#عُقد_البنات
البارت الرابع والثلاثون
للكاتبة لبنى الموسوي
فزيت من مكاني مرعوبة لا يربي كل شي ولا الحمل
صرت أروح وأرجع بالغرفة بـ جنون
شگد چان الجو بارد بس الحرارة صارت تطلع من إذني
نزلت إيدي لزمت بطني حتى اتأكد
بيها قوة ومنفوخة
يعني إذا حامل فالمفروض هسه أقل شي نهاية الثالث
اختنگت مگدرت اظل بـ مكاني
فتحت باب الغرفة بـ هدوء وطلعت للصالة
سحبت البردة فتحت الشباك گعدت مقابيله ع الكرسي
گاعدة وافكر معقولة اني مريضة
أي وإلا شلون يصير الحمل والشهرية دتجيني مسامعة هيچ شي من قبل وبالحالتين مصيبتي چبيرة
رفعت راسي ع السما دخيلك يا إلهي ساعدني
إذا أحمل ما اگدر أشيل حمل جديد
وإذا مريضة انتَ أعلم بـ وضعي يا دوب أطلع لگمة أسد بيها جوع بناتي فـ شلون بعد أعالج نفسي من المرض
التفكير أكل راسي للصبح واني على نفس الگعدة
صارت السبعة گعدت البنات ريگتهن وطلعت البيت أبو وسام
طرقت الباب طلع هوَ من المحل فتحها
صار متعود ياخذهن من الباب وأروح ما انتظرها تطلع
بس هالمرة گلت له محتاجة خالة بـ موضوع
رد تأمرين بابا
دخل صاحها طلعت تركض هلا بنيتي هلا تفضلي جوة
- أي يا ريت والله لأن محتاجة أحچي وياچ على أنفراد
- تتدللين يمة
دخلت وياها للإستقبال شعلت الضويات وطلعت تركض
أخذت البنات الـ غرفة أحفادها
ثواني ورجعت سدت الباب مبتسمة أي يلا سولفي أسمع
- مصيبة خالة
حتى ما أدري شلون أفتح الموضوع ومنين أبدي وياچ
- يا ستار يا رب شكو وگعتي گلبي مروان رجع عليچ ؟!
- لا خالة إذا على هاي هينة السالفة
- شكو لعد
- اگول همْ سامعة وحدة تحبل وتظل الـ شهرية تجيها
- أي مرت حماية الله يذكرها بالخير هيچ چانت تحبل والشهرية عليها للرابع يلا تنگطع وبكل جهالها
- عزة الـ عزاني ان شاء الله گولي غيرها خالة فدوة
- حامل ولچ !!!
- إذا على كلامچ أي حامل وراح ادخل الرابع إذا مدخلت
- شو دگومي خل اشوف
حچتها وسحبتني من إيدي تباوع البطني والله شكلچ حامل هاي وينها بطنچ مبينة شلون منتبهتي
- إنتبهت خالة إنتبهت
بس شنو مو إجتني الشهرية ما اهتميت
گلت يجوز متخربطة الهرمونات بسبب حالتي النفسية
مچنت ادري يصير الحمل حتى لو تجي هسه منچ عود عرفت بالسالفة لأن البارحة تحرك بـ بطني فـ شكيت
- يا يمة هاي سالفة منچ أكو وحدة تحبل ومتدري وين صايرة غير تنتبهين على روحچ
- خالة مو شرحتلچ صدگ تحچين ؟!!
هسه دعوفي كل شي وحاچيني شسوي شنو الحل اني ما أريد هالطفل ما أريده
أنت تقرأ
عقد البنات
Historical Fictionلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
