قصص عراقية حقيقية بقلم ابو بغداد سائق التكسي

تتذكرون

تذكرون البايسكل بغداد ... زين تذكرون الخرز الي جنا نخليها بالويل مال بايسكل و جانت الوانها وردية و حمر وصفر عود زورقة و جمبزة للتاير .. زين تذكرون ساعة ستة جان يطلع الكارتون و كلنا نلتم ؟؟
زين تذكرون من جان يصعد واحد جبير من اهلنا فوك يعدل الاريل و احنا يوكفونا يم الدرج و نصيح بعد شوووووووووية بعد شووووووووية لحد متصفى القناة ..
زين عوفكم من كل هذا تذكرون اول مرة طلع بيها السحار الاكرع ابو سنون حادة وي ساسوكي شلون خوفنا شكله ؟
تذكرون ابو الازبري الي جان يفتر بالشوارع الظهرية و كلنا شايلين ربع ننتظره و يخلينا بالجيس .. واكيد راح تذكرون صوت الخررررررررش خررررررش من يفر هاي الي تطلع ازبري بنص الثلج .. الله احلى صوت جان ..
تذكرون الحصان الي يكمز من ندوس هاي المثل الطوبة مال جهاز ضغط .. واكيد تذكرون المكعبات الي جانت بالكياعين مطشرة و كل دوسة عليها تخلي الروح تكمز ..
تذكرون الكارتون الروسي مال حوريك يا ارنب و الثاني مال هذولة الاثنين واحد كصير و واحد طويل .. الطويل شعره اسود و الصغير شعر قليل عنده و جانو يضحكون ..
زين تذكرون بحيرة البجع و الاميرة والنهر هاي الي تحارب التنين و الاسد ...
عوفكم من هاي .. تذكرون لعبة يك و لعبة رسك و لعبة الحياة و شلون بوقتها صارت ضجة و كل جهال المنطقة تلعبها و مكيفه بيها ..
لو تذكرون هاي الطوبات الاثنين الصغار الي من تنطخ وحدة بالثانية تطلع طكة قوية .. زين تذكرون من جنا نخمط اليده مال مجر ونسويها طكطاكة .. و الاحلى بعد من نزل هاذا السهم الصغير الي تتخله براسه طلقة مال مسدس ابو الطلقات و نشمرها فوك بالهوى و توكع تطلع صوت قوي ..
زين تذكرون اقوى الفيكات مال حجي الي جنا نحجيها .. كول لوري ورى لوري خمس مرات .. والي يكولها على اساس مسوي انجاز ..
زين تذكرون من جنا نلتم كل واحد بينا يفيك بمعلمته .. ولكم سمعو سمعو ست فلانة ابد متضربنا وتكتبلي بكل امتحان احسنت يابطل .. و وي منكول كتبتلي احسنت يابطل نباوع بنظره ملوكية ونبتسم ابتسامة جبيرة ..
زين تذكرون من جنا نشوف عركة بالشارع شلون نرجع نخبص اهلنا بيها و نكوم نحور بالعركة و الاحلى بعد ياهو الي يجي حتى لو خطار هم نحجيله و ندوخه بيها ..
زين تذكرون من جانت تصير حرب و تخلص ونصعد فوك عالسطح نلكة طلقات لو شضايا ..
زين تذكرون من جنا نلعب دعابل بالمقاطيط و السيفونات ..
زين تذكرون من وصلتنا الطيارة على شكل رجل الوطواط و سوبرمان و جان خيطها نايلون يختلف عن الطيارات العادية و حتى بيها مثل القاعدة نايلون تتلبس بالايد ..
زين تذكرون الموطة الي بداخل نايلونه نفس الكبوس بس مو بسكت ... نايلون و بنهايتها جوى علج دعبله ..
زين تذكرون الجنطة ام الساعة شلون صارت ضجة عليها من نزلت ..
و اكيد تذكرون العلج ابو السهم الوهمي الي من تجر علج تضربك سبرنكه على اصبعك وتفز ..
تذكرون القرد الشايل طبل تكويك من نكوكه و يدك ... طبعا بوقتها جان ينباع بالاورزدي ..
صدك تذكرون الاورزدي ..
زين تذكرون هاي السوارات مال بنات الي لونها قوس و قزح و تنفتح مثل السبرنك ..
زين تذكرون الاقلام بس البنات يشتروهم هاي الي على بمكان المساحة ريشة لو حيوان صغيروني ..
زين تذكرون اللفكس الي عليه صورة الحسناء والوحش ..
زين تذكرون المحفظة مال اقلام الي بيها مغناطيس و الطكة مالته حلوة و مرات جنا نلعب بيها نسد و نفتح حتى بس نسمع الصوت ..
زين تذكرون المقطاطة ام البيت و ام السيارة و ام الطيارة ..
تذكرون القلم الي يكتب و الحبر مالته بي ريحة طيبة ..
زين تذكرون الصبورة السحرية هاي الصغيرة و نرسم بيها و يختفي الرسم بعدين ..
و اكيد تذكرون دولاب الهوى النايلون الي نخلي بي مي و يفتر ..
و على طاري المي تذكرون المسدسات مال مي الشفافة الي لونها اخضر فسفوري ..
طبعا اذا ابقى اذكركم مراح اخلص منا لبعد سنة .. عالعموم اذا تذكرتو أي شغلة من هالشغلات معناها انت عشت فرحة بوقتها (حتى لو قليلة) بس المهم جربتها ..
و الله يحفظ اهلكم و يرحم منهم الي راحو يم رب العباد لان كدرو يوفرون هالاشياء و سعدوكم بيها ..
انتهى
اخوكم ابو بغداد سايق التكسي
#ابو_بغداد