قصص عراقية حقيقية بقلم ابو بغداد سائق التكسي

ثائر

اخوية من استشهد بحرب ايران زوجته و جهالها بقو يمنه بالبيت … اني و اخوتي الباقين ربيناهم للجهال … و هي البنية مربايه و بنت اوادم مقبلت تروح لبيت اهلها و رغم ما امكانيتنه جانت مو كلش قوية ..
كالت اني من تزوجت ثائر تزوجته لان حبيته و من جيت لهل البيت حبيتكم كلكم و صرتو اهلي .. و ما اعوفكم للموت و جهالي ميكبرون الا هنا بنفس البيت الي ابوهم كبر بي و ذكرياته بي .. و ما الكه احد احن على جهالي بكد عمامهم  و وياكم عالحلوه و عالمره و حتى لو عشنا ناكل خبز و ننكعه بمي هم قابله  ..
احنا اول فرحتنه بالبيت جان ثائر .. هو اول واحد تزوج بينا و اول واحد صار عنده اطفال .. بقت ويانه و الجهال كبرو بنصنه ..
طبعا بمرور الوقت احنا الرياجيل الي بالبيت شغلنه جان يتحسن بمساعدة الناس الطيبه .. و الحمدلله ما خلينه جهال اخونه محتاجين شي .. كبرو و مرت السنين بسرعة .. بهل السنين احنا تزوجنه و صار عدنا جهال هم .. بنتي الجبيرة زوجتهه لحمودي ابن اخويه الشهيد .. حمودي الجبير و هو الحمدلله مهندس و عنده هم شغل خاص بي و امكانيته الحمدلله زينه …. و الاصغر منه جان ممتزج  ... لان يريد يسافر … و احنا كل فترة نكعد نحجي وياه و يبطل و يشيل سالفة السفر من راسه و هم ورى مدة يرجع يحجي بالسفر … و هم عنده وضعه الخاص بي بس هو ممخلص دراسة يعني وصل للاعدادية و بطل واحنا عمامه مضغطنه عليه … طبعا همه يحبونه لدرجة يعتبرون كل واحد من اخوتي ابوهم … احنا ٣ رياجيل جنا بالبيت من عده ثائر الشهيد (الله يرحمه و يرحم والديكم)  … واحد من عدنا عزل كعد وحده .. بس يوميا يجينا للبيت لان بيته قريب .. واحنا ثنين بقينا بنفس البيت .. البيت جبير الحمدلله و كبرناه هم و سوينا طابق ثالث .. حياتنه عاديه و خاليه من المشاكل … بنتي انسعدت وي حمودي و جابولنه اول حفيد للبيت ... ثائر … سموه ثائر على اسم اخونه الشهيد … و طبعا شغلنه زين و امكانيته هم زينه .. و ولو هالحجي مينحجي بس لان القصة كتابة و مابيها ذكر اسماء حقيقيه .. الحجي الي راح احجي ميعتبر رياء و لا تقليل من قيمة الناس الي راح اذكرهم .. بيوم من الايام ابن اخويه الثاني الي براسه فكرة السفر .. اجاني كالي عمي اكو عائله محتاجين مساعده … كلتله شنو نوع المساعدة الي يحتاجوها فلوس ؟؟
كال لا .. بيتهم تعبان كلش و يرادله ترميم و خطية حتى شبابيك مثل الناس ماعدهم .. كلتله سهله اني و عمامك و اخوك و حتى انته نتشارك و نرتب بيتهم .. كيف كلش و صدك والله طلعنه للبيت الي حجالنه عليه .. البيت صغير بس تعبان كلش و الاثاث الي بداخله هم تعبان .. و العائله الي ساكنين بالبيت بنات ثنين وامهم … ابوهم متوفي .. من شفت الحاله تذكرت زوجة اخويه من استشهد رجلها .. الحمدلله احنا جنا موجودين و ماخليناهم يحتاجون شي .. بس هالعائله ماعدهم احد المساكين .. والله العظيم الدمعة نزلت من عيني .. و بديت اني و ولد اخويه نرتب البيت .. بس جان عدنا مشكله وحده .. لازم ندبر مكان (وقتي) للعائله حتى يسكنون بي لحد منكمل البيت .. و حاجيت النسوان بالبيت ( ام حمودي و زوجتي و زوجة اخويه) كالو مترهم نجيبهم هنا لان عدنا شباب و بناتهم كبار … بس خالة زوجة اخويه جبيرة بالعمر و كاعده بس هي و ابنها الجبير بالبيت .. حاجيت الولد كلتله تعال فترة يمنه و خلي هالعائلة يجون يمكم و طبعا حجيناله ظرف العائله و الرجل ما قصر .. كال مدام فعل خير اني خادم .. و اجه يمنه للبيت و بقى كل فترة الترميم و التعديل ينام بالصاله ..و ابن اخويه ينام يمه .. و هم شارك ويانه بالترميم  و الترتيب .. المشتمل مالتهم شكله تغير جذريا .. و جبنالهم اثاث مرتب … و حتى اكو ناس من معارفنه من سمعو السالفة من زوجتي و زوجات اخوتي هم كام كل واحد بيهم يجيبله شغله و يخليها ببيتنه و احنا نوديها .. الي جاب مبردات ثنين و الي جاب مجمده و الي جاب ثلاجه و اكو بيهم يسألونه شنو النقص .. نكلهم فلان حاجه هم يجيبون … البيت انترس غراض و كل الغراض القديمة ذبيناها لان متجيب سعر اصلا .. تعبنات كلش .. و كملنه البيت … و بيوم الي جبناهم للبيت جنت واكف بس اريد اشوف شغله وحده .. ردت اشوف شكل الام من تفوت للبيت ورى ما غيرناه .. ردت اشوف ردة فعلها … و الحلو بالموضوع .. كل نسوانه جوي ويانه بيوم تسليم البيت … كلهم يريدون يفرحون هالعائله المسكينه … و حتى نسوانه جانو مسويات غده جماعي .. لان البيت انترس .. عائلتنه كلها بالبيت .. و دخلت المريه لاول مره لبيتها بعد ما رتبناه … بجت بجي مشايفه بحياتي .. و تكول اني دابجي مو لان البيت ترتب و صار عدنا كلشي … لان هاي الامور كلها مراح تفيدني لان اني ساعاتي بهل الدنيا منتهيه .. بس اهم شي بناتي يرتاحون ..والله بناتي مشافو راحه من يوم ابوهم توفى لليوم … و ما الوم عمام البنات لو خوالهم .. لان همه هم وضعيتهم تعبانه .. بس هالبنات مخلو شي مشتغلو .. خياطة و خبز و حتى طبخ .. بس خطيه مكاعد يستمرون بشغله لان كل شغله يبدون بيها مره مرتين يبيعون وراها يوكف شغلهم .. و اني اخاف اشغلهم برى البيت .. لان لاتشوفوهم كبار ترى كل شي ميفتهمون بهل الدنيا و اخاف احد يقشمرهم ……… طبعا هي تحجي و اني جنت انتظرها تكمل حجيها لان ركزت على جملة وحده .. كالت ساعاتي معدوده .. من كملت حجيها كلتلها اختي احنا اخوتج و هذوله ولدج و بناتج و هذوله خواتج (على زوجتي و نسوان اخوتي) .. و عمرج طويل ان شاء الله .. كالت ليش ابنك مكالك .. (تقصد على ابن اخويه ثائر) عبالها ابني .. كلتلها لا والله .. خطية طلع عدها ذاك المرض (بعيد الشر عن القراء) … من سمعت هيج شكد جنت فرحان بفرحتها و بفرحة بناتها … بس عبالك ضربتني سجين بگلبي .. و طلعت برى صحت ابن اخويه .. گلتله شوف راح ارجع افوت جوى بس اي كلمه لاتحجي .. كالي شكو عمي ؟؟
كلتله راح اخطبلك الجبيره … وماكو فرصه احسن من هاي الفرصه كلنه متجمعين والكل فرحانين .. كالي خلص عمي .. كلتله بس سالفة السفر ديربالك بعد .. جان يبتسم و ابتسامته مبينه مال واحد مكيف بلي ديصير .. طبيت بست المرية من راسها وكلتلها مدام اليوم فرحانين و الكل مجتمعين هنا .. اني اريد منج طلب و ماريد ترديني .. كالت كول خويه شردك .. ياريت اكدر ارجع جزء من الي سويته وياي و وي بناتي … كلتلها اني بهل الدنيا الله رزقني باكثر من ابن .. ولدي من زوجتي و ولد اخويه ثائر … واحد منهم الجبير زوجته و جابلنه ثائر .. و بقى واحد بس .. هذا الي دتشوفي .. اريد ازوجه .. و بنتج ما الكه احسن منها لأبني .. خلي نسوي الفرحه فرحتين و قبلي ؟؟؟
جان تقبل و النسوان كلهم الي جانو قبل دقائق يبجون .. كلهم كامو يهلهلون و يصفكون .. و الفرحه صارت فرحتين .. والله العظيم اباوع بالوجوه شفت بنصهم ثائر .. شفته واكف بنصهم يباوع عليه و يبتسم .. عبالك يكلي ما قصرت وي جهالي و وي زوجتي و ما قصرت وي هالناس … حسيت ثائر رجع بهل اللمه .. و الحمدلله الله وفقنا و تمم كل شي على خير .. و هسه منتظرين الحفيد رقم ثنين .. و طبعا ام زوجة ابني ماشيه بالعلاج و الاعمار بيد الله .. و هسه اني اكول .. هسه اذا الله اخذ امانته .. مراح اخاف مثل قبل .. لان قبل جنت اكول اذا صار بيا شي لو بأخوتي منو راح يبقى لزوجة ثائر و منو يوكفلها .. و بنفس الوقت هالعائله الي ساعدناهم صار عدهم رجال .. واحنا هم صرنالهم اهل .. يعني هسه اذا متت … اموت و ما افكر و اخاف على جهال ثائر لو على هالعائله .. و حتى ام البنات اذا توفت مراح تخاف على بناتها .. لان بناتهم صارو بناتنه واحنا اهلهم .. و الاهم من كل هالشي .. هي المساعدة .. مثل ما احنا قبل ناس وكفتلنه و ساعدتنه ببداية حياتنه (اذا بالشغل .. واذا بالوظيف) احنا هسه لازم نوكف لغيرنه .. والحمدلله على كل حال .. و ان شاء الله ميبقى محتاج على وجه الكاع ..
(ثائر)
انتهى
اخوكم ابو بغداد سايق التكسي
#ابوـبغداد