بالحلاقة جانو يجون يكعدون يمي اشكال والوان شباب ... بس الاغلبية ولد المنطقة ... يجون يكعدون يدخنون لو يسولفون و يروحون ... اني جنت بنفس الوقت حلاق و اجيب ملابس رياضية و ترانشوزات (مكرم القارئ) ابيعهم و استرزق منهم ... و جنت هواي احب الطوبة يعني شكو لعبة تصير بالساحة بين الفرق الشعبية اروح اشجع و اباع عاللعبة ... اعزل المحل ساعتين وارجع ...
من ضمن الشباب الي يجون يكعدون يمي بالمحل اكو ولد جان يجي يمي ويوميا يكلي علمني حلاقة لان اريد اتعلم صنعه و ميصير ابقى هيج .. و كل مرة يحجيلي على وضعه المادي و بصراحة اني جنت اعرفه يحب الملابس الرياضية مرات انطي تيشرت لو ترانشوز و هالشي اسوي بس بيني و بينه حتى ميخجل كبال الشباب ... الولد حبيته و قدرت وضعه المادي و كلت بيني و بين نفسي مسكين هالولد خلي اعلمه حلاقة و يسترزق وياي ... جبته كعدته و فهمته شلون يلزم الشفرة و شلون يلزم المكص و شلون يشتغل بالمكينة و كعدت اعلمة والله العظيم عبالك ابني مو صديقي .... بالبداية جنت اخلي ياخذ خيط لو شوية يسوي تحديد لحد مخليته هو يزيني ... خليته يصير حلاق درجة اولى واذا اكول وصل مرحلة يكون احسن مني و ابد مو مبالغة .. الولد جان يتعلم و بسرعه .. يعني حاب الشغلة كلش ... بذاك الوكت جان اكو بس كراسي ثنين بالحلاقة .. صديقي الي يشتغل عالكرسي الثاني اهله شالو من المنطقة وخلص بطل .. كلتله خلص انت استلم هالكرسي وانطيني ربع من فلوس الشغل والباقي كله الك ... هو مصدك لان مستحيل اكو هيج عرض ... كيف خطية و بدى بالشغل .. بس مثل مكلت طلعته حلاق درجة اولى ... اشتغل و كام يلزم فلوس بيده و كام يشتري ملابس حلوة و كام يعزمني هههه اني جنت اكيف من اشوفه كاعد يتطور و حالته المادية تتحسن .. جنت اتخيل نفسي مثل الاب من يشوف ابنه ينجح و ينجح .. والله هيج جنت احس وياه ...
وفد يوم صار شد بالحجي علمود لعبة مال طوبة ... اكو شباب كاعدين بالمحل و كلهم ركزو على حالة معينة بس اني جنت معارضهم .. و مثل مكلت جان النقاش عالطوبة ...الولد صار ضدي بالنقاش بس بعصبية جان يتناقش .. و شوية كام يعلي صوته .. و كال انت متفتهم الي صار بالضبط ..
اني جنت دازين واحد من سمعته هيج كال وكفت شغلي و باوعت عليه ... كلتله اول شي علكيفك احجي و لاتصيح وشي ثاني خلص خلي ننهي الموضوع .. و سدينه الموضوع بس الشباب الكاعدين حسيتهم يأشروله و كمت اباع عليهم بالمرايا مال حلاقة لان المرايات عندي بالحلاقة تكشف كل الكاعدين ورايا ..
شفتهم يأشروله خلي نطلع بره .. هو باوع عليا وكال اني حروح لان عندي شغلة لازم اسويها ... عاد طلع و الشباب وراه ترخصو مني وطلعو كلهم ...
اني كملت الولد الي داحلق بي و كعدت انظف الشعر من الكاع جان يجي هو ... بس اجه ضايج و معصب .. جان يكول انت ليش تخجلني كبال اصدقائي ..
كلتله منين اجوي و صارو اصدقائك هذولة قبل متجي انت للمحل جانو يجون هنا وانت اصلا تعرفت عليهم هنا ... جان يكول المهم يعني اصدقائي و اني صح اشتغل يمك بس مو معناها تغلق موضوع بكيفك و تفتح موضوع بكيفك ..
اني ابتسمت بوجه كلتله انت صدك تحجي ؟
جان يكول اي و اني ماريد اشتغل بعد هنا وشكرا على كلشي و عافني وطلع برى ...
اني بقيت واكف بمكاني و تذكرت شلون جان قبل و شلون هسه صار ..
بس هم ماكرهته و كلت عادي يوم يومين و يرجع ..
بس راح اليوم و راحو اليومين والولد ماكو ...
و فد يوم اجه ولد يزين يمي جان يكلي اكلك فلان شنو مبطل من يمك ؟
كلتله اي زعل مني و بطل هسه يوم يومين يرجع ..
جان يكول شيرجع يمعود اني سالتك لان شفته يشتغل يم فلان ..
كلتله لا بربك ؟
جان يكول والله بالصدفة انتبهت عالحلاقة وشفته هناك ..
كلتله خلص بالخير عليه ...
و راحت ايام جتي ايام بس هو ابد لا رجع و لا اجى ولا حتى من يفوت يسلم .. واكثر من مرة تصير مواقف و نلتقي صدفة بسوك لو بمحل لو بالشارع (لان احنا ولد منطقة وحدة) وهو بكل مرة يسوي نفسه ميشوفني لو يدير وجه بغير مكان ...
اني هم جنت بكل مرة اشوفه اكول بيني وبين نفسي الله يوفقه لان بصراحة ماعندي شي وياه و مو اذا ساعدته بتعليم الصنعة معناتها اني ملكته لو هو ملكي لو عندي فضل عليه .. اني الي سويته مجرد خليت رجله عالطريق الصح وهو ثبت جدارته و صار حلاق درجة اولى و الحمدلله تحسنت حالته المادية وهاي اهم شي ...
الحاصل ..
فد يوم كاعد بالمحل و اجوي شباب كالو شفت العامل مالتك وين فتح ؟
كلتلهم شفتح ؟؟؟؟
كالو تعال برى .. طلعت وياهم برى اشرولي على العمارة الي عالسايد الثاني وكالو دشوف ذاك المحل الي جان غذائية وعزل اخذه العامل مالتك و ديفتحه حلاقة ... كلتلهم بالخير عليه و الله يرزقه وشي ثاني هو مجان عامل يمي جان يشتغل وياي ... لهل الدرجة جنت ما احب احد يجيب طاريه بسوء والله العظيم .. مجنت اقبل احد يكول عليه عامل يمك ... اني مو مستعبده لاسامح الله ... هو جان يشتغل وياي وبس ...
الحاصل ..
فتح الحلاقة هو و طبعا خلى اربع كراسي بالمحل و جاب سوالف مال تنظيف وجه و اجهزة حلوة وصار عليه شغل مو طبيعي ..
وجنت اكيف من اباع عالمحل واشوف هوسة و ازدحام والله العظيم اكيف ... مع العلم اني جان شغلي مو قوي بس جنت مطلع العلاكة ..
و فد يوم كمت اشوف المعاميل الشباب الصغار خصوصا الي اصلا متعلمين يمي يحلقون كامو يروحون يمه يزينون ..
سالت ولد صديقي كلتله شنو هو شكد ياخذ عالحلاقة معقولة ارخص من الشارع كله ؟
كال لا نفس السعر بالضبط ..
كلتله لعد شنو السالفة اشو كلها تروح يمه وحتى سويتها بالضحك كلتله شنو يغديهم لو يعشيهم وي الحلاقة حتى هيج يروحون يمه ؟
كال لا خوية السالفة غير شكل بس والله استحي اكلك .. كلتله شنو متحجي ؟
كال هذا العامل مالتك الي مترضى احد يجيب طاريه بسوء و من نكلك ناقص(مكرم القارئ) انت مترضى و تنتفض علينا ... مطلع عليك دعاية انت تدور ولد ... اني من كال هيج كلتله يمعود شدتحجي انته شنو ادور ولد ؟؟؟
كال يعني شاذ و هو بطل من يمك لان انت هيج .. كلتله بداعة امك تحجي صدك ...
كال والله شبيك وجماعتنه يستحون يكولولك وجه لوجه .. كلتله يعني هسه اذا اروحله .. جان يكلي قبل متروحله و قبل متكمل كلامك هذا ابن حرام واذا رحتله هسه يحلفلك هو محاجي هيج بس احنا كلنا نعرف هو حاجي هيج و حتى محد صاير يلتقي يمك من ورى هالدعاية ...
ورحتله و واجهته جان يكلي محاجي هيج اني وجيبلي واحد يواجهني يكلي انت حاجي هالحجاية .. عفته و مشيت بس اني ادري صدك هو حاجي هيج بس الناس متحب مشاكل ياهو الي اسأله يكلي ماكو هيج حجي بس اني متاكد هو صدك حاجي ...
وصدك والله يوم ورى يوم شغلي وكف كلش و بصراحة من ورى هالدعاية محد كام يجيني ... بس اصدقائي كلش جانو يجوون ...
وجتي فترة ايجار المحل نفسه كمت ماكدر اطلعه ..
عزلت المحل و رحت فتحت بغير منطقة لان خلص عرفت مالي خبزة بهل المحل و جماله الناس مصدكة و سمعت اكثر من واحد وصلي كلام انو صدك اني عليا هيج سمعه .. لحد موصلت بيا الدرجة قررت اتحول من المنطقة لان اذا باجر عكبة اريد اتزوج و يسألون عليا و يسمعون هيج منو ينطيني مريه اصلا ...
و ورى وفاة ابوية اني صرت الجبير بالبيت و صدك والله تحولنا لنفس المنطقة الي فتحت بيها الحلاقة ... بس كل علاقتي انكطعت هناك بالمنطقة القديمة و كرهتها كلش لان اكو ناس مصدكة اني هيج ..
بس اني مو هيج والله ...
و يجوز هسه الي يسمع قصتي هم ميصدك بس شلووون اثبت للناس اني مو هيج ... عالعموم بقت علاقتي باقرب اصدقائي و يجوني همه لمنطقتي الجديدة و لمحلي ... بس للمنطقة حلفت ما اخطي رجلي هناك ...
و هسه اني عايش و محلي يشتغل خير من الله و متزوج ومرتاح كلش ...
بس كطعت علاقتي بذيج المنطقة و هنا عندي اصدقاء عليهم الاعتماد واسمي و سمعتي طيبة بين الكل ...
السوال الي يدور بذهني بين فترة وفترة ... اذا اني رجال و هيج خربت سمعتي من ورى واحد كرهني و حاربني بعيشتي ...
واني رجال ..
لعد البنات والنسوان الله يساعدهم ... اذا اني رجال ومخلصت زين اذا مرية و مجرد كرهوها لو غارو منهم لو منطتهم مجال و طلعو عليها دعاية شلوووووووون ...
بله اني رجال و عندي صنعة و رحت عشت بغير مكان و تقريبا نسوني ..
المرية لو البنية المغلوب على امرها شتسوي و وين تنهزم .. ياجماعة الخير احنا مصيبتنا بمجتمعنا العربي القال و القيل ... و فوكاها الي توكفله و تكبره تاليها يدوسك وي اول سوء تفاهم ...
عالعموم الحمدلله على كل حال ..
(اعلمه عالموس تالي يشخطني بي)
انتهى
اخوكم ابو بغداد سايق التكسي
#ابوـبغداد
أنت تقرأ
قصص عراقية حقيقية بقلم ابو بغداد سائق التكسي
Historia Cortaننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة اقرأوها فعلا تستحق القراءة
