قصص عراقية حقيقية بقلم ابو بغداد سائق التكسي

ليش

ذوقه جان هادئ بالملابس … ميحب الالوان القوية .. يعتمد على الالوان الخفيفه … يحب عطر واحد و ميغيره ابد … اكثر من مره من نطلع اني وياه علمودي يقبل يشتري العطر بس ميستخدمه .. يتركه بمكانه و من اسأله ليش مستخدمته و رجعت على القديم يكلي ماعرف ما حبيته بس عفته ذكرى منج … حافظة كل كلماته الي جان يكولها اليا .. حتى طريقة كعدته وكل شويه يصعد الساعة لأن ميحب سير الساعة يكون ضاب على ايده .. دائما يكون راخي و من يحرك ايده هواي كل شويه تنزل ساعته و يصعدها … حتى نظرته اليا .. حافظتها … الاغاني الي يحبها .. اللون المفضل … سوالفه .. ضحكته .. نكاته … كلشي بي اتذكره زين … من انتهت علاقتي بي .. جان بكل مكان يطلعلي و اتخيله .. هواي اتذكره من اشوف التلفزيون … من الاخير ماكو شي ميذكرني بي … حتى عطره المميز من جان يفوت من يمي احد مخلي نفس نوعية عطره عيوني رأسا تدمع … ومره صارت وياي وي أمي جنا رايحين نشتري ذهب لأختي و فات ولد هو و خطيبته للصايغ .. حاط نفس نوعية عطره بس اشتميته عيوني دمعت و طلعت وكفت برى .. حبيته بكلشي بيا .. حبيته بكل تفاصيله .. حتى ضوجته و عصيبته جنت احبهم .. غيرته عليا جانت ترسملي يومي .. يغار عليا جان خصوصا من يشوفني واكفه وي طلاب (بنات و ولد) بالكلية .. و من اطلع وياه بمكان محد يستجرأ يباوع عليا لان هو بصفي يمشي … حبيته و اختاريته يكون زوجي … و كلشي رتبنا اني وياه …
تعرفت عليه بالكلية جان جاي زيارة لصديقه … هو اصلا متخرج … بيومها صديقه الي هو ويانه بنفس القسم عرفنه عليه وكالنه الولد خطاط و رسام بنفس الوكت … وعنده مكتب .. و يسوي دعايات مال محلات و حتى يصمم مواقع الكترونية و كروت و دعوات .. و يصمم دعايات تلفزيونيه يعني موهوب الولد و بنفس الوكت معروف .. يعني مشتغل لفنانين معروفين تصاميم للخلفيات مال الاغاني الصوتيه و شغله حلو .. و انطانه كارته … اني بوقتها جنت داخله بسالفة مال منظمات مدنية و مساعدات للناس المتضرره .. و جانت اكو فكره براسي على الانترنت ردت مساعدته بيها بس مجان بنيتي لا علاقة ولا شي … ما اجذب و اكول ما انعجبت بالولد .. بس مال سالفة علاقة من نظرة ماكو هالحجي … و اتصلت بي و تواصلت وياه عن طريق الانترنت لان مكتوب كل معلوماته بالكارت … و الولد امانة الله ساعدني و ما قبل ياخذ مقابل و مو بس هيج .. حتى اتصل بكم فنان معروف اخذ منهم مساعدات للناس المتضرره و ارتاحلي كلش من شافني هيج مندفعه لمساعدة الناس … و كام يتواجد وي الفريق الي اني اشتغل بي حتى بس يساعد … كلبه طيب كلش …
و جنت احس بعيونه هالشي من يشوف العائلة الي رايحين الهم حتى نساعدهم  … و اكثر شي خلاني اتعلق بي .. مواقفه و شخصيته المبنية على الاحترام .. محترم لابعد الحدود بالتعامل وي الناس … اتصالته يوم ورى يوم كامت تزيد بيا … و حجي يجر حجي .. عرفت انو هو معجب بيا .. الولد حالتهم المادية كلش زينه .. و طبعا هو معتمد على نفسه و حبيت هالشي بي … عنده علاقات هواي بالناس .. يعني مرات اتصل بي يكلي اني بفلان محافظة رايح واجب … و صدك طبعا هالشي لان جنت اسمع بأذني و جان مرات يصورلي اشياء و يرسلها بس مو لأن اني طلبتها … بس هو يحب هالشي … علاقتي طولت بي سنه كاملة … و خلال هالسنة هو يوميا يتصل بيا و نحجي ونسولف وقت طويل … حبيته و بصراحة جنا نطلع سوى اني وياه بوقت الكلية … بس اي شي خارج حدود الحجي مصار بيناتنه .. يعني نطلع بمكانات عامة وبس .. حتى الكلام بالتلفون ابد ما فد يوم هو كال كلمة مال مراهقين لو حسسني علاقتي بي غريزية .. محترم كلش .. و اني حبيته و حالي حال اي بنية لازم افكر بنهاية العلاقة … فتحت وياه موضوع و سمعته بطريقة غير مباشرة .. و طبعا الولد هو رأسا كالي نتزوج .. كيفت و ارتاحيت للحجي مالته … و هالحجي اني يوم ورى يوم اتعلق بي اكثر و اكثر … و فد يوم كالي اريد احجيلج شي بس ماعرف منين افتح الموضوع .. كلتله كول حبيبي اي شي تريد احجي ..
كالي اني اريدج زوجه .. كيفت و طرت من الفرح حالي حال أي بنيه يكلها هيج حبيبها … و تغيرت طريقة حجينا و كمنا هواي نفكر للمستقبل و نحجي بأمور عادية على ارتباطنه … و طبعا هالحجي كله الوكت يمشي بس هو مخلي وقت حتى يمشي بسالفتنه … اني بعدني صغيرة و ما بيها شي اذا شوية يتأخر ارتباطي و هو هم مو كلش جبير و عفته براحته بس طلبت منه يحجي وي أمي … و الولد مقصر و عرفته على امي و كالها اني اريد البنية بس شوية عندي متعلقات … و انسدت السالفة بس الوكت يمشي … بيوم من الايام اني طالعه وياه و بنية صديقتي ويانه رحنا بشغلة بخصوص سالفة عائلة عدهم ظرف معين و رحنا نساعدهم … هناك يم البيت مال العائلة ورى مكملنه كلشي طلعنا برى بالسيارة صعدنا اني وصديقتي كعدنا و هو راح يجيب جكاير من محل قريب و عصائر اليا و لصديقتي لان جانت دنيا صيف … شغلنه التبريد و نزل … السيارة مشتغلة و كعدنا نسولف اني وصديقتي … الرجال ابو العائلة الي جان عدنا شغله يمهم طلع و اجه يحاجينه على فد موضوع و راد رقم معين … و تلفونه جان بالبيت .. كلتله دقيقه اكتبلك الرقم واني بوقتها مجنت شايلة قلم و صديقتي هم مشايلة قلم .. دورت بالسيارة ماكو لان ردت بسرعة اكتبله الرقم وهو كالي حروح اجيب من جوى و ماعرف شلون فتحت الجكمجه و شفت تلفون دورت ملكيت قلم .. هو دخل الرجال يجيب قلم اني كلبت التلفون لكيت مسويه على وضع صامت وجايته مكالمات و طبعا بداخلي كلت عادي هو وضعيته و شغله يجوز يطلب جهازين بس بكل فترة علاقتنه هو مجايبلي طاري .. بس ماعرف شلون شفت مداليا عليها اسمه و اسم ثاني .. طبعا المدالية ذهب و تتعلك بالسيارة … اني رأسا خفت و فوكاها صديقتي خلتني اشك اكثر و كالتلي سديها ترى اجه … سديتها و هو اجه صعد للسيارة بس اني والله العظيم ماعرف الشعور الي صار وياي .. مثل ردت اتقيء (مكرم القارئ) لان مادري اختنكت … و رأسا بين على وجهي .. هو اجه صعد انطاني العصير و انطى لصديقتي و رأسا صديقتي كالتله دقيقه لا تطلع لان بس ابو فلان راح يجيب قلم و يرجع لان يريد رقم فلان … اجه الرجال اخذ الرقم وطبعا جاب تلفونه سجل بي الرقم … و احنا رحنا بس اني لا حس ولا نفس .. وهو حس كالي بيج شي عمري .. كلتله لا …
و بس وصلنه للمكان نزلت صديقتي كلتله اكلك منو فلانه (طبعا فلانه الي اسمها بالمدالية ) كالي وانتي شعرفج بفلانه!!!!!
كلتله منو فلانه … كال اول شي كوليلي منين تعرفين فلانه حتى اجاوبج … كلتله هيج وهيج السالفة وجنت ادور على قلم .. اشو هاذا انكلب عليا ١٨٠ درجة … ليش تفتحين شي ميخصج و هالشي عيب و كام يحجي كلشي الا سالفة وحدة ميحجيها اسم فلانه ومنو فلانه …اني كمت ابجي طبعا لان شفته كلش تعصب وخفت .. كالي شوفي … اني احبج و رايدج و اتزوجج .. بس اكو شغلة لازم تعرفيها وصار وكتها و جتي منج مو مني .. لان اني هيج هيج ردت احجي هالشي … كلتله شنو ؟
كال اني متزوج بس شبه منفصل لان عندي مشاكل وي زوجتي و هي اصلا حاليا مو بالعراق بعمان يم بيت اهلها … اني من كالي هيج رأسا ربطت سفراته لعمان بحجة شغل .. كلتله يعني انته من جنت تروح لعمان بحجة عندك شغل و تغلق التلفون بحجة انته مشغول جنت تروحلها .. كال بصراحة مو اروحلها الها شخصيا بس اروح لأبني .. كلتله وفوكاها عندك جهال .. اكلك و رأسا نزلت من السيارة و رجعت لبيتنا و طبعا غلقت التلفون بس دك بجي بالبيت … هو الولد كام يحاول و اتصل بأختي و فوكاها اني احبه ياعالم ياناس احبه .. و رجعت احجي وياه وقنعت نفسي بسالفة هو شبه منفصل و صدكته مو لان هو صادق .. بس لان اني اريد اصدك لان احبه … و كالي اني شبه منفصل و من هالحجي و طبعا اني متاكدة اهلي ميقبلون بسالفة اخذ واحد متزوج ..  و حتى سالته زين ليش هي ماكو بالانترنت بموقعك كالي احنا ما عدنا بنات يسوون حسابات عالانترنت و زوجتي متحب هيج سوالف  ... و يوم يجر يوم و يوميا اسأله يكلي ماشي بالسالفة و اني راح انفصل .. و اني كمت ازيد ازيد ازيد من مطالبتي بالموضوع و اريد نهاية لهل السالفة .. اخر شي كالي سالفة انفصالي مترهم و عادي لا اني اول ولا اخر واحد ياخذ ثنين .. كمت ابجي و اضرب وجهي كباله قوي .. كلتله ليش تخلي شخص يتعلق بيك لهل الدرجة و بالاخير تطلع متزوج وتريد زوجه ثانية … كلتله ليش مكلت من الاول و ماخليتني احبك ليششششش .. ليش ما جيت وجه لوجه ما بيها شي و ببداية العلاقة كلت هالكلمتين جان من البداية انحلت السالفة .. زين انته شتريد اني اكلك شتريد .. انته ردتني اتعلق مثل ما هسه متعلقة بيك اكثر واكثر .. و حتى بالنهاية اوافق اكون زوجه ثانية .. وطبعا الي افتهمته اصلا زوجته من البداية عايشة وي اهلها بعمان .. و هو لا عنده مشاكل وياها ولا شي .. بس هي واهلها ميرجعون للعراق لان عدهم عيشتهم هناك و مستقرين .. و هو كل فترة يروح يبقى هناك و يرجع .. و من الاخير … اهلي مقبلو على هالسالفة و طبعا اني هم كشت نفسي منه … لان جذب كل فترة علاقتنه بس اني مو غبية الف و مليون غبية ما حسيت بهل الشي … و الوم نفسي هم لان اني الي اتصلت بي علمود شغل اول مرة …
و هسه هو عايش حياته كلش طبيعي و طبعا هو هم كالي خلص ننهي كلشي و فوكاها يريد يصير هو ابو الراهي يكلي اني جذبت لان حبيتج … و اني مردت شي غلط … اني ردتج زوجه ثانية ما بيها شي … زين اني لو ملاكيه المدالية و التلفون الثاني جان شكد بقى يجذب عليا شكد .. وليش مو حبيتك اني ليش ..
(ليش)
انتهى
اخوكم ابو بغداد سايق التكسي
#ابوـبغداد