قصص عراقية حقيقية بقلم ابو بغداد سائق التكسي

ابو الجمسي

جان عندي جمسي بذاك الوكت .. الجمسي سيارة فخمة و قوية و جنت اشتغل بيها بس خطي محافظات مو دول … كلش جنت معتني بالسيارة و اخاف عليها … السيارة بأسمي مع العلم عمري صغير جان بذاك الوكت .. يعني ٢٤ سنة تقريبا … جنت مهتم بس بالشغل .. و اني اصلا احب اسوق .. يعني السياقة هواية و شغل ماخذها … روحي بالمسجل .. جان شكو مسجل ينزل جديد لو مميزات جديدة للصوت مثلا سماعة لو اي شي بي علاقة بالمسجل اروح اجيبه .. فد يوم عدنا مصلح مال مسجلات و تلفزيونات بمنطقتنا بس زين و يفتهم كلش .. صار عندي عطل بسيط بالمسجل ورحت يمه .. الرجال عليه ازدحام بس لأن العطل بسيط كالي افتحه للمسجل وجيبه .. فتحته و جبته و بقيت واكف يمه و هو بده يشتغل بي … كالي تشرب شي لان علاقتي بي مو بس تصليح .. علاقة اخوتي بي كلش قوية و صديقهم من الطفولة .. كلتله والله اذا اكو جاي ياريت .. هو مخلي جوى الميز  ترمز مال جاي .. صبلي كلاص و بقيت اشرب .. بنفس الوكت فاتت مرية وياها جاهل … كالتله كملت التلفزيون خوية ؟
كالها اي .. بس كلف اكثر من الي ببالج .. الظاهر المرية جانت مخلية فد سعر للتصليح بس التصليح صار اكثر سعرة .. المرية استحت و مبينه المرية بنت اوادم .. كالتله وهسه شلون .. كالها عادي اخذي و بعدين جيبي الي يبقى عليج .. كالتله زين .. طبعا التلفزيون مالتها من هذا الضخم و مو مال تشيله وحدها لان هيه ناعمة و ابنها صغير .. كالت زين ممكن بس تطلعه وياي للعربانة .. جايبه عربانة دفع .. اني و المصلح شلناه و حطيناه بالعربانة … تشكرت هيه من المصلح وانطته الفلوس الي وياها بس بقى عليها مبلغ بسيط كالتله على راس الشهر اجيبلك الباقي .. هو محجى شي و راحت المرية .. من طلعت المصلح كال كلمة وحدة .. كال مسكينة .. كلتله ليش خير شبيها … كال هاي بيتهم بظهر بيت خالي .. كلتله اي ؟
كال هاي قصتها قصة .. كلتله شبيها ؟
كال هاي كاعدة بمشتمل طابق ثاني .. جانت متزوجة واحد حقير (مكرم القارئ) و عافها بركبتها ٣ جهال و راح حب وحدة و ذيج اكبر سخيفة و سمعتها زفت قشمرته و تزوجها وطلك هاي بنت الاوادم .. وهسه تشتغل بالمستوصف الي بظهر الجامع و تعيل جهالها .. ويوميا مشاكل هيه وابو البيت يريد يطلعها لان يريد يزوج ابنه بالمشتمل .. وهيه خطية ماتعرف شتسوي .. كلتله وانت شلون عرفت ..
كال شبيك بيت خالي بظهرهم و مرة خالي تساعدها هواي وتعرف سالفتها … كلتله زين شكد بقى عليها مال التصليح .. كال هلكد .. كلتله هاك هاي مني و اذا جتي لاتكلها اني دفعت الفلوس كلها انت جنت مخربط بين تصليح تلفزيونها و تلفزيون ثاني ماشي .. كال ماشي خلف الله عليك .. و كمل المسجل و رحت .. رحت اغسل السيارة كبال بابنا ..
بس ماعرف كمت افكر بيها للبنية ..
بالمناسبة .. اني مومن بشغلة و هالشي متعلمة من ابوية (الله يرحمه و يرحم والديكم) ابويه جان يكول اي شي يصير كبالك لو ينحجي كبالك معناها مرتب .. يعني من جتي البنية و اني جنت موجود بنفس الوكت هالشي مرتب وليش المصلح كال مسكينة و حجى الموضوع كبالي مرتبه السالفة مرتبة ..
المهم..
سديت المي وعفت الصوندة وفتت لأمي جوى .. كلتلها يمه اكو مرية محتاجة مساعدة و اريد تساعديها … كالت يمه وين خطية .. كلتلها هيج وهيج سالفتها و تشتغل بالمستوصف وبركبتها جهال تلاثة .. امي انقهرت عليها .. احنا امكانيتنا زينة يعني الحمدلله .. اني على الوصف مال المصلح تقريبا اندليت البيت لان بمنطقتنا بس بغير مربع مو مربعنا ..
ثاني يوم امي تسوكت الها مسواك زين و حتى بوكتها كلتلها ليش ما اخذتي هدوم للجهال .. كالت خلي اروح اشوفهم حتى اعرف شكبرهم يا ابني و عالمرة الثانية اخذلهم هدوم .. كلتلها زين ..
اخذتها لنفس المكان المغربية و امي دكت الباب و فاتت .. امي لسانها حلو و مرية جبيرة و تعرف شلون تفوت بهيج مواضيع … من شفتها صعدت الدرج وي البنية اني ارتاحيت .. و شغلت المسجل بس وكفت بعيد عن بيت البنية لان اني رجال واعرف حجي الناس خصوصا بمنطقة مثل منطقتنا … امي بقت ساعة ونص فوك ونزلت .. البنية بوستها بباب البيت وامي هم بوستها و اني من بعيد بس شفتها لأمي نزلت شغلت السيارة و تقربت من امي اخذتها وطلعنا .. بس صعدت امي كامت تبجي … كلتلها شبيج يمه .. كالت لك لو تشوف بيتها و الجهال شلون شكولهم تقهر تبجي دم .. كلتلها ليش ؟
كالت لك مكسورين جهالها مكسورين و مكابيلن التلفزيون وكاعدين لك البيت فارغ يمه فارغ تعرف شنو فارغ مابي شي ..
بطرك الفراشات و الطباخ و ثلاجة رايحه بس كشر .. النذل ابوهم نذل لك اخر فترة قبل ميطلكها مشبعها بسط و كتل .. و هيه اهلها ناس على كد حالهم تكول اني لو اعرف اعيش بغرفة وحدة و اوكل جهالي خبز وبصل ما ارجع لأهلي لان اخاف على جهالي من اخوتي ..
اخوتها اعصاب و مشاكل و تخاف لاترجع ببيت اهلها جهالها يشبعون كتل و همه فقرا لك مو مثل جهال الناس يلعبون و يركضون و وكح ..
اوف شحجيلك يمه لك عبالك تماثيل مكابلين التلفزيون و كاعدين … و شطار بالمدرسة الاثنين الكبار شوفوني الاملاء مالتهم كله عشرات و انطيتهم هالقاسمة الله .. والصغير بعده ممسجل مدرسة .. لك يمه انت شسويت بيا ليش جبتني هنا .. طبعا امي تحجي واني لزمتني الخنكة لان امي من وصفتلي الحال حسيت روحي داشوف الي دتوصفه .. كلتلها يمه هاي امانتج بعد ..
كالت شتحجي انته هاي بنتي راح تصير و صارت اصلا بنتي و خلي ببالك حتى اذا اموت باجر عكبة البنية بركبتك .. كلتلها يمه عمرج طويل واني بهل الحجي جتي عدلة بعد حتى ابجي لان اصلا جنت مخنوك وامي كملتها كالت اذا اموت جان اوكف السيارة وحضنتي امي وبجيت .. كلتلها يمه ليش هيج تحجين فدوة اروحلج .. كالت يمه كلبي عصرني عالبنية لك صغيرة بكد اختك و تخيلت اختك يصير بيها هيج فدوة وليدي عينك على خواتك و عينك على هاي البنية ترى انت الوحيد بين اخوتك طالع حنين بعكسهم الباقين كلبهم شوية قوي … كلتلها خلص يمه بس فدوة لاتجيبين طاري الموت … و ثاني يوم امي راحت اخذت هدوم للجهال و رتبت وي مرية جوارينه عدها مشتمل انو تأجرلها المشتمل مال سنة ليكدام … و صدك والله رتبنا السالفة و حولناها يمنه بنفس شارعنه .. و امي دفعت مال سنة ليكدام الايجار .. جهالها خطية يوميا يمنا بالبيت وخواتي كلش حبوها للبنية  وحبو جهالها وكامت تجي يمنا .. البنية عمرها صغير بس الي يشوفها رغم وجهها الحلو و نعومة صوتها بس يحسها شايلة  كومة صخر على ظهرها .. تعبانة تعبانة ..
المهم … فد يوم جنت رايح محافظات يعني للشغل و رجعت .. لكيت امي وخواتي ملتمات وهيه البنية يمهم .. كلتلهم شكو شصاير لان الشكول مو طبيعية .. كالو هذا النذل اجه يريد يشوف جهاله عود و هيه سمعته حجي و ضربها .. طلع جاي النذل و مندل البيت الجديد عن طريق اهل البيت القديمين و علساس يريد يشوف جهاله .. هيه كايلتله المفروض متشوفهم لان بالجذب مجايبلهم شي .. هو متعصب و كاتلها .. وهيه بقت تصيح و ملتمين الجوارين بس خلف الله عليهم وابوس رجلهم قبل ايدهم مشبعي بسط و مطردي و كايليله اذا نشوفك بالمنطقة نذبحك والله … بيومها كلت لأمي هاي حلها بس شي واحد لان هذا راح يبقى يطلع بحياتها بحجة الجهال .. كالت شنو ؟
كلتلها نشوفلها واحد ابن اوادم و نزوجها .. كالت يمه مية مرة كلتلها تكول لا لان تخاف على جهالها كلش .. و بقت البنية هيج بس ابد مبطلت من الشغل رغم ما اهل المنطقة و احنا ممخليها تحتاج شي لا هيه ولا الجهال .. و مشت السنين و امي الف رحمة على روحها توفت .. و اني واخوتي كملنا الي امي بدت بي والي وصتنا بي .. امي وصتنا بالبنية و بخواتنا ..
وطبعا ولدها كبرو يدرسون و يشتغلون و همه متحملين مسوولية البيت و واحد بيهم يداوم كلية بس مصيبة هالواحد ههههههه احبه اكثر من جهالي لان اني هم تزوجت .. و صار عندي جهال .. ابنها الجبير سبع رجال يذكرني بنفسي لان هم سبع و غيور كلش على عرضه امه .. الحلو بالموضوع كله من يجون للبيت لو اشوفهم برى بالشارع شلون راجعين للبيت و صايرين زلم .. ومن اشوف الضحكة بعيون امهم الطيبة الشريفة .. هاي عندي تسوى الدنيا … خصوصا من اصفن على نفسي واتذكر اني جنت سبب بسيط ببناء هاي العائلة الطيبة الي صارت من عدنا وبينا … و ارجع واكول اني سبب بسيط و الفخر كله يرجع للمرحومة امي .. الف رحمه على روحج يمه اني متاكد هسه دشوفينا انتي و ابشرج يمه اخوتي طلعو كلبهم مو قاسي بس شوية جانت الدنيا لاهيتهم و هم وكفو وي المرية و وكفو وي خواتي و وياي و ماقصرو .. يمه مشتاقلج والله و اريد اكلج احنا بخير و المرية بخير و كلشي مشى مثل مردتي .. الف رحمه على روحج يمه ..
(ابو الجمسي)
انتهى
اخوكم ابو بغداد سايق التكسي
#ابو بغداد