عقد البنات

البارت 80

#عقد_البنات
البارت الثمانون
للكاتبة لبنى الموسوي

لتنسوون (التصويت + التفاعل) حتى يتنشط الحساب فضلاً وليس امراً حبايب قلبي .
متابعة ممتعة 💛

كُلّ إتِجاهتي تؤدي إليكِ كـ مُسلمٍ يَنوي الصَلاةَ في حَرمِ مَكة ، حَيْثُما يَلتفتْ قِبلتهُ واحدة . ✍🏻
__________

عطاء.. أبو حيدرا تعرف كلش زين مستحيل أوافق على مقترحك هذا وكلمتك على عيني وراسي من فوگ بس احچي بالمعقول ، أتصور وصلتلك الفكرة

ناصر.. لا ما وصلت والماضي راح بعد من احچي وتجين تعترضين واظل أخذ وانطي وياچ هذا ولى اليوم منچ ما أسمع كلمة كافي خل امشيكم اني على مزاجي خسرنا هواي مو مال نخسر أكثر

عطاء.. گلت ما اجي

ناصر.. بطلي عناد كبرتي وبعدچ على نفس الطبع

عطاء.. ناصرررر

ناصر.. استغفر الله العظيم واتوب إليه

- فرك وجهه بـ عصبية وتقرب منها كلش صار يمها تكلم بـ همس بس لأن اني واگفة بصفها سمعت الحديث الدار بينه وبينها

ناصر.. اني مو حبيب هايم بحبيبته ويريدها تظل أربعة وعشرين ساعة گدام أنظاره ، لا أم رحيل غلطانة

اني أب مسؤول عن بنته الرباها على إيده وصار حضنه الها بيت دافي وگلبه وطن آمن واني أكثر شخص يعرف شنو يصير بـ الإنسان من يتغرب عن بيته ويهجر وطنه

اني أخ شايل بـ گصته غيرة على أخيته الوحيدة ومو رجال اليترك أخته بالعوز وهوَ متنعم بخير رب العالمين

والأهم من كل هذا اني أهل وتعرفين حواء لو يتجاوز عمرها العمرين والدمع يترس الگلب قبل العين همْ تظل بحاجة لأهلها لأن مالها غيرهم سند بالحياة خصوصاً من يكون رجالها نذل وخسيس مثل مروان

ديلا يا عيني جهزي نفسچ وخلينا نتوكل تعبت هواي اليوم وعندي شغل مهم بعدني مـ مخلصة

عطاء.. ما اگدر ناصر قدر وضعي زوجتك شتگول لو...

ناصر.. لتكملين أم حيدرا متتمنى شي غير شوفتچ

عطاء.. عندي بنات وانتَ بيتك متروس زلم..

ناصر.. أفا عليچ ولدي ذولة تربيتي تشوفيهم تشوفيني

عطاء.. والنعم منك ومن ولدك بس والله..

ناصر.. لا بس ولا شي گعدتكم يمنا مؤقتة البيت الاني مستأجرة بيه مشتمل اله بابين داخلي وخارجي فـ أجرته كامل حتى ليجي واحد يگعد بيه ويتسلط على أهلي يومين مو أكثر أجهزه ألكم وتاخذون راحتكم بيه بين ميكمل المشروع الـ براسي ونستقر سوى

عطاء.. يا مشروع هذا ؟!!

ناصر.. بعدين تعرفين يلا جعت شلون اليوم مـ تغذيني ما عرفتچ هيچ بخيلة