قصص عراقية حقيقية بقلم ابو بغداد سائق التكسي

بين وبين

من وحدة تكبر ببيت كل تفكيره و كل حجية (شوكت تتزوجين و نستر عليج) الي يسمع هالحجي يتخيل اني بدون ملابس و محتاجة رجال يسترني .. ما جنت اعرف شي غير بس اريد اتزوج … حتى صديقاتي ماعدهم سالفة غير سالفة الزواج .. بنات عمي بنات خالي خواتي … لا وفوكاها من يتزوجون يجون يحجولي على بطولاتهم بالزواج .. حسيت الزواج راح يكمل حياتي واني عمري كله ٢١ سنة .. صغيرة .. توقعت حجي البنات عن الزواج والحب كله حقيقي .. و صار هدفي بهل الدنيا الجبيرة .. بس اتزوج و الكه رجال … امي جانت تدلل بيا .. وكلمة تدلل مو معناها تدللني .. بس تدلل بيا معناها تعرضني كبال صديقاتها و معارفها … من جنا نروح يم اقربائنا و عدهم شباب ممتزوجين .. تعيط بيا كومي نظفي وي البنات (من نخلص غدا لو عشا) بس تريد تشوفهم اني خدومة و مو عجوزية .. من كثر ما ردت اتزوج كمت اني من نفسي اسوي هالاشياء من نطلع برى يم كرايبنا … و بصراحة اني هم جنت اريد اتزوج حتى اقص و اسولف و احجي عن حياتي الوردية الي جانو ينقلوها اليا صديقاتي و كرايبنا المتزوجات .. من جنت اسمع حجيهم عالزواج و الراحة وي الرجال والحب الي ممجربته بحياتي جنت اطيررررر … احس روحي بغير عالم … عالم مابي صياح الجهال ببيتنا .. عالم ما بي اخوتي يصخرون بيا و اذا اتعطل يصيحون عليا بصوت عالي … عالم ما بي غرفة ننام بيها تلث خوات ..
عالم اتابع بي التلفزيون براحتي و اختار القناة الي اني اريدها و اشوف البرنامج الي اني احبه … و الاهم من كل هذا .. العرس و البدلة البيضة و البنات الملتمات داير مدايري … و صار عمري ٢٣ سنة .. و جتني قسمة هههههههههه .. قسمتي جانت برأيي احسن من كل الداير مدايري .. ليش ؟؟
لان الولد بالخارج و هو كرايبنا من بعيد .. طبعا هو و امه و اخوته عايشين بدولة اجنبية .. ورى ما اخذو الجناسي كامو يجون للعراق .. امه جانت تدورله بنية حبابة ومن الكرايب .. امي بس سمعت هالشي عرضتني و تم القبول عالعرض …. اجه الولد و طبعا وياه امه .. نزلو نزلة خاصة علمودي … كيفت طرت من الفرح و بعده مصاير شي ولا متزوجة بديت اتخيل بالخارج شلون راح اعيش و شلون راح تكون حياتي .. كمت اسولف لصديقاتي و لكرايبنا البنات .. و طبعا قبلت رأسا .. الولد شكله كلش كلش مقبول … و عنده شغل … و مرتاحين ماديا هناك برى … قبلت و جانت الصدمة الي عادي عبرتها و مهتميت الها هيه سالفة العرس … الولد جان يحاجيني ..  كالي اني ما احب هالسوالف مال عرس و ناس تجي وهوسة .. اني اريد اتزوجج انتي شسوي بالمعازيم و (هالخرط) على كولته … اني مقتنعت بس لان اريد اتزوج قبلت … و اجه و سوينه كعدة بس اهلي بيها و صديقاتي اربعة .. و تزوجت و رحت .. وصلت لهناك .. الجو الطبيعة اوف ماعرف شحجي شكد جنت مكيفة …
كلشي جديد على وحدة عمرها ٢٣ سنة ممسافرة بحياتها ولا طالعة اصلا حتى محافظات مرايحة .. مكيفة جنت طايرة من الفرح … كلشي حلو بالنسبة اليا .. تخيلت نفسي شخصية بأفلام كارتون … كلشي حلو حتى البيوت حلوة .. الناس حلوين .. الطبيعة الاشجار حتى الطيور حلوة … وين منمشي بالسيارة نشوف بحر .. الصورة صافية كلش .. مكيفة بس كل حياتي و كل دنيتي بي هو صارت لان بهل الدولة الي اصلا لغتها ما افتهمها هو لساني وهو عيوني الي اشوف بيها و حتى هو الخطوات الي امشي بيها .. يعني من الاخير عمية وهو عكازي .. بدونه اضيع و بدون ما اشوف شي .. رحت لبيتهم .. اخوته باركولي عادي و كملو يومهم … يعني حتى مسألوني متعرفو عليا و كلت عادي شوية شوية اتعرف عليهم زين و يعرفوني زين .. الام مموجودة دائما بالبيت .. كل اهتمامها كعدات وي عراقيات برى البيت .. عشت وياه بنفس البيت .. او بصراحة عشت وحدي … البيت يوميا يفرغ من الصبح لحد ساعة ١٠ لو ١١ بليل .. البيت كله اليا .. التلفزيون جنت اكلب بي براحتي .. ماكو صياح .. ماكو هوسة .. هدوء رهيب .. افتح البردات اباوع عالطبيعة … حسيت اني بقمة السعادة .. بس وحدي !
هو يجي بليل تعبان من الشغل … ينام ومرات شوية يسولف وياي و يحجيلي كلشي عن الشغل وبس .. بس للأمانة هههههه جان يسألني شلونه يومج ؟
اني اكله حلو … يوم يومين اشهر … سنة و شهرين نفس الشي … بديت احس بملل … و بديت اكله على هالشي … يكلي بابا شوية صيري عملية يعني هسه اني اذا كعدت من الشغل شلون نعيش ؟
اكله اني مكتلك اكعد من الشغل بس خلي نطلع خلي نطب اني اربع وعشرين ساعة لوحدي … وصوت الخشب خبلني .. طبعا الارضية مال بيتهم خشب و تطلع صوت بالحر و بالبرد ماعرف ليش … و طلع هالشي طبيعي لان الخشب يتمدد و يتقلص بس يطلع صوت من كثر الوحدة كمت اركز بي … هو يضحك من اكله هيج يكلي انتي مخبلة … بس بصراحة جان منطيني حرية جبيرة .. يعني يكلي روحي نادي روحي تمشي روحي محلات .. و سجلني مدرسة مال لغة … بس متعلمت اللغة صعبة جانت عليا كلش … كمت اروح افتر بس افتر وحدي … اروح سوك اروح وحدي … حتى النادي اروحله وحدي … و عادي كلت شسوي خلي اصير عملية و هاي هيه .. سنتين ورى زواجي … كل هالسنتين المواضيع جانت كلش قليلة وي امه تصير .. لان هيه قليل تجي للبيت و اصلا جتي فترة راحت كعدت بشقتها لان همه كل واحد بيهم عنده سكن وحدة بس مرات يتجمعون كلهم بشقة زوجي لان هو الولد الجبير بيهم … و طبعا اخوته ثنينهم مصادقين بنات و اخاف جنت اشوفهم مرات حتى هالمرات انلغت … المهم .. امه كل هالسنتين جانت مواضيعي وياها قليلة … بس ورى سنتين من مصار عندي اطفال كامت تجي و تحجي على هالشي و اخذتني لدكتور .. لان اني لغتي ٧ بالمية … و طبعا هالشي سوته بناء على طلب زوجي .. هو ماعنده وكت يوديني اصلا … بس امه عدها وكت فراغ … اخذتني و طلع عندي خلل بس هالخلل ياخذ وقت بالعلاج و نسبته مو كلش جبيرة … و هنا تغيرت وضعيتي كلها … الولد تغير اسلوبه وياي كله … و اني احبه لان مشفت احد غيره بحياتي … كام يحجي هواي عالجهال و يضربلي امثال على اصدقاءه الي تزوجو و صار عدهم جهال … و اني ماعرف شجاوبه .. و علاج سنة و شهرين وماكو شي … و طبعا بهل الحجي زوجي وامه تغير تعاملهم وياي جذريا بس اخوته مالهم شغلة خطية … وفد يوم انفجر بوجهي … كال اني اريد جهال … كلتله شسوي و ابجي اني لان مو بيدي والله … كال هنا القانون ميصير واحد يتزوج ثنين جان اتزوجت واني احبج والله بس اني اريد جهال … كلتله شنو قصدك .. كال منرهم نكمل سوى ..
يابه بيومها عبالك ضربني سجين بكلبي .. و لأخر لحظة عبالي ميعوفني .. بجيت هواي و توسلت هواي و كلتله اني احبك لان صدك احبه و مشايفه رجال بحياتي غيره بس مفاد الحجي … طلكني و رجعني للعراق … رجعت لأهلي بس رجعت مو ذيج البنية الي تحب الدنيا .. رجعت مكسورة بسبب شي مو بيدي والله .. امي وابوية خطية ما بيدهم شي و يعرفون السبب الرئيسي انو اكو خلل عندي وما اجيب جهال يعني لا مسويتلهم مصيبة ولا حتى منزلة روسهم للكاع … السبب من الله مو مني … دللوني و حاولو يدللوني بس اني صرت خشبة .. ما احس بشي .. ما اضحك .. عشت سنتين ونص اني هيج عبالك جماد .. اخر شي اشتركت عن طريق الانترنت بموقع مال مساعدة الناس المحتاجة يعني اشياء خيرية .. و كمت اطلع وي فريق بنات و ولد نساعد الناس المحتاجة و وقتي كله ضاع بهل الشي … انعرف الفريق مالتنا بالعراق كله … ماكو محافظة عراقية موصلناها .. الفريق ولد وبنات كلهم ولد ناس ومحترمين و يجون لبيتنا و يعرفوهم اهلي … و فد يوم اكو بنية ويانا بالفريق قريبة مني كلش .. تعرف قصتي كلها .. و من حجيتلها بجيت هواي … فد يوم خابرتني كالت اريد اشوفج بفلان مطعم .. رحت لكيت وياها رجال بس ماعرفه قبل .. عرفتني عليه .. بس من عرفتني كالت ابو ميس وياج .. يعني متزوج .. الرجال الكعدة كلها يباوع عليا .. و عيونه مبينه بيها حجي .. و كامت صديقتي راحت تحجي بالتلفون وي خطيبها .. جان اول كلمة يكولها بس كامت تتزوجيني ؟
ضحكت كلتله شنو ههههه .. كال تتزوجيني و باوع بساعته كال يله ماكو وقت تتزوجيني ههههه …. كلتله شنو ؟
انت تتشاقى لو هذا مقلب كامرة خفية .. كال ترى اني اعرفج صار كومة .. كلتله منين بله ؟
كال فلانة مخلت شي مسولفته عليج .. خلي اعرفج بنفسي .. اني فلان الفلاني ابن عمها لهاي المخبله الي طلعت برى تحجي … و اني جنت متزوج وانفصلت قبل سنتين تقريبا .. وعندي ميوسة عمرها ٤ سنوات عايشة وي امها حاليا بس مرات اروح اخذها تجي يمي .. و اني رايدج … طبعا رجعت ضحكت .. الرجال حباب و طبعا بيومها راد يضحكني .. بس صدك والله بقيت وياه بعلاقة ٨ اشهر عرفته وعرفني اكثر مو بس عالحجي .. وارتبطنا .. هو يعرف كلشي عني يعني محاجة اكله اني ما اجيب جهال .. و هسه عايشين احلى عيشة وميس مرات تجينا تبقى يمنا وتحبني كلش واني مدللتها .. و بعدني بالفريق وهو بقاني بالفريق لان هو هم يحب المساعدة .. وبصراحة .. نساني الي صار وياي رغم ما هو كلش كلش شخصيته قوية و محترم بس يحاول يضحكني بشتى الطرق وحتى مقالب يسوي بيا مرات هههه احبه والله ..
(بين و بين)
انتهى
اخوكم ابو بغداد سايق التكسي
#ابو بغداد