قصص عراقية حقيقية بقلم ابو بغداد سائق التكسي

رعد

يوميا من ساعة تسعة للعشرة لازم واحد من عدنا يطلع يفتح باب الكراج لأبوية قبل ميرجع من دوامه ... جنا نخلي الباب مفتوح و نرجع نفوت جوى حتى من يرجع خطية تعبان مينزل  من السيارة .. وكبل يفوت السيارة للكراج .... اني واخوتي جنا اربعة ... بذاك الوكت ياهو القريب من امي تدزه يفتح باب الحوش ...
فد يوم جانو اخوتي ملتهين و جايبين اتاري (صخر) وكلهم بالطابق الفوك يلعبون ... اني الوحيدة جنت قريبة من امي ... بذاك الوكت جان عمري ٢٢ سنة ... جبيرة يعني ...
امي كالت روحي فتحي الباب قبل ميجي ابوج ...
احنا كراجنا جبير و عدنا حديقة هم جبيرة ... الجو بذاك الوكت جان خريف و الاشجار ذابه اوراقها و الهوى يلعب لعب بالاوراق مال الاشجار ...
طلعت فتحت الباب و رجعت فتت جوى وكلت لأمي عالاوراق بالكراج كومة و بالحديقة .. كالت باجر نسوي حملة عالكراج والحديقة اني وياج واخوتج ..
و بنفس الوقت الي امي دتحجي بي دك التلفون الارضي ..
ابوية خابر كال اني حتأخر لان سيارة ابو عمار (صديقه بالشغل) عطلانة و راح يروح يوصلة و يرجع .... وبيت ابو عمار بعيد يعني ابوية هو و ١٢ يوصل ..
امي كالت طلعي سدي باب الحوش لعد و بعدين نفتحها .. طلعت اني و بطلعتي سمعت خشخشة غريبة بالحديقة و تحديدا بالزاوية مال الحايط .. و المشكلة احنا حديقتنا هلكد ما جبيرة الاضاءة متوصل لنهاية الحديقة يعني ... و خصوصا يم المشمشاية ... الصوت عبالك حيوان او انسان ماعرف .. وبنفس الوقت الطلع بي الصوت  اني ردت اعوف باب الكراج واركض بس انصدمت واحد صاحني بأسمي .. سرى .. سرى ..
اني كلت منو بس بصوت عالي ؟
جان يكول بداعة امج لاتصيحين اني رعد .. ((رعد جوارينا بعد عن بيتنا خمس بيوت وامه صديقة امي ... وجان وياي بالابتدائية بس هو اكبر مني ... من كبر بطل من المدرسة و جنت مرات اشوفه صدفة)) ..
كلتله شدسوي بحديقتنا بس ابد مفكرت بي هو حرامي لان نعرفهم ناس طيبين و ماعدهم اذية على احد ..
كلتله شدسوي بحديقتنا !
جان يكول الحزبية يدورون عليا و اني فتت ركض منا وشفت بابكم مفتوح و فتت جوى رأسا .
كلتله ليش يدورون عليك .. كال مو هربت من العسكرية صار فترة ... كلتله اني معليا بهل الحجي انت شتريد هسه ..
جان يكول الله عليج لاتحجين لاهلج اخاف يطلعون برى و يشوفوني و تصير هوسة وانلزم ..
بصراحة انقهرت عليه بذيج اللحظة و عفته و مشيت فتت جوى ... مكلت لأهلي شي بس امي شافت شكلي اصفر سالتني شبيج ؟
كلتلها شفت بريصي عالحايط وخفت و صدك اني اخاف كلش من البريصية و الضفادع ..
ضحكت امي ورجعت تكمل الشغل الي بيدها بس اني بقى عقلي يم رعد .. وطبعا اني سديت باب الحوش بوكتها .. صعدت فوك لغرفتي و غرفتي جان الشباك مالتها يطل عالحديقة وبقيت اباع من ورى البردة و بصراحة ماشوف شي واضح لان ظلمة ... و فوكاها اخوتي يلعبون اتاري و يصيحون و مفتهمت شي ... نزلت جوى يم امي بس تفكيري كله يم الولد .. و مشى الوكت بس اني متأكدة جان طويل كلش عليا و على رعد .. لان  اني خفت وهاي اول مرة يصير بيا هيج موقف بحياتي ... و  متاكدة هو هم جان خايف ..
عالعموم ..
صارت ساعة دعش ونص تقريبا امي صاحت على اخوية يروح يفتح الباب .. اني كلتله اكعد اكعد اني حروح افتحها ردت بس اطلع اشوف شصار وي الولد ..
طلعت و لكيت بابنا مفتوح بس صفحة وحدة يعني هو راح .. فتحت الباب كله صفحتين و فتت جوى بس ارتاحيت .. لان خفت لا ابوية يشوفه وابوية كلش كلش عصبي و تصير مشكلة ..
و مشت ايام و مرة سمعت اخوتي يحجون بيناتهم على بيت ام رعد انو الحزب جان قبل كم يوم طاب عليهم لان ابنهم هارب (فرار) و سويت نفسي ماعرف شي و سألتهم منو ابنهم ؟
كالو هذا الي جان وياج بالمدرسة .. كلتلهم ليش هارب ؟
كالو اخوة يكول علساس هناك بالعسكرية اكو واحد نائب ضابط  لسانة محلو و دائما يغلط عالجنود .. غالط على رعد و جايب طاري امه و هو ممتحمل راجع غالط عليه وضاربه .. و انهزم حتى لاينسجن ..
و ورى فترة سمعت انو رعد انلزم و انحبس .. انقهرت بس ابد محجيت عالصار ...
وراحت ايام وجتي ايام و سمعت من اخوتي انو الولد طلع من السجن و علساس ابوه رايح لواحد عنده معارف ودافعله فلوس و مطلعه .. و خلص عسكريته و اشتري سيارة يشتغل بيها تكسي ..
اني بذيج الفترة جنت اداوم كلية اني و بنات ثنين من نفس منطقتنا .. و جنا ندور على خط يودينا ويجيبنا ..
امي كالت خلي اخوج يشوفلج واحد ثقة من المنطقة و بوكتها راح اتفاهم وي رعد و رعد قبل بالسعر و هو كام ياخذنا ...
هالحجي اني من ورى موقف الحديقة ابد مشايفته ولا حاجية وياه ابدا ابدا ابدا ..
و بدينا وياه بالخط .. جان التجمع يم باب بيتنا يجون البنات ثنينهم يم بابنا و يجي رعد بسيارته ياخذنا ونروح .. و يرجعلنا بنهاية الدوام ..
الولد جان محترم جدا و جان ياخذنا و يرجعنا للبيت بس كلمتين نسمع منا ..
السلام عليكم لو صباح الخير .. و اخر شي من ينزلنه يكول الله وياكم و يروح ..
ابدا مو من النوع الي يباوع بالمرايا لو يفتح مواضيع .. وجنا تلاثتنا نكعد ليورة وهو وحدة ليكدام ..
وحدة من صديقاتي مرة سألتني عليه لان هيه بيتهم مو يمنه و كالت اكلج هذا السايق متزوج .. كلتلها ليش ؟
جان تكول شكله صغير بس عبالك عمرة سبعين سنة .. صارلنه اربع اشهر وياه اشو من يصعدنا لحد مينزلنا لا حس ولا نفس ؟
كلتلها وانتي مكافي تكعدين لوك لوك لوك بالكلية و بالطريق ويانا فوكاها تريدين تحجين وي السايق هههههه .
كالت لا والله بس صدك ليش هذا هيج ؟
كلتلها ماعرف والله بس هالولد مرة صار وياه موقف ومحد يعرف بهل الموقف بس اني وياه ..
صديقتي فضولية كلش كالت شنو هاااا شصاير حب وحبانية كلتلها لج ياحب وحبانية غير شي بس اهم شي تحلفين متحجين لأي بشر ..
رأسا حلفت .. و اني حجيتلها عالصار و كلتلها هو من ذاك اليوم لهل اليوم محجيت وياه ابد غير بس سلام من بدا ياخذنا بالخط ..
كالت هاي شنو بالجذب حتى مكالج شكرا ؟
كلتلها لا والله .. جان تكول هو يعرف شكلج اخاف ناسيج ؟
كلتلها دولي لج اكلج جوارينا و جنت وياه بالابتدائية وكلتلج بيوم الي جان خاتل بحديقتنا صاحني بأسمي ..
جان تكول اي والله نسيت ..
و ثاني يوم جان عدنا دوام و بطريق الرجعه كامت تحجي مباشر وي السايق .. واني اكرص بيها قوي ... كالتله انت شعجبت مكملت دراسة ؟
كالها والله اختي اني احب الشغل اكثر .. و رأسا سالته انت خلصت عسكرية ..
الولد رأسا ضحك كالها خلصتها بالكوه وخلف الله عالوالد ساعدني و طلعني من السجن .. جان تكله بس الوالد ؟
الولد ذكي كالها مفتهمت ؟
كالتله يعني محد مساعدك بس ابوك واني من كاعد تحجي وياه اباع عليها و مخنزره عليها و اكرص بجتفها ..
جان يضحك رعد و كال اكيد اكو هواي ناس وكفتلي وساعدتني و هاي بنت الخير الكاعدة بصفج هم مرة وكفتلي وكفة متنسي ابد (يعني هو افتهم اني حاجية لصديقتي) .. اني جانت عيوني على صديقتي و وجهي عليها و جاوبته كلتله الحمدلله انو طلعت منها سلامات ..
بس شنو زعلت وي صديقتي زعل من صدك و ثاني يوم مكعدت بصفها خليتها هيه تكعد ورى السايق وصديقتنا الثالثة بالنص واني من الصفحة الثانية .. و ورى كم يوم تصالحنا اني وصديقتي و الولد رجع ميحجي كالعادة ..
و فد يوم جانت وحدة من صديقاتي ممداومة و رحنا بس ثنين .. و انتهى الدوام و اني رحت للساحة صعدت بالسيارة و بقينا ننتظر صديقتي المداومة تجي حتى نرجع ... بس صديقتي تعطلت بيومها ..
هو حجى وياي و كالي تصدكين اني جنت منتظر هيج لحظة حتى اشكرج ..
كلتله مو شكرتني ذاك اليوم ..
كال اني اعرف انتي حجيتي لصديقتج وهيه مبينة ام لسان ومتضم شي وحجت .. بس اني كل مرة اريد اشوفج وحدج حتى اشكرج بس مصارت ابد ..
اني هواي اشكرج عالموقف القديم .. بيومها اني اول مرة ارفع عيوني بوجه رعد واشوفه زين .. وهو اول مرة هيج يباوع عليا وجه لوجه ..
بصراحة خجلت كلش و هو هم خجل بس من يومها هو كام يباع عليا بالمرايا و يبتسم بدون ميحسون البنات الي ويانا بالخط ..
و مرة انصدمت من رجعت للبيت انو امه جانت يمنا و طلعت مفاتحة امي هو رايدني ..
و سألتني امي و اني كلتلها اقبل بشرط .. يخليني اكمل كليتي و اتخرج ..
و ابوية هم مجان عنده اعتراض لان الناس صدك طيبين و الناس بالمنطقة تحلف براسهم ..
و انخطبت و تزوجت و تحولت ببيتهم كعدت ... الولد حباب و عاقل كلش .. و حتى تعاملة وي اهله واخوته كلش محترم ..
واهله شالوني على راسهم .. و رجعت للدوام بس تحولت من الكعدة ورى و كمت اكعد ليكدام بالخط لان زوجي هههههه ..
وجان حبيبي يتشاقى وياي يكلي شلون تورطت ورطة .. اكله شنو ليش ؟
يكلي بعد ما اخذ منج فلوس خط شهريا ههههههههههه ..
و راحت ايام وجتي ايام و جبت ولد ثنين من عنده وتخرجت بس متوظفت لان  هو حالته المادية كلش تحسنت بعد مباع السيارة و اخذ هو و اخوة الجبير تريلة و شغلة كلش زين صار ...
كام يطلع محافظات و يبقى مرات تلث ايام برى البيت و هالشي كام يسوي مشاكل بيني و بينه ... و كمت من يروح هو للشغل اروح لبيت اهلي اني والجهال ... ومرة  زعلت من عنده و ياريت مزعلانة ...
راح للشغل و مرجع بعد ..
صار حادث و السيارة انكلبت من الجسر و توفى المسكين ..
بيومها ردت انتحر وحسيت كل الي صار من وريا ولهذا اليوم اني الوم نفسي ...
رعد جان فقير و يحب جهاله كلش ... يحب جهاله ويحبني و يحاول دائما يساعد الناس .. وهسه كل مينجاب طاريه يترحمون الناس على روحه و يكولون شكد طيب ...
اني جنت اقرب انسانة من عنده ..
جانت امنيته الجهال يكبرون و ياخذون شهايد وميشتغلون وميتعبون مثل ما هو تعب ..
و خطية ورى متوفى عرفت هو جان مشتري كاع وبادي يبني بيها و جان مسويلي علساس مفاجاءة من يكمل المشتمل يشوفنياه وهالحجي اخوه حجاليا ورى متوفى لان الكاع صارت حق اطفالي ..
و رجعت عشت وي اهلي و نذرت روحي لجهالي و توظفت و طلعت فكرة الزواج من راسي لان كلبي ميحب غير رعد ..
الف رحمة على روحة ..
(رعد)
انتهى
اخوكم ابو بغداد سايق التكسي
#ابوـبغداد