#عُقد_البنات
البارت الثالث
للكاتبة لبنى الموسوي
هيَّ جزء من الثانية مو أكثر
انسلبت بيها مني الأرادة وفقدت الأدراك تماماً
شنو صار و وين اني ما ادري.. وعيت على صوت آمنة تضرب على خدي بـ خفة وتتعوذ من الشيطان الرجيم
رفعت راسي من الوجع ما اگدر اشوف بـ عيوني بعد
لزمت زندي بـ إيدها الترجف شصار ولچ
هزيت بـ راسي ما ادري
سندتني للمغاسل غسلت وجهي وإيدي ورجعتني للغرفة
گعدت ع السرير الهوى رافض يدخل الـ صدري
أشرت الها ع البردة
افتهمت وفتحت الشباك عافتني اهدأ ربع ساعة وگعدت يمي ها قمورة شكو ترى بديت أخاف والله
- ما ادري
- شلون يعني متدرين انتِ مستوعبة شصار لو لا
- لا
- وگعتي من السرير عبالك واحد دفعچ حلمتي لو شنو
- يمكن حلمت ويمكن اكو شي صار بالفعل والله ما ادري
- زين دتتذكرين هالحلم
- اي
- احچي لعد
- سولفت الها كل شي گبل گمزت من يمي خايفة
- عزة صدگ تحچين بس لا جني
- جني شنو يمعودة لتصيرين مدري شلونچ
- لعد شنو هذا كلامچ خل نگول اللمسات والنفس حلم بس الوگعة القوية الوگعتيها شنو تفسيرها هااا
- عادي مو اكو يمشون وهمَ نايمين اني وگعت بنومي
- لا لا والله هذا جني ولازم من الصبح نبلغ أمي
- ديري بالچ آمنة ديري باااالچ
- عزة ولچ من كل عقلچ اني حتى نوم ما اگدر انام بعد بـ هالغرفة شلون گلب قوي عليچ راح تخبليني والله
- لتلغين لغوة زايدة لو تنامين وانتِ منچبة
لو فوتي اطلعي برة شوفيلچ مكان ثاني انخمدي بيه
واذا افتهمت گايله العمتي ع الشي الصار ازعل عليچ
- لا يلا راح أنام هنا بس عفية خلي البردة مفتوحة
- براحتچ
- سحبت البردة فتحتها وتمددت تباوع علية
- نامي يمعودة حلم والله وين اكو جني يلعب مصارعة
- راح اسوي روحي مصدگة
بس والله اذا رجعتي وگعتي اعوفچ واطلع هالمرة حتى لو اشوفچ تموتين گدامي.. الـ من إيده الله يزيده
- خوش أخت بارك الله بيچ
- هذا جني مو لعبة يعني يا روح ما بعدچ روح حبيبتي
- دنامي وكافي لغوة مو ورانا دوام
- نمت يلا
- درت وجهي ع الحايط احاول اجبر نفسي على النوم
ساعة واني مغمضة بس بدون نتيجة
باوعت الآمنة نامت
كفيت الغطى وگمت طلعت للصالة تمددت ع الكرويت
نامي عطاء نامي شـ يگعدچ الصبح
غمضت حيل
ليش صار وياية كل هذا ؟!! ليش أخسر كل شي قبل لا امتلكه.. شسويت حتى استاهل كل هالأذية !!!
گمت من مكاني اباوع داير مدايري وإيدي على صدري
صارت عيوني على غرفة ناصر
مشيت بـ اتجاها لزمت يدة الباب ترددت ادخل رغم ما اكو واحد يعتبها غيري حتى مفتاحها مأمنه عندي
أنت تقرأ
عقد البنات
Historische Romaneلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
