قصص عراقية حقيقية بقلم ابو بغداد سائق التكسي

سماء

بالتسعينات اختي تزوجت و راحت لبيت رجلها …. زوجها مهندس بس ميشتغل بشهادته … صارله عن طريق اقربائه شغل بس خارج العراق  … قرر هو يطلع بالبداية و بعدين يدز على زوجه (الي هي اختي) يعني يسحبها يسويلها لم شمل  … جانو ستوهم متزوجين و هو كيف كلش و هي هم كيفت على كصتها صار هالشي … الي ساعدة بهل الموضوع رتبله اوراقه بسرعه و طلعه بس عن طريق تركيا مو مباشر للأوربا .. لان جانت صعبه كلش بذيج الفترة سالفة الهجرة لأوربا … و راح رجل اختي لأوربا و عاف اختي يمنا بالبيت .. جانت حامل هيه بشهرها الخامس .. و الاتفاق جان متطول السالفة سنة و هو يسحبها بس المهم هناك ياخذ اقامة .. و طبعا بذيج الفترة جانت الاقامة كلش سهلة بالنسبة للعراقيين .. بالتسعينات يعني بعكس هسه صعبة كلش .. احنا بالبيت خوات ثنين و اب و ام … ابوية موظف بوزارة الري و امي معلمة و اني جنت طالبة اعدادية و اختي جانت خريجة هندسة بس متشتغل بشهادتها و هي اصلا تعرفت على زوجها بأيام الكلية و حبو بعض و ارتبطو ..
المهم .. اختي للأسف توفت بيوم ولادة بنتها ( سماء ) .. و الله يرحمها ولو ميصير احجي بهل المواضيع (لان مواضيع نسائية) بس يعني الولادة مجانت طبيعية و صار  عدها نزيف يعني ماريد اكمل توفت المسكينة و عافتلنه سماء .. بوقتها المرحومة جانت مختارة اسمين (اذا ولد صفاء و اذا بنية سماء و هالشي بالاتفاق وي زوجها) .. و فرحتنه مكملت بالبيت لأن راحت حوراء و جتي سماء بمكانها .. جان هالشي بالنسبة النا يوم مينسي والله .. و لهذا يومنا و بعد كل هالسنين من نتذكر الي صار نبجي … حوراء جانت فقيرة و طيبه و حنونه كلش و بعمري مسمعتها تصيح لو تحجي بصوت عالي .. هادئة و الكل يحجي بيها  و بأخلاقها .. الله يرحمها … و جتي سماء بمكان حوراء .. معرفنا شلون ننقل الي صار لزوجها الي مكيف هو هناك و كاعد يشتغل بأوراق سفر حوراء و دينتظر المولود الجديد حتى يسجله بالاوراق المطلوبة و مكيف بشغلة الجديد .. الوضع كله جان حزين بالنسبة النا .. و ابوية كاله بالتلفون هالحجي و طك من البجي و كال لأبويه (هو اني كل الي سويته و دأسوي علمودها و تالي راحت وعافتني) .. المسكين معرف شيسوي و شيحجي .. طبعا هو جان بعلاقة وي حوراء اكثر من اربع سنوات و حتى حوراء جان عدها باكيت صغيروني بالكنتور بي رسائله و الشعر الي يكتبه الها من اول متعرف عليها الى حد قبل ميتزوجها بكم شهر … يحبها يموت عليها .. و احنا بالبيت حسينا سماء الصغيرة هي حوراء .. هي صح اسمها سماء بس لا اني ولا ابوية ولا امي نصيحله سماء كلنا نصيحلها حوراء .. جانت هي الوحيدة الي تنسينه الي صار و سبحان الله تشبه امها كلش خصوصا من كامت تكبر … ابوها قرر يعوف سماء يمنا لحد متكبر لان بيت اهله عدهم جهال كومة و هو يخاف عليها .. و اصلا هو مو بالعراق يعني ميأمن عليها تروح لبيت اهله اخاف يأذوها جهال اخوته .. و بدت تكبر بنصنا حوراء الصغيرة (سماء يعني) .. اني جنت امها .. صح اني ممتزوجه بس حسيت اني امها بهل الدنيا .. جنت من اخليها على صدري اغمض عيوني و ابجي لان اشتم ريحة امها بيها … و سنة تجر سنة و كبرت سماء … دخلناها ابتدائية و طبعا بهل الحجي اني جنت متخرجة و متوظفة … جانت تصيحلي ماما لينا .. لان اني اسمي لينا .. و تصيح لأمي ماما نادية لأن امي اسمها نادي .. و ابوية تصيحله بابا بدون متخلي اسمه هههههههه … يعني جان عدها بمكان الام (امهات ثنين) … تعلقنا كلش بسماء و صارت هي فرحتنا بالبيت بعد مراحت حوراء .. جنا نتسابق على دلالها ..
منو يدللها اكثر و منو يداريها اكثر .. جانت متعرف تنام اذا مو بحضني … تبقى تلعب بشعري لحد متنام .. و طبعا للأمانة ابوها جان يدزلها مصرف شهري و جان ابوية يجمعه الها و منصرف منه شي لان هي ممحتاجة شي .. و عمامها بين فترة و فترة يجون هم يخلون مصرف الها و احنا جنا منقبل بس همه يحلفون لازم يعوفولها شي .. و هم جان بابا يجمعه الها … البنية جانت ممحتاجة شي ابد و عايشة بنصنا مرتاحة و هي حبيبتي على امها طالعة هادئة و كلش محبوبة .. و بيوم من الايام صار اتصال بين ابوها و ابوية و ابوها جان مفاتح ابوية بموضوع طبعا ابوية محجالنه بس بعدين امي بقت تلح عليه و تعرفون الملحه مال نسوان .. من كثر ملحة امي قرر يحجي .. رجل اختي قرر يتزوج هناك بالخارج لان تعب من الوحدة و هالشي حقه بعد مرور هالسنين ..و راد ياخذ رأي ابوية و ابوية كاله حقك بس ابوية خاف يحجي كبالنه اخاف نكرهه و نكول عليه شي محلو بس اني وامي تفهمنا الموضوع و هم كلنه هالشي حقه .. هو بعده صغير و عايش بغربة بس الي جنا متخوفين منه (سماء) جنا متخوفين لا يجي يوم يكول خلي تجي يمي و تروح تعيش يم زوجة أب اخاف تأذيها اخاف تضربها و اصلا مجرد التفكير بفكرة سماء تعوفنه هالشي يخوفنا و يرعبنا لان تعلمنه عليها وهالبنية قطعة من عدنا .. و تزوج (سلام) الي هو زوج اختي المرحومة .. و صار عنده طفل .. يعني اخ جديد لسماء .. و سنة تجر سنة و العمر يمشي و طبعا من يمشي هالعمر ياخذ من عدنا احبابنا واحد ورى واحد .. و اجه اليوم الي ابوية توفى بي و عافنه وراح .. الف رحمه على روحه جان على فراش الموت و يوصينا بسماء … و راح و عافنه تلاثتنه .. اني و امي و سماء و هنا اني قررت ما اتزوج بعد .. طبعا بهل السنين ابو سماء (سلام) صار عنده طفلين و سماء كبرت و كامت تفتهم و واعية للدنيا .. و طبعا كامت تحجي وي ابوها بين فترة و فترة و ابوها طرح عليها فكرة انو يدز عليها هي مقبلت ..
و قرر  سلام يجي للعراق يشوفها و يجيب وياه زوجته و جهاله يعني (سفرة و يحاول يقنع بنته ان تسافر وياه) .. و صدك والله جوي كلهم للعراق و سماء جانت يوميا تبجي من تاريخ جية ابوها يتقرب .. تخاف لا يجبرها و ياخذها وياه .. و حتى وصلت بيها الدرجة انو تكول كلمة (انتحر و اكتل روحي) بس ابقى هنا .. احنا جنا نصبرها و بنفس الوقت نكلها بس هو يبقى ابوج و ترى للامانة هو مقصر وياج ابد و حتى حجينالها هو شلون سافر ببدايته و علساس يسحبها هي وامها بس القدر تدخل و حوراء توفت و هو كال انتو ربوها لان يخاف يدزج لبيت عمامج .. يعني لا كذبنه عليها و لا شوهنه صورته للرجل لان الرجل ما سوى شي غلط ابد .. و اجه اليوم الي ابوها رجع هو و زوجته و جهاله و جوي لبيتنا .. طبعا جان اللقاء كلش صعب علينا كلنه .. والله العظيم حضن بنته يمكن ربع ساعة و يبوس بيها و يبجي مثل الطفل .. مثل الطفل و يصيحلها حوراء .. مع العلم احنا من بدت تكبر كمنا نصيحلها بأسمها سماء .. بس مرات نخربط نكول حوراء .. هو من شافها كبل صاحلها حوراء و طبعا احنا مكايلله ابد انو احنا نصيحلها حوراء .. كلنا كمنا نبجي حتى زوجته الي متعرفنه هم كامت تبجي .. طبعا زوجته كلش فقيرة و جهاله كلش كلش مودبين و هم بوسو اختهم وطبعا لغتهم العربية مو قوية بس حاولو يتواصلون وياها .. و طلب ابوها ان يكعد وياها لوحدهم .. و دامت الجلسة اكثر من ساعة و بالاخير هو تفهم طلب سماء و قبل ان تبقى هنا و ما حاول يجبرها على شي .. و بقى فترة بالعراق و بعدين رجع للخارج و بقت سماء يمنا ..
و رجعت لمتنه سوى و هي ارتاحت كلش ورى هاللقاء و رجعتلها الضحكة لوجهها لان جتي فترة حتى شعر راسها كام يوكع (اسم الله عالقارين) لان تفكير تفكير تفكير .. خافت البنية ان تعوفنه وهي ثنينه تصيحلنه ماما .. صح اني مولدتها و لا امي بس احنا ربيناها و كبرت بنصنا و اول كلمة كالتها اما (اما) يعني ماما كالتها اليا .. شلون تعوفني .. اني جنت ما ابين هالشي بس امووووت والله .. ماكدر بدونها هاي حوراء اختي و سماء بنتي .. و رجعت الفرحة لبيتنا و طبعا اني جان اكو واحد كاتل روحه يريدني .. هو موظف ويانه و سبعين مرة دز عليا موظفات و حتى رياجيل بالدائرة يريد يتقدملي و اني ارفض و هالشي حجيته لأمي و حتى لسماء .. كالو ليش متقبلين .. كلتلهم ماريد اعوفكم وحدكم .. كالو ميصير هالحجي انتي شرطي عليه تكعدين بنفس المنطقة اذا قبل تزوجي و قريبة من عدنا ويوميا نتشاوف .. و كلتله هالحجي و الرجال قبل بسرعة هههه طبعا للامانة هو يحبني .. و تزوجت و كعدت بنفس المنطقة مالتنه و صار عندي طفل و هالمرة سماء هي تريد تربي هههههههههههههه .. تكلي هذا ابني كلتلها لج شنو انتي تقلديني هههههههههههه اني كلت هالشي عليج اول مجيتي للدنيا .. و الحمدلله عشنا بسعادة و طبعا سماء تزوجت قبل ازمة كورونا بفترة و اخذت ولد جوارينه و هم كاعدة بنفس منطقتنا .. وطبعا ورى زواج سماء قررت ان انتقل اني و زوجي و ابني لبيت امي حتى متبقى وحدها .. و انتقلنه و هسه حياتنا كلنه بخير و سماء بعدها الله مرازقها بجهال بس حالفة اذا جاها ولد تسمي صفاء و اذا بنية حوراء على اسم امها .. و هاي قصتنا .. و هاي سالفتنه .. الله اخذ حوراء و انطانه سماء و سبحان الله عوضني بأخت و ببنت بنفس الوقت .. لان هي بنتي و اختي بنفس الوقت … هسه اذا احلف اكول سماء حباية و انقسمت نصين من حوراء محد يصدكني .. بس والله هالشي حقيقي و هي حوراء بس اسمها سماء ..
(سماء)
انتهى
اخوكم ابو بغداد سايق التكسي
#ايوـيغداد