قصص عراقية حقيقية بقلم ابو بغداد سائق التكسي

عمي

بوقتها جنت بصف ثاني ابتدائي ... جسمي جان ضعيف و كصير … ابوية يطلع من صباحيات الله للشغل يرجع المغربية .. و امي ملتهية وي نسوان عمامي بالبيت يطبخون و ينظفون .. البيت جان بي اكثر من ١٣ نفر … عمامي و نسوانهم و جهالهم و عائلتنه .. عمي الوسطاني كل عمامي و حتى ابوية يخافون منه .. لان يشرب و ميحترم احد و المنطقة كلها تعرفه و تعرف مشاكله … احنا الجهال الي بالبيت كلنه نخاف منه .. لان يضربنه دائما ومحد يكله ليش تضربهم .. ابوية اصلا جان فقير البيت .. يعني مسكين ميدور مشاكل .. اتذكر مرة من المرات عمي جان كاعد برى يم باب الحوش و جماعته يمه … كام يصيح راد مي اله و لجماعته … اني و بنت عمي هم بعمري تقريبا طلعنه المي لان ميصير النسوان يطلعون .. بنت عمي شالت كلاصين كزاز .. واني شلت الدولكه الكزاز مال المي .. جان بيها ثلج و ثكيله … ايدي واني دامشي كامت تميل يمين و يسار … مع العلم اني بثنين ايدناتي لازم الدولكه … وصلت لباب الحوش و بنت عمي فتحت الباب حتى اطلع .. الحديدة مال السركي جلبت ببجامتي .. عثرت و وكعت على وجهي و الدولكه مالي المي وكعت انكسرت و تطشر الكزاز مالتها .. حتى اكو وحدة من الكزازات فاتت بجتفي لان على وجهي وكعت .. بس مأذتني ولا وجعتني ولا حتى الدم الي طلع اذاني بكد الكتل الي اكلته من عمي … شالني و لزكني بالكاع و يصيح انته شوكت يصير براسك خير ولك مي متعرف تجيب.. و اصدقائه يجرون بي يريدوه يعوفني وهو يمكن جان معصب اصلا و طلع كل ضوجته بيا .. لدرجة امي على البجي مالتي جتي تركض و رادت تسحبني منه .. هو من شافها طلعت برى و جماعته كاعدين .. وهي المسكينه من الخوف عليا ملحكت تخلي الربطة على شعرها .. هم دفرها و كالها فوتي جوى و وكعت بالكاع .. اني من شفته هيج ضرب امي رغم كل الوجع الي بيا ماعرف شنو الي خلاني اشيل الطابوكه الي نثبت بيها باب الحوش حتى لا تنسد .. و ضربتها عليه جتي بظهره .. هو شافني هيج سويت .. اجه ركض عليا و شالني شلون واحد يشيل اثقال هيج ليفوك .. و لزكني بالكاع .. جسمي متحمل هالوكعه .. انكسرت ايدي .. و صار صياح مال نسوان عمامي و جماعة عمي جروه اخذوه بعيد .. امي ودتني للمضمد الي بمنطقتنا و كالها اني ما اجبر كسور لان ابنج ترى ايده مكسوره … اخذت تكسي امي هي و زوجة واحد من عمامي و ودوني لمستشفى تبعد منطقة عن بيتنا ..
جبرولي ايدي و رجعنا للبيت بس امي مقبلت انزل من التكسي .. كالت ابقى بالتكسي و سمعتها حاجته لابو التكسي انو ياخذنه لبيت جدي (ابو امي) و بس نزلت جابت اختي الصغيرة و جابت هدومنا بجياسه و هدومها و طلعنه لبيت جدي (ابو امي) و صلنه هناك و امي حجتلهم الي صار  … بيت جدي (يعني خوالي) هم مو قليلين شر .. اني ماعرف الله ليش خلقني بنص هالعائلتين كل ما اتذكر الوضعيه و اشكالهم رغم ما اني منهم و بيهم اذا جانو عمامي او خوالي والله العظيم والله العظيم والله العظيم كل ما اتذكر نفسي تكوم تلعب و اريد اتقيأ (مكرم القارئ) مجانو ناس طبيعين .. عبالك ناس مخلوقين بس للعركات و المشاكل … كبل من سمعو خوالي بلي صار .. اول شي كامو يلومون امي و يغلطون عليها و على ابويه و كالولها حرفيا (لو زوجج رجال جان محد متجرأ يسوي هيج بس زوجج جبان) و كبل طلعو بسيارتهم راحو يدورون على عمي الي ضربني .. و كل هالحجي ابوية خطية بالشغل و بذاك الوكت ماكو موبايلات حتى نتصل بي .. هو المسكين يشتغل سايق مال شفل .. و يوميا بمكان يروح .. و طبعا الشفل مو مالته .. الحاصل .. راحو و هناك هم صارت مشكله و رجعو و كالو خلص تتطلكين من رجلج لو يعزلج ببيت وحدج … و طبعا عمي الي ضرب أمي انهزم لمحافظة من محافظات ابونه العراق … و أمي مقبلت على سالفة الطلاق لان تعرف ابوية ماعنده امكانيه يعزل .. و اجه ابوية لبيت خوالي .. طبعا شبع رزايل و هو كالهم اني مجنت موجود و كالوله حتى لو موجود شراح تسوي كلكم تخافون من فلان (قصدهم على عمي الي ضربني و ضرب امي) و مقبلو امي ترجع و هو كالهم انطوني فرصة فترة حتى بس اكدر ارتب سالفة الطلعة من بيت اهلي .. و بقينا ببيت خوالي .. طبعا العيشة ببيت خوالي ما تختلف هواي عن العيشة ببيت جدي ابو ابويه .. بس الشغلة الوحيدة هنا زينه و حلوة انو محد يضربنا احنا الجهال .. و ما كدر ابوية يعزل لان هو اصلا مديون و شغله على كد حاله .. و جوي اعتذرو على الي صار بعد فترة (يعني بعد ما هدأت النفوس) و صار صلح بس سالفة رجعة امي مستحيله اذا مياخذ بيت لوحده .. و شهر يجر شهر لحد ما ملو خوالي و قررو ان يتنازلون عن سالفة العزل (لان شافو ماكو فايده) و رجعنا لبيت جدي .. طبعا ابوية ميحجي وي عمي الي ضربنا … و عمي ميحجي ويانه .. و ماكو خوف منه بعد لان ورى سالفة خوالي من راحو يدورون عليه هو شاف السالفة صدك و مستحيل يكرر الي سواه .. بعد ما رجعنه بشهرين النفوس بقت ممتصافيه .. عمي كام يدور حصته من الورث و طلع بسالفة نبيع البيت و نوزع الحصص ..
زين هو البيت بمنطقة شعبية .. و همه الورثه كومة .. يعني شراح ياخذ مثلا .. الحصه مالتهم اذا توزعت متجيب قطعة كاع .. الي افتهمناه انو هو من جان مهزوم من خوالي بغير محافظة شايف اسعار الكياعين هناك رخيصة و حتى البيوت رخيصة لان خارج بغداد .. و بذاك الوكت جانت الفلوس تجيبله مشتمل صغير برى بغداد .. و حتى حصتنا نفس الشي .. و باعو البيت و توزعت الحصص .. ابويه كال بحصتي راح اخذ سيارة اشتغل بيها تكسي و بنفس الوقت نأجر مشتمل ادفعله مال سنه مقدما .. و الباقي اضمه … و صدك صار الي صار و انباع البيت و ابويه اخذ حصته و انتقلنه لمشتمل بغير منطقة .. و اخذ ابوية سيارة تكسي و مشت حياتنه طبيعي .. يعني جانت عيشتنه على كد الحال بس مرتاحين .. بالوقت الي جنت كاعد ببيت جدي (ابو ابويه) جانت درجاتي ابد مو زينه بكل الدروس .. من كعدنا وحدنا رغم حالتنه الماديه البسيطة بس بديت ادرس و اركز .. قبل جنت ماعرف اركز لعدة اسباب .. الهوسة الي بالبيت .. المشاكل بين الموجودين بالبيت و الصياح .. بديت انجح بسرعة و ارتاحيت نفسيا اني و اختي .. حتى امي ارتاحت و حست بأستقلالية .. بس ابويه تعب لان الحمل بالبداية جان ثكيل عليه .. بمرور السنين تأقلمنه وي الوضع و كدر ابوية بمساعدة واحد من جوارينه يطور نفسه بالشغل .. و كدر ياخذ سيارة ثانية هم يشغلها تكسي بس يم سايق … و اني طبعا كمت سنه ورى سنه انجح و صار عندي اصدقاء بالمنطقة هواي .. و كلش مرتاح بحياتي الجديدة .. 
اختي هم ارتاحت و صدك تغيرت وضعيتنا جذريا .. و بدينا نكبر و ننجح و ابوية باع السيارات و اشترو هو وصديقه تريله (شركاء يعني) و التريله من وراها كدر ياخذ شفل .. و طبعا هو سايق شفل و الوضعيه تحسنت لدرجة اخذنا قطعة كاع و بدينا نبنيها … ورى مكملت قطعة الكاع و بنيناها .. تحولنا لبيتنا الملك .. طبعا الظرف النفسي يغير حتى الشكل .. امي و ابويه اشكالهم عبالك تغيرت و صغرو بالعمر من الراحة النفسية .. عائلتنا جانت سعيدة لدرجة جبيرة .. و عشنا احلى سنين بعمرنا و كبرنا و اني دخلت كلية و اختي هم دخلت معهد معلمات الي بالمنصور .. اني جنت اداوم بالتراث .. و ابوية ورى مكبر سلم الشغل لناس ثقة همه يشتغلون و ينطون لابوية الوارد مال الشغل .. و بيوم من الايام امي دتكعد ابوية الصبح ما كعد .. توفى والدي بدون اي مقدمات .. لا مريض .. لا عنده وجع ..
نام بليل ما كعد الصبح و هاي قسمته و قدرنا و كل واحد بينا الى يوم تخلص ايامه بهل الدنيا .. تاذينا كلش بوفاته بس لازم الدنيا تمشي و الحياة تمشي .. و اني صرت جبير البيت و لزمت المسوولية .. الي جانو يشتغلون وي ابوية ما قصرو وياي و ابد متلاعبو وياي بسالفة الفلوس الي تطلع من شغل الشفل و التريلة .. و الحمدلله الوضعية مشت و بيتنا ملك يعني احتياجتنا كلها مدفوعه و فوكاها تزيد فلوس امي تضمهم لأي حالة طارئه و سيارة ابوية الصغيرة (الشخصية) اني اخذتها و كمت اسوقها ..
بالفاتحة مال ابوية كل عمامي جوي من عده عمي الوسطاني الي ضربني و ضرب امي اني وصغير .. سألت عمامي وينه عمي فلان .. كالو خلي يولي لا تجيبلنه طاريه .. كلتلهم بس فاتحة ابوية هاي غير لازم يكون حاضر .. اخوه مات شلون ميجي ؟؟
كالو اول شي احنا منحجي وياه و هو اصلا مسجون .. كلتلهم شلون و ليش .. كالو والله سمعنا من كرايبنه هو عاف الشرب و صار عدل و بطل مشاكل و تزوج و عنده بنات ثنين بعمركم ..
و دخل بشغله فلوس و انطلب و ما عنده يسدد و حبسه الي يطلبه .. كلتلهم ليش مساعدتو .. كالو احنا من خلانه نبيع البيت لليوم منحجي وياه .. وهالحجي كله سمعناه من اقربائنه الي بذيج المحافظة .. كلتلهم ورى الاربعين مال ابويه اروحله .. كالو احنا فلس احمر مندفعله .. كلتلهم ماشي و صدك والله ورى فترة رحت للمحافظة و طبعا اني مرايح قبل بس كل اقرباء ابوية بذيج المحافظة .. عرفوني اني ابن فلان و للامانة قامولي بالواجب و زيادة .. و دلوني على بيت عمي و رحت دكيت الباب طلعت زوجته .. طبعا حال الظيم حالهم .. صح عدهم اكل وشرب و الناس تساعدهم بس وضعهم كلش تعبان .. هالحجي كله اني مشايف بنات عمي .. و امهم صاحتهم كالتهم اجه ابن عمكم تعالو .. يابه يا يمه من شفت بنت عمتي الجبيرة .. غير عبالك الله دزني هالمسافة كلها حتى اشوفها و اتعلق بيها من اول نظره .. بس شفتها كلبي انشال من صدري و تحول يمها .. نسيت حتى اني علمود شنو جاي .. و صفنت عليها و سكتت لزمتني العبره .. حبيتها من اول ما شفتها والله العظيم .. ماعرف اللقاء جان مخربط ورى ما شفتها .. حتى كلامي صار سريع سريع ..
المهم  .. سالت شنو السالفة و افتهمت انو هو عليه فلوس و موقع اوراق مال سداد بس ممسدد .. و مبلغين عليه و المبلغ بصراحة جان جبير بس متوفر نصه عندي .. اني هالحجي كله مكلت لأمي راح اروح لهيج محافظة و اساعد عمي .. لان امي اذا تكره حتى اسمه .. و بس ينفتح طاريه تكوم تصيح و تغلط حتى عليا .. زين اذا اكلها رايح اساعده شراح تسوي !!!
عالعموم .. وصلت للرجال الي حبسه و طبعا جان عمي بالتوقيف بعده ممتحاكم و صارله فترة محبوس .. و قنعته انو انطي نص من الفلوس و بعدين نص .. ما قبل بالبداية بس حجاية منا حجاية منا قنع .. كلتله انته بهيج حاله راح تخسر كل فلوسك لان اذا انحكم عمي متقبض شي .. اقتنع و قبل بنص الفلوس كشكل مبدئي و بعدين اسددله شهريا مبالغ .. و رتبت وياه انو يتنازل و ورى فترة يطلع عمي .. رجعت لبغداد و حاولت افتح هالموضوع وي أمي بس مكدرت .. خفت من ردة فعلها و ابوية مصارله فترة متوفي .. بقيت اسوي هالامور بدون علم أمي .. و حتى من ردت منها المبلغ كلتلها اريد ادخل بسالفة شغل و ما دققت هواي …
و رحت انطيت الفلوس و تنازل هو عن حقه و عمي ورى فترة طلع من السجن و طبعا عرف منو دفع الفلوس و بده يتصل بيا .. للامانة الرجل متغير و هالفلوس الي صارت من وراها مشكلته مجان متقصد توصل الامور لهل المرحله و ينحبس لان بركبته عائلة و بنات ثنين كبار .. بس صارت بعد .. و رحت و التقيت بي و كام يبجي من شافني و كالي اني غلطت بحقكم هواي قبل بس والله مجنت اعرف ليش جنت هيج اسوي اشياء غلط .. و كالي اخوتي ميحجون وياي و يعتبروني سويت شي غلط بس والله اني مسويت شي غلط اني شفت الكل يكرهني لان اصلا اني جنت مكروه .. كلت خلي نبيع البيت و اروح بعيد منهم و لا ااذي احد ولا احد يأذيني .. و اعترف اني جنت غلط بذيج الفترة بس شسوي .. جيت لهنا كعدت بمشتمل وحدي .. و بديت اشتغل و رتبت الاثاث شوية شوية و رأسا تزوجت .. و طبعا بطلت كل المكسرات و فتحت صفحة جديدة بيني و بين نفسي .. و الحمدلله مسويت شي غلط ابد .. بس هاي سالفة الفلوس الي انحبست من وراها و هم مجانت مقصودة .. و سالني الف مرة بعدك شايل بكلبك عليا لان ضربتك هواي بطفولتك و ضربت والدتك .. كلتله لا يمعود شجلبت بالموضوع كل شي راح بوقته .. كالي والله جنت مكبسل .. و مجنت بوعيي .. و بصراحة هو متغير من السما للكاع .. كبران و مبين الدنيا لاعبة بي طوبه .. و ما قبل اني اسدد باقي الفلوس .. كال راح ارجع لشغلي واني اسدده .. كلتله لا اني وياك وياك .. مره انته مره اني .. و رجع لشغلة و مرت سنه واني اتصالي بي اقل شي بالاسبوع مرتين .. و هالحجي كله مثل مكلت امي متدري بي .. و ورى سنه ونص .. قررت افتح الموضوع وي امي و اكلها اريد اتزوج فلانه الي هي بنت عمي .. و هنا جانت الكارثة .. طبعا حجيتلها كل شي و هي كبت عليا مثل النار .. كالت لو عايفه يخيس بالسجن لهل النكس (مكرم القارئ) و كامت تغلط و تسب عليا لدرجة حلفت متحجي وياي لحد متموت اذا اسوي الي براسي (لان كلتلها اريد اتزوج بنت عمي) ..
و بقت زعلانه اسبوعين وياي و متحجي وياي و اختي يوميا تحاول تراضيها وهي متقبل .. و حتى اختي كالتلها ماشي عمي مو زين بنته شعليها .. بس امي قافله متقبل .. و اني بدت امثل هههههه سويت نفسي ما اكل و تعبت نفسيتي وعفت لحيتي تطول .. وهي ام اول وتالي لازم تنقهر .. و طبعا حصرت روحي بغرفتي بأتفاق وي اختي تجيبلي الاكل تهريب هههههههههههههه حتى امي متحس .. و اختي كامت تروح تحاجيها تكلها هذا راح يصير بي شي و شكله تعبان كلش .. عاد فاتتلي للغرفة كالت حجايتين و عافتني وراحت .. كالت ماشي قابله تتزوجها بس ابوها ميفوت بيتي للموت و اذا تريد تشوف ابوها (تقصد عالبنيه) توديها لبيتهم تشوفه بس لهنا ميوصل .. كيفت اني و طلعت حضنتها و تقدمت للبنية و رجعت علاقة عمامي وي عمي .. و طبعا اخذت خالي الجبير بيوم الخطبه و قنعته لان هم جان قافل من سالفة العركة القديمة .. و تقدمت لبنت عمي و تزوجتها .. جبتها للبيت و انوب انفتحت سالفة جديدة .. امي ٢٤ ساعة كالبه وجهها على زوجتي .. لا تحجي وياها هواي و لا تسولف وياها و زوجتي فقيرة لا تحل ولا تربط .. و بالمناسبة اني كلت لعمي امي بعدها شايله بكلبها و متقبل تجي عليكم ولا انته تجي علينا وهو تفهم السالفة و قبل ..
المهم .. بيوم من الايام عندي اختي غرفتها فوك .. دتنزل من الدرج و تزحلكت و انلوت رجلها و كعدت من الدوام فترة .. بكل هالفترة زوجتي تداري اختي و كل متفوت امي لغرفة اختي تشوف زوجتي كاعدة تدلك (تفرك) رجل اختي .. و حتى الدهن هي تدهنلها رجلها (يعني هي تداري اختي) من امي شافت هالشي شوية كلبها حن على زوجتي .. و بدت شوية شوية تغير لهجتها وياها .. و كامت تاخذ وتنطي وياها .. و حتى زوجتي مرة سالت أمي كالتلها ابوية لهل الدرجة جان مو زين وياكم .. عاد امي انفتحت بالحجي و كالتلها ابوج جان مو زين و حجتلها على مشاكله وعلى اليوم الي كسر ايدي بي و ضرب امي .. زوجتي كالتلها تدرين ابد ما شفته بيوم تعارك وي امي لو اجه للبيت شارب .. و كامت تحجيلها شلون هو جان مدللها و مدلل اختها لزوجتي و شلون جان يبجي من يشوف وحده بيهم مريضه .. امي عاد اقتنعت هو صدك متغير بس بقت مصره ميجي و لا يفوت للبيت ههههههه .. و شوية شوية كامت العلاقة تقوى لحد مجاني اول طفل .. عاد امي كالت خطية زوجتك متكدر تروح لبيت اهلها حتى يشوفون ابنك .. خابر عمك خلي يجي هو و بنته و زوجته يشوفوه هنا .. و جوي لبيتنا و هو بقى برى بالحر واكف .. خاف يدخل ههههههههههه .. طلعلته برى كلتله فوت عمي .. كال لا حبيبي خلي فلانه (على زوجتي يعني) تطلع هي و تجيبلي ابنك اشوفه هنا .. كلتله فوت .. كال لا عندي شغلة راح اعوفهم يمكم و اروح اكظيها و بليل اجي اخذهم و نرجع .. عاد دخلت جوى للبيت و كلت لامي هالحجي و كالت وخرررر و جان تطلعله بالماسحه ههههههه اني عبالي صدك راح تتعارك وياه .. جان تكله تفوت لا اكسر ايدك مثل مكسرت ايده هههههههه عاد هو ضحك و حضن امي باسها من راسها و كام يبجي .. كالها ما اعرف شحجي بس سامحيني والله مجنت بوعيي بذيج الفترة .. كالتله دفووووت جوى هسه مو الحر راح يموعك هههههههه .. و فات و الحمدلله انتهى الحقد من كل الاطراف و علاقتنه رجعت طبيعية بس بقت حسره بداخلي .. اتمنيت الي ديصير كله يكون ابويه حاضر بي .. بس الحمدلله على كل حال .. وهسه ما اكول غير الله يحفظ الي اهلي و يحفظ كل الناس من كل شر ..
(عمي)
انتهى
اخوكم ابو بغداد سايق التكسي
#ابوـبغداد