قصص عراقية حقيقية بقلم ابو بغداد سائق التكسي

رائد عقارب

تعلمت من ابوية بذاك الوكت اصلح ساعات … ابوية جان يتعامل وي الساعة بهدوء كلش .. يعني الادوات الي يصلح بيها كلش معتز بيهم .. و كلش يخاف عليهم .. علمني شلون الزم الساعة و شلون اخلي العدسة بعيني و شلون اشوف العطل … و شلون اعالجه .. ابوية مجان عنده محل .. جان عنده مثل المعرض صغير … مكانه تحديدا ببغداد جديدة يم محلات الملابس .. جان الاسبوع كله يكعد هناك .. بس بيوم الجمعة ننزل اني وياه لباب الشرجي يم السوادنين اهل الساعات ياخذ اشياء منهم و اذا عنده ساعات زينة مشتريهم يبيعهم هناك … علمني عالاسعار وعلمني شلون بالضبط اشوف العطل .. و بديت اشتغل وياه .. المدرسة محبيتها ابد .. و جنت دائما ارسب … و يوميا ورى ما اخلص مدرسة ارجع للبيت اكل لكمة و اطلع اركب كوستر و اروح لأبوية .. حبيت السالفة و حبيت الشغلة … كمت اني اشتغل و عمري كبر و لحظة بلحظة وي ابوية .. جنت مرات اتخربط بأسعار الساعات بس لأن ابوية موجود حفظني بالضبط شلون انطي سعر للساعة .. اهل البسطيات القريبين من بسطيتنا ربطتني بيهم علاقات حلوة .. يعني صارو اصدقاء اليا اكثر من اصدقائي الي بالمنطقة .. لان وقتي كله هناك .. و طبعا طلعو عليا لقب رائد ابو العقارب … و بصراحة قليل يصيحولي رائد .. كله ابو العقارب .. و العقارب قصدهم على عقارب الساعة …
الشغلة جانت مطلعه مصرف البيت … بس بمرور الوكت شغلة الساعات اندثرت .. و خصوصا الساعات صارت رخيصة و طبعا ما احجي عالماركات لان الاغلبية يلبسون ساعات عادية شغل مو تمام … و اذا تعطل يذبوها و ياخذون غيرها … المعرض مال الساعات جنه نضمه يم ابو محل ملابس يوميا بليل قبل منعزل … ابوية من شاف الشغلة هيج كال اني مجمع مبلغ زين راح افتح اسواق بس بمنطقتنا .. احنا بيتنا جان بحي الخليج بذاك الوكت … فتح ابوية اسواق بس اني بقيت بنفس المكان الي ببغداد جديدة بس غيرت الشغل .. و طبعا دخلت شريك وي ولد بنفس بسطيته مال ملابس .. الولد صديقي .. بدينا نوسع الشغل و نجيب ملابس اكثر .. و فد يوم جتي بنية تشتغل بصالون عاملة .. البنية دورت عالبسطية مال ساعات لان شايفة قبل البسطية و كالولها عزلو بس الولد الي جان يصلح هذاك هناك عنده بسطية مال ملابس .. جتي عليا و طبعا الصالون ليكدام عن مكان شغلي .. البنية جتي وطلبت مني اصلحلها ساعة مال امها و كلش معتزة بيها لان امها متوفية و منطيتها هالساعة .. الساعة جانت قيمتها المادية مو شي .. بس قيمتها للبنية كلش جبيرة … اخذت الساعة و صلحتها بالبيت و ثاني يوم جتي اخذتها و رادت تدفعلي فلوس كلتلها والله ما اخذ اي فلس لان التصليح صار هوايه عندي .. و بطلت اصلح بفلوس … البنية حبابة جانت و خجلت كلش و هي من جابت الساعة كالت ترى اني اشتغل بالصالون الي هناك و شايفه العربانه قبل و دورت و سألت  …  المهم
من كلتلها ماريد فلوس كالت زين و راحت .. ثاني يوم جتي جايبتلي وياها جيس مال معجنات … كالت هاي بمكان فلوس التصليح .. الجيس بي كليجة و قطع ماعرف شسمها بيها جبن و كرفس .. وجان طعمهم كلش طيب … ماعرف ليش بذاك الوكت انعجبت بالبنية .. صديقي و شريكي كالي ها كله معجنات و ترتيبات عمي عيني باردة .. كلتله يابه صلحلتلها ساعة ومقبلت اخذ فلوس و انت مجنت موجود متكلي شبيك الا تحط انه بالموضوع ههههههه .. كال بس بيناتنا الحجي البنية حلوة … كلتله الله يستر عليها .. و بصراحة وراها ملتقيت بالبنية بس قررت اروح قريب من يم الصالون اتمشى … رحت مرة مرتين مشفتها لان هي جوى .. و فد يوم لكفتها بالشارع لحكتها و سلمت عليها .. البنية وكفت و سلمت عليا و كلتلها بيومها الساعة زينة هههههه معرفت شفتح موضوع وياها … كالت زينة تبوس ايدك و ضحكت .. كلتلها يعني متقدم لو تأخر .. كالت لا زينة هاك شوف .. جان ترفع ايدها من رفعت ايدها شفت زراك على ايدها .. كلتلها هاي شنو شبيها ايدج ؟؟؟
جان تجر الردن مال قميص بسرعة و غطت الزراك و كالت ماكو شي بس انضربت بالباب مال غرفتي … و سلمت عليا وراحت .. اني هم رجعت للبسطية .. بس تفكيري زاد بيها … و حجيت كلشي لصديقي و شريكي .. كالي لك ليش ملحكتها شفت وين ساكنة .. كلتله ماعرف .. كال خلص الحكها و حاول تحجي وياها بعد .. و كمت يوميا اروح اتمشى هناك .. و شفتها وهم وكفتها و حجيت وياها .. و كلتلها اكلج ترى اني يوميا كمت اجي هنا اتمشى علمودج .. كالت علمودي !!! ..
كلتلها اي والله اريد اعرفج اكثر عادي ؟؟
كالت ليش ؟؟؟ كلتلها يعني والله ماعندي اي سوء تجاهج بس عاجبني اتعرف عليج اكثر .. كالت شوف اني يوميا بفلان وكت اخلص شغل و عادي نحجي … رجعت مكيف كلش لان عرفت وقت نهاية شغلها و هي مجان عدها اي اعتراض علمود نتعرف اكثر .. و كمت يوميا التقي بيها و نطلع نتمشى ببغداد جديدة .. ومرات نكعد بمطعم ناكل شي .. البنية حياتها مأساة .. و جانت من تحجيلي تبجي .. هي عايشة ببيت خالتها بعد وفاة امها .. و خالتها كلش فقيرة و ميصير عدها اطفال .. بس رجلها كلش حقير و سخيف و تافه .. الزراك الي جان بيدها .. بسببه هو .. طبعا هو يضرب خالتها دائما و هي مرة رادت تجر خالتها وهو ضاربها بيدها قوي .. و خطية همه نسوان ثنين يخافون من عنده كلش .. وهي ماعدها احد بهل الدنيا غير خالتها .. لان ابوها هم متوفي المسكينة يعني يتيمة .. الي افتهمته انو ابوها وامها الله يرحمهم متزوجين على كبر .. يعني ثنينهم اعمارهم جبيرة و تزوجو .. الاب مات بجلطة .. و الام وراه بكم سنة توفت وفاة طبيعية تكول الصبح رحت اكعدها حتى نتريك لكيتها لا حس ولا نفس .. و وراها مكدرت تبقى وحدها و اصلا همه بيتهم ايجار و هي من وقت ما امها عايشة جانت تشتغل بالصالونات .. تكول جنت اكدر ادفع ايجار البيت وابقى وحدي بس خفت من الوحدة كلش و رحت يم خالتي عشت لان هي ميصير عدها اطفال .. من حجتلي هيج حبيتها اكثر .. و تمسكت بيها .. تكول رجل خالتي ياخذ نص الفلوس الي اشتغل بيها هنا .. و النص الباقي اجمعة .. اريد افتح صالون لوحدي .. كلتلها زين و ورى عدة لقائات اعترفتلها بحبي ..
و هي هم حبتني .. و بدينا نفكر للمستقبل …. هي بيت خالتها بالالف دار .. رجل خالتها طلع سكير و حقير كلش .. و المنطقة كلها تكرهه .. كلتلها اريد اخطبج و طبعا حاجيت امي وابوية كلش انقهرو عليها وكالو تزوجها و حرامات تضيعها من ايدك هاليتيمة .. حاجت خالتها و حاجت رجلها و السافل صار شريف براسها .. منين عرفتي و شلون حجيتي وياه و احلى شي تكول كالي مو من مستوانه الاجتماعي .. اني معلقت عالحجي لان اريد اخطبها وماريد مشاكل … بس هو السافل اجاني للبسطية و طبعا هي شارحة كلشي لخالتها و خالتها من الخوف حاجيتله كلشي .. اجاني للبسطية يكلي شنو تروح تحاجيها من ورانا .. اني جنت محترم وياه لابعد الحدود و شريكي كل شوية يريد يحجي واني اسكته .. كلتله خالي اني طلبت منها تاخذلي موعد حتى اجيب الوالد ونجيكم .. اشو هذا كام يشمر بالحجي يمنى يسرى .. اخر شي كلتله توكل بالله .. كال شنو تطردني الشارع ملك الحكومة .. اني ضحكت من كال ملك الحكومة يذكرني من جنا جهال و واحد يكلنا روح منا نكله واكفين بملك الحكومة .. اخر شي تقربت عليه كلتله شوف .. اول شي البنية عمرها فوك العشرين واني عمري ٢٨ … و هي مو بنتك وانت مجرد رجل خالتها وترى الي دنسوي من باب التقاليد وبس .. البنية اتزوجها اتزوجها .. اني هالحجي واكف بصفه اشو هذا كبل اني وداحجي ضربني .. صديقي هجم عليه و طبعا اني اكدر اضربه بس خفت لا يأذي خالة البنية و يجوز يأذي البنية نفسها .. جريت صاحبي و طبعا صاحبي طرحه طرح .. كام يهدد و الناس التمت .. وجوي الشرطة اخذونا لمركز الرشاد .. حاجيت صاحبي كلتله ديربالك تجيب طاري البنية كبال الشرطة كول مشاجرة و خلص ….. ضابط التحقيق سالنا شنو السبب .. و هو انفتح كبال الضابط و طبعا الضابط يعرفه لان مو اول مرة يشيلوه الشرطة .. هو كام يحجي كال للضابط كلشي و كاله اني علساس مقشمر عالبنية و هو رجل خالتها و ميقبل واحد غريب يحجي وي البنية و علساس اجه يحجي وياي بأسلوب واني غلطت عليه …سالني الضابط حجيتله كلشي .. كالي ونعمه النسب تريد تناسب هذا .. اني متحملت حجاية الضابط كلتله اذا هو مو زين بنت اخت زوجته شعليها … جان يكلي طبك مرض لعد انته وياه و دخلونا للسجن ظلم لان ببساطة ضاج السيد الضابط من شافني دافعت عالبنية …. مع العلم هو يعرف رجل خاله البنية مو زين .. بس لان حجيت هو تضايق .. عالعموم طلعنا بفلوس و ابوية بوقتها كال والله العظيم مدام هيج السالفة الا ازوجكياها غصبا ما عليه للسخيف .. و تواعدت وياها وجبتها لبيتنا ..
ابوية حاجها كالها بنتي هذا رجل خالتج مكيف على كم فلس الي ياخذهم منج و من الاخير كل الي سواه حتى تخرب سالفتج وي رائد .. تحبين رائد انتي و مقتنعه تصيرين وحدة من عدنا هسه اوديكم اعقدلكم والله .. وانتي جبيرة وهو جبير .. امي هم حاجتها كامت تبجي البنية و خافت على خالتها .. امي كامت تبجي هم انقهرت عليها .. من الاخير عقدت عليها و تزوجتها بدون مناخذ حتى رأيه .. والمرية صارت عرضي .. و رحنا لبيتهم لكيناه هناك و طبعا وياي ابوية و خوالي ثنين .. خوالي ضخام كلش .. كالوله شوف … البنية صارت بتنا و تزوجها رائد .. و عرضنا واحنا ناس عشاير .. كلمة زايدة كلمة ناقصة .. تضرب خالتها و توصلنا حجاية .. نعدمك و ناخذك جثه نذبك بحديقة بيتنا .. بحجة انت دايس بيتنا و جاي تهددنا وتعرف القانون شيكول اذا واحد جاي بأرض مو ارضه يسرق لو يهدد لو اي شي .. هو كام يطكطك من هالحجي و لا عبالك ذاك الي اجه للبسطية يشمر بالحجي و يغلط .. وراها كمت كل اسبوعين اخذ زوجتي ونروح نشوف خالتها هههه طبعا تكول تغير مية وثمانين درجة و كل مرة يكلي اتصلي بالبنية شوفي اخاف محتاجه شي ههههه خالتها تكله منك من الشيطان صاير تراعي صلة الرحم ههههه .. و طبعا هالحجي كله قديم .. حاليا اني اب لاربع جهال .. و عندي محل ملابس بالشهداء .. و العيشة ما اكول زنكين ولا اكول فقير بس خير ونعمة عايشين و مرتاحين .. و بصراحة رجل خالتها بطل شرب و كام يمشي بصف الحايط مو بسببي بسبب المرض .. وخالة البنية تجينا دائما و مرات اني اروح اجيبها .. و هاي عايشين ومناقصنا شي .. بالمناسبة … مرات زوجتي تجي تبوس راسي بدون سابق انذار .. تكلي لك احبك والله كل ما اصفن بيني و بين نفسي و اتذكر ايام قبل .. اخاف شلون جان انتهى بيا الوكت .. و انت تعرف خصوصا اكو سمعة بذاك الوكت على البنات الي يشتغلون بصالونات .. انت ماهمك شي و حتى مهتميت من شفت رجل خالتي سكير و شخصيته زفت .. فدوه اروحلك والله احبك .. اني ارجع اجاوبها .. لج بنتي انتي من اول منولدتي جنتي اليا و ما اتخيل حياتي اني هم بدونج .. احبج يا شريكة عمري ..
(رائد عقارب)
انتهى
اخوكم
ابو بغداد سايق التكسي
#ابوـبغداد