قصص عراقية حقيقية بقلم ابو بغداد سائق التكسي

قسمتنا

الحصيرة الي جنا نكعد عليها جانت بيها الوان … هي نايلون .. و بيها اشكال هواي .. دوائر و مربعات و مثلثات … من جنا نتربع عليها اني و اخوتي جانت تطبع مكانات برجلينا تصير حمره … جنا من نكمل اكل نضحك على الاشكال المطبوعة على رجليناتنا … جنا على كلشي نضحك .. حتى مرات جنا نخلي بالصينية  دعبله و نفرها .. بالحافة مال الصينية تفتر و تطلع صوت .. على هالصوت هم جنا نضحك … و احلى لعبة عدنا هي الصوندة مال مي .. كل ظهرية نطلع للحديقة نترس الطشت مي و بالدولكة نشمر واحد عالثاني .. حتى بليل قبل مننام هم نضحك … و امي من تصيح نامو … نسكت و بعدين واحد منه نسمع منه ضحكة مخنوكة هم نضحك مثله …. و امي جانت تضحك ويانا وتكول مخابيل … بيتنا جان عبارة عن مصنع للضحك و الابتسامة … احنا تلث ولد بالبيت و امي وابوية … مجان اكو شي يسكت فرحنا لو يمسحه … الشارع كله يعرفنا .. مماذين احد ولا احد يأذينا .. امانينا جانت بسيطة .. و ماعدنا تفكير لشي اسمه مستقبل .. طوبة حتى لو نايلون جانت تفرحنا .. بايسكل تلاثتنا بي جان يخلينا طايرين بالسما .. قوطية متروسة دعابل اهوووو هاي احلى شي … ماكو لعبة مجربناها .. ماكو ركضة مركضناها … جانت الدنيا بسيطة .. و جان اسبوعنا محصور بالكارتون و بسينما الصغار و اللعب برى البيت لو بالبيت … مدرستنا شطار بيها .. لان اكو حماس بالموضوع اسمه (الي ينجح ابونا يجيبله هدية على حسب الطلب) … مجان اكو بيناتنا اي مشاكل … كلب على كلب .. و مشت الايام واحنا نفس شي … العدد جان خمسة .. تلث ولد مثل مكلت و اب وام … بمرور السنين العدد جان ثابت بس كبرنا … دخلنا متوسطات و خلصناها و دخلنا اعدادية وهم خلصناها و الجبير تخرج و توظف و اني و الاكبر مني الوسطاني جنا بعدنا ممتخرجين …. المنطقة كلها تحبنا لأن ماعدنا مشاكل ... علاقتنا جانت بس بيناتنا حتى عركاتنا جانت بيناتنا … و فترة و تخرجنا اني و الوسطاني … توظفنا كل واحد حسب شهادته .. ورى دوامي بسنة توفى ابوية و جانت نكسة كلش قوية النا بالبيت … تأذينا كلش و امي انهد حيلها … الضحك قل .. بس جنا نحاول نضحك امنا لان المسكينة تعبت نفسيتها اكثرنا … و مشت الايام و بنعمة النسيان كدرنا شوية نتخطى هالمرحلة بس هو عايش جوانا … و ورى فترة من وفاة ابوية …. اخوية الجبير تزوج و زوجته وردة مال الله .. دارت امي كلش و امي شوية ارتاحت وياها لان يسولفون دائما و يضحكون .. و طبعا ورى زواج اخوية بدلنا بيتنا اخذنا بيت اكبر … و ورى زواج اخوية الجبير اخوية الوسطاني هم تزوج … و هم زوجته حبابة و اخذها اصلا عن حب … البيت رجعت بي الضحكة و امي رجعت تضحك و تغيرت نفسيتها من اجاها اول حفيد .. اني الوحيد بيهم بقيت ممتزوج … و رجعنا مثل قبل نضحك و خصوصا على سوالف ابن اخوية .. جان المدلل عدنا … و فد يوم هاليوم ما انساه ابد هاليوم جان بداية النهاية اليا  …
لان جان يوم اسود بحياتي .. جنت طالع للدوام و رجعت لكيت البيت بي هوسة .. اني كل توقعي امي الي توفت و كلبي لزمني و خطواتي ثكلت …  وصلت لباب البيت الخوف و البجي مالكني ملك … و ادور بوجوه الواكفين على اخوتي حتى اسألهم لان خفت أسال الواكفين .. و اكو رجال جبير جوارينا جرني على صفحة و بده يحجي و يكول الانسان و قدره اني كلتله عمي اكطع كل الحجي و كلي من الاخير امي مو ؟؟
كال لا اخوتك ثنينهم … الصدمة جانت قوية لدرجة تخربطت اني و كمت اشيل بالتراب و اطش على راسي .. هذولة اخوتي و عقلي وكف .. عقلي كام ميشتغل من الي صار … بديت اصيح بأساميهم .. و فتت للبيت لكيت امي تبجي و النسوان يبجون انوب ابنة الصغير المدلل يبجي ميعرف شنو الموضوع …. اني ماعرف شسوي اسكت امي اسكت النسوان اسكت العالم … انفجار صاير بذاك الوكت وهمه كلش قريبين عليه و استشهدو … والله اخوتي لا عدهم مواضيع سياسيه ولا عدهم حتى مواضيع طائفية او تعصب ديني و لا حتى عدهم حتى كره لأي شخص بهل الدنيا … جانت امانيهم بسيطة انو نعيش بسلام و بس … من راحو اخوتي اني صرت رجال البيت و لزمت المسوولية … امي مطولت ورى استشهاد اخوتي ٨ اشهر و توفت … بقيت اني ونسوان اخوتي بالبيت و طبعا مترهم السالفة .. يبقون يمي .. واني اصلا ممتزوج .. رجعتهم لبيت اهلهم و بقيت وحدي بالبيت … بس هالشعور هذا بالوحدة محد مراح يفتهمه الي عاشه و خصوصا اذا عاشه مجبور .. لان اني انجبرت اعيشه بعد مفقدت ابوية بالبداية و وراها اخوتي ثنينهم و وراها امي و اخير شي فقدت نسوان اخوتي  و فقدت هم ابن اخوية الصغير هم .. عشت على ذكراهم بالبيت و المصيبة اني علاقات شبابية ماعندي لان جانت كل علاقاتي مرتبطة بأخوتي .. كمت مرات اكعد بالبيت و ابجي واتذكر شلون جنا نلعب دعابل واحنا صغار بالصالة و امي تجي ترزلنا و تصيح علينا و تضم الدعابل بالطاسه الي عالثلاجة .. و جنا ننتظرهم تحجي بالتلفون وي خالتي حتى نجيب كرسي و نصعد اخونه .. يمد ايده بالطاسه يطلعلنه الاوراق مال كهرباء وصولات  لان امي تحطهم هم بالطاسه الفرفوري الي عالثلاجة ههههه و يكولون هاي تريدون بس بصوت ناصي هههه واحنا نضحك و نكله الله عليك جيب الدعابل خلي نكمل لعب … و من يجيبهم ننهزم ركض برى بالطرمة نكمل لعب .. اني من اتذكر ابجي واضحك و احجي وي اخوية ومرات اغلط عليه اكله شكد حقير هههه هيج بيني و بين نفسي اتخيل الموقف كله و اعيشه عبالك و ارجع بالطفوله ليورى .. و بعدين تمر عليا نسمه هوى .. هاي من واحد يكون عركان و كصته حاره يضربها هوى بارد عبالك يصحي .. وارجع للواقع و اعرف انو اني حاليا وحدي بالبيت و ماكو احد عندي كل اهلي بالمقابر نايمين … مكدرت اعبر هالواقع بسهولة .. لان صعب .. صعب بعد مجان بيت جبير متروس ضحك و ناس وهوسة و جاهل .. بلحظه يفرغ ؟؟؟؟
بلحظه كلشي يصير ذكرى ؟؟؟
بلحظه اني كاعد وحدي واهلي ماكو يمي .. يمه وينج فدوة اروحلج … يمه والله احبج و احب ابوية .. ابوية وينه زين اخوتي وينهم ؟؟؟
المن اسأل بعد وينكم .. بقيت وحدي مكابل الحياطين الي صبغناها سوى تتذكرون ؟؟
تتذكرون شكد تشاقينا من جنا نصبغ و نطشر صبغ على هدومنه … هسه اني مكابلها للحياطين و كاعد عالتخم الرصاصي القديم الي امي مقبلت تبدله ولا تبيعه تكول ابوكم جان يحبه .. زين وينه ابويه وينه امي ؟؟ استغفر الله …
بقيت على هالحال مدة طويله .. الى ان قررت اني اطلع من هالوضع و طلعت .. رجعت للدنيا بس رجعت مكسور .. والله نسيت شكل الضحك و شكل الابتسامة .. حسيت ماكو شي يستاهل اضحك لو افرحله بعد .. لان خسرت كلشي .. خسرت كلشي .. و رضيت بالقدر و كملت حياتي .. هالحجي قديم ومر عليه كم سنة .. طبعا لهيت روحي بالشغل .. و الوظيفة .. جنت احاول اساعد الناس بحكم وظيفتي .. كمت ارتااااااااح من مرية جبيرة تجيني على معامله و حتى لو عدها نقص امشيلها السالفة حتى بس اخذ منها كلمه وحدة .. رحم الله والديك … لو الله يرحم موتاك … والله والله والله .. ابتسم ابتسامه عريضه من تكلي هيج عبالك منطيتني قصر من ذهب .. اكو موظفين وياي ياخذون رشوه و خلي اكون واقعي و هالكلام لازم يكون حقيقي .. اكو ياخذون هواي و الله يسامحهم معليا اني بغيري .. اني حالي حالهم .. بس همه ياخذون فلوس اني اخذ رحمه و دعوى حلوة من لسان مرية جبيرة لو رجال جبير لو حتى بنية لو ولد .. مو مشكله منو يدعيلي لأهلي بالرحمه .. المهم اسمعها و اكيف .. و سبحان الله .. اني وظيفتي مرتبطة بعامة المواطنين .. و التقي بيهم يوميا .. اكو مرية جبيرة والله تخيلتها امي و ساعدتها بالمعاملة .. و كمت اتردد عليها للبيت لان وضعها المادي (جان) كلش كلش تعبان .. حجيتلها قصتي كلها .. جانت تضحكني و تحاول تطلعني من حزني من جنت اسولف .. و يومي صار يكمل بوجودها .. عرفتني على بنية كرايبهم هم قصتها قصة المسكينة .. البنية ابوها متوفي و هي وامها يشتغلون حتى يطلعون مصرف البيت و الايجار .. البنية وامها عدهم بسطية مال مخضر يطلعون منها عيشتهم .. تزوجتها رأسا .. و الحمدلله الله رزقني ببنية .. و عايش هسه مرتاح و مناقصني كلشي .. بس مستحيل اكول مرات من اصفن ما ابجي .. ابجي .. بس زوجتي الله يخليها هي الي تطلعني من هالشي .. عالعموم اني اعرف هواي اكو ناس بالعراق مثل حالي .. بس شنسوي هذا قدرنا وهاي قسمتنا نعيش هيج …
(قسمتنا)
انتهى
اخوكم ابو بغداد سايق التكسي
#ابوـبغداد