعتذر و شراح تبرر مراح يفيد لا الحجي و لا الاعتذار و لا التبرير ..
لأن خلص راح الي غلطت بحقه .. راح و ميرجع .. صحوه متأخره)
انتهى
اخوكم ابو بغداد سايق التكسي
#ابوـبغداد