ابوية جانت امنيته ادخل كلية ... و اصير فد شي بالمجتمع ... و اني المجتمع كله عندي ابوية .. ابوية دنيتي كلها ... لان ببساطة ابوية بعد وفاة امي الله يرحمها و يرحم والديكم هو الي ربانا اني واختي ...
امي توفت عمرها صغير و ابوية هو الي ربانا .. ابوية مشفته بيوم مرتاح ... دائما تعبان خطية .. الصبح يكعدنا يودينا لمدارسنا و مناك يروح لشغلة .. طبعا الحلو بالموضوع اني واختي سبحان الله جنا صغار بس كبار بعقلنا لان نعرف ماكو ام بالبيت ...
يعني المسكين حتى تعلم يطبخ وجان يحضر الاكل مال ثاني يوم .. اختي عمرها ١٣ سنة كامت تطبخ وتعلمت من عمتي ... عالعموم كبرنا و شلنا وي ابونا المسوولية مال بيت .. ابوية مراح تزوج ورى وفاة والدتي و نذر روحه و عمره اليا ولأختي ..
اني هم جنت ادرس و اشتغل حداد ... المنطقة كلها تعرفني ... وعندي اصدقاء قيامة ...
بيهم الزين و بيهم الشين .. بس لان محترم نفسي و لان اعرف الصح من الغلط ما سويت غلط بيوم .. بس ..
الي يخربط وياي اخربط عشر مرات وياه .. يعني بين قوسين لا اندك بأحد ولا احد يندك بيا ... لان ما اخاف و ترباة رجال ابن رجال ..
بس حذر كلش بتصرفاتي لان مثل مكلت ماريد اقهر الرجال الي نذر روحه اليا و لأختي و جنت بشتى الطرق احاول افرحه لان تعب المسكين علمودنا .. بيوم الي دخلت كلية ابوية جاب طبل و موسيقى ههههههه خطية كيف و جان عنده عيد ... دخلت كلية و بصراحة محد مصدك من جماعتي انو اني هيج عندي ذكاء و هيج شطارة خلتني انقبل كلية ؟
شلون و وين جبت وكت تدرس ؟
عالعموم .. دخلت كلية .. دوامي جان بالمستنصرية .. الكلية مثل الجيش ... تلكه بي الزين و المو زين .. وتلكه بي الوضعيته المادية زينة و تلكه الفقير ..
اني شغلي جان زين و ابوية هم شغلة زين يعني اكدر اكول الحمدلله عايشين مرتاحين بس مو زناكين ولا تحت خط الفقر ..
اني جنت اروح للكلية وارجع بدون ما اسوي علاقات يعني عندي اصدقاء بس على كد الدراسة .. مملتقي بيهم خارج الكلية .. و العلاقات من كلا الطرفين بس اهم شي الاحترام .. واني تركيبة شخصيتي شوية بيها حدودية .. احب اكون محترم وابد ما اضحك على شي تافه و ما احب اضيع وكت بشغلات مابيها نهاية ..
لذلك جانو يحبوني و جنت من اسلم الكل يرد السلام و ماعندي لا احد يكرهني ولا اكره احد وهاي احلى شي بالدنيا .. بس بالاول والاخير اهم شي الاحترام .. واني جنت فارض احترامي لان محترم الكل ..
و اذا مرات جانت تصير وكفة بالكلية وي شباب و يضحكون بصوت عالي اني رأسا انسحب بحجة صارت عندي شغلة ..
عالعموم .. كل هالحجي مو مربط الفرس هالحجي كله تفاصيل صغيرة عالوضع الي جنت عايشة و بأختصار ..
المهم ..
فد يوم جان المطر بي مو طبيعي .. قوي كلش ... مطر مطر مطر .. و هوى قوي كلش ...
اني جنت بالكلية و خلصت دوامي وطلعت .. اكو طالبة منطويه على نفسها وماعدها علاقات ابد وي البنات .. تجي للكلية عبالك مبرمجة على شي واحد (النجاح وبس) .. لبسها جان كلش بسيط و هيه كلش ناعمة .. و متلبس حذاء (مكرم القارئ) تلبس تارنشوز (حذاء رياضي) وي الزي الموحد .. بسيطة لأبعد الحدود و دائما حاضنه كتبها و تمشي بسرعة .. خطواتها كلش سريعة ...
الحاصل ..
بيوم المطر طلعنا وهيه جانت تمشي كبالي وثنينا متجهين للكراج الرئيسي .. اكو شباب ثنين من الكلية بس اني ماعرفهم معرفة شخصية ... بس شايفهم قبل هواي ..
جانو يمشون بيني و بينها .. يعني هيه ليكدام اول شي و همه وراها و بعدين اني اخر شي .. الظاهر ديسمعوها حجي جانو وهيه سريعة اصلا بالمشي كامت تمشي اسرع وخطية تزحلكت و وكعت وهمه كامو يضحكون بصوت عالي و طبعا الدنيا مثل مكلت جانت مطر و الكاع مبللة .. كامت هيه و جان اني بدون تفاهم ركضت دفرت واحد منهم من ورى و الثاني راد يضربني و خرت بسرعه وضربته .. اجه ابو كشك قريب ركض وخرهم و فاككنا وهمه بقو يهددون بس من الاخير اني عندي قانون الي يهدد معناها بس حلك و سماعة عالفارغ .. البي خير يكمل الموضوع بدقيقته من يكوم يهدد وراح و راح اسوي هيج ... معناها فارغ وبس لغوه ..
عفتهم يهددون ورحت ..
ركضت ادور عالبنية خطية تنورتها صارت مي .. بقيت ادور بنص السيارات لكيتها خطية واكفة يم حايط و خاتلة من المطر جوى سكف وكاعد تعصر تنورتها ... رحت كلتلها هاي يابه خو ممحتاجة شي .. مجاوبتني هيه و اني كلتلها اختي و كلمة اختي كلتها حتى شوية تصير عدها ثقة .. كالت لا اخوية اشكرك ... كلتلها زين وردت اروح جان تكلي دقيقة .. رجعت كلتلها تفضلي ؟
جان تكول انته مو ويانا بالكلية ؟
كلتلها اي ؟
كالت اي و سكتت و حسيت هيه محتاجة شي ..
كلتلها كولي يابه اني اخوج احجي تريدين شي ؟
كالت والله ماعرف شكلك .. كلتلها كولي يابه احجي ؟
كالت اني جنت حاطة فلوسي مال الرجعة بنص الكتب و من وكعت وكعو الكتب مالتي وتطشرو و المي دخل للكتب والفلوس هاك شوف ..
جان تفتح الكتاب طلعت خطية الفلوس مالتها منكعه كلش كلش .. ولازكات بالورق مال الكتاب يعني اذا تجرهم متاكد ينشكون لان كلش ذبلانات بالمي ..
كلتلها صدك جذب جان اطلع المحفظة وانطيتها فلوس جان تكلي لا لا بس هلكد اريد .. كلتلها صار اختي و جان انطيها المبلغ (البسيط اصلا) و اخذتهم وكالت باجر ارجعلكياهم انته بيا قسم ؟
كلتلها عمي كولي يا الله و عفتها ورحت و مكلتلها اني بيا قسم اداوم ...
رجعت للبيت تغديت و رحت للشغل ... بالشغل تذكرت شكلها من جانت تعصر التنورة ... و ايديها الناعمة .. و وجها الصغيروني ... جانت بدون مكياج و مبلل وجهها وهيه اصلا اني شايفها اكثر من مرة هيه اصلا متستخدم مكياج ..
عالعموم رحت ثاني يوم للدوام .. و جان الجو زين و شمس بس برد .. كعدت برى ادخن و بيدي كتاب اقرا بي .. جتي جان تخلي الفلوس بنص الكتاب المفتوح مالتي الي داقرا بي ...
و كالت اني كلش اشكرك ..
ابتسمت كلتلها يابه متسوى والله .. كالت لا اني اشكرك مرتين اول مرة لان تعاركت من ورايا و ثاني مرة لان ساعدتني بصراحة اني جنت ناوية اخذ تكسي وانطي الفلوس من البيت ... بس ماعرف شنو الي خلاني اتجرأ واطلب منك .. كلتلها يابه احنا طلاب بكلية وحدة و عادي تصير ظروف مرات .. كالت اني هواي اشكرك وراحت ..
بقت براسي وهيه والله شكلها كلش طبيعي بس ماعرف اشو تفكيري صار بيها .. و من يومها عرفت الي يحجون بالحب و يحجون بالشكل جذابين و ميعرفون شي عن الحب .. الحب موقف الحب كلمة الحب مو شكلها حلو وعيونها كبار لو طولها هيج و جسمها هيج ..
الحب من يجي يجي بدون ميقدم نفسه .. عدل وكبل يلزك بالراس ..
حبيتها .. بس المصيبة هاي مو مال حب وهالسوالف يعني اذا اروح اكلها احبج ماعرف ردة فعلها ههههه لان حقيقة هاي البنية جايه مبرمجه تنجح وتتخرج ..
بس رغم كلشي كمت اروح اسلم عليها من اشوفها كاعدة وحدها .. و اسألها خو مضايجة من شي ؟
جانت تهز براسها يعني لا و تبتسم .. و مرة سويت نفسي محتاج لشرح معين و رحتلها .. دوختني عبالك كاسيت و انفتح .. معلومات معلومات معلومات .. تمطر معلومات .. اني هيه جانت تحجي ومندمجة بالشرح و اني اباع على شكلها .. و علساس مركز وياها عالمعلومات بس الصراحة اني جنت مركز بشكلها و ارسم شكلها براسي ... هيه ودتحجي كلتلها يعني عادي اذا بعد مرة اطلب منج شرح لان هسه كلش افتهمت الي اريده على شرحج ..
كالت صدك جذب تدلل و ابتسمت و اني كمت يوميا اروحلها بحجة ممفتهم شي ..
و هيه تشرح واني نفس الشي اصفن عليها ... لحد ما فد يوم خلص .. كلت اكلها اني احبج قابل شيصير ؟
رحت و هم طلبت تشرحلي ومن كملت الشرح كلتلها اني احبج ..
جان تتخردل البنية ههههههههه ... شمرت الكتاب الي اني منطياها اصلا و مخلي علامات عالسوالف الي ممفتهمها .. شمرته عليا و راحت بس مشت نفس المشية الي تزحلكت بيها من ضوجوها ذولة الشباب ..
اني انقهرت عليها كلش .. و عفتها .. وبعد ولا رحتلها ولا سويت هالشي وياها .. بس لحكتها فد يوم واندليت هيه بيا منطقة ساكنة واندليت حتى بيتهم ..
وراها بفترة شهرين طبعا جنت مطلعها من راسي كلش .. ابوية تمرض وتوفى ..
ومن يوم وفاة ابوية اني تغيرت كلش .. لان ابوية جان سعادتي بهل الدنيا .. رجعت للكلية ورى فترة من الغياب و شكلي جان كلش تعبان لان تعلمت عالسهر .. وفد يوم كاعد وحدي جان هيه تفوت اني من فاتت دنجت راسي حتى متكول ديباع عليا لان مردت اضوجها .. راحت ورجعت بس رجعت عليا ..
كالت انت وين جنت ؟
بس تحجي عبالك تريد تتعارك ..
كلتلها ابوية توفى .. جان تكعد بصفي هيه كالت البقاء في حياتك ..
اني من كعدت بصفي شوية لزمتني العبرة و كمت احجيلها بدون سابق انذار عن حياتي وشلون ابوية كبرنا ورى وفاة امي و شلون تعب علينا ..
وهيه كامت تسأل هواي .. واني اجاوب ... تسأل واني اجاوب ... و من يومها كامت هيه تجي تكعد يمي بالدوام ... وكامت تحجيلي عن نفسها ...
كالت اني ابوية مطلك امي و اني وامي عايشين ببيت جدي (ابو امي) ... و امي امنيتها اني انجح واخذ شهادة حتى احصن نفسي للمستقبل ... انقهرت عليها وحسيتها قريبة مني كلش ... و بدت علاقتي وعلاقتها تكبر .. هيه هم حبتني..
و خلصنا الكلية و توظفنا ثنينا ... اختي جتي قسمتها و زوجتها وبقيت وحدي بالبيت ...
و رحت تقدمت للبنية بس اخذت ناس من المنطقة كبار و معروفين لان بصراحة ماعندي احد اني .. خال البنية مقبل .. و عدم موافقته جانت نهائية لان منطي حجاية عود لصديقة ياخذها لأبنه ... و اني سالتها كالت ماكو هيج حجي .. صارت مشاكل بيني و بينه لان رحتله وحدي .. و صار حجي قوي و كلتله البنية متصير لغيري و هو ركب راسه واني ركبت راسي .. اخر شي اتفقت اني وحبيبتي نقنع الام تجي تعيش يمنا بالبيت اذا نتزوج غصبا ما على خالها .. و الام اقتنعت لان اهم شي بالنسبة الها سعادة بنتها .. و صدك والله جبتها عاشت ويانا بالبيت و تزوجنا الحمدلله بس خالها كطع علاقته بيهم نهائيا .. و ميكدر يحجي و ميكدر يسوي شي لان كلشي قانوني وثنينا كبار مو زغار و الام هم موافقة ..
و تزوجتها لدعسوقتي اي اي دعسوقة مسميها دعسوقه ههههه و جنت اتشاقى وياها اكلها اذا يصير عدنا بنية نسميها دعسوقة و هيه تضوج و تضربني بس ضرباتها متاثر هههههههه و جتني بنية بس حرامات مسميتها دعسوقة سميتها رحمه .. لان ماكو احلى من الرحمه بهل الدنيا ..
و هسه عايشين اني وياها ورحمه و امها الي هيه اصلا صارت مثل امي والله ..
و هيه بقت بوظيفتها واني بقيت بوظيفتي و الحمدلله عايشين و مرتاحين ومنريد غير بس تبقى عيشتنا هيج حلوة و خاليه من المشاكل ... بس دعسوقه مرات تسوي مشاكل لان تغار ههه من شنو تغار ماعرف و طبعا امها تطبك وياي ههههه
.. مصيبة دعسوقة اذا تشوفني لازم التلفون عبالها عندي شي متعرف اني احجي وي رياض وايرات ... لو نصير مبيدات .. وطبعا اني مسمي اصدقائي بالتلفون اسماء على ضوء اعمالهم ..
هيه مرات تكلي اخاف تحجي وي بنات .. اكلها والله مشفت ولا راح اشوف غيرج بهل الكون يا سعادتي كلها ..
(ابو رحمه)
انتهى
اخوكم ابو بغداد سايق التكسي
#ابوـبغداد
أنت تقرأ
قصص عراقية حقيقية بقلم ابو بغداد سائق التكسي
Storie breviننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة اقرأوها فعلا تستحق القراءة
