ဗီလိန်ဖေဖေကို ဖြောင့်မတ်မှန်ကန်လာအောင် ပြုပြင်ပေးခြင်း( မြန်မာဘာသာပြန် )

Chapter 109 : မကျေနပ်ချက်အသစ်များ (၁)

Chapter 109 : မကျေနပ်ချက်အသစ်များ (၁)

ကလေးများသည် သိမ်မွေ့စိတ် ရှိကြ၍ သူတို့ပတ်ဝန်းကျင်တွင်ဖြစ်ပေါ်နေသော မည်သည့်စိတ်ပိုင်းဆိုင်ရာပြောင်းလဲမှုကိုမဆို ခံစားသိရှိနိုင်သည်။ သူတို့ပတ်ဝန်းကျင်မှ လူများက သူတို့ကို သဘောကျသည်၊ သဘောမကျသည်ကို သိသိသာသာ သိမြင်နိုင်စွမ်းရှိကြသည်။

ယီချန်းသည် ဟော်ဆွေ့ချန်းမှာ သူ့ကို မြင်ပြီးကတည်းက သူ့ကို သဘောမကျဘူးလို့ ခံစားနေရသည်။

သူ သူ့အမေ၏စကားများကို သတိရမိသည်။ " သား သူများအိမ်ကို ရောက်တဲ့အခါ သူတို့စည်းကမ်းတွေကို လိုက်နာရမယ်၊ သားက ကလေးတစ်ယောက်ဖြစ်လို့ဆိုပြီး ပြဿနာတွေလိုက်မရှာရဘူး. . . လူကြီးတွေက ဆိုးသွမ်းတဲ့ကလေးတွေကို သဘောမကျဘူး . . . လူကြီးတစ်ယောက်က သားကို သဘောမကျရင် သားက သူ မကြိုက်တာ တစ်ခုခုကိုလုပ်ထားပြီး သူ့ကို ဒေါသထွက်နေစေလို့ပဲ " 

ထို့ကြောင့် ယီချန်းသည် သူ့ညစာကို စားပွဲပေါ်တွင် တိတ်တဆိတ်သာ စားနေခဲ့သည်။ သူ့ရှေ့က ဟင်းလျာနှစ်ခုကိုသာ စားပြီး ဟော်ဆွေ့ချန်းရှေ့ရှိ ဘယ်အရာကိုမှ သူ့တူလေးက သွားမထိရဲပေ။

ဟော်ဆွေ့ချန်းရှေ့တွင် သူ့အကြိုက်ဆုံး  ဝက်သားနံရိုးပေါင်း ရှိနေခဲ့လျှင်တောင်မှပေါ့!

ယီချန်း အများကြီးမစားတာကို သတိပြုမိပြီး ဟော်သခင်ကြီးသည် သူ့အား နူးညံ့သော ငါးဗိုက်သားကို ပေးလိုက်သည် " ယီချန်း၊ ဒါဘိုးဘိုးရဲ့အိမ်ပဲ. . . အရမ်းယဉ်ကျေးနေစရာမလိုပါဘူး၊ မင်း စားချင်တာကို စားပါ "

" ကျေးဇူးတင်ပါတယ် ဘိုးဘိုးဟော် "

ဟော်ဆွေ့ချန်းတစ်ယောက် သူ့ရှေ့တွင် ရှိနေသော ဝက်နံရိုးများကို တူဖြင့် ညှပ်နေသည်အား ဟော်ရှောင်းရှောင်း မြင်လိုက်ရသည်။ ဟော်ဆွေ့ချန်းတူက မထိရသေးခင် ဟော်ရှောင်းရှောင်းသည် နံရိုးများကို အလျင်အမြန်ကောက်လိုက်ပြီး ယီချန်းပန်းကန်ထဲသို့ ထည့်ပေးလိုက်သည်။

" ယီချန်း ဝက်နံရိုးတွေစားလေ. . . အန်တီလုပ်ထားတဲ့ နံရိုးတွေက အရသာရှိတယ် ”