قصص عراقية حقيقية بقلم ابو بغداد سائق التكسي

صوجي

ورى سنة ونص من وصولي للدولة الي حاليا اني بيها ... تعلمت احجي لغة و بديت اشتغل ... اشتغلت وي شباب اتراك بمطعم بمحطة مال قطار ...  المطعم صغير صح بس عليه شغل كلش زين ... لان النازل و الصاعد من القطار حصرا يفوت على مكان المطعم .. المطعم صاير جوى بالممر الي ينحدر منه الدرج مال نزول وصعود الركاب ..
جنت اشتغل عالشيش .. اكو شيشن واحد لحم و الثاني دجاج اني الي اكص و اخلي بالصمون ...
مكان الشياشة مو مقابيل الناس الي تشتري و اكو جامه تفصل الشياشة عن الكاشير و المكان الي يدخلون يشترون منه الناس ... الجامه جانت مثل المرايا ... يعني احنا نشوفهم للناس بس همه ميشوفونا ...
و كل العمال لابسين زي واحد واني منهم هم .. الزي لونه احمر و عالظهر مرسوم شيش كص و مكتوب اسم المطعم و عالصدر هم اكو علامة صغيرة مكتوب عليها نفس الاسم ..
المنطقة بيها عراقيين هواي ... بس مو منطقتي هيه .. اني اركب مرتين حتى اوصل .. يعني اركب قطار و اغير لقطار ثاني يله اوصل ...
فد يوم اني بالمطعم و اجوي بنات تلاثة ... البنات يحجون عراقي بيناتهم بس كبال الكاشير يحجون لغة الدولة ... اني سمعتهم يحجون عراقي كيفت ... كمت اباع عليهم من ورى الجامة و جانت بيهم وحدة كلش حلوة و شكلها كلش مألوف ... و المصيبة تشبه بنية اني جنت اعرفها بالعراق بس امانة الله ما بيني و بين ذيج البنية اي شي ... بس جانت مجرد صديقة بالكلية ...
البنية عجبتني كلش بس معرفت شلون احجي وياها لان ماكدر اعوف الشياشة و اطلع برى و حتى اذا اطلع قابل اطلع بهدوم الشغل ... بس لاحظت شي انو الولد التركي الي يقدم الاكل برة يعرفهم للبنات و يعرفون اسمه ..
جان اسمه هاكان .. سالته كلتله هاكان هذول البنات تعرفهم ؟
كال اي عراقيات ومرات يجون يتغدون هنا و بيوتهم قريبه ..  طبعا هالحجي مصارلي اسبوع بالشغل ... كلتله اوكي و كيفت .. ثاني يوم بنفس الوقت هم جوي ... و هم بقيت اباع عليها من ورى الجامة ...
ثالث يوم انتظرت بنفس الوقت وعيني عالجامه ما جوي ... حتى حسيت روحي ضجت ... مع العلم اني ميربطني شي بيني و بينها وحتى ممتحاجين .. بس حسيت روحي ضجت كلش ... و هاكان  بذاك الوكت لان هو بعمري و حباب كلش و يحب العرب جان يتصل بيا و نحجي هواي .. حجيتله و كلتله اني اكو بنية من ذولة التلاثة عاجبتني كلش و اريد احجي وياها ... كالي شكو بيها احجي وياها .. كلتله لك اني خجول و ابد ممسوي هيج شي بحياتي ... كال شوف همه دائما ياكلون يمنا ... قبل متشتغل انته اصلا ... و البنات حبابات و الي دتحجي عليها كلش حبابة و طيبة ... هذا الي اني اشوفه .. بس عندي الك اقتراح .. جيب وياك لبسك الحلو و خلي بالغرفة مال تبديل الورى ... و من يجون همه انت بدل واطلع اكعد بحجة انت زبون ههههه و حاول تمشي وراها وتحاجيها ورى ميكومون ..
كلتله والله ؟
كال والله شبيك .. و اندفعت كلش من كالي هيج و كالي  هنا العلاقات والحب عادي وانت ممسوي شي غلط ما عجبها خلص عوفها و اذا عجبها خلص انت مناقصك شي تكدر تتزوج عندك سكن وحدك و شغلك هنا ... و هاي هيه ..و بالاول و بالاخير انتو ثنينكم من نفس الدولة و عرب ..
كلتله زين و حضرت هدوم باجر و لبست ارقى ملابس عندي هههه هالملابس ملبستها غير بس مرة وحدة بحفلة و هلكد ما اخاف عليهم مرات اطلعهم اكويهم و ارجعهم للكنتور ..
و رحت والله ... اول موصلت للشغل نزعت الهدوم و علكتهم بغرفة التبديل و بالمناسبة اخذت عطر وياي .. كل ميصير عندي فراغ اطب ارش عالهدوم عطر حتى لا تصير بيهم ريحة الاكل مال مطعم ...
و صارت ساعة تلاثة ونص تقريبا جان يجون البنات وهيه وياهم ... كبل فتت بدلت و اخذت كوب كوفي و سويت نفسي طالع من باب المطعم و هاكان لزم مكاني لان جنت مكصصله لحم و دجاج وهو بس يعبي اذا اجه احد يريد ...
طلعت عالطاولات البرى و اختاريت طاولة مقابيلها .. كعدت اباع عليها هيه ملتهية وي صديقاتها تسولف وتضحك ... و ابد ما باوعت عليا ...
و خلصو الاكل وراحو ...
رجعت فتت جوى بدلت لبس الشغل .. هاكان كال ليش مرحت وراها ؟
كلتله اصلا ما باوعت عليا ..
كال مو اتفقنا تروح وراها ..
كلتله ماعرف من شفتها ما باوعت عليا كلت بعد شكو رايح وراها ..
كال انت جبان و مراح تحجي وياها اصلا اذا تبقى هيج ..
ثاني يوم قررت الحكها اذا جتي بس للاسف رحت بنفس الهدوم و ما جتي .. وراها بيومين جنت هم ماخذ هدوم الطلعه وياي جتي هيه وصديقاتها .. هم سويت نفسي الشي بس هالمرة هيه انتبهت عليا بس مركزت هواي ..
بس خلصو اكل و كامو كبل لحكتهم و هاكان جان لازم مكاني جوى ...
بقيت امشي وراهم تلاثتهم ... بالطريق اكو بنية من البنات راحت لغير جهة و عافتهم ... و ورى شوية هم بنية راحت و بقت بس الي اني لاحكها وحدها بالشارع ..
مشيت وراها و صرت قريب بس خايف و عركان هههه لان صدك اول مرة ..
جان اسلم عليها بصوت مرتبك ..
هيه افترت عليا كالت اهلا وسهلا ..
كلتلها انتي عراقية ؟
كالت اي عراقية انت مو جنت هسه بالمطعم الي بالمحطة ؟
كلتلها اي ... كالت تفضل ..
كلتلها عندج كرايب تداوم بالمستنصرية ... هههههه ضحكت البنية كالت شنو ؟
كلتلها والله اكو بنية تشبهج جانت وياي بالكلية ... كالت على حد علمي ماعندي ..
كلتلها اني اسف لان لحكتج بس ذكرتيني بهواي امور و جيت وراج .. كالت يله مصار شي ...
كلتلها زين باعي اني حطلب طلب و داعة امي و داعة ابوية اذا مقبلتي اروح و متشوفيني بعد و هالطلب هو مو طلب سخيف و لا طلب محلو و اني والله اهلي مربيني و بحياتي مواكع بهيج موقف .. ضحكت البنية كالت شبيك شنو طلبك و بسرعة لان عندي شغل ..
كلتلها راح اغمض عيني و اطلب..
كالت اطلب و فضني ههههه ..
كلتلها رقمج ؟
كالت شسوي بي ..
كلتلها والله والله ماسوي بي شي غلط بس احب احجي وياج على وقت فراغج و اذا حجيت شي محلو مسحي رقمي و لاتجاوبيني ابد ..
كالت انت انطيني رقمك .. كلتلها وتخابريني ؟
كالت ماعرف ..
جان انطيها رقمي و رجعت كبل للمطعم .. لكيت هاكان واكفلي برى كلي همزين جيت لان اللحم خلص ..
كبل نزعت و رجعت للشغل وحجيت لهاكان الي صار ...
وبقيت انتظرها تتصل بيا ... عيني عالتلفون شوكت تتصل .. اول يوم متصلت و ثاني يوم اني بالشغل جان تجي بس اني بقيت خاتل جوى .. و بنفس اليوم الي بقيت خاتل جوى اتصلت بيا ورى مرجعت للبيت ...
حجيت وياها واني ممصدك نفسي .. بقيت احجيلها على جيتي هنا و شلون تعذبت حتى تعلمت اللغة .. وشلون تعذبت بالطريق و شلون الناس ماتت ...
انقهرت عليا و سالتني ششتغل ؟
كلتلها ماعرف شكلج سوال صعب ..
كالت احجي شنو تشتغل قابل بوكالة ناسا ؟
كلتلها زين راح احجيلج .. حجيتلها كلشي صار و كلتلها جنت اباع عليكم من ورى الجامة و كلشي بالضبط نقلته الها و حتى سالفة الهدوم ...
خربت من الضحك و كالت صدك هيج سويت علمودي ؟