عقد البنات

البارت الأخير (النهاية)

#عقد_البنات
الجزء الثاني من البارت الأخير ( النهاية ) ..
للكاتبة لبنى الموسوي

لبوةٌ أنا .. أهدتني الحياةُ لذئبٍ ماكر
فَـ بدأت الحكاية ..
من قلبِ السعادة إنتشلوني
ولذاكَ الماكر أهدوني
غابت عن وجهي الضحكات
سرقوا من نايي النغمات
فَشلت أن توصفَ آلامي
لُغتي
حُنجرتي
أرقامي
عَجزت أن تشرحَ أوجاعي ما نزلت في اللغة من كلمات
غابت عن ليلي أقماري
كسروا ضِلعَيَ بِـ مِسامري
جفت في جوفي أنهاري
زرعوا في شرياني الأبهر أهاتًا ليست كَـ الأهات
حصدوا من رحمي الفتيات
والآن ..
بدأت يا ساداتي معكم أقسى أنواع الروايات
في نجمتي الأولى قتلوني
في الثانية جدًا آذوني
في الثالثة مرضًا أهدوني
في الرابعة قوة أعطوني لم تكسرَ مجدافيها الروجات
عقدٌ ألبستُ صَغيراتي
والماضي يُمحىٰ بالآتي
عوضي فيهنَّ نَجماتي
ما زلنَّ يُطوقنَّ حياتي كما يُطوقُ عُنقهنَّ عقد البنات .
_________

- شبيچ انتِ تخبلتِ ؟!! امشي يلا اطلعي برررررررررة

- هههههه ليش انتَ متصور دخول الحمام مثل خروجه

- شگد ناقصة واني من كل عقلي بنتي گلبها على گلب أبوها نسيت انتِ تربيت الـ **** عطاء

- اشششش إياك ثم إياك ثم إيااااااك تجيب سيرة أمي بالسوء ساعتها والله افرغ هالتيزاب بنص حلگك القذر

مررت إيدي على شعره اضحك : اي بلا شنو گلت عيد عبالك اني گلبي على گلب ابوية ، صدگ هوَ منو أبوية شو ما أتذكر عندي أب فتحت عيني ؏ الدنيا بس أمي فوگ راسي لا لا صحيح كلامك حسب ما أذكر كان اكو واحد عار للنخاع يجي بين فترة والثانية يضرب ويبيع ويشتري بينا ويگول هااا يگول اني أبوكم !!!

- انتِ شنو تردين منو المسلطچ عليَّ ؟!! ناصر العار مو

- دموع أمي ونار گلبها على مدار أكثر من ثلاثين سنة سلطوني عليك ..

وجع عشق ومرضها ولوعتها على ابنها بعدما بعته للعار الثاني واستلمت ثمنه سلطوني عليك ..

السنين الضاعت من عمر نبض وهيَّ تتوسل بالهوا يدخل لرئتها وتبوس الإيادي حتى بس نريحها من عذابها ونلگى علاج لمرضها سلطوني عليك ..

الأيام الما گدر نظر يغمض عيونه بيها وهوَ يتذكر الكلام القذر الزرعته بعقله بحق أقرب الناس اله أمه الربته وفنت عمرها علموده وهوَ مو بزر بطنها وخاله المعتبره مثل أبوه ويشوفه اعظم رجال بعيونه واجيت بالنهاية تشوه صورتهم براسه سلطوني عليك ..

هه تذكر من حطيت الأشياء القذرة مثل قذارتك بجنطة المدرسة حتى تلوث سمعتي ويجي بلال مثل البطل اللي بالقصص والحكايات على حصانه الأبيض ينقذ البنية الفقيرة من ضياعها وبالنهاية تنعجب بيه وتتزوجه حتى أبوها يقبض ثمن هالزواج اي اي هنا بالتحديد ورد تحولت غير ورد وسلطني رب العالمين عليك ..