عقد البنات

البارت 5

#عُقد_البنات
البارت الخامس
للكاتبة لبنى الموسوي

نايمة بالفراش وعيوني تتنقل بين زوايا الغرفة
لو بـ إيدي ما اتحرك من مكاني
لو يطلع بـ إيدي اوگف الزمن عند هاللحظة حتى لو كان بيها موتي ولا اصير على أسم واحد مثل مروان

مسحت على صدري بـ هدوء ليش بعدك تنبض
ليش مدتوگف
على شنو مُصر تعيش بحياة رافضة وجودك بيها حياة متنطي الفرص إلا للناس المتجردين من إنسانيتهم

رميت الغطا مني وسحبت نفسي للحايط عدلت گعدتي
صارت عيوني ع الحلقة
مررت أصبعي عليها احسها قفل يقيد حريتي ومفتاحه ضاع ببحر أعمق من الحيرة الأني بيها حالياً

نزعتها اباوع عليها نزلت دموعي بـ غصة
انفتحت الباب ولأن بالي كان شارد وگعت مني بالأرض حتى ما اهتميت اشوفها وين
التفتت بـ تعب آمنة صافنة عليَّ هزيت راسي ها شبيچ

- هوَ مو المفروض اليوم أفرح لأن عرس أخوية
- المفروض
- شلون يعني أفرح وأختي دتنذبح گدامي بسكين أعمى

- الله ليعيشچ الوجع الگاعد اعيش بيه بـ هاللحظات

بس حچيتها اجت تركض حضنتني وصارت تبچي
من گد ما كابرت ساعتها
الغصة ترست صدري و دموعي تحولت الى تيزاب كل قطرة منها تقطع شريان من شرايين گلبي المغلوب على أمره

- بعدت عني تمسح بـ دموعها احچي حبابة احچي
فوتي اطلعي الـ ناصر وخربي هالزواجة
صح راح تصير مشاكل
وصح هالبيت ينهد على روسنا
بس ميخالف كل شي يهون ولا تنذبحين بـ سكوتچ هذا

- يا ريت لو اگدر يا ريت آمنة يا ريت

- اي ليييييش
ليش غير افتهم ليش والله حرام عليچ
انتِ مو بس دتظلمين نفسچ حتى ناصر ظلمتي وياچ

ولچ ما نام تدرين شنو يعني ما نام
الليل كله يلوب
مثل الطير الماخذين منه عشه وما عنده مكان يحتمي بيه من النار الگاعد تاكل بـ گلبه قبل جسمه

ارحميه وارحمي نفسچ من هالعذاب
روحي خلي إيدچ بـ إيده وطززززززز بالكل
شيريد يصير خل يصير المهم هوَ بـ ظهرچ وانتِ بگلبه الغير هالشي لتهتمون

- وخري خليني اگوم تأخرت هسه خالتي تحچي عليَّ
- قمر
- ماكو قمر بعد اني من اليوم عطاء

- عساچ بالنار والله ولا انقهر عليچ بعد
كل شي ديصير وراح يصير وياچ من إيدچ وتستاهليه

- دوري حلقتي مدري وين وگعت معندي مجال اشوفها

حچيتها وطلعت اسمعها تصيح وراية راح تندمين والله راح تندمين وگولي آمنة گالت

اكتفيت بالسكوت وكملت طريقي
دخلت للصالة البيت مخبوص خبص بالنسوان
ظليت ادور على خالتي لگيتها تغسل بالحمامات وگفت بالباب وسندت نفسي ع الحايط الله يساعدچ خالة